Неделя о Страшномъ Судѣ
Стихи́: Егда́ судя́й земли́, Судіе́ всѣ́хъ, ся́деши.
Пріиди́те, о́наго гла́са, досто́йна и мене́ усуди́.
Въ сíй де́нь втора́го и неумы́тнаго прише́ствія Христо́ва па́мять твори́мъ, ю́же боже́ственнѣйшіи отцы́ по двою́ при́тчу положи́ша, я́ко да не кто́ во о́ну Бо́жіе человѣколю́біе увѣ́давъ, лѣ́ностно поживе́тъ, глаго́ля: человѣколюби́въ е́сть Бо́гъ, и егда́ грѣ́ха отлучу́ся, гото́во и́мамъ все́ соверши́ти. Се́й стра́шный де́нь здѣ́ учини́ша, да сме́ртію и ча́яніемъ бу́дущихъ злы́хъ устраши́вше, лѣ́ностно живу́щія къ добродѣ́тели возведу́тъ, не надѣ́ющіяся къ человѣколю́бному то́чію, но взира́ти я́ко и пра́веденъ е́сть Судія́ и отдае́тъ кому́ждо по дѣло́мъ его́.
Ина́ко же, и душа́мъ преше́дшимъ, подоба́ше пріити́ и Судіи́: о́бразъ же нѣ́кій, и настоя́щій пра́здникъ, поне́же у́бо коне́цъ всѣ́хъ пра́здниковъ полага́ется ны́нѣ, я́коже и о́нъ всѣ́хъ бу́детъ по на́мъ коне́чный. Подоба́етъ бо смотри́ти, я́ко въ бу́дущую недѣ́лю нача́ло мíра, и са́мое отъ рая́ паде́ніе положа́тъ Ада́мово: настоя́щій же всѣ́хъ дне́й коне́цъ, и мíру самому́.
Въ мясопу́стѣ же сію́ положи́ша, сокраща́юще, мню́, пи́щу и объяде́ніе стра́ха ра́ди пра́здника, и къ ми́лости бли́жняго на́съ созыва́юще. И ина́ко: поне́же пита́вшеся изгна́хомся изъ Еде́ма, и подъ судо́мъ бы́хомъ и кля́твою, посему́ здѣ́ настоя́щій положи́ша пра́здникъ, и я́ко хо́щемъ [и́мамы] въ другу́ю недѣ́лю Ада́момъ, по о́бразу Еде́мскому изгна́тися, до́ндеже Христо́съ прише́дъ, па́ки на́съ возведе́тъ къ раю́. Второ́е же прише́ствіе рече́ся, зане́ и пе́рвѣе пло́тію къ на́мъ пріи́де, но ти́хо и безъ сла́вы. Ны́нѣ же съ преесте́ственными чудесы́ пріи́детъ, и съ явле́нною свѣ́тлостію съ небе́съ и съ тѣ́ломъ, я́ко да позна́нъ бу́детъ всѣ́ми. Яко Се́й е́сть Иже и пе́рвѣе прише́дый, и ро́дъ человѣ́чь изба́вивый, и суди́ти па́ки хотя́й Са́мъ, а́ще до́брѣ да́нная Ему́ соблюде́.
Когда́ у́бо бу́детъ сіе́ прише́ствіе, никто́же вѣ́сть, сіе́ бо и Госпо́дь апо́столомъ скры́. Тогда́ у́бо зна́менія нѣ́кая яви́ предвари́ти, я́же нѣ́цыи отъ святы́хъ простра́ннѣе изъясни́ша. Глаго́лется же, я́ко по седми́хъ ты́сящахъ лѣ́тъ прише́ствіе Его́ бу́детъ. Пре́жде же Его́ прише́ствія пріи́детъ анти́христъ, и роди́тся, я́ко глаго́летъ святы́й Ипполи́тъ Ри́мскій, отъ жены́ скве́рны и дѣви́цы мни́мыя, отъ евре́й же су́щи, отъ пле́мене Да́нова, и́же бя́ше о́трокъ Іа́ковль. И ходи́ти у́бо и́мать по Христу́ проходя́ жи́тельство, и чудеса́ соверши́тъ, ели́ка у́бо и Христо́съ дѣ́йствова, и ме́ртвыя воскреси́тъ. Оба́че по мечта́нію вся́ содѣ́етъ: и рожде́ніе, и пло́ть, и про́чая вся́, я́коже глаго́летъ апо́столъ. И тогда́, глаго́ля, откры́ется сы́нъ па́губы, во вся́кой си́лѣ, и зна́меніихъ, и чудесѣ́хъ ло́жныхъ (2 Сол. зач. 275).
Оба́че не са́мъ діа́волъ въ пло́ть претвори́тся, я́коже изъ Дама́ска глаго́летъ Іоаннъ, но человѣ́къ, отъ блуда́ роди́вся, все́ сатанино́ дѣ́йствіе пріи́метъ и внеза́пу воста́нетъ, та́же бла́гъ и кро́токъ всѣ́мъ яви́тся. И гла́дъ тогда́ ве́лій бу́детъ. Угоди́тъ лю́демъ, и Боже́ственная писа́нія про́йдетъ, и посту́ навы́кнетъ, и пону́дится отъ человѣ́къ, и ца́рь проповѣ́стся, и возлю́битъ мно́жае евре́йскій ро́дъ, и во Іерусали́мъ дости́гнетъ, и хра́мъ и́хъ воздви́гнетъ.
