Иная служба священномученику Павлину Могилевскому
Завтра Церковь совершает память святого священномученика Павлина (Крошечкина), архиепископа Могилевского (†1937). На заседании Священного Синода Русской Православной Церкви 25 августа 2022 года была одобрена к общецерковному употреблению служба святому (журнал №78, §1), составленная, по-видимому, в Новоспасском ставропигиальном монастыре. Это чинопоследование будет теперь основным для нашей Церкви. Я же для памяти (и к 85-летию мученичества святого) выкладываю в «Уставные заметки» текст иной службы, составленной в 2008 году в Белорусской Православной Церкви и много лет употреблявшейся в Могилевской епархии, на месте последнего земного служения новомученика.
21 октября́ / 3 ноября́
Слу́жба
священному́ченика Павли́на, архиепи́скопа Могиле́вскаго
На вели́цей вече́рни
На Го́споди, воззва́х стихи́ры, глас 8:Днесь све́тло красу́ется богоспаса́емый град Могиле́в в прославле́нии своего́ архипа́стыря, святи́теля Павли́на, и па́ства его́ ликовству́ющи ра́дуется и вси правосла́внии хва́лятся, ты же, о́тче наш Павли́не, с собо́ром новому́чеников Христо́вых моли́ Человеколю́бца Христа́ Бо́га на́шего лю́дем правосла́вным тишину́ дарова́ти, земли́ плодоро́дие и душа́м на́шим ве́лию ми́лость.
Земля́ Пе́нзенская просла́вися, я́ко в преде́лех ея́ от благочести́ваго ко́рене Космы́ и Евдоки́и плод благокра́сен прозябе́, Петр отроча́ благонра́вное, апо́столу Петру́ тезоимени́тое. В сем же и́мени ве́лий путь тебе́ преднарече́ся.
Путь де́вства и нищеты́, своея́ во́ли отсече́ние избра́л еси́, блаже́нне, и́ноческое постриже́ние прия́л еси́, в не́мже и́менем Павли́н нарече́н бе, да путе́м ми́лостиваго святи́теля Нола́нскаго ше́ствуеши.
Прехва́льный о́тче Павли́не му́чениче, тя ни темни́ца потаи́ла есть, возсе́л бо еси́ та́мо, я́ко на престо́ле, ве́лия ре́вность Бо́жия объя́т тя, и испо́лнился еси́ огня́, поя́сти хотя́щаго сопроти́вныя. Внутрь темни́цы быв, я́ко свети́льник, пред Бо́гом сгора́л еси́. Христу́ моли́ся дарова́ти душа́м на́шим мир и ве́лию ми́лость.
Прехва́льный о́тче Павли́не му́чениче, ни земля́ тя потаи́ла есть, но не́бо прия́т тя и отверзо́шася ти ра́йския две́ри. Христу́ моли́ся дарова́ти душа́м на́шим мир и ве́лию ми́лость.
Тих нра́вом, кро́ток и смире́н се́рдцем вои́стину пред Бо́гом и людьми́ яви́лся еси́, и́го Христо́во чрез все житие́ твое́ до́бре пронесы́й, во оби́телех небе́сных упокои́лся еси́, блаже́нне. Моли́ся ны́не и о нас, да и мы, на земли́ до́бре пожи́вше, Ца́рствия Бо́жия насле́дницы бы́ти сподо́бимся.
Сла́ва, глас 8:Бог тя возвели́чи, святи́телю о́тче Павли́не, иера́рхом Це́ркве Своея́ поста́ви, ты же служе́ние сие́, я́ко во́лю благу́ю Его́ восприи́м, в святи́тельстем по́двизе твое́м при́сно ревнова́л еси́ о сла́ве Отца́ и Сы́на и Свята́го Ду́ха - Тро́ицы Единосу́щныя и Неразде́льныя.
И ны́не, Богоро́дичен догма́тик, глас то́йже:Царь Небе́сный за человеколю́бие на земли́ яви́ся, и с челове́ки поживе́, от Де́вы бо Чи́стыя плоть прие́мый и из Нея́ проше́дый с восприя́тием. Еди́н есть Сын, сугу́б естество́м, но не Ипоста́сию. Те́мже соверше́нна Того́ Бо́га и соверше́нна Челове́ка вои́стину пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.
Вход. Проки́мен дне. Чте́ния три.
При́тчей чте́ние (главы́ 10, 3 и 8):Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, все же честно́е недосто́йно ея́ есть. Долгота́ бо дней и ле́та живота́ в десни́це ея́, в шу́ице же ея́ бога́тство и сла́ва; от уст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да! честна́я бо реку́, и блаже́н челове́к, и́же пути́ моя́ сохрани́т, исхо́ди бо мои́ - исхо́ди живота́, и уготовля́ется хоте́ние от Го́спода. Сего́ ра́ди молю́ вас и предлага́ю мой глас сыново́м челове́ческим, я́ко аз, прему́дрость, устро́их сове́т, и ра́зум и смысл аз призва́х. Мой сове́т и утвержде́ние, мой ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́заннии же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси глаго́лы уст мои́х, ничто́же в них стро́потно, ниже́ развраще́нно. Вся пра́ва суть разумева́ющим, и про́ста обрета́ющим ра́зум. Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха.
Прему́дрости Соломо́новы чте́ние (главы́ 10, 6, 8 и 9):Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет их от сме́рти. Сконча́вшуся му́жу пра́ведну, не поги́бнет наде́жда. Сын бо пра́веден ражда́ется в живо́т: и во благи́х свои́х плод пра́вды обы́мет. Свет пра́ведным всегда́, и от Го́спода обря́щут благода́ть и сла́ву. Язы́к му́дрых до́брая свесть, и в се́рдце их почи́ет му́дрость. Лю́бит Госпо́дь преподо́бная сердца́, прия́тни же Ему́ вси непоро́чнии в пути́. Му́дрость Госпо́дня просвеща́ет лице́ разу́мнаго. Постига́ет бо жела́ющия ю, пре́жде да́же разуме́ти ю, и удо́бь у́зрится от лю́бящих ю. У́треневавый к ней не утруди́тся; и бдяй ея́ ра́ди вско́ре без печа́ли бу́дет. Я́ко досто́йных ея́ сама́ обхо́дит, и́щущи, и во стезя́х ея́ явля́ется им благоприе́мне. Му́дрости никогда́ же одоле́ет зло́ба. Сих ра́ди и рачи́тель бых добро́ты ея́, и возлюби́х ю, и поиска́х от ю́ности моея́. И взыска́х неве́сту привести́ себе́, я́ко всех Влады́ка возлюби́ ю, таи́нница бо есть Бо́жия хи́трости и обрета́тельница дел Его́. Труды́ ея́ суть доброде́тели, целому́дрию же и ра́зуму та учи́т, пра́вде и му́жеству, и́хже потре́бне ничто́же есть в житии́ челове́ком. А́ще же и мно́гаго иску́сства жела́ет кто, весть дре́вняя и бы́ти хотя́щая разсмо́трит. Свесть изви́тия слове́с и разреше́ния гада́ний, зна́мения и чудеса́ проразуме́ет и сбытия́ време́н и лет, и всем сове́тник есть благ, я́ко безсме́ртие есть в ней и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и рех от всего́ сердца́ моего́: Бо́же отце́в и Го́споди ми́лости, сотвори́вый вся сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде. Даждь ми Твои́х престо́лов приседя́щую прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́. Посли́ ю с небе́с от свята́го жили́ща Твоего́ и от престо́ла сла́вы Твоея́, да, су́щи со мно́ю, научи́т мя, что благоуго́дно есть пред Тобо́ю. И наста́вит мя в ра́зум, и сохрани́т мя в сла́ве свое́й. Помышле́ния бо сме́ртных вся боязли́ва и погреши́тельна умышле́ния их.
Прему́дрости Соломо́новы чте́ние (глава́ 4):Пра́ведник же а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ лет изчита́ется. Седи́на же есть му́дрость челове́ком, и во́зраст ста́рости житие́ нескве́рно. Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть: восхище́н бысть, да не зло́ба измени́т ра́зума его́, или́ лесть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет ум незло́бив. Сконча́вся вма́ле испо́лни ле́та до́лга: уго́дна бо бе Го́сподеви душа́ его́, сего́ ра́ди потща́ся от среды́ лука́вствия; лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.
На лити́и стихи́ра, глас 3:Жи́во сло́во Госпо́дне и де́йственно: не убо́йтеся от убива́ющих те́ло, души́ же не могу́щих уби́ти, убо́йтеся же па́че Могу́щаго и ду́шу и те́ло погуби́ти в гее́нне о́гненней. Потерпе́ душа́ твоя́ в сло́во сие́, священному́чениче Павли́не: Еди́наго бою́ся Живу́щаго на небесе́х, рекл еси́ беззако́нным. Что ми есть заточе́ние? - сла́дость моли́твы уедине́нныя. Что ми есть мраз и глад? - умира́ние жи́зни грехо́вныя. Что ми есть смерть? - ра́дость отше́ствия ко Христу́. Не бою́ся стра́ха сме́ртнаго, вся претерплю́ за Возлю́бльшаго мене́, потерплю́ и не отве́ргуся. Сие́ разуме́йте и покоря́йтеся, я́ко с на́ми Бог Свое́ю благода́тию.
Сла́ва и ны́не, Богоро́дичен, глас то́йже:Засту́пнице Усе́рдная, Ма́ти Бо́га на́шего, и Предста́тельнице Чи́стая, со святи́телем Павли́ном моли́ Сы́на Твоего́ о Твои́х рабе́х.
