Служба святой мученице Лукии Сиракузской
К приближающейся памяти святой мученицы Луции (в нашем календаре - Лукии) Сиракузской (†304) выкладываю в «Уставные заметки» полиелейную службу ей, составленную в 2019 году клириком Одесской епархии Украинской Православной Церкви протоиереем Илией Тетерько. Последование публикуется по авторской машинописи, текст цензурными инстанциями не рассматривался. В славянской Минее мученице нет самостоятельной службы, но она упоминается в Богородичнах 1-го канона службы святым пяточисленным мученикам, чья память совершается в тот же день.
13 декабря
СЛУЖБА
святой деве-мученице Луции
НА ВЕЧЕРНИ
На Господи, воззвах: стихиры, глас 1:Девства добротами украшена, / нетленно соблюла еси тело Христу, Жениху твоему, / Луцие дево всечестная, / и просвещена мученическими блистаньми, / вселилася еси в чертог Божественный. / Темже твое всемирное совершаем торжество, // Спаса величающе, Тя славою увенчавшаго.
Теченьми страдальческих кровей / обагрив твою священную одежду, Луцие, / возшла еси, радуяся, в Небесный храм, / явитися Богу нашему, / подающему венцы страдавшим. / Того прилежно моли // всем низпослати велию милость.
Житие твое равноангельно, / мучение же просвещенно, / имже сподобилася еси со Ангелы ликовати в радости, / чудесы Божественными землю озаряя, / дево честная Луцие. / Тем твоими молитвами проси // даровати всем велию милость.
Светло во страдании твоем возсияла еси, страстотерпице, / от кровей твоих преиспещрена, / и, яко красная голубица, к Небеси возлетела еси, Луцие, // темже молися всегда о любовию чтущих тя.
Слава, глас тойже:Со Ангельскими чинми сочеталася еси, славная, / мир оставльши и Христа возжелевши, / Луцие дево всечестная, // испроси нам велия милости.
И ныне, Богородичен, глас тойже: Всемирную славу:
На стиховне стихиры, глас 2.
Подобен: Доме Евфрафов:Дом Духа Божественнаго, / исполненный чистоты и правды, / явилася еси, Луцие прехвальная, / сосуде честнаго девства, // и веры утверждение.
Стих: Святым, иже суть на земли Его, / удиви Господь вся хотения своя в них.
Царство Небесное, / славная дево Луцие, / наследила еси страданием, / и Небесный чертог воистинну, // и свет незаходимый.
Стих: Многи скорби праведным, / и от всех их избавит я Господь.
Богом призванная, / мученице Луцие славная, / девство свое и веру чистую / на алтарь Христов принесла еси. // Темже ныне радуешися.
Слава, глас тойже:Услыши наша моления, / Луцие всечудная дево, / любовию к тебе прибегающих, / и сердечная подавай прошения // чтущим святую память твою.
И ныне, Богородичен, глас и подобен тойже:Пресвятая Мати Божия, / с лики дев святых / молися из Тебе Воплощенному, / Солнцу Правды, Господу, // спасти и просветити души наша.
Тропарь, глас 4:Подвигом, мученице, добрым подвизався / и светлыя венцы приим, / Свету предстоиши Трисолнечному, / просвещаема причастием невещественныя радости, / Луцие дево всечестная, / того сияньми // просвети души наша.
НА УТРЕНИ
По стихословии седален, глас 6:Светлый твой, мученице Луцие, праздник / вся созва радостно на трапезу днесь, / предложив страданий твоих борения, мужество и противление, / имиже насыщшеся, верою тя и любовию ублажаем.
Слава, и ныне, Богородичен:Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:Величаем тя, / страстотерпице святая Луцие, / и чтим честная страдания твоя, // яже за Христа претерпела еси.
Псалом избранный:1. Терпя потерпех Господа, и внят ми, и услыша молитву мою.
2. Бог нам Прибежище и Сила, Помощник в скорбех, обретших ны зело.
1. Многи скорби праведным и от всех их избавит я Господь.