Пре́жде же седми́хъ лѣ́тъ, я́коже глаго́летъ Даніи́лъ, прíидетъ Ено́хъ и Илія́, проповѣ́дающе лю́демъ не пріима́ти его́. Се́й же е́мь и́хъ уму́читъ, та́же и главы́ и́хъ отсѣче́тъ. Благоче́ствовати же изво́лившіи дале́че отбѣ́гнутъ, и́хже въ гора́хъ обрѣ́тъ, де́монми иску́ситъ. Ума́лятся же се́дмь лѣ́тъ о́ная избра́нныхъ ра́ди, и гла́дъ бу́детъ вели́къ, стихíямъ всѣ́мъ превраща́емымъ, я́ко потреби́тися вма́лѣ уже́ всѣ́мъ.
По си́хъ же внеза́пу я́ко мо́лнія съ небе́съ Госпо́дне прише́ствіе бу́детъ, предыду́щу честно́му Его́ кресту́, и о́гненная рѣка́ клоко́щущи Ему́ преды́детъ, всю́ зе́млю отъ скве́рны очища́ющи. Ятъ же бу́детъ а́біе и анти́христъ, и его́ слуги́, и предадя́тся вѣ́чному огню́. Воструби́вшимъ же а́нгеломъ, пріи́детъ внеза́пу отъ коне́цъ земли́ и отъ всѣ́хъ стихíй вся́къ человѣ́ческій ро́дъ во Іерусали́мъ, я́ко среда́ мíра то́й; и та́мо сѣдо́ша престо́ли на судѣ́. Оба́че съ свои́ми тѣлесы́ и душа́ми, всѣ́мъ къ нетлѣ́нію престихíованнымъ, и еди́нъ иму́щимъ зра́къ, и тѣ́мъ же стихíямъ на лу́чшее пріе́мшимъ измѣне́ніе.
И разлучи́тъ еди́нѣмъ сло́вомъ Госпо́дь пра́ведныя отъ грѣ́шныхъ. И по́йдутъ благи́хъ дѣ́латели, вѣ́чный живо́тъ пріе́млюще, грѣ́шніи же - въ вѣ́чную па́ки му́ку, и никогда́же си́хъ преста́ніе бу́детъ. Вѣ́домо же, я́ко не поста́ тогда́ взы́щетъ, и наготы́, и чуде́съ, Христо́съ, добра́ бо и сія́; но мно́жицею си́хъ лу́чшая - ми́лостыню я́вѣ и просты́ню [сострада́ніе]. Рече́тъ бо пра́веднымъ и грѣ́шнымъ ше́сть нѣ́кихъ за́повѣдей: Взалка́хъ бо, и да́сте Ми́ я́сти; возжада́хъ, и напои́сте Мя́; стра́ненъ бѣ́хъ, и введо́сте Мя́; на́гъ, и одѣ́ясте Мя́; бо́ленъ бѣ́хъ, и посѣти́сте Мя́; въ темни́цѣ бѣ́хъ, и пріидо́сте ко Мнѣ́. Ели́ко бо сотвори́сте еди́ному си́хъ ме́ньшихъ, Мнѣ́ сотвори́сте. Яже мо́жетъ вся́къ кто́ сотвори́ти по си́лѣ. Тогда́ у́бо вся́къ кто́ исповѣ́сть, я́ко Госпо́дь Іису́съ Христо́съ, во сла́ву Бо́га Отца́ (Флп. зач. 240).
Му́ки у́бо, я́же свяще́нное Ева́нгеліе предаде́, сія́ су́ть: та́мо бу́детъ пла́чь и скре́жетъ зубо́въ; че́рвь и́хъ не сконча́ется и о́гнь и́хъ не уга́снетъ (Матѳ. зач. 105). И: вложи́те его́ во тму́ кромѣ́шную (Марк. зач. 42). Яже у́бо вся́ свѣ́тло Це́рковь Бо́жія пріе́мши, непщу́етъ, пи́щи [сла́дости] у́бо и Ца́рствію небе́сному бы́ти, съ Бо́гомъ святы́хъ спребыва́нію, бу́дущему о́нымъ сія́нію всегда́шнему и восхожде́нію. Муче́нію же и тмѣ́, и сицевы́мъ отъ Бо́га удале́нію, и душа́мъ со́вѣстію иждиве́нію, ка́ко лѣ́ностію и пи́щею вре́менною Боже́ственнаго сія́нія лиши́шася.
Неизрече́ннымъ человѣколю́біемъ Твои́мъ, Христе́ Бо́же, жела́тельнаго Твоего́ гла́са на́съ сподо́би, и су́щимъ одесну́ю Тебе́ сопричти́, и поми́луй на́съ, ами́нь.
(Синакса́рь Недели мясопустной)