На стихо́вне стихи́ры глас 6:Святи́телю Павли́не, мо́лим тя: при́зри на страну́ на́шу и посети́ ю моли́твою: Го́споди, да исче́знут врази́ Руси́, я́ко дым, и, я́ко воск от лица́ огня́, да поги́бнут.
Стих: Честна́ пред Го́сподем смерть преподо́бных Его́.
Моли́тву твою́ пролия́л еси́ ко Го́споду, святи́телю Павли́не, и Тому́ возвести́л еси́ печа́ли твоя́, глаго́ля: се аз ду́шу мою́ полага́ю за о́вцы моя́. Го́споди, приими́ ю, я́ко кади́ло моли́твы о Руси́ Правосла́вней, да пребу́дет свята́ и правове́рна во ве́ки.
Стих: Свяще́нницы Твои́ облеку́тся в пра́вду и преподо́бнии Твои́ возра́дуются.
Облецы́ нас моли́твами твои́ми, святи́телю о́тче наш Павли́не, и научи́ нас правосла́вно моли́тися: Го́споди, Го́споди, поми́луй нас, пре́жде да́же до конца́ не поги́бнем, спаси́ нас.
Сла́ва, глас 1:Святи́теля на́шего Павли́на днесь просла́вим, па́мять его́ благоче́стно почти́м, той бо я́ко свети́льник пресве́тлый просия́л есть и о́бразом жития́ своего́ ре́вностному служе́нию Бо́гу лю́ди науча́ет.
И ны́не, Богоро́дичен, глас то́йже:Се испо́лнися Иса́иино прорече́ние: Де́ва бо родила́ еси́ и по рождестве́ я́ко пре́жде рождества́ пребыла́ еси́, Бог бо бе рожде́йся, те́мже и естества́ новопресече́. Но, о Богома́ти, моле́ния Твои́х рабо́в, в Твое́м хра́ме приноси́мая Тебе́, не пре́зри, но, я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися и моли́ спасти́ся душа́м на́шим.
Тропа́рь, глас 2:Ве́ры Правосла́вныя непоро́чный блюсти́телю и за́поведей Христо́вых усе́рдный исполни́телю, священному́чениче Павли́не, Христа́ всем се́рдцем возлюби́в, па́ству твою́ до́бре упа́сл еси́. В хла́дней Сиби́ри му́ченическую смерть прия́л еси́, венце́м сла́вы украси́лся еси́ и в ве́чней сла́ве пребыва́я, моли́ спасти́ся душа́м на́шим.
Тропа́рь на прославле́ние, глас 4:Приспе́ день све́тлаго торжества́, па́ства Могиле́вская ра́дуется и с нею Русь Правосла́вная ликовству́ет пе́сньми и пе́нии духо́вными: днесь бо свяще́нное торжество́ в прославле́нии святи́теля и чудотво́рца Павли́на, я́коже бо со́лнце незаходи́мое возсия́ светоза́рными луча́ми, разгоня́я тьму искуше́ний же и бед от вопию́щих ве́рно: спаса́й нас, я́ко предста́тель наш, ми́лостивый Павли́не.
Богоро́дице Де́во, ра́дуйся:
На у́трени
На Бог Госпо́дь: тропа́рь на преставле́ние, глас 2: Ве́ры Правосла́вныя…
Сла́ва: глас 4: Приспе́ день све́тлаго торжества́…
И ны́не, глас то́йже: Е́же от ве́ка…
По 1-м стихосло́вии седа́лен:Прииди́те, ве́рнии, согла́сно вси воспои́м святи́теля Павли́на блаже́ннаго, и́же досто́йно и́го Христо́во чрез все житие́ свое́ понесе́, и ны́не во оби́телех Отца́ Небе́снаго водвори́вся, мо́лится о спасе́нии душ на́ших.
Сла́ва, и ны́не, Богоро́дичен:Утоли́, Влады́чице, боле́зни душ на́ших, ра́достию благода́тною о Тебе́ испо́лни сердца́ на́ша, на Тя бо наде́ющиися, прича́стницы бу́дем жи́зни ве́чныя.
По 2-м стихосло́вии седа́лен:Притеце́м, ве́рнии, к святи́телю на́шему Павли́ну, и моли́тву пролие́м пред ним, возвести́м печа́ль на́шу и скорбь на́шу, да обря́щем ве́лие утеше́ние: всяк бо ве́руяй не оты́дет тощ.
Сла́ва, и ны́не, Богоро́дичен:Покры́й нас всемо́щным Твои́м покро́вом, Всеми́лостивая Богоро́дице Влады́чице, защити́ нас от вся́ких сете́й вра́жиих, даде́ся бо Ти благода́тная си́ла, я́ко ро́ждшей Влады́ку Христа́ и Спа́са душ на́ших.
По полиеле́и седа́лен:Прииди́те, ве́рнии, святи́теля на́шего пе́сньми почти́м, сей бо благоче́стия и́стинный ревни́тель бысть, ста́ду же своему́ па́стырь всеусе́рднейший. За испове́дание Ве́ры Правосла́вныя смерть му́ченическую прия́т. Ему́ же, со умиле́нием припа́дающе, вопие́м: священному́чениче Павли́не, услы́ши мольбы́ люде́й твои́х, на тя упова́ющих.
Сла́ва, и ны́не, Богоро́дичен:Притеце́м ны́не к Ма́тери Го́спода Вы́шняго и вку́пе со святи́телем Павли́ном воспои́м Засту́пницу Усе́рдную: за всех бо мо́лит Сы́на Своего́, Христа́ Бо́га на́шего, и всем твори́т спасти́ся, в держа́вный Ея́ покро́в прибега́ющим.
Степе́нна, 1-й антифо́н 4-го гла́са.Проки́мен, глас 4: Честна́ пред Го́сподем смерть преподо́бных Его́.
Стих: Что возда́м Го́сподеви о всех, я́же воздаде́ ми?
Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:Па́мять священному́ченика Павли́на ве́рнии лю́дие пра́зднуют: небеса́ ра́дуются и земли́ на́шея концы́ торжеству́ют. Того́ моли́твами да́руй, Го́споди, душа́м на́шим ве́лию ми́лость.
Кано́н, глас 1,
его́же краегране́сие: Го́споди, моли́твами святи́теля Павли́на спаси́ нас.
Песнь 1Ирмо́с: Песнь побе́дную пои́м вси Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.
Го́рняго Сио́на иски́й, я́ко жа́ждай еле́нь на исто́чники водны́я, та́ко ты, свя́те Павли́не, и́ноческое житие́ возлю́бль, в го́рняя возлете́л еси́. И нас научи́, свя́те, мо́лим тя, го́рняя му́дрствовати, не земна́я.
О́трасль честна́я роди́телей твои́х благочести́вых Космы́ и Евдоки́и был еси́, свя́те Павли́не, благоче́стию и́ми наставля́емый, кни́жному науче́нию вдан был еси́, иде́же преуспева́я му́дростию, уразуме́л еси́ глаго́лы жи́зни ве́чныя, поуча́я воспева́ти Го́сподеви, я́ко просла́вися.
Стра́хом Госпо́дним утвержда́ем, нача́ло бо прему́дрости сий есть, терпе́нием стяжа́л еси́ ду́шу твою́, еще́ о́трок сый, любо́вию прилепи́лся еси́ прему́дрости, о Павли́не, о́тче наш.
Пе́нзенское прозябе́ние был еси́, блаже́нне Павли́не, роди́телей свои́х благочести́вый сын, доброде́телию, смире́нием и любо́вию к бли́жним украша́яся, я́ко луча́ Боже́ственнаго све́та, возсия́л еси́ нам. Прииди́те, ча́да све́та, озари́мся е́ю, да возгори́мся ду́хом, пе́сньми святи́теля велича́юще.
Богоро́дичен: О Де́во, Госпоже́ Ма́ти Зижди́телева, небе́сных еси́ чино́в ра́дование и челове́ческому ро́ду Благослове́нная Помо́щнице, моли́ спасти́ся душа́м на́шим.
Песнь 3Ирмо́с: Да утверди́тся се́рдце мое́ в во́ли Твое́й, Христе́ Бо́же, и́же над вода́ми не́бо утвержде́й второ́е и основа́вый на вода́х зе́млю, Всеси́льне.
Ду́ха Всесвята́го жили́ще яви́лся еси́, святи́телю о́тче наш Павли́не: от ю́ности бо твоея́ возжела́л еси́ и́ноческаго жития́, в Саро́вскую оби́тель всели́лся еси́, в ней ду́шу твою́ оживотвори́л еси́ и сию́ в боже́ственный орга́н Ду́ха Свята́го угото́вал еси́.
Из утро́бы ма́терния Бо́гом избра́н был еси́, святи́телю Павли́не, пасти́ о́вцы сло́вом и Ца́рствию Небе́сному сочета́лся еси́, богому́дре.
Моли́тву те́плую, я́ко ми́ро благово́нное, возноси́л еси́ в Саро́встей оби́тели Го́споду Бо́гу на́шему, да предста́тельством преподо́бных Анто́ния и Феодо́сия Ки́ево-Пече́рских и ста́рца Серафи́ма причте́н бу́деши к ста́ду и́ночествующих.
О́трок сый, блаже́нне Павли́не, во оби́тели Саро́встей три ле́та подвиза́лся еси́ в смире́нии и кро́тости, да угото́виши сосу́д свой для служе́ния Це́ркви Христо́вей.
Богоро́дичен: Ли́ком а́нгельским вино́вно есть ра́дости Твоего́, Влады́чице, настоя́щаго торжества́ славосло́вие: сии́ бо днесь дви́жутся к похвале́нию, мы же бре́ннии что Ти принесе́м, то́чию усе́рдная благодаре́ния.