2. Приведутся Царю девы, приведутся в веселии и радовании.
1. Девы да восхвалят имя Господне.
2. Суди ми, Господи, яко аз незлобою моею ходих.
1. Искуси мя, Господи, и испытай мя, разжи утробы моя, и сердце мое.
2. Да не погубиши с нечестивыми душу мою.
1. Аз же незлобою моею ходих, избави мя, Господи, и помилуй мя.
2. Нога моя ста на правоте: в церквах благословлю Тя, Господи.
По полиелеи седален, глас 8:Воспеваем житие твое всечудное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно память твою, // мученице Луцие добропобедная.
Слава, и ныне, Богородичен, глас тойже:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси // молитвами Твоими, Пречистая.
Таже степенна, 1-й антифон, глас 4.Прокимен, глас 4: Святым, иже суть на земли Его, / удиви Господь вся хотения своя в них.
Стих: Презрех Господа предо мною выну, / яко одесную мене есть, да не подвижуся.
Всякое дыхание: Евангелие от Матфея, зачало 36.
По 50-м псалме стихира самогласна, глас 6:Троическим Светом озаряема, / со Ангелы ныне ликуеши, / предстоя Престолу всех Царя / и почесть приемля трудом своих, Луцие предивная, / Егоже присно моли // о чтущих святую память твою, преблаженная.
Канон святыя мученицы, глас 6:
Песнь 1Ирмос: Яко по суху, пешешествовав Израиль / по бездне стопами, / гонителя фараона / видя потопляема, / Богу / победную песнь // поим, вопияше.
Песнь хвалебную, Богу содействующу, приношу ти, Луцие честная: / от избытка бо сердца глаголют уста и потщатся на славословие твое.
Мученическими озарена светлостьми, / чистому предстоиши Жениху твоему, Луцие славная, / душетленных прегрешений просящи избавитися хвалящим тя.
Невеста Христова, Божественною благостию украсилася еси, и девства добротами, / и Божественными кровьми честнаго мучения, / сугубыми венцы венчаема, Луцие славная.
Богородичен: Боголепное селение, Чистая, Ты была еси, / Небес пространнейшее и чистейшее, Богородице Дево Марие, / и ныне о Тебе радуется девственный лик.
Песнь 3Ирмос: Несть свят, / якоже Ты, / Господи Боже мой, / вознесый рог верных Твоих, Блаже, / и утвердивый нас на камени // исповедания Твоего.
Светом Пресущественным просвещенна, Луцие чудная, / воспламенилася еси любовию Божественною и явилася еси заря пресветлая, / облистающая безбожия нощь.
Плоть покорила еси Христу, мученица славная Луцие, / и жизни нетленныя сподобилася еси, блаженная дево.
Падеся мучитель под нозе твои, всеславная, / низложен быв твоим терпением и сопротивлением, Луцие всечестная.
Богородичен: Якоже неистощимое сокровище дарований Тя имуще, Владычице, / независтныя дары от Тебе чудес вси приемлем.
Седален, глас 2:Вольными твоими стремленьми / вошла еси ко страданию, волею Христа подражающи / и победивши светло тьмы миродержца, / венценосица явилася еси, Луцие Богоприятная. / Поминай нас любовию чтущих святую память твою.
Слава, и ныне, глас тойже:Упование христиан, Пресвятая Дево, / Егоже родила еси Бога, паче ума же и слова, / непрестанно моли с вышними Силами подати оставление грехов наших всех / и исправление жития верою и любовию присно Тя славящим.
Песнь 4Ирмос: Христос моя сила, / Бог и Господь, / честная Церковь / Боголепно поет, взывающи, // от смысла чиста о Господе празднующи.
Блистают мученицы светозарныя мощи светом исцелений, верою к сим притекающим, / благодать бо приимь от источников Спасовых, / Того вольней страсти поревновавше.
Исцеление тя даде всем верным Владыка Христос, Луцие добропобедная, / и твоими Божественными молитвами целиши страсти душ наших.
