Иисоу̀ яви́сѧ жє́намъ
Въ вє́чєръ жє собо́тьнъи свитáѩштю въ ѥди́нѫ отъ собо́тъ прии́дє мари́я магдали́на и дроугáя мари́я ви́дєти гро́бъ. И сє̀ трѫ́съ бъи́сть вє́лии · áггєлъ бо госпо́дьнь съшь́дъ съ нєбєсє̀ пристѫ́пль отъвалѝ кáмєнь отъ двє́рии гро́ба и сѣдѣ́ашє на нє́мь. Бѣ̀ жє зьрáкъ ѥго̀ я́ко млъ́ниѩ, и одѣя́ниѥ ѥго̀ бѣ́ло я́ко снѣ́гъ. Отъ стрáха жє ѥго̀ сѫтрѧсо́шѧ сѧ стрѣгѫ́штии и бъи́шѧ я́ко мьрь́тви.
Отъвєштя́въ жє áггєлъ рєчє̀ жєнáмъ ·
Нє бо́ита сѧ въи́ · вє́дмь бо яко иисоу̀ разъпѧ́тааго и́штєта. Нѣ́сть сьдѣ́ · възъстá бо, я́кожє рєчє́. Прииди́та, ви́дита мѣ́сто, идє́жє лєжя́а госпо́дь. И ско́ро шь́дъши рьци́та оучєнико́мъ ѥго́, я́ко възъстá отъ мьрь́твъихъ · и сє̀ варя́ѥтъ въѝ въ галилє́и · тáмо ѥго̀ оу́зьритє. Сє̀ рѣ́хъ вáма.
И изъшь́дъши ско́ро отъ гро́ба, сѫ стрáхомь и рáдостиѭ вє́лиѥѭ, тєко́стє възъвѣсти́ти оучєнико́мъ ѥго́. И сє̀ иисоу̀ сърѣ́тє ѩ́, глаго́лѧ · рáдоуитє сѧ. Онѣ̀ жє пристѫ́пльшє ѩ́стѣ сѧ за но́зѣ ѥго̀ и поклони́стє сѧ ѥмоу́.
Tъгъдá глаго́ла и́ма иисоу́ · нє бо́ита сѧ, иди́та, възъвѣсти́та брáтии моѥ́и, да и́дѫтъ въ галилє́ѫ, и тоу̀ мѧ ви́дѧтъ.