Питіе́ мно́гое и упита́ніе суть сви́нское житіе́!

Mar 26, 2016 20:27


               Непости́вшихся же (израильтянъ), Господь не пощадѣ́. Глаго́ла бо и́мъ Моисе́й о́тъ Бога: пости́теся четы́редесять дне́й. Они́ же то́кмо два́десять дне́й пости́вшеся, сѣдо́ша я́сти и пи́ти: и пріи́де на ня́ гнѣ́въ Бо́жій, и изомро́ша злѣ́ два́десять и двѣ́ ты́сящи; а про́чихъ о́гнь сожже́, невоздержа́нія и́хъ ра́ди.
              Ка́я же по́льза на́мъ бу́детъ, е́же недѣ́лю то́кмо пости́вшеся, и па́ки тѣ́лу угожда́ти и непра́вды дѣ́яти? Но молю́ вы, не прельща́йтеся, ви́дяще нѣ́кіихъ въ безстра́шіи живу́щихъ и о души́ непеку́щихся: тíи бо не Бо́гу раби́ су́ть, но чре́ву, и́мже коне́цъ - па́губа и сме́рть е́сть, а по сме́рти - му́ка вѣ́чная.
   
        О, бра́тіе, молю́ вы́, я́коже отъ пе́рваго дне́ нача́сте пости́тися, та́ко и до Воскресе́нія Христо́ва сотвори́те. Но никого́же ва́съ понужда́ю чрезъ си́лу пости́тися, но ко́ждо по си́лѣ свое́й, а во осла́бу не вдава́йтеся. Идѣ́же бо питіе́ мно́гое и упита́ніе, ту́ сви́нское житіе́.
           Вся́къ же постя́йся, я́рости и сва́ра, и вся́кія непра́вды оста́нися. Въ терпѣ́ніи си́ мзду́ стяжи́те, да чи́стою со́вѣстію причасти́теся Святы́хъ Та́инъ Христо́выхъ. Иже бо кто́ въ сíи святы́я дни́ по́стныя не причасти́тся - то́ гла́дъ души́ е́сть. Тѣ́мже, дади́те, вѣ́рніи, духо́вное бра́шно души́, а тѣ́лу - тѣле́сное. Не тѣ́ло бо то́чію пита́й, но души́ гла́дны не оста́ви лише́нны да́ра Бо́жія, но насы́ти ю́ причаще́ніемъ святы́мъ.
Въ недѣ́лю 2-ю поста́, поуче́ніе свята́го Іоа́нна Златоу́стаго отъ Боже́ственныхъ Писа́ній о святѣ́мъ постѣ́

исторія, нравственность, златоустъ

Previous post Next post
Up