Служба «Взысканию погибших»
Публикуемая служба пред иконой Божией Матери «Взыскание погибших» составлена протоиереем Николаем Александровичем Голубцовым (†1963).
Месяца февраля 5-го дня
Служба Пресвятей Владычице нашей Богородице в честь и память честныя иконы Ея, именуемыя «Взыскание погибших»
На вечерни
Блажен муж: 1-й антифон.
На Господи, воззвах: стихиры на 8, глас 5:Предивная Твоя икона, Богородице Дево, / врачевство всего мира духовное, / к нейже мы прибегаем, Тебе кланяющеся, / почитаем и лобызаем ю, / исцелений благодать почерпаем, / Ты бо еси, Царице Небесная, / пристанище обуреваемых, / скорбящих утешение и радосте, / падших возстание и кающихся совоздыхание; / молися, Благая Мати, // о верно чтущих Тя.
Храм и дверь еси, / ковчег Святаго Духа, / Дево Всечестная, / Еюже Бог Слово плотию облечеся, / во тьме и сени седящим явися, / Солнце сый Правды, / просветити хотя, яже созда по образу Своему; / темже, Всепетая, / яко Матернее дерзновение к Владыце всех стяжавшая, / простри непорочнии руце Твои // ко Спасу душ наших.
Веселися, новый Иерусалиме! / Торжествуйте, вси, любящии Сиона! / Спас мира пришел еси / разрешити осуждение Адамово. / Рай нам отверзеся, / змий упразднися, / иже бо прельсти жену первее, / Девою побеждается. / О глубина богатства и премудрости Божия, / спасения начало бысть миру Богородицы ради, / Младенец бо родися от Нея, / Отроча младо всесовершеннейший Бог. / Емуже вернии возопиим: // Жизнодавче Христе Боже наш, слава Тебе!
Глас 8:Пред иконою Твоею честною / житейское море волнуется, Владычице, / с мольбою неотступною и надеждою крепкою / простирают к Тебе ныне руце грешнии; / спаси в бездне нечестия погибающих, / злобою зело истощенных, / и волною Твоего милосердия на брег спасения изнеси, / да зовем Ти: // радуйся, Взыскание, от вечныя смерти любовию избавляющая.
Глас 2:Богодарованную благодать утешения / всем изливаеши, Богородице, / верою к Тебе притекающим, / душевных бо ран еси врачевание, / заблуждших от истиннаго пути правое наставление, / предстани и нам, скорая Помощнице, / от всякаго искушения хранящи, / яко милости имущая бездну / и многое дерзновение к рождшемуся от Тебе // Единому Всещедрому Богу.
Слава, и ныне, Богородичен догматик, глас 4: Иже Тебе ради:
Вход. Прокимен дне. Чтения три.
На литии стихиры, глас 8:Приидите, верных множества, / песньми почтим Богоизбранную Деву, / грешных упование непостыдное, / не презираеши бо во мраце отчаяния сущих, Владычице, / усердно ищеши овцы заблуждшия. / Кто может изследити Божия Промысла пути? / Кто не ублажит Твоего к Сыну дерзновения? / Ангели и человецы / воспевают милосердие Твое, Всенепорочная. // Ты бо еси воистину погибших Взыскание.
О преславнаго чудесе! / О Божественнаго ко грешником долготерпения! / Дивны дела Твоя, Господи! / Пречистую Твою Матерь / Церкви и роду человечу даровал еси, / бедствующим скорую Помощницу, / беззащитным Избавительницу крепкую, / заблуждшим просвещение, / нерадивым исправление, / безответным теплое пред Тобою ходатайство, // погибающим спасения провозвестницу.
Что Тя наречем, Пречистая, / реку ли тиху и многоводну, / яко жаждущих правды благодатию напояеши; / стену ли необориму Христовой Церкви, / яко козни вражеския разрушаеши; / темже от напастей избавльшеся, / возопием Владычице: / радуйся, Всемилостивая, // надежды уповающих не посрамляющая.
Слава, и ныне, глас 6:Днесь собори верных сошедшеся / духовно да торжествуем, / почитающе явление иконы Божия Матери, / и тако вси Богородице возопиим: / терпение в бедах утверди, / с радующимися радость разделити научи, / к сетующим нози наша направи / и дар братолюбия свыше ниспосли, // любве пучину рождшая, Благодатная!
На стиховне стихиры, глас 4:О дивное чудо! / О всемилостивое от напрасныя смерти избавление! / Путника, от бури снежныя замерзающа, / промышление Твое, Всеблагая, / до жилища доводит / и глас неведомый дома владетелю вещает: / «Возьмите сего»; / и тако омертвевшаго спасе. / Темже мы зовем: // радуйся, Благодатная, погибающих спасение!
Видяще смерти скорое пришествие, / обещание дает путник благочестивый / украсити церковь иконою Пречистыя Девы. / И услышана бе молитва, / и от плена смертнаго свобожден быв, / пречудный образ обещник написати повелевает / и во храм на главе своей со умилением вносит / во свидетельство чуднаго спасения. / Мы же, честному образу кланяющеся, вопием: / радуйся, о верных промышление, // радуйся, погибших Взыскание.
Глас 2:Возсия светло икона Твоя, Владычице, / открыся источник благодати; / се время благоприятное, се время покаяния истиннаго; / отложим дела тьмы, / облечемся во оружие света. / Слезы умиления, Дево, ныне нам ниспосли, / скверну всю очищающия страстей, / да вси вопием прилежно: // помилуй нас, обуреваемых Пристанище!
Слава, и ныне, глас 8:Приими моление раб Твоих, / Всесвятая Пречистая Богородице Дево, / виждь непрестающия печали наша, / виждь обращение и слезы не презри, / но приими паки благоутробия ради, / прошения наша во благое исполни, / от всякия напасти и недугов свободи, // да воспеваем державу благости Твоея.
