Հմուտ կառավարիչն ու տրամաբանությունը
Մեր քաղաքապետին գովազդելուց, ինչպես երևի հիշում եք, նկարագրում էին որպես հմուտ կառավարիչ։
Ըստ իս, հմուտ կառավարումը ենթադրում է կառավարողի կողմից արվող քայլերի որոշակի տրամաբանություն։ Սակայն քաղաքապետի վերջին «մանկապարտեզային» արկածախնդրությունը լուրջ կասկածներ է հարուցում գոնե տարրական տրամաբանական հմտություններին տիրապետելուն...
Ինչպես գիտեք, «առավոտյան խցանումների դեմ պայքարի» պատրվակով, քաղաքապետի բանավոր հրամանի հիման վրա «Կենտրոն» համայնքի մանկապարտեզներում արգելվում է ժամը 8:30-ից հետո երեխա ընդունել։ Եւ սա այն դեպքում, որ կան ծնողների հետ կնքված պայմանագրեր, որոնցում նշված է 9:30-ը։
Քաղաքապետի այդ որոշման ջատագովները պնդում են, որ քաղաքապետը փորձում է մեր «անկարգ» ժողովրդին կարգ ու կանոն սովորեցնել։
Անտրամաբանական է։
Նախ՝ եթե կան պայմանագրեր, ապա իր բանավոր հրահանգը որևէ օրինական ուժ չունի։
Երկրորդը՝ միակողմանի ձևով պայմանագրի պայմանները փոխելը հանդիսանում է օրենքի՝ ըստ այդմ նաև կարգ ու կանոնի կոպիտ խախտում։ Հենց այն կարգ ու կանոնի, որն իբր փորձում է հաստատել «հմուտ կառավարիչ» Կարեն Կարապետյանը։
Էլ չասենք այն մասին, որ քաղաքապետի իրավասության մեջ չի մտնում որոշելը, թե քաղաքացիները երբ պիտի արթնանան։
* * *
Վերջերս արդեն հիշատակել էի նոր քաղաքապետի՝ «կարգ ու կանոն հաստատելու» տեսանկյունից անտրամաբանական մեկ այլ գործողությունը։ Երեսպաշտություն է մեղադրել ժողովրդին, թե օրենք չենք հարգում, քանզի հենց այսպիսի «հմուտ կառավարիչներն» են իրենց գործողություններով սերմանում օրենքի նկատմամբ արհամարհանքը ժողովրդի մեջ։
Ընկերանալ Ֆշտուկ