Силою Христа от Девы Марии возсиявшаго, / девы юныя свирепство льстиваго змия попирают / и посрамляют того безумие и немощную дерзость.
Богородичен: Свет рождшая, тьму разруши многих моих прегрешений Твоею зарею, Пренепорочная Владычице, / Яже Солнце правды верным возсиявшая.
Песнь 5Ирмос: Божиим светом Твоим, Блаже, / утреннюющих Ти души / любовию озари, молюся, / Тя ведети, Слове Божий, / истиннаго Бога, // от мрака греховнаго взывающа.
Потопы кровей твоих миро исцеления всем источают / и отгоняют смрад недугов и скорбей.
Свещу душевную елеем добродетелей разумно украсив, Луцие славная, / огнем страдания возжегла еси ю. / Темже в чертог Божественный достигла еси.
Потекла еси, последуя Христовым стопам Божественным, / и общница показался еси Страстей Того и Царствия, всеславная, / за любовь твою изрядно венчаваема.
Богородичен: Божественным сиянием Твоим, Благая, / просвети омраченную душу мою и к спасения стези направи, / Едина Спаса Христа рождшая.
Песнь 6Ирмос: Житейское море, / воздвизаемое зря / напастей бурею, / к тихому пристанищу Твоему притек, вопию Ти: // возведи от тли живот мой, Многомилостиве.
Столп добродетелей непреклонен, и благочестия жилище ты была еси, / и мужества, и целомудрия приятелище, Луцие всехвальная.
Сладости Небесныя и пресветлыя радости исполнена еси, предстоя Христу, / Духом Святым и страдании очищенна, мученице достохвальная Луцие, / молись за люди твоя.
Богородичен: Архангельский глас вопием Ти: Радуйся, Благодатная, Господь с Тобою; / радуйся, Благословенная, Заступница наша и скорая в бедах Помощница.
Кондак, глас 6:Добродетельным житием на земли просиявшую / и на Небесех со Ангелы ныне ликующую, / деву всечудную и мученицу неодоленную, / сугубым венцем исповедничества и целомудрия увенчaнную, / Луцию воспоим вернии, / сия бо подает исцеления, // чтущим любовию святую память ея.
Песнь 7Ирмос: Росодательну убо пещь содела Ангел / преподобным отроком, / халдеи же опаляющее веление Божие мучителя увеща вопити: // благословен еси, Боже отец наших.
Непобедимым дерзновением и доблим умом, страстотерпице Луцие, / стала еси пред судищем, воплощение Спасово велегласно проповедуя / излиявшаго Себе даже до рабияго образа, Избавителя нашего.
Имела еси Бога помощника во твоих подвизех и защищающа, всемудрая, / сего ради венчавшися, мучителя победила еси, вопиющи: / благословен еси, Боже отец наших.
Светом Небеснаго просвещения озаряема, победоносная мученице Луцие, / воспевающия тя ныне просвещаеши, песнопоющия: / благословен еси, Боже отец наших.
Богородичен: Во тьме неразумения мя пребывающаго, просвети Светом Неприступным Сына Твоего, Пречистая, / и настави верно взывати Ему благочестно: / благословен еси, Боже отец наших.
Песнь 8Ирмос: Из пламене преподобным росу источил еси, / и праведнаго жертву с водою попалил еси: / вся бо твориши, Христе, токмо еже хотети. // Тя превозносим во вся веки.
Преестественными ряснами и красною одеждею украшена, яко царева дщерь, / во славе Христовой предстоиши, Луцие, взывающи: / Тя превозносим во вся веки.
Двери райския тебе отверз, приемлет тя Христос, Луцие всемудрая, / и в чертог Небесный вводит тя, / и царствия причастницу являет яко сообщницу Его страстей. / Емуже вопием: Тя превозносим во вся веки.
Просвещена сиянием чистоты и обагрении кровными испещренна, / предстоиши, Луцие девице, Христу Богу нашему, вопиюще со всеми святыми: / Тя превозносим во вся веки.