Седа́лен:Еле́й ве́ры непоро́чныя и житие́ нескве́рное Бо́гу ве́рно стяжа́л еси́, святи́телю Павли́не, имже но́вая свеща́ на све́щнице Це́ркве Христо́вы возже́ся, всех ве́рных на путь спасе́ния наставля́ющи, во е́же чи́стым се́рдцем твори́ти во́лю Бо́жию.
Сла́ва, и ны́не, Богоро́дичен:Ма́терь Незаходи́маго Све́та, осиява́ющую страну́ на́шу покро́вом ма́терняго заступле́ния, пе́сньми велича́ем я́ко светле́йшую го́рних во́инств.
Песнь 4Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ приближи́тися ле́том, позна́ешися, внегда́ приити́ вре́мени, пока́жешися; сла́ва си́ле Твое́й, Го́споди.
И́го благо́е и бре́мя ле́гкое подъя́л еси́, о́тче Павли́не, егда́ о́браз а́нгельский восприя́л еси́, да прии́деши в во́зраст му́жа соверше́нна.
Терпе́нием стяжа́л еси́ ду́шу твою́, блаже́нне Павли́не, путе́м те́сным во оби́телех шел еси́, вы́ну взира́я на Кре́стный Путь Подвигополо́жника Христа́ и Сего́ о́браз житию́ твоему́ полага́я.
Всего́ себе́ любви́ Бо́жией преда́л еси́: ду́шу и те́ло, се́рдце и ра́зум, па́мять и во́лю, наме́рение и начина́ние, сло́во и де́ло, и помышле́ние к Бо́гу в любо́вь прине́сл еси́, Павли́не богому́дре.
Ада́ма паде́ние, Христо́выми Страстьми́ искупле́ние, час сме́ртный, стра́шный суд помышля́я, блаже́нне, оста́вив земна́я, прите́кл еси́ в Но́во-Спа́сскую оби́тель гра́да Москвы́, иде́же и на сте́пень свяще́нства возведе́н был еси́ и в са́не священноархимадри́та до́бре подвиза́лся еси́.
Богоро́дичен: Ма́ти Всепе́тая, Влады́чице ми́ра, Богоро́дице, умилосе́рдися на моле́ние на́ше, Твое́ бо есьмы́ достояние. Всех спаси́ и поми́луй, да Тя вси ро́ди непреста́нно велича́ем.
Песнь 5Ирмо́с: Све́тлый нам возсия́й Свет Присносу́щный, у́треннюющим о судьба́х за́поведей Твои́х, Влады́ко Человеколю́бче, Христе́ Бо́же наш.
Изря́дно житие́ твое́ в оби́тели, досточу́дне, все́ми позна́но бысть, сего́ ра́ди и избра́ тя Госпо́дь на святи́тельское служе́ние, и первосвяти́тель Ти́хон в святи́тельский сан тя возведе́ и архипа́стырем Ры́льско-Ку́рския епа́рхии поста́ви.
Святи́тель Ры́льский и моли́твенник всея́ страны́ днесь Це́рковию прославля́ется, я́ко му́дрый упра́витель церко́вный, я́ко милосе́рдия о́браз, я́ко святи́телей украше́ние.
Вои́стинну а́нгел храни́тель яви́лся еси́ па́стве твое́й, любобоже́ственне Павли́не, в годи́ну бе́дствий, егда́ и сам в темни́це пребыва́л еси́, оте́чески в моли́твах свои́х к Бо́гу предста́тельствовал еси́ о ней, да вси благода́рне велича́ют Христа́ Спа́са на́шего и Пренепоро́чную Ма́терь Его́.
Я́ко конь храбре́йший, подо́бяся Па́влу апо́столу, спаси́тельне ежде́ние и богопропове́дничество в суро́вем Се́вере Перми́ соверша́л еси́, блаже́нне Павли́не. Прее́мником твои́м сподви́жник в труде́х был еси́, па́ству свою́ просвеща́я, поуча́л еси́ за́поведи Госпо́дни храни́ти и сла́вити Человеколю́бца Христа́ Бо́га на́шего.
Богоро́дичен: Те́плая Засту́пнице к Тебе́ прибега́ющих и ненаде́ющихся Наде́ждо, виждь скорбь люде́й Твои́х и пода́ждь по́мощь в зна́мении Твое́м, Пречи́стая.
Песнь 6Ирмо́с: Проро́ка Ио́ну подража́я, вопию́: живо́т мой, Бла́же, свободи́ от тли, и спаси́ мя, Спа́се ми́ра, зову́ща: сла́ва Тебе́.
И́стинный храни́телю апо́стольских преда́ний, ду́ха облиста́ющая заре́, зе́млю Сиби́рскую освети́л еси́ сия́нием до́брых дел твои́х, святи́телю Павли́не, и нас научи́ прославля́ти Го́спода Человеколю́бца.
Таи́нник быв Христо́ва уче́ния, святи́телю Павли́не, сего́ ве́дением просвети́л еси́ па́ству твою́, де́лы и словесы́ явля́я и́стину Христо́ву.
Его́же возлюби́л еси́, Его́же возжела́л еси́, Его́же ра́ди подвиза́лся еси́, святи́телю Павли́не, моли́ Христа́ Бо́га, да ми́рное даст стоя́ние Це́ркви святе́й, Оте́честву на́шему и всем правосла́вным христиа́ном, почита́ющим па́мять твою́.
Любы́ николи́же отпада́ет, глаго́лет Боже́ственный Дух. И́стина сия́ в чудесе́х любве́ твоея́ извести́ся, святи́телю Христо́в Павли́не, я́ко боля́щим исцеле́ние и скорбя́щим утеше́ние источа́еши. Ве́си Пе́нзенския прозябе́ние, пе́рмския па́ствы и Но́во-Спа́сския оби́тели гра́да Москвы́ украше́ние, моли́ся ко Го́споду, да спасе́т Христо́с Бог вся, я́ко Человеколю́бец.
Богоро́дичен: Я́же по благода́ти дарова́нная нам Помо́щнице, Того́ моли́ Всеблага́я и Всенепоро́чная, я́ко пре́зрит на́ша бесчи́сленная согреше́ния и изба́вит пла́меннаго томле́ния и тьмы кроме́шныя, и му́ки вся́ческия.
Конда́к, глас 8:Избра́нный священному́чениче и престо́лов апо́стольских наме́стниче, гра́да Могиле́ва преди́вный свети́льниче, кро́тостию и незло́бием А́гнцу Бо́жию уподо́бивыйся, изгна́ние, темни́чныя у́зы и злострада́ния от безбо́жных претерпе́вый, да́же до сме́рти ве́рен Христу́ пребы́л еси́, блаже́нне. Ты же, я́ко име́яй дерзнове́ние ко Го́споду, просвети́ омраче́нныя умы́ и сердца́ на́ша, да зове́м ти: Ра́дуйся, священному́чениче Павли́не, усе́рдный о нас ко Го́споду моли́твенниче.
И́кос:Прииди́те, правосла́внии лю́дие, пе́сньми ублажи́м па́стыря до́браго, гра́да Могиле́ва похвалу́ и утвержде́ние, моли́твенника всея́ земли́ Белору́сския, за ве́ру Христо́ву вся претерпе́вшаго, и за Правосла́вие и Оте́чество ду́шу свою́ положи́вшаго, и ны́не, ми́лостию Бо́жиею, но́ваго священному́ченика. Мы же, восхваля́юще сего́ Бо́жия уго́дника, воспева́ем ему́ си́це: Ра́дуйся, от ю́ности послуша́нию и смире́нию научи́выйся. Ра́дуйся, от жре́бия святи́тельства, а́ки от мона́шескаго послуша́ния, не уклони́выйся. Ра́дуйся, за па́ству твою́ ду́шу свою́ положи́вый. Ра́дуйся, па́стыря до́браго о́браз нам в себе́ яви́вый. Ра́дуйся, по и́мени твоему́ ме́ньший во всем был еси́. Ра́дуйся, по сло́ву Христо́ву, бо́льший в Ца́рствии Небе́снем наре́клся еси́. Ра́дуйся, по за́поведи Госпо́дней ма́терь свою́ почита́вый. Ра́дуйся, малоду́шие от серде́ц люде́й твои́х отгна́вый. Ра́дуйся, я́ко зло́бы и преще́ния безбо́жных убоя́тися не восхоте́вый. Ра́дуйся, я́ко Христа́ ра́ди и Ве́ры Правосла́вныя хлад и мраз Сиби́рский претерпе́вый. Ра́дуйся, за ве́ру Христо́ву богобо́рцами умерщвле́нный. Ра́дуйся, от Го́спода Иису́са на Небесе́х венча́нный. Ра́дуйся, священному́чениче Павли́не, усе́рдный о нас ко Го́споду моли́твенниче.
Песнь 7Ирмо́с: Пещь, Спа́се, ороша́шеся, о́троцы же, лику́юще, поя́ху: отце́в Бо́же, благослове́н еси́.
По шестиле́тнем пребыва́нии в хла́дней Сиби́ри Госпо́дь вруча́ет ти па́ству Калу́жскую, ю́же возлюби́л еси́ и рекл еси́: Зде поко́й, зде вселю́ся; и та́ко в по́двизе твое́м соиме́нник святи́телю Павли́ну Ми́лостивому был еси́, во сла́ву Це́ркве и па́ствы труди́лся еси́, поуча́я всех пе́ти: отце́в Бо́же, благослове́н еси́.
