Поревну́емъ мытаря́ вели́кому смире́нію!
Сла́ва, гла́съ 8: Покая́нія отве́рзи ми́ две́ри Жизнода́вче, у́тренюетъ бо ду́хъ мо́й ко хра́му свято́му Твоему́, хра́мъ нося́й тѣле́сный ве́сь оскверне́нъ, но, я́ко Ще́дръ, очи́сти благоутро́бною Твое́ю ми́лостію.
И ны́нѣ, богоро́диченъ: На спасе́нія стези́ наста́ви мя́, Богоро́дице, сту́дными бо окаля́хъ ду́шу грѣхми́, и въ лѣ́ности все́ житіе́ мое́ ижди́хъ, но, Твои́ми моли́твами, изба́ви мя́ отъ вся́кія нечистоты́.
Та́же, гла́съ 6: Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ, очи́сти беззако́ніе мое́.Мно́жества содѣ́янныхъ мно́ю лю́тыхъ, помышля́я, окая́нный, трепе́щу стра́шнаго дне́ су́днаго, но, надѣ́яся на ми́лость благоутро́бія Твоего́, я́ко Дави́дъ вопію́ Ти: поми́луй мя́, Бо́же, по вели́цѣй Твое́й ми́лости.
Стихира по 50-м псалме
Пріиди́те у́бо, бра́тіе, послу́шайте Христо́ва гла́са, да бодрѣ́йши бу́демъ на послуша́ніе. Сію́ бо при́тчу Спа́съ рече́ на́шего ра́ди спасе́нія: не сни́де бо пра́ведныхъ ра́ди, но грѣ́шныхъ ра́ди, да спасу́тся.
Человѣ́ка, - рече́, - два́ внидо́ста въ це́рковь помоли́тися: еди́нъ фарисе́й, а другíй мыта́рь (Лук. зач. 89). Отъ нача́тка сло́ва позна́емъ, ко́ждо бо на́съ въ себѣ́ о́ба и́мамы. Це́рковь, разумѣ́емъ, люби́мицы, - составле́ніе тѣлесе́ своего́, я́ко же апо́столъ глаго́летъ: бра́тіе, вы́ есте́ це́ркви Бо́га жи́ва. Человѣ́ка же два́ - се́рдце и душа́, въ нею́ же пра́вда и грѣ́хъ. Пра́вда же у́бо высокоу́міемъ низпа́даетъ, грѣ́хъ же смире́ніемъ потребля́ется. Рече́ бо Дави́дъ Ду́хомъ Святы́мъ: я́ко не оправди́тся предъ Тобо́ю вся́къ живы́й. И па́ки рече́: смири́хся, и спасе́ мя.
Се́рдце у́бо е́сть фарисе́й, и́же не сохрани́ добродѣ́тели, но о исправле́ніихъ велича́ется и на лѣни́вѣйшія возно́сится, не вѣ́сть бо о себѣ́ пи́саннаго: не хвали́теся, - рече́, - ни глаго́лите высо́кая въ горды́ни свое́й, ни да изы́детъ велерѣ́чіе изъ у́стъ ва́шихъ. Душа́ же сама́ сказу́ется мыта́рь, поне́же чиста́ Бо́гомъ сотворена́ бы́сть, и въ тѣлеси́ оскверни́вшися, ни на не́бо зрѣ́ти не хо́щетъ, но, бію́щися въ пе́рси со́вѣстію злы́хъ дѣ́лъ, тя́жкими воздыха́ніи и немо́лчнымъ гла́сомъ вопіе́тъ: Бо́же, ту́не мя́ поми́луй; е́же е́сть: не восхощи́ со мно́ю сотвори́ти словесе́ испыта́нія. Тѣ́мъ пріе́млетъ покая́ніемъ оправда́ніе. Да никто́ же о си́хъ блазни́тся, я́ко раздѣля́ема е́сть на́двое человѣ́ческая мы́сль, по́мыслъ отъ словеси́ отсѣка́емь: вою́етъ бо, - рече́, - пло́ть на ду́шу.
Два́ супоста́та въ на́съ е́сть непреста́нно борю́щася: востае́тъ бо несы́тость на по́стъ, на добродѣ́тель - велича́ніе, на цѣлому́дріе - пія́нство; блу́дъ - на душе́вную чистоту́, на любо́вь - не́нависть и гнѣ́въ, на смире́ніе - го́рдость, на и́стину - лжа́ и клевета́, и про́чая зла́я дѣла́. Два́, - рече́, - ко́нника: мыта́рь и фарисе́й. И впряже́ фарисе́й два́ коня́, да пости́гнетъ въ вѣ́чную жи́знь: еди́нъ ко́нь добродѣ́тельный - по́стъ и ми́лостыня; а другíй ко́нь - го́рдость, и велича́ніе и осужде́ніе. И запя́ го́рдость добродѣ́тели, и разби́ся ко́нная колесни́ца, и поги́бе самомни́мый вса́дникъ. Никто́ же бо, - рече́, - о себѣ́ пріе́млетъ че́сть, но зва́нный отъ Бо́га. Рече́ бо апо́столъ: не хвали́ся на вѣ́твіи сѣдя́, не ты́ бо ко́рень но́сиши, но ко́рень тебе́. Впряже́ бо и мыта́рь два́ коня́: еди́нъ зла́я дѣ́ла - лихои́мство, нечистоту́, несы́тство; а другíй ко́нь - смире́ніе, не отча́яніе. И спасе́ вса́дника смире́нная наде́жда: еди́нѣмъ бо сло́вомъ обрѣ́те оправда́ніе, рече́: Бо́же, очи́сти мя́, грѣ́шнаго! До́брѣ рече́ проро́къ: бли́зъ Госпо́дь всѣ́мъ се́рдцемъ призыва́ющихъ Его́ и́стинною. И премо́же сло́во дѣ́лу.
Фарисе́и бо, пра́ведницы нарица́хуся, и ве́сь зако́нъ исполня́юще мня́хуся, не слы́шаще Самого́ Го́спода глаго́люща: Азъ пріидо́хъ взыска́ти заблу́ждшихъ. Жидо́встіи же собо́ри укоря́ху, глаго́люще: еда́ кто́ отъ кня́зь, или́ отъ фарисе́й вѣ́рова въ Онь? Не хотя́ху бо во о́бщину прія́ти ка́ющихся, тѣ́мъ и въ це́ркви осужда́ху лихои́мцы, своя́ же добродѣ́тели помина́юще, велича́хуся. Се́ же слы́шавъ мыта́рь, а́ки не имы́й дерзнове́нія, не хотя́ше ни о́чію на не́бо возвести́, но бія́ше въ пе́рси, да подви́гнетъ ду́шу на покая́ніе и се́рдце на умиле́ніе, того́ бо ра́ди злíи по́мыслы отбѣга́ютъ, глаго́лаше: Бо́же, очи́сти мя́, грѣ́шнаго!
Тѣ́мъ же и мы́, бра́тіе, поревну́емъ сего́ мытаря́ вели́кому смире́нію, и́мъ же Са́мъ Госпо́дь смири́ся и всѣ́хъ на́съ научи́ смиренномы́слити, да полу́чимъ вѣ́чная блага́я, о Христѣ́ Іису́сѣ, Го́сподѣ на́шемъ, Ему́ же сла́ва ны́нѣ, и при́сно и во́ вѣки вѣко́мъ.
Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. - М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. - Л. 1 - 2 об.