Богородичен: Яже Владыку всех плотию рождшая, насилия страстей избави мя, Отроковице, / и Творцу всяческих присвой любовию, поющаго во вся веки.
Песнь 9Ирмос: Бога / человеком не возможно видети, / на Него же не смеют чини Ангельстии взирати; / Тобою же, Всечистая, явися человеком / Слово воплощенно, / Его же величающе, // с Небесными вои Тя ублажаем.
Чиста жертва принеслася еси Христу Богу нашему, / и приношение пресветло, / и яко благовонный фимиам, Луцие Богомудрая.
Всю тя освяти Избавитель Господь, Луцие честная, / всею крепостию Сего от души возлюбившу.
Смотряя свыше, чудяшеся лик Ангельский терпению твоему, славная дево Луцие, / како безплотныя враги с плотию побеждала еси благодатию Христовою.
Совокупльшися с лики Безплотных и с мученическими соборы, прехвальная Луцие, / о нас всех Бога моли.
Богородичен: Мысленно Твоим стопам прикасаяся, Всенепорочная, молю Тя: / пение мое приими и от бед избави мя, молитвами Твоими, Дево Марие, / да любовию Тя величаю.
Светилен:Предстоще ныне Трисиянному Великому Свету / и пребывающе в неизреченней светлости со всеми святыми, / добрая мученице Луцие, помяни всех нас, / память твою светоносно совершающих.
Слава, и ныне, Богородичен:Света Превечнаго родила еси нам, Христа, Бога нашего, Пречистая Дево, / избавльшаго весь мир от лести диавола. / Темже молим Тя: не престай молящи, / да подаст нам милость Свою в День Судный.
На хвалитех стихиры, глас 4:Невесту нетленную, / украшеную Духом Святым, тя ведяще, / совершаем память твою святую, / мученице страстотерпице, / и, покланяющеся благочестно мощем твоим, / здравие почерпаем страстем нашим всегда, / Луцие дево всехвальная, // верою тя почитающе.
Дар принесла еси, твоих удов терзания, / Христу-Жениху твоему, веечестная. / Темже, чертогов тя пресветлых сподобив, / просвещает светом Божественныя славы Пресущный, / Емуже радующися предстоиши, / о нас прилежно моли, // верно славящих твоя, Луцие, страдания.
Память всесвященную честнаго твоего страдания совершающе, / Луцие мученице всехвальная, / славим во гласех непрестанных / даровавшаго терпение тебе твердое, / и победоносну тя показавшаго, // Иисуса Человеколюбца, и Спаса душ наших.
Глаголом внимающи сладким, / достославная Луцие, / Божественнаго и Всесвятаго Духа, / горесть всяку плотских страстей оставила еси / и смертию к безсмертней славе преминула еси, // Христа молящи всем даровати велию милость.
Слава, глас 8:Уязвися, Христе, любовию твоею сладкою Луция премудрая / и страдания славно претерпевает, Слове Божий, / темже к неболезненному преставляется наслаждению, / яко нескверна и нетленна. // Тоя молитвами даруй всем, Господи, велию милость.
И ныне, глас тойже:Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИПрокимен, глас 4: Святым, иже суть на земли Его, / удиви Господь вся хотения своя в них. Стих: Предзрех Господа предо мною выну, / яко одесную мене есть, да не подвижуся.
Апостол к Галатом, зачало 214.
Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.
Евангелие от Иоанна, зачало 51.
Причастен: Радуйтеся, праведнии, о Господе, правым подобает похвала.
МОЛИТВАО, достохвальная и премудрая мученице Христова Луцие! Ныне почитающе святую память твою, к тебе мы, грешнии и недостойнии, усердно прибегаем и во умилении сердец наших молимся. Ты от младенства своего паче всех благ земных Сладчайшаго Господа Иисуса Христа возлюбила еси и Тому чрез все житие верно последовала еси, Божественною благодатию душу свою питающи. Испроси убо и нам благодать просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних Его служити неленостно потщимся. Моли убо Спаса нашего да сподобит и нас странствие наше земное непреткновенно совершити, и в мире и покаянии житие наше проводити, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и Нераздельную, и воспоем Едино Божество и Царство, Отца и Сына и Святаго Духа во веки веков. Аминь.