А́ще не Госпо́дь сози́ждет дом, всу́е труди́шася зи́ждущии. Сию́ и́стину внуша́л еси́, святи́телю, па́стве твое́й, да не осуетя́тся помышле́нии свои́ми и да не всу́е мяту́тся.
Вси в пе́снех духо́вных воспои́м в благоче́стии просия́вшаго святи́теля Павли́на, его́же Це́рковь воспита́. К нему же взыва́ем: моли́ Человеколю́бца Бо́га, да возведе́т от тли живо́т наш.
Ле́та дре́вняя помяну́хом и поучи́хомся во всех де́лех твои́х, святи́телю Павли́не, и обрето́хом ве́дение, ка́ко жи́ти в ми́ре сем, от святы́х Оте́ц и от жития́ своего́ вразумля́ющеся.
Богоро́дичен: Изба́ви ны от нужд на́ших, Ма́ти Христа́ Бо́га, Ро́ждшая всех Творца́, да вси зове́м Ти: ра́дуйся, Еди́но Предста́тельство душ на́ших.
Песнь 8Ирмо́с: Его́же ужаса́ются а́нгели и вся во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся ве́ки.
На́ше хвале́ние сие́ от недосто́йных и окая́нных чад твои́х, от усе́рдия же бога́то приноси́мое тебе́, приими́ ми́лостивно, святи́телю Павли́не, и благода́ть воздая́ преизоби́льно па́стве твое́й во гра́де Могиле́ве, благослове́ние Бо́жие препода́ждь ей.
Апо́столов прее́мника, святи́телей сопресто́льника, преподо́бных сожи́теля прославля́ет тя, святи́телю Павли́не, па́ства твоя́ Могиле́вская, тобо́ю просвеще́нная пе́ти Го́спода во вся ве́ки.
Ско́рбных уте́шитель, ни́щих упокоева́л еси́, друг был ме́ньшей бра́тии Христо́вей, сего́ ра́ди и Христо́с в ли́це друзе́й Свои́х учини́ тя, ми́лостиве Павли́не. Его́же моли́ и на́ше жестосе́рдие умягчи́ти и ско́ры ны сотвори́ти на благотворе́ние по́мощи и утеше́ния тре́бующим.
Подража́телю Отца́ Небе́снаго, я́ко сын любве́, в любви́ при́сно пребыва́яй, любо́вь вы́ше поста́ поста́вил еси́, святи́телю Павли́не. Мо́лим тя, пода́ждь и нам от ду́ха любве́ твоея́ и научи́ нас зре́ти на́ша прегреше́ния и не осужда́ти бра́та: мо́жеши бо, я́ко в Бо́зе пребыва́еши, и Бог в тебе́ пребыва́ет.
Богоро́дичен: А́нгельскую песнь, е́же ра́дуйся, Тебе́ зове́м, Богоневе́сто, Госпо́дь с Тобо́ю. Ра́дуйся, Ра́досте а́нгелов и всех челове́ков, сла́вящих Тя, и́стинное Весе́лие.
Песнь 9Ирмо́с: Живоприе́мный исто́чник приснотеку́щий, светоно́сный свети́льник благода́ти, храм одушевле́нный, сень пречи́стую, небесе́ и земли́ простра́ннейшую, Богоро́дицу, ве́рнии, велича́ем.
Словеса́ прему́дра, о е́же не ле́ты, но дея́ньми благи́ми полнота́ жития́ челове́ческаго пред Бо́гом измеря́ется, на тебе́ испо́лнишася, святи́телю Павли́не. Те́мже ду́шу доброде́тельми обогаще́нну име́я, на путь испове́дничества угото́вал еси́ ю, иде́же вся му́жественно за Христа́ и Це́рковь претерпева́я, взыва́л еси́: Го́спода по́йте дела́ и превозноси́те Его́ во ве́ки.
Иера́рх Апо́стольския Це́ркве и испове́дник Правосла́вныя Ве́ры был еси́, священному́чениче Павли́не: за сие́ темни́цею и гла́дом му́чим был еси́, та́же в Сиби́рь со́слан был еси́, иде́же и му́ченическую кончи́ну прие́м, в небе́сныя оби́тели всели́лся еси́ и та́мо Го́спода, Царя́ Сла́вы со все́ми святы́ми превозно́сиши во вся ве́ки.
Но́ваго и ди́внаго попечи́теля Це́ркве Правосла́вныя ве́мы тя, святи́телю Павли́не, поне́же во испове́дании твое́м не устраши́лся еси́ челове́ческих преще́ний и, ви́дя, ка́ко пла́чем и рыда́нием земля́ на́ша огласи́ся, кровь святы́х му́ченик и испове́дник Христо́вых пото́ки по ней излия́ся, хра́мы Бо́жии оскверни́шася и попра́нию преда́шася, взыва́л еси́: увы́ мне, земле́ моя́, увы́ мне, лю́дие Росси́йстии: Го́спода забы́хом, попече́ние же о души́ николи́же име́хом, благоволе́ния Бо́жия не обря́щем, а́ще ду́ши на́ша слеза́ми покая́ния пред Го́сподем не потщи́мся очи́стити.
А́нгели на небесе́х ра́дуются и земни́и ликовству́ют: ны́не вре́мя торжества́, ны́не ра́дость духо́вная яви́ся. В Юбиле́й Вели́кий Рождества́ Христо́ва Це́рковь Ру́сская прославля́ет сонм Новому́чеников, за Ве́ру Правосла́вную уму́ченных. Возвесели́мся у́бо и мы, христоимени́тии лю́дие, прославля́юще страстоте́рпца царя́ Никола́я со все́ми ца́рственными и про́чими му́ченики и священному́ченика Павли́на, архипа́стыря Могиле́вскаго, ра́достно воспоева́юще Христу́: Твой мир да́ждь нам и спаси́ нас я́ко Человеколю́бец.
Богоро́дичен: Сло́во Бо́жие светода́тельное и прему́дрость О́тчую пло́тию, Де́во, ро́ждшая, просвети́ глубо́кую тьму моего́ неразу́мия и сло́во ми пода́ждь воспева́ти Твоя́ чудеса́.
Свети́лен:Святи́теля Могиле́вскаго Павли́на днесь просла́вим, па́мять его́ благоче́стно почита́юще, той бо, я́ко свети́льник пресве́тлый, просия́л есть и о́бразом пресве́тлаго испове́дническаго жития́ своего́ ре́вностному служе́нию Бо́гу лю́ди науча́ет.
Сла́ва, и ны́не, Богоро́дичен:Ма́терь Незаходи́маго Све́та, осиява́ющую страну́ на́шу покро́вом ма́терняго заступле́ния, пе́сньми велича́ем, я́ко Светле́йшую го́рних во́инств.
На хвали́тех стихи́ры на 4, глас 4:Прииди́те, ублажи́м па́стыря до́браго земли́ на́шея, за Ве́ру Правосла́вную вся претерпе́вшаго и ду́шу свою́ положи́вшаго; и ны́не ми́лостию Бо́жиею чудотво́рца, явле́ннаго во утвержде́ние ве́ры немощству́ющих, во исцеле́ние всех неду́гующих, и во упокое́ние озло́бленных грехи́ мно́гими; да вси возра́дуемся и да пое́м ему́: ра́дуйся, любы́, нас согрева́ющая; ра́дуйся, си́ло, нас исцеля́ющая; ра́дуйся, ра́зуме, всех просвеща́яй; ра́дуйся, стра́же, Правосла́вие на́ше охраня́яй; ра́дуйся, святи́телю Павли́не.
Ве́ре в лю́дех оскуде́вшей, любви́ истощи́вшейся, наде́жде исся́кнувшей, попусти́ Госпо́дь бе́дствия на лю́ди Оте́чества на́шего. Ты же, святи́телю, боле́знуя о наро́де свое́м, преклоня́я коле́на, моли́лся еси́, да к покая́нию Госпо́дь призове́т па́ству твою́.
Вси помо́лимся Христу́, творя́ще па́мять днесь святи́теля Павли́на, вку́пе с ним воспои́м ца́рственныя и всея́ новому́ченики на́ша. Прии́ми, Го́споди, моли́твы всех святы́х и пода́ждь нам мир и ве́лию ми́лость.
Внима́йте у́бо себе́, лю́дие Ру́сстии, проба́ви бо Госпо́дь ны́не ми́лость Свою́ нам: пото́цы кро́ве му́ченическия иссяко́ша плене́ния от вла́сти безбо́жных свободи́хомся, и ны́не бежи́м всеме́рно прираже́ния грехо́внаго, да не па́ки гнев Бо́жий наведе́м на себе́, и да не бу́дет нам после́дняя го́рша пе́рвых.
Сла́ва, глас 8:Кровьми́ святы́х му́ченик Це́рковь Христо́ва и́здревле утверди́ся, та́кожде и во дни твоя́, святи́телю Павли́не, во Оте́честве на́шем, я́ко пото́цы водни́и, кровь святы́х пролия́ся, оба́че смотре́нием Бо́жиим сия́ се́менем яви́ся, из него́же прозябе́ благосенноли́ственное дре́во Це́ркве Правосла́вныя.
И ны́не, Богоро́дичен, глас то́йже:Влады́чице, приими́ моли́тву раб Твои́х и изба́ви ны от вся́кия ну́жды и печа́ли.
На Литурги́иБлаже́нны от кано́на песнь 3-я и 6-я.
Проки́мен, глас 7: Возвесели́тся пра́ведник о Го́споде и упова́ет на Него́.
Апо́стол, Евре́ям 335 зача́ло.
Ева́нгелие от Иоа́нна, 36 зача́ло.