Тропарь, глас 7:
Радуйся, Благодатная Богородице Дево: (трижды)
На утрени
На Бог Господь: тропарь тойже, трижды.
По 1-м стихословии седален, глас 8:Мене, заблуждшаго, на горах лютых преступлений / взыщи, Слове, / и к Себе воззови, / и умерщвлена грехом паки оживи, / темже слышу Твоя словеса: / «Моему созданию не хощу погибнути, / но хощу ему спастися / и в познание истины приити, / яко грядущаго ко Мне не изгоняю вон». / Молитвами Приснодевы, // Милостиве, помилуй мя, падшаго.
Слава, и ныне, тойже.
По 2-м стихословии седален, глас 8:Господи, пришедый в мир грешники призвати / и разбойника, и мытаря, и сына блуднаго приемый, / паче всех мене, согрешившаго Тебе, / человеколюбно приими, Спасе, / ради молитв рождшия Тя, // да избавлюся от плена страстей и вечнаго осуждения.
Слава, и ныне, тойже.
На полиелеи величание:Величаем Тя, / Пресвятая Дево, / Богоизбранная Отроковице, / и чтим образ Твой святый, / имже точиши исцеления // всем, с верою притекающим.
По полиелеи седален, глас 2:Болезни претерпевшая многия / в распятии Сына и Бога Твоего, Пречистая, / воздыхала еси горце у Креста стоящи, / волю же Отчую и любовь Божественную познавше. / Сего Агнца Божия, за грехи мира закланнаго, / яко Искупителя и смерти Победителя, // падшим провозвестила еси, Всенепорочная.
Слава, и ныне, тойже.
Степенна, 1-й антифон 4-го гласа.Прокимен, глас 4: Помяну имя Твое / во всяком роде и роде.
Стих: Слыши, Дщи, и виждь, и приклони ухо Твое.
Евангелие от Луки, зачало 4.
По 50-м псалме стихира, глас 2: Богодарованную благодать... (зри на Господи, воззвах)
Канон, глас 8.
Песнь 1Ирмос: Колесницегонителя фараоня погрузи, / чудотворяй иногда, / Моисейский жезл, крестообразно поразив / и разделив море, / Израиля же беглеца, пешеходца спасе, // песнь Богови воспевающа.
Припев: Пресвятая Богородице, спаси нас.
Слово Божие светодательное и Премудрость Отчую, Дево Чистая, рождшая, просвети мое неразумие, и слово ми подаждь воспети Тя, Богородице, Тобою бо исполнися Божие о мире смотрение; Бог во плоти явися, спасти погибшаго человека.
Пророцы духоноснии нарекоша Тя, Дево, и Купиною Неопалимою, и Ковчегом, и Скинией, и Дверию, и Горою несекомою: ныне же собором верных Богородицею Тя исповедуем, и образ сей честно прославляем, яко залог Божия ко грешником снисхождения.
Слава: Чрез икону Твою, Пречистая, «Взыскание погибших» именуемую, являеши о мире милосердое промышление, бедствующих от смерти избавляеши, согрешивших исправляеши, да ни едина душа останется вопиющей напрасно: Владычице, помози, потщися, погибаем!
И ныне: Падением прародителей, змием прельщенных, истекоша злая на род человеческий, рожденным же от Тебе, Благословенная, токи благодати пролияшася, спасая нас от клятвы и вечныя смерти: радуйся, мира греховнаго обновление.
Песнь 3Ирмос: Утверждей в начале Небеса разумом / и землю на водах основавый, / на камени мя, Христе, заповедей Твоих утверди, // яко несть свят паче Тебе, Едине Человеколюбче.
Всю Тя Бог освяти Деву Всесветлую и Непорочную в женах. Пророки прообразив честно, иереи благословив, во Святая Святых всели, Ангелом пристави служити Тебе. Радуется Захария, и мы с ним Приснодеве возопием: радуйся, Предстательнице, яко свеща пред Престолом Божиим возжженная.
Всю Тя Духом Святым приочищенну разумев Гавриил, вопияше: «Радуйся, Благодатная, Господь с Тобою!». И пресущественное Слово плотию вселися в Тя, Богоневесто, Отчим Советом и Святаго Духа содействием. Радуйся, прародителей воззвание, нас с Богом примирение.
Слава: Воплотивыйся от Духа Святаго и Приснодевы Марии, свет нам возсия, Христе Боже, небо и земля веселятся, мы же, видя Тя, Слово Отчее, яко Отроча младо Матери предстояща, Тя Бога воплощеннаго и Богородицу песньми величаем.
И ныне: Пастыри, волхвы и Ангели прославиша Младенца, в яслех лежащаго, яко Бога в мир явльшагося. Ты же, Непорочная Дево, нищету вертепа смиренно приявшая, скорбь материнскую об Отрочати познала еси и служение Сыну Человеческому послушно подъяла еси: темже Тя, яко Мати Божию и Мати рода человеческаго почитаем.
Седален, глас 3:Страшно, еже впасти в руце Бога Жива, / Сей Судия есть помышлений и желаний сердечных. / Злобою бо обогатихся, и сладость греховную возлюбих, / и огню гееннскому подсужден бых, / но благодатию молитвы и поста очищеннаго // Твоим заступлением спаси мя, Мати Всепетая.
Песнь 4Ирмос: Ты моя крепость, Господи, / Ты моя и сила, / Ты мой Бог, Ты мое радование, / не оставль недра Отча, / и нашу нищету посетив. / Тем с пророком Аввакумом зову Ти: // силе Твоей слава, Человеколюбче.
Ты истинная спасения вина, Богомати, едина была еси: Творцу и Зиждителю от Твоих пречистых кровей плоть взаим давши, еюже смертныя сокрушишася двери и жизнь даровася человеком, иже взывают Ти: радуйся, погибших Взыскание.
