Иже во святыхъ отца нашего Геннадія, во Святѣй Руси жидовскую прелесть попалившаго
Пое́мъ ку́пно съ великому́ченицею Варва́рою. На стихо́внѣ стихи́ры, гла́съ 3.
Па́ки сбира́ется нечести́вое собо́рище* на Го́спода, и на Христа́ Его́, и на Це́рковь Его́,* дре́внимъ богоотсту́пникомъ подража́юще,* сме́рти Безгрѣ́шнаго па́ки руга́ющеся,* но́, я́ко же та́етъ во́скъ отъ лица́ огня́,* та́ко исчеза́етъ отъ слы́шанія слове́съ твои́хъ,* богому́дре святи́телю Генна́діе,* воево́до Госпо́день изря́дный.
Па́ки со́нмище богопроти́вное,* храня́щее су́етная и ло́жная* совѣща́етъ зла́я на Невѣ́сту Госпо́дню* и прельща́етъ маловѣ́рныя воскресе́нію не вѣ́ровати,* и Святы́мъ Та́йнамъ руга́тися,* и уче́ніе Христо́во хули́ти,* но на ка́мени исповѣ́данія твоего́,* я́ко волна́ свирѣпѣ́ющая, разбива́ется,* пѣ́нящися всѣ́ми срамота́ми свои́ми,* и вели́чіе ду́ха твоего́ нево́лею показу́юще,* богому́дре святи́телю Генна́діе,* воево́до Госпо́день непобѣди́мый.
Па́ки учени́къ невѣ́рный* іуде́ямъ Христа́ предае́тъ* и мно́гое мно́жество та́йныхъ отсту́пникъ приво́дитъ.* Оле рыда́нія, о́ле посрамле́нія!* Оле безу́мія нечести́выхъ,* вѣ́дущихъ Христа́ и къ жидо́вству приложи́вшихся!* Но́ на стра́жѣ поста́вленъ Боже́ственнѣй* о ста́дѣ Госпо́днемъ слове́снѣмъ,* отъ ю́га прише́дшаго Бо́га* и спасе́ніе на́ше устро́ившаго проповѣ́далъ еси́,* богому́дре святи́телю Генна́діе* воево́до Госпо́день пресла́вный.