13 декабря
СЛУЖБА
святой деве-мученице Луции
НА ВЕЧЕРНИ
На Господи, воззвах: стихиры, глас 1:Девства добротами украшена, / нетленно соблюла еси тело Христу, Жениху твоему, / Луцие дево всечестная, / и просвещена мученическими блистаньми, / вселилася еси в чертог Божественный. / Темже твое всемирное совершаем торжество, // Спаса величающе, Тя славою увенчавшаго.
Теченьми страдальческих кровей / обагрив твою священную одежду, Луцие, / возшла еси, радуяся, в Небесный храм, / явитися Богу нашему, / подающему венцы страдавшим. / Того прилежно моли // всем низпослати велию милость.
Житие твое равноангельно, / мучение же просвещенно, / имже сподобилася еси со Ангелы ликовати в радости, / чудесы Божественными землю озаряя, / дево честная Луцие. / Тем твоими молитвами проси // даровати всем велию милость.
Светло во страдании твоем возсияла еси, страстотерпице, / от кровей твоих преиспещрена, / и, яко красная голубица, к Небеси возлетела еси, Луцие, // темже молися всегда о любовию чтущих тя.
Слава, глас тойже:Со Ангельскими чинми сочеталася еси, славная, / мир оставльши и Христа возжелевши, / Луцие дево всечестная, // испроси нам велия милости.
И ныне, Богородичен, глас тойже: Всемирную славу:
На стиховне стихиры, глас 2.
Подобен: Доме Евфрафов:Дом Духа Божественнаго, / исполненный чистоты и правды, / явилася еси, Луцие прехвальная, / сосуде честнаго девства, // и веры утверждение.
Стих: Святым, иже суть на земли Его, / удиви Господь вся хотения своя в них.
Царство Небесное, / славная дево Луцие, / наследила еси страданием, / и Небесный чертог воистинну, // и свет незаходимый.
Стих: Многи скорби праведным, / и от всех их избавит я Господь.
Богом призванная, / мученице Луцие славная, / девство свое и веру чистую / на алтарь Христов принесла еси. // Темже ныне радуешися.
Слава, глас тойже:Услыши наша моления, / Луцие всечудная дево, / любовию к тебе прибегающих, / и сердечная подавай прошения // чтущим святую память твою.
И ныне, Богородичен, глас и подобен тойже:Пресвятая Мати Божия, / с лики дев святых / молися из Тебе Воплощенному, / Солнцу Правды, Господу, // спасти и просветити души наша.
Тропарь, глас 4:Подвигом, мученице, добрым подвизався / и светлыя венцы приим, / Свету предстоиши Трисолнечному, / просвещаема причастием невещественныя радости, / Луцие дево всечестная, / того сияньми // просвети души наша.
НА УТРЕНИ
По стихословии седален, глас 6:Светлый твой, мученице Луцие, праздник / вся созва радостно на трапезу днесь, / предложив страданий твоих борения, мужество и противление, / имиже насыщшеся, верою тя и любовию ублажаем.
Слава, и ныне, Богородичен:Труждает мя буря греховная / и возмущение безместных помышлений: / умилосердися, Всенепорочная, / и руку помощи, яко Милосердная, простри ми, / да величаю Тя, спасаемый.
Величание:Величаем тя, / страстотерпице святая Луцие, / и чтим честная страдания твоя, // яже за Христа претерпела еси.
Псалом избранный:1. Терпя потерпех Господа, и внят ми, и услыша молитву мою.
2. Бог нам Прибежище и Сила, Помощник в скорбех, обретших ны зело.
1. Многи скорби праведным и от всех их избавит я Господь.
2. Приведутся Царю девы, приведутся в веселии и радовании.
1. Девы да восхвалят имя Господне.
2. Суди ми, Господи, яко аз незлобою моею ходих.