Разумети тайну страшнаго Твоего Рождества, Приснодево, никакоже может ум человеческий, ниже ангельский: яко Бога Ты родила еси воплощеннаго паче естества, Творца и Законодателя и Агнца, вземлющаго грехи мира.
Слава: В женах Непорочная, егда Первенца Своего принесла еси в церковь, по закону чин очищения смиренно исполняющи, тогда праведный Симеон вознесе Отроча, свидетельствова всем, яко видеста очи его Бога Превечна, мира Спасителя. Радуйся, свет миру явившая.
И ныне: И благослови Тя Симеон и прорече: «Тебе же Самой душу пройдет оружие», - знаменуя тем Твое, Богомати, у Креста предстояние и скорбь чрезмерную о Сыне, Егоже неболезненно родила еси, Пречистая.
Песнь 5Ирмос: Вскую мя отринул еси / от лица Твоего, Свете Незаходимый, / и покрыла мя есть чуждая тьма, окаяннаго; / но обрати мя и к свету заповедей Твоих // пути моя направи, молюся.
Радуйся, благодати Живоприемный Источниче! Повсюду бо изливаеши верным воду спасения: иже в болезнех свобождение, иже во отчаянии - надежду, иже в бедах - крепость, являя всем скорбящим утешение.
Из ребр Сына Твоего истекшими струями мир очищается от скверны, Богородице, покаянием истинным извлеки потоки слез из души моея ожесточенныя, и яко цельбоносным дождем язвы и соблазны очисти, грешников приятелище.
Слава: Лучами истиннаго Света Христа, неизреченно из Тебе, Богородице, возсиявшаго, просвети наши омраченныя души и сердца, из тьмы неведения изведи и на пути заповедей Христовых утверди, заблуждших Наставнице!
И ныне: Ангели на небеси радуются о единем грешнице кающемся. Мы же на земли, в беззакониях сущии, к Тебе, погибших Взыскание, прибегаем: в унынии спящих и грехом покровенных пробуди, молитвою ум озаряя, и тучу гнева Божия отведи, солнца Светлейшая.
Песнь 6Ирмос: Очисти мя, Спасе, / многа бо беззакония моя, / и из глубины зол возведи, молюся: / к Тебе бо возопих, и услыши мя, // Боже спасения моего.
Идеже осеняет благодать от иконы Твоея, Царице Небесная, оттуда диаволя прогонится сила: не терпит бо светила благочестия видети падший денница. Ты моя надежда известная, Ты мое и пение, обуреваемых пристанище.
К Твоему ныне прибегаю заступлению, Богоизбранная, предвари мя избавити смущающаго потока озлоблений, враг бо греховными стрелами душу мою всю порази и оскверни сердце мечтаньми. Предстоятеля тьмы отгоняй Твоими молитвами, Всесильная.
Слава: Стоящих утверждение и грехом умерщвленных оживление, Мати Живота вечнаго, падшаго мя приими и от плена страстей свободи, оковы греха покаянием снимая, Узорешительнице Милостивая.
И ныне: Радуйся, Мати Избавителя, согрешивших отчаянно в смерть, паки призываеши к свету заповедей Христовых. Радуйся, лествице, извлекающая из рова погибели и возводящая к Горнему Отечеству, лета живота нашего сохраняя неврежденно и от сна лености пробуждая.
Кондак, глас 1:Спаса мира рождшая, / Пресвятая Богородице Дево, / Мати роду человеческому явилася еси / и грешником надеждою спасения; / дверь бо покаяния всем отверзаеши / и овцы разсеянныя к Сыну Твоему и Богу приводиши; // да будет едино стадо и един Пастырь.
Икос, глас тойже:Предызбранная от всех родов Дева Пречистая, / стадо, еже стяжа Кровию Сын Твой и Бог, / от бед избави, / видимыя и невидимыя враги отгоняюще, / да вси благодарно Ти воспоем: / радуйся, пламень любве неугасающий; / радуйся, грешных к небу воззвание; / радуйся, Взыскание заблуждших овец; // радуйся, от вечныя смерти избавляющая.
Песнь 7Ирмос: Божия снисхождения / огнь устыдеся в Вавилоне иногда. / Сего ради отроцы в пещи, радованною ногою, / яко во цветнице, ликующе, пояху: // благословен еси, Боже отец наших.
Тебе Заступницу и покров державен Христос дарова, вразумляти и очищати люди согрешившия, усердно к образу Твоему притекающия. Радуйся, теплая Предстательнице пред Сыном, Емуже поем: благословен еси, Боже отец наших.
Не токмо на небеси, но и в церкви святей предстоиши Престолу Божию, Царице Небесная, с чинми святых Ангел и с соборы пророк и Апостол, во славе велицей, и молишися за предстоящия прилежно, гнев Божий отвращая от вопиющих: благословен еси, Боже отец наших.
Слава: Споборствующи верным во брани на нападающия бездумно враги, даждь победительная, Дево, Мати Господа Сил, покрывающи Отечество наше и люди от огня и меча и от всякия напасти, да Владыце всех благодарне поем: благословен еси, Боже отец наших!
И ныне: Низложи гордынею вознесенныя умы, брани хотящия, Мати мира, и миром, яко оружием сильнейшим, козни врагов прекрати и в тишине вселенную сохрани, Божественное ограждение наше, внушая пети Творцу веков: благословен еси, Боже отец наших!
Песнь 8Ирмос: Седмерицею пещь / халдейский мучитель / Богочестивым неистовно разжже, / силою же лучшею спасены, сия видев, / Творцу и Избавителю вопияше: / отроцы, благословите, / священницы, воспойте, // людие, превозносите во вся веки.
Всем, сущим в бедах, руку помощи скоро простираеши, Пречистая: на водах спасение, смертоносныя язвы исцеление, вихрей и бурь прекращение и во мразех согреяние. Человеколюбивая Мати! В нужде и немощи сущих никогоже и никогдаже не оставляеши, Тя и Сына Твоего превозносящих во вся веки.