21 октября́ / 3 ноября́
Слу́жба
священному́ченика Павли́на, архиепи́скопа Могиле́вскаго
На вели́цей вече́рни
На Го́споди, воззва́х стихи́ры, глас 8:Днесь све́тло красу́ется богоспаса́емый град Могиле́в в прославле́нии своего́ архипа́стыря, святи́теля Павли́на, и па́ства его́ ликовству́ющи ра́дуется и вси правосла́внии хва́лятся, ты же, о́тче наш Павли́не, с собо́ром новому́чеников Христо́вых моли́ Человеколю́бца Христа́ Бо́га на́шего лю́дем правосла́вным тишину́ дарова́ти, земли́ плодоро́дие и душа́м на́шим ве́лию ми́лость.
Земля́ Пе́нзенская просла́вися, я́ко в преде́лех ея́ от благочести́ваго ко́рене Космы́ и Евдоки́и плод благокра́сен прозябе́, Петр отроча́ благонра́вное, апо́столу Петру́ тезоимени́тое. В сем же и́мени ве́лий путь тебе́ преднарече́ся.
Путь де́вства и нищеты́, своея́ во́ли отсече́ние избра́л еси́, блаже́нне, и́ноческое постриже́ние прия́л еси́, в не́мже и́менем Павли́н нарече́н бе, да путе́м ми́лостиваго святи́теля Нола́нскаго ше́ствуеши.
Прехва́льный о́тче Павли́не му́чениче, тя ни темни́ца потаи́ла есть, возсе́л бо еси́ та́мо, я́ко на престо́ле, ве́лия ре́вность Бо́жия объя́т тя, и испо́лнился еси́ огня́, поя́сти хотя́щаго сопроти́вныя. Внутрь темни́цы быв, я́ко свети́льник, пред Бо́гом сгора́л еси́. Христу́ моли́ся дарова́ти душа́м на́шим мир и ве́лию ми́лость.
Прехва́льный о́тче Павли́не му́чениче, ни земля́ тя потаи́ла есть, но не́бо прия́т тя и отверзо́шася ти ра́йския две́ри. Христу́ моли́ся дарова́ти душа́м на́шим мир и ве́лию ми́лость.
Тих нра́вом, кро́ток и смире́н се́рдцем вои́стину пред Бо́гом и людьми́ яви́лся еси́, и́го Христо́во чрез все житие́ твое́ до́бре пронесы́й, во оби́телех небе́сных упокои́лся еси́, блаже́нне. Моли́ся ны́не и о нас, да и мы, на земли́ до́бре пожи́вше, Ца́рствия Бо́жия насле́дницы бы́ти сподо́бимся.
Сла́ва, глас 8:Бог тя возвели́чи, святи́телю о́тче Павли́не, иера́рхом Це́ркве Своея́ поста́ви, ты же служе́ние сие́, я́ко во́лю благу́ю Его́ восприи́м, в святи́тельстем по́двизе твое́м при́сно ревнова́л еси́ о сла́ве Отца́ и Сы́на и Свята́го Ду́ха - Тро́ицы Единосу́щныя и Неразде́льныя.
И ны́не, Богоро́дичен догма́тик, глас то́йже:Царь Небе́сный за человеколю́бие на земли́ яви́ся, и с челове́ки поживе́, от Де́вы бо Чи́стыя плоть прие́мый и из Нея́ проше́дый с восприя́тием. Еди́н есть Сын, сугу́б естество́м, но не Ипоста́сию. Те́мже соверше́нна Того́ Бо́га и соверше́нна Челове́ка вои́стину пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.
Вход. Проки́мен дне. Чте́ния три.
При́тчей чте́ние (главы́ 10, 3 и 8):Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, все же честно́е недосто́йно ея́ есть. Долгота́ бо дней и ле́та живота́ в десни́це ея́, в шу́ице же ея́ бога́тство и сла́ва; от уст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да! честна́я бо реку́, и блаже́н челове́к, и́же пути́ моя́ сохрани́т, исхо́ди бо мои́ - исхо́ди живота́, и уготовля́ется хоте́ние от Го́спода. Сего́ ра́ди молю́ вас и предлага́ю мой глас сыново́м челове́ческим, я́ко аз, прему́дрость, устро́их сове́т, и ра́зум и смысл аз призва́х. Мой сове́т и утвержде́ние, мой ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́заннии же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. С пра́вдою вси глаго́лы уст мои́х, ничто́же в них стро́потно, ниже́ развраще́нно. Вся пра́ва суть разумева́ющим, и про́ста обрета́ющим ра́зум. Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха.
Прему́дрости Соломо́новы чте́ние (главы́ 10, 6, 8 и 9):Уста́ пра́веднаго ка́плют прему́дрость, устне́ же муже́й му́дрых ве́дят благода́ть. Уста́ му́дрых поуча́тся прему́дрости, пра́вда же избавля́ет их от сме́рти. Сконча́вшуся му́жу пра́ведну, не поги́бнет наде́жда. Сын бо пра́веден ражда́ется в живо́т: и во благи́х свои́х плод пра́вды обы́мет. Свет пра́ведным всегда́, и от Го́спода обря́щут благода́ть и сла́ву. Язы́к му́дрых до́брая свесть, и в се́рдце их почи́ет му́дрость. Лю́бит Госпо́дь преподо́бная сердца́, прия́тни же Ему́ вси непоро́чнии в пути́. Му́дрость Госпо́дня просвеща́ет лице́ разу́мнаго. Постига́ет бо жела́ющия ю, пре́жде да́же разуме́ти ю, и удо́бь у́зрится от лю́бящих ю. У́треневавый к ней не утруди́тся; и бдяй ея́ ра́ди вско́ре без печа́ли бу́дет. Я́ко досто́йных ея́ сама́ обхо́дит, и́щущи, и во стезя́х ея́ явля́ется им благоприе́мне. Му́дрости никогда́ же одоле́ет зло́ба. Сих ра́ди и рачи́тель бых добро́ты ея́, и возлюби́х ю, и поиска́х от ю́ности моея́. И взыска́х неве́сту привести́ себе́, я́ко всех Влады́ка возлюби́ ю, таи́нница бо есть Бо́жия хи́трости и обрета́тельница дел Его́. Труды́ ея́ суть доброде́тели, целому́дрию же и ра́зуму та учи́т, пра́вде и му́жеству, и́хже потре́бне ничто́же есть в житии́ челове́ком. А́ще же и мно́гаго иску́сства жела́ет кто, весть дре́вняя и бы́ти хотя́щая разсмо́трит. Свесть изви́тия слове́с и разреше́ния гада́ний, зна́мения и чудеса́ проразуме́ет и сбытия́ време́н и лет, и всем сове́тник есть благ, я́ко безсме́ртие есть в ней и благосла́вие во обще́нии слове́с ея́. Сего́ ра́ди бесе́довах ко Го́споду, и помоли́хся Ему́, и рех от всего́ сердца́ моего́: Бо́же отце́в и Го́споди ми́лости, сотвори́вый вся сло́вом Твои́м и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде. Даждь ми Твои́х престо́лов приседя́щую прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́. Посли́ ю с небе́с от свята́го жили́ща Твоего́ и от престо́ла сла́вы Твоея́, да, су́щи со мно́ю, научи́т мя, что благоуго́дно есть пред Тобо́ю. И наста́вит мя в ра́зум, и сохрани́т мя в сла́ве свое́й. Помышле́ния бо сме́ртных вся боязли́ва и погреши́тельна умышле́ния их.
Прему́дрости Соломо́новы чте́ние (глава́ 4):Пра́ведник же а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ лет изчита́ется. Седи́на же есть му́дрость челове́ком, и во́зраст ста́рости житие́ нескве́рно. Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть: восхище́н бысть, да не зло́ба измени́т ра́зума его́, или́ лесть прельсти́т ду́шу его́. Раче́ние бо зло́бы помрача́ет до́брая, и паре́ние по́хоти пременя́ет ум незло́бив. Сконча́вся вма́ле испо́лни ле́та до́лга: уго́дна бо бе Го́сподеви душа́ его́, сего́ ра́ди потща́ся от среды́ лука́вствия; лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.
На лити́и стихи́ра, глас 3:Жи́во сло́во Госпо́дне и де́йственно: не убо́йтеся от убива́ющих те́ло, души́ же не могу́щих уби́ти, убо́йтеся же па́че Могу́щаго и ду́шу и те́ло погуби́ти в гее́нне о́гненней. Потерпе́ душа́ твоя́ в сло́во сие́, священному́чениче Павли́не: Еди́наго бою́ся Живу́щаго на небесе́х, рекл еси́ беззако́нным. Что ми есть заточе́ние? - сла́дость моли́твы уедине́нныя. Что ми есть мраз и глад? - умира́ние жи́зни грехо́вныя. Что ми есть смерть? - ра́дость отше́ствия ко Христу́. Не бою́ся стра́ха сме́ртнаго, вся претерплю́ за Возлю́бльшаго мене́, потерплю́ и не отве́ргуся. Сие́ разуме́йте и покоря́йтеся, я́ко с на́ми Бог Свое́ю благода́тию.
Сла́ва и ны́не, Богоро́дичен, глас то́йже:Засту́пнице Усе́рдная, Ма́ти Бо́га на́шего, и Предста́тельнице Чи́стая, со святи́телем Павли́ном моли́ Сы́на Твоего́ о Твои́х рабе́х.
На стихо́вне стихи́ры глас 6:Святи́телю Павли́не, мо́лим тя: при́зри на страну́ на́шу и посети́ ю моли́твою: Го́споди, да исче́знут врази́ Руси́, я́ко дым, и, я́ко воск от лица́ огня́, да поги́бнут.