1. Искуси мя, Господи, и испытай мя, разжи утробы моя, и сердце мое.
2. Да не погубиши с нечестивыми душу мою.
1. Аз же незлобою моею ходих, избави мя, Господи, и помилуй мя.
2. Нога моя ста на правоте: в церквах благословлю Тя, Господи.
По полиелеи седален, глас 8:Воспеваем житие твое всечудное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно память твою, // мученице Луцие добропобедная.
Слава, и ныне, Богородичен, глас тойже:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси // молитвами Твоими, Пречистая.
Таже степенна, 1-й антифон, глас 4.Прокимен, глас 4: Святым, иже суть на земли Его, / удиви Господь вся хотения своя в них.
Стих: Презрех Господа предо мною выну, / яко одесную мене есть, да не подвижуся.
Всякое дыхание: Евангелие от Матфея, зачало 36.
По 50-м псалме стихира самогласна, глас 6:Троическим Светом озаряема, / со Ангелы ныне ликуеши, / предстоя Престолу всех Царя / и почесть приемля трудом своих, Луцие предивная, / Егоже присно моли // о чтущих святую память твою, преблаженная.
Канон святыя мученицы, глас 6:
Песнь 1Ирмос: Яко по суху, пешешествовав Израиль / по бездне стопами, / гонителя фараона / видя потопляема, / Богу / победную песнь // поим, вопияше.
Песнь хвалебную, Богу содействующу, приношу ти, Луцие честная: / от избытка бо сердца глаголют уста и потщатся на славословие твое.
Мученическими озарена светлостьми, / чистому предстоиши Жениху твоему, Луцие славная, / душетленных прегрешений просящи избавитися хвалящим тя.
Невеста Христова, Божественною благостию украсилася еси, и девства добротами, / и Божественными кровьми честнаго мучения, / сугубыми венцы венчаема, Луцие славная.
Богородичен: Боголепное селение, Чистая, Ты была еси, / Небес пространнейшее и чистейшее, Богородице Дево Марие, / и ныне о Тебе радуется девственный лик.
Песнь 3Ирмос: Несть свят, / якоже Ты, / Господи Боже мой, / вознесый рог верных Твоих, Блаже, / и утвердивый нас на камени // исповедания Твоего.
Светом Пресущественным просвещенна, Луцие чудная, / воспламенилася еси любовию Божественною и явилася еси заря пресветлая, / облистающая безбожия нощь.
Плоть покорила еси Христу, мученица славная Луцие, / и жизни нетленныя сподобилася еси, блаженная дево.
Падеся мучитель под нозе твои, всеславная, / низложен быв твоим терпением и сопротивлением, Луцие всечестная.
Богородичен: Якоже неистощимое сокровище дарований Тя имуще, Владычице, / независтныя дары от Тебе чудес вси приемлем.
Седален, глас 2:Вольными твоими стремленьми / вошла еси ко страданию, волею Христа подражающи / и победивши светло тьмы миродержца, / венценосица явилася еси, Луцие Богоприятная. / Поминай нас любовию чтущих святую память твою.
Слава, и ныне, глас тойже:Упование христиан, Пресвятая Дево, / Егоже родила еси Бога, паче ума же и слова, / непрестанно моли с вышними Силами подати оставление грехов наших всех / и исправление жития верою и любовию присно Тя славящим.
Песнь 4Ирмос: Христос моя сила, / Бог и Господь, / честная Церковь / Боголепно поет, взывающи, // от смысла чиста о Господе празднующи.
Блистают мученицы светозарныя мощи светом исцелений, верою к сим притекающим, / благодать бо приимь от источников Спасовых, / Того вольней страсти поревновавше.
Исцеление тя даде всем верным Владыка Христос, Луцие добропобедная, / и твоими Божественными молитвами целиши страсти душ наших.
Силою Христа от Девы Марии возсиявшаго, / девы юныя свирепство льстиваго змия попирают / и посрамляют того безумие и немощную дерзость.