Узы неплодства яве разрешаеши, Богомати, ибо яко родившая Владыку всех и силу рождения подаеши, Благая, и к радости материнства жен опечаленных приобщаеши, да превозносят Тя во вся веки.
Слава: Воздыхания кающихся приемлеши прилежно, Всепетая, от множества припадающих к благолепней иконе Твоей; не презри долу лежащих и молитвы их вознеси Сыну Твоему и Богу; Егоже, отроцы, благословите, священницы, воспойте, людие, превозносите во вся веки.
И ныне: Се ныне приидох в Церковь и аз, Щедре, яко сын блудный ко отцу, расточив бо богатства, еже дал еси мне, гладом душевным истаеваю, под покров Рождшия Тя прибегаю, причастника Тайныя Вечери мя сотвори, да со избранными прославлю Тя во вся веки.
Песнь 9Ирмос: Ужасеся о сем Небо, / и земли удивишася концы, / яко Бог явися человеком плотски, / и чрево Твое бысть пространнейшее Небес. / Тем Тя, Богородицу, // Ангелов и человек чиноначалия величают.
Воинства безплотных трепетом содержими бяху, егда видеша Господа Славы, на Кресте распинаема. Ты же, Пренепорочная, Херувим Честнейшая, Агнца Божия, Сына Своего, на Древе зряще, оружие скорби крестной в сердце содержала еси, миру же спасение благовестила еси.
Избранная Агница Божия Слова, моли Пастыря добраго, душу Свою за нас положившаго, к десным овцам [нас] причислити, в час же смертный и на воздушных мытарствах покрый нас Своею благодатною силою, Державная, от страшных истязаний избавляя.
Слава: Древле дарованную мне ризу купелию Крещения раздрав безумно страстьми, и ужасаюся, окаянный, час помышляя Божественнаго истинно Страшнаго Суда: Дево Всенепорочная, предстани тогда и избави мя страшнаго прещения, яко Судию Рождшая.
И ныне: Устнами грешными приносим Ти, Всепетая, пред образом Твоим, простое сие пение, аще и недоумеем по достоянию воспети милости и величия Твоя, но от усердия дерзаем, на Твоя щедроты надеяся. Темже не возгнушайся грехов наших, но с любовию приими и яко погибающих спаси.
Светилен:Да почтится Всепетая Матерь Божия, / Жизнь сущую рождши Христа Бога нашего, / райских дверей отверзение / и всего мира очищение, / к Животу возведение; / Сей есть пророком глаголавый - / Тому поклонимся, // Богу и Спасу душ наших.
На хвалитех стихиры, глас 8:О величия благости и неисчетнаго милосердия Твоего, Владычице! / Молящихся пред иконою Твоею / спасаеши от смерти грядущия, / от стрелы молниеносныя и всеяднаго огня, / от ярости врага и убийства мечем, / от труса и водою покрытия, / от воздуха смертоноснаго / или мраза свирепаго, / от болезни погибельныя и прочаго вреда. / От таковых напастей избавльшеся, / песньми хвалебными Тя немолчно величаем, // яко Мати стихиями обладающаго Владыки Христа.
Глас 6:О Благодатная Дево, / заблуждших Наставнице верная, / упование наше непреложное, / воззри кротким оком Твоим на предстоящия люди, / покров Твой простри, от праведнаго гнева Судии нас защищая, // Всемогущая, яко Мати Сына Божия.
Глас 5:Собезначальному Слову / истинная Мати сущи, / о нас хотяще воздати в час Суда слово, / предстани и умоли Сына Своего теплыми [к Нему] мольбами; / вемы бо яко много могут Матерния Твоя молитвы, / и сих ради надеемся обрести милость // в день Страшнаго испытания.
Слава, и ныне, глас 1:Небесных чинов радование, / на земли человеков крепкое предстательство, / Пастыря добраго Мати Преблагая, / спаси ны, иже к Тебе прибегающия, / яко на Тя упование по Бозе возложихом. / Мира благоукрашение, отчаянных спасение, / умножи стадо Христово словесных овец, / в преподобии и правде живущия, // яко Ты еси падших Возстание.
Славословие великое. Ектении и отпуст.
Молитва 1О Богоизбранная Заступнице грешных, Взыскание погибших и Наставнице заблуждших! Ты не презираешь удалившейся своеволием от пажити Сына Твоего блуждающей в дебрех греха бедныя словесныя овцы, но шед, ищешь заблуждшую. Кто изследит пути милосердия Твоего? Будь милостива ко всем: погибающих извлеки из бездны погибели, заблуждших обрящи и настави, удаленных обрати и привлеки, обращающихся к Тебе и приближающихся приими и спаси. Всех же кающихся к Сыну Твоему, доброму Пастырю и Богу нашему, приведи, да молитвами Твоими не будет ни единыя овцы, без вести пропавшия, но да будет едино стадо и един Пастырь, Иже упасет души наша и открыет ходатайством Твоим двери во обители вечныя. Аминь.
Молитва 2О Пресвятая Владычице Богородице, Взыскание погибших! Призри милостивым Твоим оком на молящихся пред честною иконою Твоею. Воздвигни нас из глубины греховныя: просвети ум наш, омраченный страстьми, уврачуй язвы душ и телес наших. Ты веси непрестающия скорби и вся немощи наша: подай нам руку помощи, облегчи страдания. Буди нам милосердия и мира источник, утешение в бедах и крепкое прибежище грешником кающимся. Даруй нам исправление греховныя жизни нашея: заблуждших на путь правый настави, падших и погибающих силою благодати спаси. От внезапныя смерти избави, с Сыном Твоим и Судиею Праведным нас примири и вечныя муки свободи. Милосердным же предстательством Твоим сподоби нас вселитися во обителех небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно и во веки веков. Аминь.