Стих: Честна́ пред Го́сподем смерть преподо́бных Его́.
Моли́тву твою́ пролия́л еси́ ко Го́споду, святи́телю Павли́не, и Тому́ возвести́л еси́ печа́ли твоя́, глаго́ля: се аз ду́шу мою́ полага́ю за о́вцы моя́. Го́споди, приими́ ю, я́ко кади́ло моли́твы о Руси́ Правосла́вней, да пребу́дет свята́ и правове́рна во ве́ки.
Стих: Свяще́нницы Твои́ облеку́тся в пра́вду и преподо́бнии Твои́ возра́дуются.
Облецы́ нас моли́твами твои́ми, святи́телю о́тче наш Павли́не, и научи́ нас правосла́вно моли́тися: Го́споди, Го́споди, поми́луй нас, пре́жде да́же до конца́ не поги́бнем, спаси́ нас.
Сла́ва, глас 1:Святи́теля на́шего Павли́на днесь просла́вим, па́мять его́ благоче́стно почти́м, той бо я́ко свети́льник пресве́тлый просия́л есть и о́бразом жития́ своего́ ре́вностному служе́нию Бо́гу лю́ди науча́ет.
И ны́не, Богоро́дичен, глас то́йже:Се испо́лнися Иса́иино прорече́ние: Де́ва бо родила́ еси́ и по рождестве́ я́ко пре́жде рождества́ пребыла́ еси́, Бог бо бе рожде́йся, те́мже и естества́ новопресече́. Но, о Богома́ти, моле́ния Твои́х рабо́в, в Твое́м хра́ме приноси́мая Тебе́, не пре́зри, но, я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися и моли́ спасти́ся душа́м на́шим.
Тропа́рь, глас 2:Ве́ры Правосла́вныя непоро́чный блюсти́телю и за́поведей Христо́вых усе́рдный исполни́телю, священному́чениче Павли́не, Христа́ всем се́рдцем возлюби́в, па́ству твою́ до́бре упа́сл еси́. В хла́дней Сиби́ри му́ченическую смерть прия́л еси́, венце́м сла́вы украси́лся еси́ и в ве́чней сла́ве пребыва́я, моли́ спасти́ся душа́м на́шим.
Тропа́рь на прославле́ние, глас 4:Приспе́ день све́тлаго торжества́, па́ства Могиле́вская ра́дуется и с нею Русь Правосла́вная ликовству́ет пе́сньми и пе́нии духо́вными: днесь бо свяще́нное торжество́ в прославле́нии святи́теля и чудотво́рца Павли́на, я́коже бо со́лнце незаходи́мое возсия́ светоза́рными луча́ми, разгоня́я тьму искуше́ний же и бед от вопию́щих ве́рно: спаса́й нас, я́ко предста́тель наш, ми́лостивый Павли́не.
Богоро́дице Де́во, ра́дуйся:
На у́трени
На Бог Госпо́дь: тропа́рь на преставле́ние, глас 2: Ве́ры Правосла́вныя…
Сла́ва: глас 4: Приспе́ день све́тлаго торжества́…
И ны́не, глас то́йже: Е́же от ве́ка…
По 1-м стихосло́вии седа́лен:Прииди́те, ве́рнии, согла́сно вси воспои́м святи́теля Павли́на блаже́ннаго, и́же досто́йно и́го Христо́во чрез все житие́ свое́ понесе́, и ны́не во оби́телех Отца́ Небе́снаго водвори́вся, мо́лится о спасе́нии душ на́ших.
Сла́ва, и ны́не, Богоро́дичен:Утоли́, Влады́чице, боле́зни душ на́ших, ра́достию благода́тною о Тебе́ испо́лни сердца́ на́ша, на Тя бо наде́ющиися, прича́стницы бу́дем жи́зни ве́чныя.
По 2-м стихосло́вии седа́лен:Притеце́м, ве́рнии, к святи́телю на́шему Павли́ну, и моли́тву пролие́м пред ним, возвести́м печа́ль на́шу и скорбь на́шу, да обря́щем ве́лие утеше́ние: всяк бо ве́руяй не оты́дет тощ.
Сла́ва, и ны́не, Богоро́дичен:Покры́й нас всемо́щным Твои́м покро́вом, Всеми́лостивая Богоро́дице Влады́чице, защити́ нас от вся́ких сете́й вра́жиих, даде́ся бо Ти благода́тная си́ла, я́ко ро́ждшей Влады́ку Христа́ и Спа́са душ на́ших.
По полиеле́и седа́лен:Прииди́те, ве́рнии, святи́теля на́шего пе́сньми почти́м, сей бо благоче́стия и́стинный ревни́тель бысть, ста́ду же своему́ па́стырь всеусе́рднейший. За испове́дание Ве́ры Правосла́вныя смерть му́ченическую прия́т. Ему́ же, со умиле́нием припа́дающе, вопие́м: священному́чениче Павли́не, услы́ши мольбы́ люде́й твои́х, на тя упова́ющих.
Сла́ва, и ны́не, Богоро́дичен:Притеце́м ны́не к Ма́тери Го́спода Вы́шняго и вку́пе со святи́телем Павли́ном воспои́м Засту́пницу Усе́рдную: за всех бо мо́лит Сы́на Своего́, Христа́ Бо́га на́шего, и всем твори́т спасти́ся, в держа́вный Ея́ покро́в прибега́ющим.
Степе́нна, 1-й антифо́н 4-го гла́са.Проки́мен, глас 4: Честна́ пред Го́сподем смерть преподо́бных Его́.
Стих: Что возда́м Го́сподеви о всех, я́же воздаде́ ми?
Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:Па́мять священному́ченика Павли́на ве́рнии лю́дие пра́зднуют: небеса́ ра́дуются и земли́ на́шея концы́ торжеству́ют. Того́ моли́твами да́руй, Го́споди, душа́м на́шим ве́лию ми́лость.
Кано́н, глас 1,
его́же краегране́сие: Го́споди, моли́твами святи́теля Павли́на спаси́ нас.
Песнь 1Ирмо́с: Песнь побе́дную пои́м вси Бо́гу, сотво́ршему ди́вная чудеса́ мы́шцею высо́кою, и спа́сшему Изра́иля, я́ко просла́вися.
Го́рняго Сио́на иски́й, я́ко жа́ждай еле́нь на исто́чники водны́я, та́ко ты, свя́те Павли́не, и́ноческое житие́ возлю́бль, в го́рняя возлете́л еси́. И нас научи́, свя́те, мо́лим тя, го́рняя му́дрствовати, не земна́я.
О́трасль честна́я роди́телей твои́х благочести́вых Космы́ и Евдоки́и был еси́, свя́те Павли́не, благоче́стию и́ми наставля́емый, кни́жному науче́нию вдан был еси́, иде́же преуспева́я му́дростию, уразуме́л еси́ глаго́лы жи́зни ве́чныя, поуча́я воспева́ти Го́сподеви, я́ко просла́вися.
Стра́хом Госпо́дним утвержда́ем, нача́ло бо прему́дрости сий есть, терпе́нием стяжа́л еси́ ду́шу твою́, еще́ о́трок сый, любо́вию прилепи́лся еси́ прему́дрости, о Павли́не, о́тче наш.
Пе́нзенское прозябе́ние был еси́, блаже́нне Павли́не, роди́телей свои́х благочести́вый сын, доброде́телию, смире́нием и любо́вию к бли́жним украша́яся, я́ко луча́ Боже́ственнаго све́та, возсия́л еси́ нам. Прииди́те, ча́да све́та, озари́мся е́ю, да возгори́мся ду́хом, пе́сньми святи́теля велича́юще.
Богоро́дичен: О Де́во, Госпоже́ Ма́ти Зижди́телева, небе́сных еси́ чино́в ра́дование и челове́ческому ро́ду Благослове́нная Помо́щнице, моли́ спасти́ся душа́м на́шим.
Песнь 3Ирмо́с: Да утверди́тся се́рдце мое́ в во́ли Твое́й, Христе́ Бо́же, и́же над вода́ми не́бо утвержде́й второ́е и основа́вый на вода́х зе́млю, Всеси́льне.
Ду́ха Всесвята́го жили́ще яви́лся еси́, святи́телю о́тче наш Павли́не: от ю́ности бо твоея́ возжела́л еси́ и́ноческаго жития́, в Саро́вскую оби́тель всели́лся еси́, в ней ду́шу твою́ оживотвори́л еси́ и сию́ в боже́ственный орга́н Ду́ха Свята́го угото́вал еси́.
Из утро́бы ма́терния Бо́гом избра́н был еси́, святи́телю Павли́не, пасти́ о́вцы сло́вом и Ца́рствию Небе́сному сочета́лся еси́, богому́дре.
Моли́тву те́плую, я́ко ми́ро благово́нное, возноси́л еси́ в Саро́встей оби́тели Го́споду Бо́гу на́шему, да предста́тельством преподо́бных Анто́ния и Феодо́сия Ки́ево-Пече́рских и ста́рца Серафи́ма причте́н бу́деши к ста́ду и́ночествующих.
О́трок сый, блаже́нне Павли́не, во оби́тели Саро́встей три ле́та подвиза́лся еси́ в смире́нии и кро́тости, да угото́виши сосу́д свой для служе́ния Це́ркви Христо́вей.
Богоро́дичен: Ли́ком а́нгельским вино́вно есть ра́дости Твоего́, Влады́чице, настоя́щаго торжества́ славосло́вие: сии́ бо днесь дви́жутся к похвале́нию, мы же бре́ннии что Ти принесе́м, то́чию усе́рдная благодаре́ния.