Богородичен: Свет рождшая, тьму разруши многих моих прегрешений Твоею зарею, Пренепорочная Владычице, / Яже Солнце правды верным возсиявшая.
Песнь 5Ирмос: Божиим светом Твоим, Блаже, / утреннюющих Ти души / любовию озари, молюся, / Тя ведети, Слове Божий, / истиннаго Бога, // от мрака греховнаго взывающа.
Потопы кровей твоих миро исцеления всем источают / и отгоняют смрад недугов и скорбей.
Свещу душевную елеем добродетелей разумно украсив, Луцие славная, / огнем страдания возжегла еси ю. / Темже в чертог Божественный достигла еси.
Потекла еси, последуя Христовым стопам Божественным, / и общница показался еси Страстей Того и Царствия, всеславная, / за любовь твою изрядно венчаваема.
Богородичен: Божественным сиянием Твоим, Благая, / просвети омраченную душу мою и к спасения стези направи, / Едина Спаса Христа рождшая.
Песнь 6Ирмос: Житейское море, / воздвизаемое зря / напастей бурею, / к тихому пристанищу Твоему притек, вопию Ти: // возведи от тли живот мой, Многомилостиве.
Столп добродетелей непреклонен, и благочестия жилище ты была еси, / и мужества, и целомудрия приятелище, Луцие всехвальная.
Сладости Небесныя и пресветлыя радости исполнена еси, предстоя Христу, / Духом Святым и страдании очищенна, мученице достохвальная Луцие, / молись за люди твоя.
Богородичен: Архангельский глас вопием Ти: Радуйся, Благодатная, Господь с Тобою; / радуйся, Благословенная, Заступница наша и скорая в бедах Помощница.
Кондак, глас 6:Добродетельным житием на земли просиявшую / и на Небесех со Ангелы ныне ликующую, / деву всечудную и мученицу неодоленную, / сугубым венцем исповедничества и целомудрия увенчaнную, / Луцию воспоим вернии, / сия бо подает исцеления, // чтущим любовию святую память ея.
Песнь 7Ирмос: Росодательну убо пещь содела Ангел / преподобным отроком, / халдеи же опаляющее веление Божие мучителя увеща вопити: // благословен еси, Боже отец наших.
Непобедимым дерзновением и доблим умом, страстотерпице Луцие, / стала еси пред судищем, воплощение Спасово велегласно проповедуя / излиявшаго Себе даже до рабияго образа, Избавителя нашего.
Имела еси Бога помощника во твоих подвизех и защищающа, всемудрая, / сего ради венчавшися, мучителя победила еси, вопиющи: / благословен еси, Боже отец наших.
Светом Небеснаго просвещения озаряема, победоносная мученице Луцие, / воспевающия тя ныне просвещаеши, песнопоющия: / благословен еси, Боже отец наших.
Богородичен: Во тьме неразумения мя пребывающаго, просвети Светом Неприступным Сына Твоего, Пречистая, / и настави верно взывати Ему благочестно: / благословен еси, Боже отец наших.
Песнь 8Ирмос: Из пламене преподобным росу источил еси, / и праведнаго жертву с водою попалил еси: / вся бо твориши, Христе, токмо еже хотети. // Тя превозносим во вся веки.
Преестественными ряснами и красною одеждею украшена, яко царева дщерь, / во славе Христовой предстоиши, Луцие, взывающи: / Тя превозносим во вся веки.
Двери райския тебе отверз, приемлет тя Христос, Луцие всемудрая, / и в чертог Небесный вводит тя, / и царствия причастницу являет яко сообщницу Его страстей. / Емуже вопием: Тя превозносим во вся веки.
Просвещена сиянием чистоты и обагрении кровными испещренна, / предстоиши, Луцие девице, Христу Богу нашему, вопиюще со всеми святыми: / Тя превозносим во вся веки.
Богородичен: Яже Владыку всех плотию рождшая, насилия страстей избави мя, Отроковице, / и Творцу всяческих присвой любовию, поющаго во вся веки.