Месяца февраля 5-го дня
Служба Пресвятей Владычице нашей Богородице в честь и память честныя иконы Ея, именуемыя «Взыскание погибших»
На вечерни
Блажен муж: 1-й антифон.
На Господи, воззвах: стихиры на 8, глас 5:Предивная Твоя икона, Богородице Дево, / врачевство всего мира духовное, / к нейже мы прибегаем, Тебе кланяющеся, / почитаем и лобызаем ю, / исцелений благодать почерпаем, / Ты бо еси, Царице Небесная, / пристанище обуреваемых, / скорбящих утешение и радосте, / падших возстание и кающихся совоздыхание; / молися, Благая Мати, // о верно чтущих Тя.
Храм и дверь еси, / ковчег Святаго Духа, / Дево Всечестная, / Еюже Бог Слово плотию облечеся, / во тьме и сени седящим явися, / Солнце сый Правды, / просветити хотя, яже созда по образу Своему; / темже, Всепетая, / яко Матернее дерзновение к Владыце всех стяжавшая, / простри непорочнии руце Твои // ко Спасу душ наших.
Веселися, новый Иерусалиме! / Торжествуйте, вси, любящии Сиона! / Спас мира пришел еси / разрешити осуждение Адамово. / Рай нам отверзеся, / змий упразднися, / иже бо прельсти жену первее, / Девою побеждается. / О глубина богатства и премудрости Божия, / спасения начало бысть миру Богородицы ради, / Младенец бо родися от Нея, / Отроча младо всесовершеннейший Бог. / Емуже вернии возопиим: // Жизнодавче Христе Боже наш, слава Тебе!
Глас 8:Пред иконою Твоею честною / житейское море волнуется, Владычице, / с мольбою неотступною и надеждою крепкою / простирают к Тебе ныне руце грешнии; / спаси в бездне нечестия погибающих, / злобою зело истощенных, / и волною Твоего милосердия на брег спасения изнеси, / да зовем Ти: // радуйся, Взыскание, от вечныя смерти любовию избавляющая.
Глас 2:Богодарованную благодать утешения / всем изливаеши, Богородице, / верою к Тебе притекающим, / душевных бо ран еси врачевание, / заблуждших от истиннаго пути правое наставление, / предстани и нам, скорая Помощнице, / от всякаго искушения хранящи, / яко милости имущая бездну / и многое дерзновение к рождшемуся от Тебе // Единому Всещедрому Богу.
Слава, и ныне, Богородичен догматик, глас 4: Иже Тебе ради:
Вход. Прокимен дне. Чтения три.
На литии стихиры, глас 8:Приидите, верных множества, / песньми почтим Богоизбранную Деву, / грешных упование непостыдное, / не презираеши бо во мраце отчаяния сущих, Владычице, / усердно ищеши овцы заблуждшия. / Кто может изследити Божия Промысла пути? / Кто не ублажит Твоего к Сыну дерзновения? / Ангели и человецы / воспевают милосердие Твое, Всенепорочная. // Ты бо еси воистину погибших Взыскание.
О преславнаго чудесе! / О Божественнаго ко грешником долготерпения! / Дивны дела Твоя, Господи! / Пречистую Твою Матерь / Церкви и роду человечу даровал еси, / бедствующим скорую Помощницу, / беззащитным Избавительницу крепкую, / заблуждшим просвещение, / нерадивым исправление, / безответным теплое пред Тобою ходатайство, // погибающим спасения провозвестницу.
Что Тя наречем, Пречистая, / реку ли тиху и многоводну, / яко жаждущих правды благодатию напояеши; / стену ли необориму Христовой Церкви, / яко козни вражеския разрушаеши; / темже от напастей избавльшеся, / возопием Владычице: / радуйся, Всемилостивая, // надежды уповающих не посрамляющая.
Слава, и ныне, глас 6:Днесь собори верных сошедшеся / духовно да торжествуем, / почитающе явление иконы Божия Матери, / и тако вси Богородице возопиим: / терпение в бедах утверди, / с радующимися радость разделити научи, / к сетующим нози наша направи / и дар братолюбия свыше ниспосли, // любве пучину рождшая, Благодатная!
На стиховне стихиры, глас 4:О дивное чудо! / О всемилостивое от напрасныя смерти избавление! / Путника, от бури снежныя замерзающа, / промышление Твое, Всеблагая, / до жилища доводит / и глас неведомый дома владетелю вещает: / «Возьмите сего»; / и тако омертвевшаго спасе. / Темже мы зовем: // радуйся, Благодатная, погибающих спасение!
Видяще смерти скорое пришествие, / обещание дает путник благочестивый / украсити церковь иконою Пречистыя Девы. / И услышана бе молитва, / и от плена смертнаго свобожден быв, / пречудный образ обещник написати повелевает / и во храм на главе своей со умилением вносит / во свидетельство чуднаго спасения. / Мы же, честному образу кланяющеся, вопием: / радуйся, о верных промышление, // радуйся, погибших Взыскание.
Глас 2:Возсия светло икона Твоя, Владычице, / открыся источник благодати; / се время благоприятное, се время покаяния истиннаго; / отложим дела тьмы, / облечемся во оружие света. / Слезы умиления, Дево, ныне нам ниспосли, / скверну всю очищающия страстей, / да вси вопием прилежно: // помилуй нас, обуреваемых Пристанище!
Слава, и ныне, глас 8:Приими моление раб Твоих, / Всесвятая Пречистая Богородице Дево, / виждь непрестающия печали наша, / виждь обращение и слезы не презри, / но приими паки благоутробия ради, / прошения наша во благое исполни, / от всякия напасти и недугов свободи, // да воспеваем державу благости Твоея.
