Dec 16, 2010 10:59
عثمان خان مرحوم باباسی طریقنه سلوك ایدوب سردار رومیان و میدان غزاده دامن در میان اولدی و علما و مشایخه مزید اعتقادی اولمغله اول زمانك اهل حالی صاحب مقام عالی شیخ ادهبالی خدمتنه علی التوالی مراجعت و استدعای دعا و همت ایلمكدن خالی دكل ایدی اتفاقا بر كیجه عادت مألوفهسی اوزره جناب وهابه و دركاه رب الاربابه مناجات و عرض حاجات ایدركن كندویه نوم غلبه ایدوب عالم رؤیاده كورر كه شیخ ادهبالینك قوینندن بر آی طوغر كلور كندو قویننه كیرر و كوبكندن بر شجر منتها بتر و اول شجرك دالی و بوداغی بتون دنیایی احاطه ایدر و خلق عالم كمی بوستان صوارر و كمی زراعت ایدر كمی سیرانجی كمی تماشاجی عثمان غازی خوابدن بیدار اولدقده صبح نمازینی ادا ایدوب شیخ حضرتلرینك حضرتلرینه وارر كوردیكی واقعهیی بربر تقریر ایدوب تعبیرینی التماس ایلجك شیخ ادهبالی برآز مراقبهیه واروب بعده باش قالدیروب عثمان غازییه دیر كه ای یكیت بشارت اولسون سكا و سنك نسلكه پادشاهلق ویرلدی اول آی كه دوشكده كوردك قوینمدن چیقدی سنك قوینكه كیردی سن بنم قزمی آلوب بكا داماد اولهجقسین اندن اولاد و انسابك اولوب الی انقراض الدوران یدی اقلیمه حكم ایدهجكلردر دیوب درحال مسلمین حضورنده كریمهسی رابعهیی عثمان خان غازییه عقد نكاح ایدوب اورخان غازی اندن وجوده كلمشدر
ottoman empire,
ottoman language