Песнь 9Ирмос: Бога / человеком не возможно видети, / на Него же не смеют чини Ангельстии взирати; / Тобою же, Всечистая, явися человеком / Слово воплощенно, / Его же величающе, // с Небесными вои Тя ублажаем.
Чиста жертва принеслася еси Христу Богу нашему, / и приношение пресветло, / и яко благовонный фимиам, Луцие Богомудрая.
Всю тя освяти Избавитель Господь, Луцие честная, / всею крепостию Сего от души возлюбившу.
Смотряя свыше, чудяшеся лик Ангельский терпению твоему, славная дево Луцие, / како безплотныя враги с плотию побеждала еси благодатию Христовою.
Совокупльшися с лики Безплотных и с мученическими соборы, прехвальная Луцие, / о нас всех Бога моли.
Богородичен: Мысленно Твоим стопам прикасаяся, Всенепорочная, молю Тя: / пение мое приими и от бед избави мя, молитвами Твоими, Дево Марие, / да любовию Тя величаю.
Светилен:Предстоще ныне Трисиянному Великому Свету / и пребывающе в неизреченней светлости со всеми святыми, / добрая мученице Луцие, помяни всех нас, / память твою светоносно совершающих.
Слава, и ныне, Богородичен:Света Превечнаго родила еси нам, Христа, Бога нашего, Пречистая Дево, / избавльшаго весь мир от лести диавола. / Темже молим Тя: не престай молящи, / да подаст нам милость Свою в День Судный.
На хвалитех стихиры, глас 4:Невесту нетленную, / украшеную Духом Святым, тя ведяще, / совершаем память твою святую, / мученице страстотерпице, / и, покланяющеся благочестно мощем твоим, / здравие почерпаем страстем нашим всегда, / Луцие дево всехвальная, // верою тя почитающе.
Дар принесла еси, твоих удов терзания, / Христу-Жениху твоему, веечестная. / Темже, чертогов тя пресветлых сподобив, / просвещает светом Божественныя славы Пресущный, / Емуже радующися предстоиши, / о нас прилежно моли, // верно славящих твоя, Луцие, страдания.
Память всесвященную честнаго твоего страдания совершающе, / Луцие мученице всехвальная, / славим во гласех непрестанных / даровавшаго терпение тебе твердое, / и победоносну тя показавшаго, // Иисуса Человеколюбца, и Спаса душ наших.
Глаголом внимающи сладким, / достославная Луцие, / Божественнаго и Всесвятаго Духа, / горесть всяку плотских страстей оставила еси / и смертию к безсмертней славе преминула еси, // Христа молящи всем даровати велию милость.
Слава, глас 8:Уязвися, Христе, любовию твоею сладкою Луция премудрая / и страдания славно претерпевает, Слове Божий, / темже к неболезненному преставляется наслаждению, / яко нескверна и нетленна. // Тоя молитвами даруй всем, Господи, велию милость.
И ныне, глас тойже:Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИПрокимен, глас 4: Святым, иже суть на земли Его, / удиви Господь вся хотения своя в них. Стих: Предзрех Господа предо мною выну, / яко одесную мене есть, да не подвижуся.
Апостол к Галатом, зачало 214.
Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.
Евангелие от Иоанна, зачало 51.
Причастен: Радуйтеся, праведнии, о Господе, правым подобает похвала.
МОЛИТВАО, достохвальная и премудрая мученице Христова Луцие! Ныне почитающе святую память твою, к тебе мы, грешнии и недостойнии, усердно прибегаем и во умилении сердец наших молимся. Ты от младенства своего паче всех благ земных Сладчайшаго Господа Иисуса Христа возлюбила еси и Тому чрез все житие верно последовала еси, Божественною благодатию душу свою питающи. Испроси убо и нам благодать просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних Его служити неленостно потщимся. Моли убо Спаса нашего да сподобит и нас странствие наше земное непреткновенно совершити, и в мире и покаянии житие наше проводити, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и Нераздельную, и воспоем Едино Божество и Царство, Отца и Сына и Святаго Духа во веки веков. Аминь.