Тропарь, глас 7:
Радуйся, Благодатная Богородице Дево: (трижды)
На утрени
На Бог Господь: тропарь тойже, трижды.
По 1-м стихословии седален, глас 8:Мене, заблуждшаго, на горах лютых преступлений / взыщи, Слове, / и к Себе воззови, / и умерщвлена грехом паки оживи, / темже слышу Твоя словеса: / «Моему созданию не хощу погибнути, / но хощу ему спастися / и в познание истины приити, / яко грядущаго ко Мне не изгоняю вон». / Молитвами Приснодевы, // Милостиве, помилуй мя, падшаго.
Слава, и ныне, тойже.
По 2-м стихословии седален, глас 8:Господи, пришедый в мир грешники призвати / и разбойника, и мытаря, и сына блуднаго приемый, / паче всех мене, согрешившаго Тебе, / человеколюбно приими, Спасе, / ради молитв рождшия Тя, // да избавлюся от плена страстей и вечнаго осуждения.
Слава, и ныне, тойже.
На полиелеи величание:Величаем Тя, / Пресвятая Дево, / Богоизбранная Отроковице, / и чтим образ Твой святый, / имже точиши исцеления // всем, с верою притекающим.
По полиелеи седален, глас 2:Болезни претерпевшая многия / в распятии Сына и Бога Твоего, Пречистая, / воздыхала еси горце у Креста стоящи, / волю же Отчую и любовь Божественную познавше. / Сего Агнца Божия, за грехи мира закланнаго, / яко Искупителя и смерти Победителя, // падшим провозвестила еси, Всенепорочная.
Слава, и ныне, тойже.
Степенна, 1-й антифон 4-го гласа.Прокимен, глас 4: Помяну имя Твое / во всяком роде и роде.
Стих: Слыши, Дщи, и виждь, и приклони ухо Твое.
Евангелие от Луки, зачало 4.
По 50-м псалме стихира, глас 2: Богодарованную благодать... (зри на Господи, воззвах)
Канон, глас 8.
Песнь 1Ирмос: Колесницегонителя фараоня погрузи, / чудотворяй иногда, / Моисейский жезл, крестообразно поразив / и разделив море, / Израиля же беглеца, пешеходца спасе, // песнь Богови воспевающа.
Припев: Пресвятая Богородице, спаси нас.
Слово Божие светодательное и Премудрость Отчую, Дево Чистая, рождшая, просвети мое неразумие, и слово ми подаждь воспети Тя, Богородице, Тобою бо исполнися Божие о мире смотрение; Бог во плоти явися, спасти погибшаго человека.
Пророцы духоноснии нарекоша Тя, Дево, и Купиною Неопалимою, и Ковчегом, и Скинией, и Дверию, и Горою несекомою: ныне же собором верных Богородицею Тя исповедуем, и образ сей честно прославляем, яко залог Божия ко грешником снисхождения.
Слава: Чрез икону Твою, Пречистая, «Взыскание погибших» именуемую, являеши о мире милосердое промышление, бедствующих от смерти избавляеши, согрешивших исправляеши, да ни едина душа останется вопиющей напрасно: Владычице, помози, потщися, погибаем!
И ныне: Падением прародителей, змием прельщенных, истекоша злая на род человеческий, рожденным же от Тебе, Благословенная, токи благодати пролияшася, спасая нас от клятвы и вечныя смерти: радуйся, мира греховнаго обновление.
Песнь 3Ирмос: Утверждей в начале Небеса разумом / и землю на водах основавый, / на камени мя, Христе, заповедей Твоих утверди, // яко несть свят паче Тебе, Едине Человеколюбче.
Всю Тя Бог освяти Деву Всесветлую и Непорочную в женах. Пророки прообразив честно, иереи благословив, во Святая Святых всели, Ангелом пристави служити Тебе. Радуется Захария, и мы с ним Приснодеве возопием: радуйся, Предстательнице, яко свеща пред Престолом Божиим возжженная.
Всю Тя Духом Святым приочищенну разумев Гавриил, вопияше: «Радуйся, Благодатная, Господь с Тобою!». И пресущественное Слово плотию вселися в Тя, Богоневесто, Отчим Советом и Святаго Духа содействием. Радуйся, прародителей воззвание, нас с Богом примирение.
Слава: Воплотивыйся от Духа Святаго и Приснодевы Марии, свет нам возсия, Христе Боже, небо и земля веселятся, мы же, видя Тя, Слово Отчее, яко Отроча младо Матери предстояща, Тя Бога воплощеннаго и Богородицу песньми величаем.
И ныне: Пастыри, волхвы и Ангели прославиша Младенца, в яслех лежащаго, яко Бога в мир явльшагося. Ты же, Непорочная Дево, нищету вертепа смиренно приявшая, скорбь материнскую об Отрочати познала еси и служение Сыну Человеческому послушно подъяла еси: темже Тя, яко Мати Божию и Мати рода человеческаго почитаем.
Седален, глас 3:Страшно, еже впасти в руце Бога Жива, / Сей Судия есть помышлений и желаний сердечных. / Злобою бо обогатихся, и сладость греховную возлюбих, / и огню гееннскому подсужден бых, / но благодатию молитвы и поста очищеннаго // Твоим заступлением спаси мя, Мати Всепетая.
Песнь 4Ирмос: Ты моя крепость, Господи, / Ты моя и сила, / Ты мой Бог, Ты мое радование, / не оставль недра Отча, / и нашу нищету посетив. / Тем с пророком Аввакумом зову Ти: // силе Твоей слава, Человеколюбче.
Ты истинная спасения вина, Богомати, едина была еси: Творцу и Зиждителю от Твоих пречистых кровей плоть взаим давши, еюже смертныя сокрушишася двери и жизнь даровася человеком, иже взывают Ти: радуйся, погибших Взыскание.
