Дне́сь благода́ть Свята́го Ду́ха на́съ собра́, и вси́, взе́мше кре́стъ Тво́й, глаго́лемъ: благослове́нъ Гряды́й во и́мя Госпо́дне, оса́нна въ вы́шнихъ. (
Стихира на Господи воззвахъ)
Въ сíй де́нь сла́вный и пресвѣ́тлый пра́здникъ ва́ій пра́зднуемъ вины́ ра́ди сицевы́я.
По воста́ніи Ла́заревѣ изъ ме́ртвыхъ, мно́зи, ви́дѣвше бы́вшее, вѣ́роваху во Христа́. И у́бо утвержда́ется су́дъ іуде́йскою со́нмицею - Христа́ же, и самаго́ уби́ти Ла́заря. Бѣ́гаетъ у́бо Іису́съ, мѣ́сто зло́бѣ дая́, іуде́и же въ пра́здникъ Па́схи уби́ти Его́ поуче́ніе положи́ша. И вре́мени бѣ́гства да́ну бы́вшу до́лгу.
Пре́жде шести́ дне́й Па́схи, глаго́летъ, пріи́де Іису́съ во Виѳа́нію, идѣ́же бѣ́ Ла́зарь уме́рый, и та́мо обѣ́ду бы́вшу, ядя́ше съ Ни́мъ и Ла́зарь, сестра́ же его́ Марíя на Христо́вѣ но́зѣ мѵ́ро излива́ше.
И нау́тріе посыла́етъ ученики́ Своя́ привести́ осли́цу и жребя́. И Имѣ́яй престо́лъ - не́бо, всѣ́дъ на жребя́, вхо́дитъ во Іерусали́мъ, дѣ́ти же евре́йскія и са́ми подстила́ху Ему́ ри́зы своя́ и вѣ́тви фи́никовъ, о́выя у́бо рѣ́жуще, другíя же и въ рука́хъ нося́ще, вопія́ху Ему́, предсыла́юще: «оса́нна Сы́ну Дави́дову, благослове́нъ Гряды́й во и́мя Госпо́дне, Ца́рь Изра́илевъ!» Сіе́ же бы́сть, о́нѣхъ язы́ки подви́гшу Всесвято́му Ду́ху, въ сла́ву и благохвале́ніе Христо́во. Явля́ху же Христо́ву на сме́рть побѣ́ду ва́іами, сíесть, вѣ́твьми: «ва́ія» бо у евре́овъ вѣ́твь мя́гкая глаго́лется. Обы́чай бо бя́ше, я́ко побѣди́теле по́двиговъ или́ бра́ній нѣ́кіихъ, вѣ́твьми древе́съ присноцвѣту́щихъ въ побѣ́дныхъ провожде́ніихъ почита́еми и обводи́ми бя́ху. Гада́тельственно же зна́меноваше жребе́цъ, су́щія ны́ отъ язы́къ лю́ди, на не́мже всѣ́дъ Христо́съ и препочи́въ, Одолѣ́тель и Побѣди́тель, Ца́рь же всея́ земли́ нарече́ся.
О се́мъ пра́здницѣ и проро́къ глаго́лаше Заха́рія: «ра́дуйся зѣло́, дщи́ Сіо́нова, се́ Ца́рь тво́й гряде́тъ тебѣ́ кро́токъ, и всѣ́дъ на подъяре́мника и жребца́ осля́, сы́на подъяре́мнича» (Зах. 9, 9). И Дави́дъ па́ки о дѣ́техъ: «изъ у́стъ младе́нецъ и ссу́щихъ соверши́лъ еси́ хвалу́» (Псал. 8, 3).
Но входя́щу, рече́, Христу́ потрясе́ся ве́сь Іерусали́мъ, и во отмще́ніе наро́ди отъ архіере́й поощре́ни бы́вше, смотря́ху Его́ уби́ти. То́й же тая́шеся, кры́яся и явля́яся, при́тчами глаго́лаше и́мъ.
Неизрече́ннымъ Твои́мъ милосе́рдіемъ, Христе́ Бо́же на́шъ, побѣди́тели ны́ безслове́сныхъ страсте́й сотвори́, и Твою́ свѣ́тлую на смѣ́рть побѣ́ду, я́сное же и живоно́сное Воскресе́ніе ви́дѣти сподо́би, и поми́луй на́съ ны́нѣ и при́сно, и во вѣ́ки вѣко́въ, ами́нь. (
Синаксарій)