Седа́лен:Еле́й ве́ры непоро́чныя и житие́ нескве́рное Бо́гу ве́рно стяжа́л еси́, святи́телю Павли́не, имже но́вая свеща́ на све́щнице Це́ркве Христо́вы возже́ся, всех ве́рных на путь спасе́ния наставля́ющи, во е́же чи́стым се́рдцем твори́ти во́лю Бо́жию.
Сла́ва, и ны́не, Богоро́дичен:Ма́терь Незаходи́маго Све́та, осиява́ющую страну́ на́шу покро́вом ма́терняго заступле́ния, пе́сньми велича́ем я́ко светле́йшую го́рних во́инств.
Песнь 4Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ приближи́тися ле́том, позна́ешися, внегда́ приити́ вре́мени, пока́жешися; сла́ва си́ле Твое́й, Го́споди.
И́го благо́е и бре́мя ле́гкое подъя́л еси́, о́тче Павли́не, егда́ о́браз а́нгельский восприя́л еси́, да прии́деши в во́зраст му́жа соверше́нна.
Терпе́нием стяжа́л еси́ ду́шу твою́, блаже́нне Павли́не, путе́м те́сным во оби́телех шел еси́, вы́ну взира́я на Кре́стный Путь Подвигополо́жника Христа́ и Сего́ о́браз житию́ твоему́ полага́я.
Всего́ себе́ любви́ Бо́жией преда́л еси́: ду́шу и те́ло, се́рдце и ра́зум, па́мять и во́лю, наме́рение и начина́ние, сло́во и де́ло, и помышле́ние к Бо́гу в любо́вь прине́сл еси́, Павли́не богому́дре.
Ада́ма паде́ние, Христо́выми Страстьми́ искупле́ние, час сме́ртный, стра́шный суд помышля́я, блаже́нне, оста́вив земна́я, прите́кл еси́ в Но́во-Спа́сскую оби́тель гра́да Москвы́, иде́же и на сте́пень свяще́нства возведе́н был еси́ и в са́не священноархимадри́та до́бре подвиза́лся еси́.
Богоро́дичен: Ма́ти Всепе́тая, Влады́чице ми́ра, Богоро́дице, умилосе́рдися на моле́ние на́ше, Твое́ бо есьмы́ достояние. Всех спаси́ и поми́луй, да Тя вси ро́ди непреста́нно велича́ем.
Песнь 5Ирмо́с: Све́тлый нам возсия́й Свет Присносу́щный, у́треннюющим о судьба́х за́поведей Твои́х, Влады́ко Человеколю́бче, Христе́ Бо́же наш.
Изря́дно житие́ твое́ в оби́тели, досточу́дне, все́ми позна́но бысть, сего́ ра́ди и избра́ тя Госпо́дь на святи́тельское служе́ние, и первосвяти́тель Ти́хон в святи́тельский сан тя возведе́ и архипа́стырем Ры́льско-Ку́рския епа́рхии поста́ви.
Святи́тель Ры́льский и моли́твенник всея́ страны́ днесь Це́рковию прославля́ется, я́ко му́дрый упра́витель церко́вный, я́ко милосе́рдия о́браз, я́ко святи́телей украше́ние.
Вои́стинну а́нгел храни́тель яви́лся еси́ па́стве твое́й, любобоже́ственне Павли́не, в годи́ну бе́дствий, егда́ и сам в темни́це пребыва́л еси́, оте́чески в моли́твах свои́х к Бо́гу предста́тельствовал еси́ о ней, да вси благода́рне велича́ют Христа́ Спа́са на́шего и Пренепоро́чную Ма́терь Его́.
Я́ко конь храбре́йший, подо́бяся Па́влу апо́столу, спаси́тельне ежде́ние и богопропове́дничество в суро́вем Се́вере Перми́ соверша́л еси́, блаже́нне Павли́не. Прее́мником твои́м сподви́жник в труде́х был еси́, па́ству свою́ просвеща́я, поуча́л еси́ за́поведи Госпо́дни храни́ти и сла́вити Человеколю́бца Христа́ Бо́га на́шего.
Богоро́дичен: Те́плая Засту́пнице к Тебе́ прибега́ющих и ненаде́ющихся Наде́ждо, виждь скорбь люде́й Твои́х и пода́ждь по́мощь в зна́мении Твое́м, Пречи́стая.
Песнь 6Ирмо́с: Проро́ка Ио́ну подража́я, вопию́: живо́т мой, Бла́же, свободи́ от тли, и спаси́ мя, Спа́се ми́ра, зову́ща: сла́ва Тебе́.
И́стинный храни́телю апо́стольских преда́ний, ду́ха облиста́ющая заре́, зе́млю Сиби́рскую освети́л еси́ сия́нием до́брых дел твои́х, святи́телю Павли́не, и нас научи́ прославля́ти Го́спода Человеколю́бца.
Таи́нник быв Христо́ва уче́ния, святи́телю Павли́не, сего́ ве́дением просвети́л еси́ па́ству твою́, де́лы и словесы́ явля́я и́стину Христо́ву.
Его́же возлюби́л еси́, Его́же возжела́л еси́, Его́же ра́ди подвиза́лся еси́, святи́телю Павли́не, моли́ Христа́ Бо́га, да ми́рное даст стоя́ние Це́ркви святе́й, Оте́честву на́шему и всем правосла́вным христиа́ном, почита́ющим па́мять твою́.
Любы́ николи́же отпада́ет, глаго́лет Боже́ственный Дух. И́стина сия́ в чудесе́х любве́ твоея́ извести́ся, святи́телю Христо́в Павли́не, я́ко боля́щим исцеле́ние и скорбя́щим утеше́ние источа́еши. Ве́си Пе́нзенския прозябе́ние, пе́рмския па́ствы и Но́во-Спа́сския оби́тели гра́да Москвы́ украше́ние, моли́ся ко Го́споду, да спасе́т Христо́с Бог вся, я́ко Человеколю́бец.
Богоро́дичен: Я́же по благода́ти дарова́нная нам Помо́щнице, Того́ моли́ Всеблага́я и Всенепоро́чная, я́ко пре́зрит на́ша бесчи́сленная согреше́ния и изба́вит пла́меннаго томле́ния и тьмы кроме́шныя, и му́ки вся́ческия.
Конда́к, глас 8:Избра́нный священному́чениче и престо́лов апо́стольских наме́стниче, гра́да Могиле́ва преди́вный свети́льниче, кро́тостию и незло́бием А́гнцу Бо́жию уподо́бивыйся, изгна́ние, темни́чныя у́зы и злострада́ния от безбо́жных претерпе́вый, да́же до сме́рти ве́рен Христу́ пребы́л еси́, блаже́нне. Ты же, я́ко име́яй дерзнове́ние ко Го́споду, просвети́ омраче́нныя умы́ и сердца́ на́ша, да зове́м ти: Ра́дуйся, священному́чениче Павли́не, усе́рдный о нас ко Го́споду моли́твенниче.
И́кос:Прииди́те, правосла́внии лю́дие, пе́сньми ублажи́м па́стыря до́браго, гра́да Могиле́ва похвалу́ и утвержде́ние, моли́твенника всея́ земли́ Белору́сския, за ве́ру Христо́ву вся претерпе́вшаго, и за Правосла́вие и Оте́чество ду́шу свою́ положи́вшаго, и ны́не, ми́лостию Бо́жиею, но́ваго священному́ченика. Мы же, восхваля́юще сего́ Бо́жия уго́дника, воспева́ем ему́ си́це: Ра́дуйся, от ю́ности послуша́нию и смире́нию научи́выйся. Ра́дуйся, от жре́бия святи́тельства, а́ки от мона́шескаго послуша́ния, не уклони́выйся. Ра́дуйся, за па́ству твою́ ду́шу свою́ положи́вый. Ра́дуйся, па́стыря до́браго о́браз нам в себе́ яви́вый. Ра́дуйся, по и́мени твоему́ ме́ньший во всем был еси́. Ра́дуйся, по сло́ву Христо́ву, бо́льший в Ца́рствии Небе́снем наре́клся еси́. Ра́дуйся, по за́поведи Госпо́дней ма́терь свою́ почита́вый. Ра́дуйся, малоду́шие от серде́ц люде́й твои́х отгна́вый. Ра́дуйся, я́ко зло́бы и преще́ния безбо́жных убоя́тися не восхоте́вый. Ра́дуйся, я́ко Христа́ ра́ди и Ве́ры Правосла́вныя хлад и мраз Сиби́рский претерпе́вый. Ра́дуйся, за ве́ру Христо́ву богобо́рцами умерщвле́нный. Ра́дуйся, от Го́спода Иису́са на Небесе́х венча́нный. Ра́дуйся, священному́чениче Павли́не, усе́рдный о нас ко Го́споду моли́твенниче.
Песнь 7Ирмо́с: Пещь, Спа́се, ороша́шеся, о́троцы же, лику́юще, поя́ху: отце́в Бо́же, благослове́н еси́.
По шестиле́тнем пребыва́нии в хла́дней Сиби́ри Госпо́дь вруча́ет ти па́ству Калу́жскую, ю́же возлюби́л еси́ и рекл еси́: Зде поко́й, зде вселю́ся; и та́ко в по́двизе твое́м соиме́нник святи́телю Павли́ну Ми́лостивому был еси́, во сла́ву Це́ркве и па́ствы труди́лся еси́, поуча́я всех пе́ти: отце́в Бо́же, благослове́н еси́.