Разумети тайну страшнаго Твоего Рождества, Приснодево, никакоже может ум человеческий, ниже ангельский: яко Бога Ты родила еси воплощеннаго паче естества, Творца и Законодателя и Агнца, вземлющаго грехи мира.
Слава: В женах Непорочная, егда Первенца Своего принесла еси в церковь, по закону чин очищения смиренно исполняющи, тогда праведный Симеон вознесе Отроча, свидетельствова всем, яко видеста очи его Бога Превечна, мира Спасителя. Радуйся, свет миру явившая.
И ныне: И благослови Тя Симеон и прорече: «Тебе же Самой душу пройдет оружие», - знаменуя тем Твое, Богомати, у Креста предстояние и скорбь чрезмерную о Сыне, Егоже неболезненно родила еси, Пречистая.
Песнь 5Ирмос: Вскую мя отринул еси / от лица Твоего, Свете Незаходимый, / и покрыла мя есть чуждая тьма, окаяннаго; / но обрати мя и к свету заповедей Твоих // пути моя направи, молюся.
Радуйся, благодати Живоприемный Источниче! Повсюду бо изливаеши верным воду спасения: иже в болезнех свобождение, иже во отчаянии - надежду, иже в бедах - крепость, являя всем скорбящим утешение.
Из ребр Сына Твоего истекшими струями мир очищается от скверны, Богородице, покаянием истинным извлеки потоки слез из души моея ожесточенныя, и яко цельбоносным дождем язвы и соблазны очисти, грешников приятелище.
Слава: Лучами истиннаго Света Христа, неизреченно из Тебе, Богородице, возсиявшаго, просвети наши омраченныя души и сердца, из тьмы неведения изведи и на пути заповедей Христовых утверди, заблуждших Наставнице!
И ныне: Ангели на небеси радуются о единем грешнице кающемся. Мы же на земли, в беззакониях сущии, к Тебе, погибших Взыскание, прибегаем: в унынии спящих и грехом покровенных пробуди, молитвою ум озаряя, и тучу гнева Божия отведи, солнца Светлейшая.
Песнь 6Ирмос: Очисти мя, Спасе, / многа бо беззакония моя, / и из глубины зол возведи, молюся: / к Тебе бо возопих, и услыши мя, // Боже спасения моего.
Идеже осеняет благодать от иконы Твоея, Царице Небесная, оттуда диаволя прогонится сила: не терпит бо светила благочестия видети падший денница. Ты моя надежда известная, Ты мое и пение, обуреваемых пристанище.
К Твоему ныне прибегаю заступлению, Богоизбранная, предвари мя избавити смущающаго потока озлоблений, враг бо греховными стрелами душу мою всю порази и оскверни сердце мечтаньми. Предстоятеля тьмы отгоняй Твоими молитвами, Всесильная.
Слава: Стоящих утверждение и грехом умерщвленных оживление, Мати Живота вечнаго, падшаго мя приими и от плена страстей свободи, оковы греха покаянием снимая, Узорешительнице Милостивая.
И ныне: Радуйся, Мати Избавителя, согрешивших отчаянно в смерть, паки призываеши к свету заповедей Христовых. Радуйся, лествице, извлекающая из рова погибели и возводящая к Горнему Отечеству, лета живота нашего сохраняя неврежденно и от сна лености пробуждая.
Кондак, глас 1:Спаса мира рождшая, / Пресвятая Богородице Дево, / Мати роду человеческому явилася еси / и грешником надеждою спасения; / дверь бо покаяния всем отверзаеши / и овцы разсеянныя к Сыну Твоему и Богу приводиши; // да будет едино стадо и един Пастырь.
Икос, глас тойже:Предызбранная от всех родов Дева Пречистая, / стадо, еже стяжа Кровию Сын Твой и Бог, / от бед избави, / видимыя и невидимыя враги отгоняюще, / да вси благодарно Ти воспоем: / радуйся, пламень любве неугасающий; / радуйся, грешных к небу воззвание; / радуйся, Взыскание заблуждших овец; // радуйся, от вечныя смерти избавляющая.
Песнь 7Ирмос: Божия снисхождения / огнь устыдеся в Вавилоне иногда. / Сего ради отроцы в пещи, радованною ногою, / яко во цветнице, ликующе, пояху: // благословен еси, Боже отец наших.
Тебе Заступницу и покров державен Христос дарова, вразумляти и очищати люди согрешившия, усердно к образу Твоему притекающия. Радуйся, теплая Предстательнице пред Сыном, Емуже поем: благословен еси, Боже отец наших.
Не токмо на небеси, но и в церкви святей предстоиши Престолу Божию, Царице Небесная, с чинми святых Ангел и с соборы пророк и Апостол, во славе велицей, и молишися за предстоящия прилежно, гнев Божий отвращая от вопиющих: благословен еси, Боже отец наших.
Слава: Споборствующи верным во брани на нападающия бездумно враги, даждь победительная, Дево, Мати Господа Сил, покрывающи Отечество наше и люди от огня и меча и от всякия напасти, да Владыце всех благодарне поем: благословен еси, Боже отец наших!
И ныне: Низложи гордынею вознесенныя умы, брани хотящия, Мати мира, и миром, яко оружием сильнейшим, козни врагов прекрати и в тишине вселенную сохрани, Божественное ограждение наше, внушая пети Творцу веков: благословен еси, Боже отец наших!
Песнь 8Ирмос: Седмерицею пещь / халдейский мучитель / Богочестивым неистовно разжже, / силою же лучшею спасены, сия видев, / Творцу и Избавителю вопияше: / отроцы, благословите, / священницы, воспойте, // людие, превозносите во вся веки.
Всем, сущим в бедах, руку помощи скоро простираеши, Пречистая: на водах спасение, смертоносныя язвы исцеление, вихрей и бурь прекращение и во мразех согреяние. Человеколюбивая Мати! В нужде и немощи сущих никогоже и никогдаже не оставляеши, Тя и Сына Твоего превозносящих во вся веки.
