Калядам па-беларуску прысвячаецца...

[bulbaed]

Памежныя елкі завальвае снег,

Памежнік прымёрз да прыкладу.

Ды раптам аўчаркі прастуджаны брэх:

Святы Мікалай ізноў, як на грэх,

Вязе кантрабандай Каляды!

Цемру ірве на шматкі кулямёт,

Сірэнамі выюць вышкі…

Ашчэрвае іклы калючы дрот:

Няма загаду на Новы год!

Табе, парушальнік - крышка!

Усмешка хаваецца ў бель барады:

Калядам стварыць перашкоду?

Імчыць ён праз кулі і праз гады

У край, дзе вёскі і гарады

Чакаюць яго прыходу.

І вось ён прыйшоў, каб сабраць камяні

І хібы грамадскага ладу,

Прывёз гірляндаў і свечак агні,

Бялюткай, зіхоткай, як снег, чысціні,

Старога віна хмяльной цеплыні…

Прывёз кантрабандай Каляды!