А́ще не Госпо́дь сози́ждет дом, всу́е труди́шася зи́ждущии. Сию́ и́стину внуша́л еси́, святи́телю, па́стве твое́й, да не осуетя́тся помышле́нии свои́ми и да не всу́е мяту́тся.
Вси в пе́снех духо́вных воспои́м в благоче́стии просия́вшаго святи́теля Павли́на, его́же Це́рковь воспита́. К нему же взыва́ем: моли́ Человеколю́бца Бо́га, да возведе́т от тли живо́т наш.
Ле́та дре́вняя помяну́хом и поучи́хомся во всех де́лех твои́х, святи́телю Павли́не, и обрето́хом ве́дение, ка́ко жи́ти в ми́ре сем, от святы́х Оте́ц и от жития́ своего́ вразумля́ющеся.
Богоро́дичен: Изба́ви ны от нужд на́ших, Ма́ти Христа́ Бо́га, Ро́ждшая всех Творца́, да вси зове́м Ти: ра́дуйся, Еди́но Предста́тельство душ на́ших.
Песнь 8Ирмо́с: Его́же ужаса́ются а́нгели и вся во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся ве́ки.
На́ше хвале́ние сие́ от недосто́йных и окая́нных чад твои́х, от усе́рдия же бога́то приноси́мое тебе́, приими́ ми́лостивно, святи́телю Павли́не, и благода́ть воздая́ преизоби́льно па́стве твое́й во гра́де Могиле́ве, благослове́ние Бо́жие препода́ждь ей.
Апо́столов прее́мника, святи́телей сопресто́льника, преподо́бных сожи́теля прославля́ет тя, святи́телю Павли́не, па́ства твоя́ Могиле́вская, тобо́ю просвеще́нная пе́ти Го́спода во вся ве́ки.
Ско́рбных уте́шитель, ни́щих упокоева́л еси́, друг был ме́ньшей бра́тии Христо́вей, сего́ ра́ди и Христо́с в ли́це друзе́й Свои́х учини́ тя, ми́лостиве Павли́не. Его́же моли́ и на́ше жестосе́рдие умягчи́ти и ско́ры ны сотвори́ти на благотворе́ние по́мощи и утеше́ния тре́бующим.
Подража́телю Отца́ Небе́снаго, я́ко сын любве́, в любви́ при́сно пребыва́яй, любо́вь вы́ше поста́ поста́вил еси́, святи́телю Павли́не. Мо́лим тя, пода́ждь и нам от ду́ха любве́ твоея́ и научи́ нас зре́ти на́ша прегреше́ния и не осужда́ти бра́та: мо́жеши бо, я́ко в Бо́зе пребыва́еши, и Бог в тебе́ пребыва́ет.
Богоро́дичен: А́нгельскую песнь, е́же ра́дуйся, Тебе́ зове́м, Богоневе́сто, Госпо́дь с Тобо́ю. Ра́дуйся, Ра́досте а́нгелов и всех челове́ков, сла́вящих Тя, и́стинное Весе́лие.
Песнь 9Ирмо́с: Живоприе́мный исто́чник приснотеку́щий, светоно́сный свети́льник благода́ти, храм одушевле́нный, сень пречи́стую, небесе́ и земли́ простра́ннейшую, Богоро́дицу, ве́рнии, велича́ем.
Словеса́ прему́дра, о е́же не ле́ты, но дея́ньми благи́ми полнота́ жития́ челове́ческаго пред Бо́гом измеря́ется, на тебе́ испо́лнишася, святи́телю Павли́не. Те́мже ду́шу доброде́тельми обогаще́нну име́я, на путь испове́дничества угото́вал еси́ ю, иде́же вся му́жественно за Христа́ и Це́рковь претерпева́я, взыва́л еси́: Го́спода по́йте дела́ и превозноси́те Его́ во ве́ки.
Иера́рх Апо́стольския Це́ркве и испове́дник Правосла́вныя Ве́ры был еси́, священному́чениче Павли́не: за сие́ темни́цею и гла́дом му́чим был еси́, та́же в Сиби́рь со́слан был еси́, иде́же и му́ченическую кончи́ну прие́м, в небе́сныя оби́тели всели́лся еси́ и та́мо Го́спода, Царя́ Сла́вы со все́ми святы́ми превозно́сиши во вся ве́ки.
Но́ваго и ди́внаго попечи́теля Це́ркве Правосла́вныя ве́мы тя, святи́телю Павли́не, поне́же во испове́дании твое́м не устраши́лся еси́ челове́ческих преще́ний и, ви́дя, ка́ко пла́чем и рыда́нием земля́ на́ша огласи́ся, кровь святы́х му́ченик и испове́дник Христо́вых пото́ки по ней излия́ся, хра́мы Бо́жии оскверни́шася и попра́нию преда́шася, взыва́л еси́: увы́ мне, земле́ моя́, увы́ мне, лю́дие Росси́йстии: Го́спода забы́хом, попече́ние же о души́ николи́же име́хом, благоволе́ния Бо́жия не обря́щем, а́ще ду́ши на́ша слеза́ми покая́ния пред Го́сподем не потщи́мся очи́стити.
А́нгели на небесе́х ра́дуются и земни́и ликовству́ют: ны́не вре́мя торжества́, ны́не ра́дость духо́вная яви́ся. В Юбиле́й Вели́кий Рождества́ Христо́ва Це́рковь Ру́сская прославля́ет сонм Новому́чеников, за Ве́ру Правосла́вную уму́ченных. Возвесели́мся у́бо и мы, христоимени́тии лю́дие, прославля́юще страстоте́рпца царя́ Никола́я со все́ми ца́рственными и про́чими му́ченики и священному́ченика Павли́на, архипа́стыря Могиле́вскаго, ра́достно воспоева́юще Христу́: Твой мир да́ждь нам и спаси́ нас я́ко Человеколю́бец.
Богоро́дичен: Сло́во Бо́жие светода́тельное и прему́дрость О́тчую пло́тию, Де́во, ро́ждшая, просвети́ глубо́кую тьму моего́ неразу́мия и сло́во ми пода́ждь воспева́ти Твоя́ чудеса́.
Свети́лен:Святи́теля Могиле́вскаго Павли́на днесь просла́вим, па́мять его́ благоче́стно почита́юще, той бо, я́ко свети́льник пресве́тлый, просия́л есть и о́бразом пресве́тлаго испове́дническаго жития́ своего́ ре́вностному служе́нию Бо́гу лю́ди науча́ет.
Сла́ва, и ны́не, Богоро́дичен:Ма́терь Незаходи́маго Све́та, осиява́ющую страну́ на́шу покро́вом ма́терняго заступле́ния, пе́сньми велича́ем, я́ко Светле́йшую го́рних во́инств.
На хвали́тех стихи́ры на 4, глас 4:Прииди́те, ублажи́м па́стыря до́браго земли́ на́шея, за Ве́ру Правосла́вную вся претерпе́вшаго и ду́шу свою́ положи́вшаго; и ны́не ми́лостию Бо́жиею чудотво́рца, явле́ннаго во утвержде́ние ве́ры немощству́ющих, во исцеле́ние всех неду́гующих, и во упокое́ние озло́бленных грехи́ мно́гими; да вси возра́дуемся и да пое́м ему́: ра́дуйся, любы́, нас согрева́ющая; ра́дуйся, си́ло, нас исцеля́ющая; ра́дуйся, ра́зуме, всех просвеща́яй; ра́дуйся, стра́же, Правосла́вие на́ше охраня́яй; ра́дуйся, святи́телю Павли́не.
Ве́ре в лю́дех оскуде́вшей, любви́ истощи́вшейся, наде́жде исся́кнувшей, попусти́ Госпо́дь бе́дствия на лю́ди Оте́чества на́шего. Ты же, святи́телю, боле́знуя о наро́де свое́м, преклоня́я коле́на, моли́лся еси́, да к покая́нию Госпо́дь призове́т па́ству твою́.
Вси помо́лимся Христу́, творя́ще па́мять днесь святи́теля Павли́на, вку́пе с ним воспои́м ца́рственныя и всея́ новому́ченики на́ша. Прии́ми, Го́споди, моли́твы всех святы́х и пода́ждь нам мир и ве́лию ми́лость.
Внима́йте у́бо себе́, лю́дие Ру́сстии, проба́ви бо Госпо́дь ны́не ми́лость Свою́ нам: пото́цы кро́ве му́ченическия иссяко́ша плене́ния от вла́сти безбо́жных свободи́хомся, и ны́не бежи́м всеме́рно прираже́ния грехо́внаго, да не па́ки гнев Бо́жий наведе́м на себе́, и да не бу́дет нам после́дняя го́рша пе́рвых.
Сла́ва, глас 8:Кровьми́ святы́х му́ченик Це́рковь Христо́ва и́здревле утверди́ся, та́кожде и во дни твоя́, святи́телю Павли́не, во Оте́честве на́шем, я́ко пото́цы водни́и, кровь святы́х пролия́ся, оба́че смотре́нием Бо́жиим сия́ се́менем яви́ся, из него́же прозябе́ благосенноли́ственное дре́во Це́ркве Правосла́вныя.
И ны́не, Богоро́дичен, глас то́йже:Влады́чице, приими́ моли́тву раб Твои́х и изба́ви ны от вся́кия ну́жды и печа́ли.
На Литурги́иБлаже́нны от кано́на песнь 3-я и 6-я.
Проки́мен, глас 7: Возвесели́тся пра́ведник о Го́споде и упова́ет на Него́.
Апо́стол, Евре́ям 335 зача́ло.
Ева́нгелие от Иоа́нна, 36 зача́ло.