Узы неплодства яве разрешаеши, Богомати, ибо яко родившая Владыку всех и силу рождения подаеши, Благая, и к радости материнства жен опечаленных приобщаеши, да превозносят Тя во вся веки.
Слава: Воздыхания кающихся приемлеши прилежно, Всепетая, от множества припадающих к благолепней иконе Твоей; не презри долу лежащих и молитвы их вознеси Сыну Твоему и Богу; Егоже, отроцы, благословите, священницы, воспойте, людие, превозносите во вся веки.
И ныне: Се ныне приидох в Церковь и аз, Щедре, яко сын блудный ко отцу, расточив бо богатства, еже дал еси мне, гладом душевным истаеваю, под покров Рождшия Тя прибегаю, причастника Тайныя Вечери мя сотвори, да со избранными прославлю Тя во вся веки.
Песнь 9Ирмос: Ужасеся о сем Небо, / и земли удивишася концы, / яко Бог явися человеком плотски, / и чрево Твое бысть пространнейшее Небес. / Тем Тя, Богородицу, // Ангелов и человек чиноначалия величают.
Воинства безплотных трепетом содержими бяху, егда видеша Господа Славы, на Кресте распинаема. Ты же, Пренепорочная, Херувим Честнейшая, Агнца Божия, Сына Своего, на Древе зряще, оружие скорби крестной в сердце содержала еси, миру же спасение благовестила еси.
Избранная Агница Божия Слова, моли Пастыря добраго, душу Свою за нас положившаго, к десным овцам [нас] причислити, в час же смертный и на воздушных мытарствах покрый нас Своею благодатною силою, Державная, от страшных истязаний избавляя.
Слава: Древле дарованную мне ризу купелию Крещения раздрав безумно страстьми, и ужасаюся, окаянный, час помышляя Божественнаго истинно Страшнаго Суда: Дево Всенепорочная, предстани тогда и избави мя страшнаго прещения, яко Судию Рождшая.
И ныне: Устнами грешными приносим Ти, Всепетая, пред образом Твоим, простое сие пение, аще и недоумеем по достоянию воспети милости и величия Твоя, но от усердия дерзаем, на Твоя щедроты надеяся. Темже не возгнушайся грехов наших, но с любовию приими и яко погибающих спаси.
Светилен:Да почтится Всепетая Матерь Божия, / Жизнь сущую рождши Христа Бога нашего, / райских дверей отверзение / и всего мира очищение, / к Животу возведение; / Сей есть пророком глаголавый - / Тому поклонимся, // Богу и Спасу душ наших.
На хвалитех стихиры, глас 8:О величия благости и неисчетнаго милосердия Твоего, Владычице! / Молящихся пред иконою Твоею / спасаеши от смерти грядущия, / от стрелы молниеносныя и всеяднаго огня, / от ярости врага и убийства мечем, / от труса и водою покрытия, / от воздуха смертоноснаго / или мраза свирепаго, / от болезни погибельныя и прочаго вреда. / От таковых напастей избавльшеся, / песньми хвалебными Тя немолчно величаем, // яко Мати стихиями обладающаго Владыки Христа.
Глас 6:О Благодатная Дево, / заблуждших Наставнице верная, / упование наше непреложное, / воззри кротким оком Твоим на предстоящия люди, / покров Твой простри, от праведнаго гнева Судии нас защищая, // Всемогущая, яко Мати Сына Божия.
Глас 5:Собезначальному Слову / истинная Мати сущи, / о нас хотяще воздати в час Суда слово, / предстани и умоли Сына Своего теплыми [к Нему] мольбами; / вемы бо яко много могут Матерния Твоя молитвы, / и сих ради надеемся обрести милость // в день Страшнаго испытания.
Слава, и ныне, глас 1:Небесных чинов радование, / на земли человеков крепкое предстательство, / Пастыря добраго Мати Преблагая, / спаси ны, иже к Тебе прибегающия, / яко на Тя упование по Бозе возложихом. / Мира благоукрашение, отчаянных спасение, / умножи стадо Христово словесных овец, / в преподобии и правде живущия, // яко Ты еси падших Возстание.
Славословие великое. Ектении и отпуст.
Молитва 1О Богоизбранная Заступнице грешных, Взыскание погибших и Наставнице заблуждших! Ты не презираешь удалившейся своеволием от пажити Сына Твоего блуждающей в дебрех греха бедныя словесныя овцы, но шед, ищешь заблуждшую. Кто изследит пути милосердия Твоего? Будь милостива ко всем: погибающих извлеки из бездны погибели, заблуждших обрящи и настави, удаленных обрати и привлеки, обращающихся к Тебе и приближающихся приими и спаси. Всех же кающихся к Сыну Твоему, доброму Пастырю и Богу нашему, приведи, да молитвами Твоими не будет ни единыя овцы, без вести пропавшия, но да будет едино стадо и един Пастырь, Иже упасет души наша и открыет ходатайством Твоим двери во обители вечныя. Аминь.
Молитва 2О Пресвятая Владычице Богородице, Взыскание погибших! Призри милостивым Твоим оком на молящихся пред честною иконою Твоею. Воздвигни нас из глубины греховныя: просвети ум наш, омраченный страстьми, уврачуй язвы душ и телес наших. Ты веси непрестающия скорби и вся немощи наша: подай нам руку помощи, облегчи страдания. Буди нам милосердия и мира источник, утешение в бедах и крепкое прибежище грешником кающимся. Даруй нам исправление греховныя жизни нашея: заблуждших на путь правый настави, падших и погибающих силою благодати спаси. От внезапныя смерти избави, с Сыном Твоим и Судиею Праведным нас примири и вечныя муки свободи. Милосердным же предстательством Твоим сподоби нас вселитися во обителех небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно и во веки веков. Аминь.