Изъ последованія въ Неделю Православія
Сія́ вѣ́ра апо́стольская, сія́ вѣ́ра оте́ческая, сія́ вѣ́ра правосла́вная, сія́ вѣ́ра вселе́нную утверди́. Еще́ же собо́ры святы́хъ оте́цъ, и и́хъ преда́нія и писа́нія Боже́ственному открове́нію согла́сная, пріе́млемъ и утвержда́емъ.
Аще сему́ Госпо́дню о на́съ промышле́нію и открове́нію спаси́телному врази́ Правосла́вія и проти́вишася, но помяну́ Госпо́дь поноше́нія ра́бъ Свои́хъ: ху́льники бо сла́вы Своея́ поруга́, и продерза́тели и враги́ Правосла́вія боя́зненны и бѣжа́тели яви́. Якоже у́бо плѣня́ющихъ ра́зумъ сво́й въ послуша́ніе Боже́ственному открове́нію и подвиза́вшихся за о́ное ублажа́емъ и восхваля́емъ; та́ко проти́вящихся се́й и́стинѣ, а́ще ожида́вшему и́хъ обраще́нія и раска́янія Го́споду не пока́яшася, Свяще́нному Писа́нію послѣ́дующе и пе́рвенствующія Це́ркве преда́ній держа́щеся, отлуча́емъ и анаѳема́тствуемъ.
Отрица́ющимъ бытіе́ Бо́жіе и утвержда́ющимъ, я́ко мíръ се́й е́сть самобы́тенъ, и вся́ въ не́мъ безъ про́мысла Бо́жія и по слу́чаю быва́ютъ: Ана́ѳема! [Три́жды].
Глаго́лющимъ Бо́га не бы́ти Ду́хъ, но пло́ть; или́ не бы́ти Его́ пра́ведна, милосе́рда, прему́дра, всевѣ́дуща, и подо́бная хуле́нія произнося́щимъ: Ана́ѳема! [Три́жды].
Дерза́ющимъ глаго́лати, я́ко Сы́нъ Бо́жій не единосу́щный и не равноче́стный Отцу́, та́кожде и Ду́хъ Святы́й, и исповѣ́дающимъ Отца́ и Сы́на и Свята́го Ду́ха, не еди́наго бы́ти Бо́га: Ана́ѳема! [Три́жды].
Безу́мнѣ глаго́лющимъ, я́ко не ну́жно бы́ти ко спасе́нію на́шему и ко очище́нію грѣхо́въ прише́ствіе въ мíръ Сы́на Бо́жія во пло́ти, и Его́ во́льное страда́ніе, сме́рть и воскресе́ніе: Ана́ѳема! [Три́жды].
Не пріе́млющимъ благода́ти искупле́нія Ева́нгеліемъ проповѣ́даннаго, я́ко еди́нственнаго на́шего ко оправда́нію предъ Бо́гомъ сре́дства: Ана́ѳема! [Три́жды].
Дерза́ющимъ глаго́лати, я́ко Пречи́стая Дѣ́ва Марíя не бы́сть пре́жде рождества́, въ рождествѣ́ и по рождествѣ́ Дѣ́ва: Ана́ѳема! [Три́жды].
Не вѣ́рующимъ, я́ко Ду́хъ Святы́й умудри́ проро́ковъ и апо́столовъ, и чрезъ ни́хъ возвѣсти́ на́мъ и́стинный пу́ть къ вѣ́чному спасе́нію, и утверди́ сіе́ чудеса́ми, и ны́нѣ въ сердца́хъ вѣ́рныхъ и и́стинныхъ христіа́нъ обита́етъ и наставля́етъ и́хъ на вся́кую и́стину: Ана́ѳема! [Три́жды].
Отме́щущимъ безсме́ртіе души́, кончи́ну вѣ́ка, су́дъ бу́дущій и воздая́ніе вѣ́чное за добродѣ́тели на небесѣ́хъ, а за грѣхи́ осужде́ніе: Ана́ѳема! [Три́жды].
Отме́щущимъ вся́ та́инства свята́я, Це́рковію Христо́вою содержи́мая: Ана́ѳема! [Три́жды].
Отверга́ющимъ собо́ры святы́хъ оте́цъ и и́хъ преда́нія, Боже́ственному открове́нію согла́сная, и Правосла́вно-Каѳоли́ческою Це́рковію благоче́стно храни́мая: Ана́ѳема! [Три́жды].
Помышля́ющимъ, я́ко правосла́вніи Госуда́ри возво́дятся на престо́лы не по особли́вому о ни́хъ Бо́жію благоволе́нію и при пома́заніи дарова́нія Свята́го Ду́ха къ прохожде́нію вели́каго сего́ зва́нія на ни́хъ не излива́ются: и та́ко дерза́ющимъ проти́ву и́хъ на бу́нтъ и измѣ́ну: Ана́ѳема! [Три́жды].
Руга́ющимъ и ху́лящимъ святы́я ико́ны, и́хже свята́я Це́рковь ко воспомина́нію дѣ́лъ Бо́жіихъ и уго́дниковъ Его́, ра́ди возбужде́нія взира́ющихъ на о́ныя ко благоче́стію, и ко о́ныхъ подража́нію пріе́млетъ, и глаго́лющимъ о́ныя бы́ти и́долы: Ана́ѳема! [Три́жды].
Click to view