Иная служба преподобномученику Ефрему Новому
К приближающейся памяти преподобномученика Ефрема Нового выкладываю в «Уставные заметки» полиелейную службу святому, составленную в 2016 году клириком Украинской Православной Церкви протоиереем Илией Тетерько (Одесса). Текст публикуется по авторской машинописи, цензурными инстанциями текст пока не рассматривался.
СЛУЖБА
преподобномученику Ефрему Новому, чудотворцу
НА ВЕЛИЦЕЙ ВЕЧЕРНИ
Блажен муж: 1-й антифон.
На Господи, воззвах: стихиры, глас 1:Отче богомудре Ефреме, / постником причелся еси, безстрастием украшен, / и мученическому сочтался еси сословию, / и вселился еси во обители присноцветущия, / идеже Свет незаходимый и идеже есть Древо жизни. / И ныне Христу, блаженне, молися // даровати душам нашим мир и велию милость.
Житие непорочно, терпение и благодушие, / любовь ко всем и милосердие, / незлобие же со смирением / и самоотвержение крайнее стяжав, / яко Ангел, на земли пожил еси / и страдати за Христа сподобился еси, / сего ради и друг Божий нареклся еси, Ефреме блаженне, // молитвенниче о душах наших.
Нося крест на рамех твоих, / последовал еси Христу невозвратным помыслом, / житейския сладости презрев / и плотския страсти отнюд отринув, / многоразличныя муки дерзновенно претерпел еси, / темже и благодать от Бога приял еси / недуги различныя исцеляти / и духи лукавыя от человек прогоняти, / Ефреме отче треблаженне, // молитвенниче о душах наших.
Первее иноческими подвигами твоим / в житии земнем Богови угождая, / страданием второе мученически житие твое скончал еси. / Тем тя венча за сугубыя подвиги, отче Ефреме преподобне, / и даром чудес обогати тя / Христос Человеколюбец / и Спас душ наших.
Слава, глас 2:Земная отринув, Небесная себе уготовляя, / яко страдалец за истину, / Небесныя сладости вкусил еси, страстотерпче Ефреме. / Сея сладости испроси и нам у Христа, Спаса нашего, // яко теплый молитвенник о душах наших.
И ныне, догматик, глас тойже:Прейде сень законная, благодати пришедши: / якоже бо купина не сгараше опаляема, / тако Дева родила еси / и Дева пребыла еси. / Вместо столпа огненнаго / праведное возсия Солнце, / вместо Моисея - Христос, // спасение душ наших.
Вход. Прокимен дне, и чтения 3.
Премудрости Соломоновы чтение (глава 3):Праведных души в руце Божией, и не прикoснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку примут, упование их безсмертия исполнено. И вмале наказании бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение (глава 4):Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.
Премудрости Соломоновы чтение (глава 5 и 6):Праведницы во веки живут, и в Господе мзда их, и попечение их у Вышняго. Сего ради примут Царствие благолепия и венец доброты от руки Господни, зане десницею покрыет я и мышцею защитит их. Примет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Примет щит непобедимый преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли, внушите, держащие множества и гордящиися о народех язык, яко дана есть от Господа держава вам и сила от Вышняго.
На стиховне стихиры, глас 4:Светлая память страданий твоих, / преподобне отче Ефреме, / сердца наша веселит духовно: / зрим бо честную раку мощей твоих, / исцеляющу недужныя, с верою к ней притекающия, / и славим Господа, тя прославльшаго, / труды и подвиги твоя увенчавшаго // толикою чудес благодатию.
Стих: Честна пред Господем / смерть преподобных Его.
В жертву Богу себе самаго принося, / в сердце твоем хранил еси образ Христа, Агнца непорочнаго, / вдавшаго Себе на заклание за грехи мира, / и, Тому подражая, Ефреме отче блаженне, / сладце предал еси душу твою в руце Божии. / Христовых страданий общниче, // Того моли спастися душам нашим.
Стих: Блажен муж, бояйся Господа, / в заповедех Его восхощет зело.
Кто не воспоет, кто не прославит / преславная чудеса твоя, отче Ефреме? / По честных страданиих твоих / врач недугов и заступник милосерд явился еси нам, / подавая обильно исцеления / и помощи различныя даже не ведущим тя, // поспешая к людем благодатию твоею.
Слава, глас 6:Светлый мученик славным страданием своим / Горния силы возвесели, / нам же на земли праздник воздвиже добропобеднаго своего преставления, / в немже подвиги его прославляюще, / яже за Христа даже до смерти претерпе, / любовию к нему возопиим: / моли о нас, святе Ефреме, // получити нам райское вселение и велию милость.
И ныне, Богородичен, глас тойже:Творец и Избавитель мой, Пречистая, / Христос Господь, из Твоих ложесн прошед, / в мя оболкийся, первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся, Ангельски, радуйся, Владычице, / предстательство и покрове, // и спасение душ наших.
Тропарь, глас 1:Якоже светильник, на горе Амомстей возсиял еси, / преподобномучениче Христов Ефреме, / и, варварская претерпев нахождения, / мученически к Богу отшел еси. / Сего ради благодать всегда источаеши / благочестно зовущим ти: / слава Давшему ти крепость, / слава Прославльшему тя, // слава Действующему тобою всем исцеления.
НА УТРЕНИ
По 1-м стихословии седален, глас 1:Яко инок всечестен / и благочестия священнострадалец, / мук многоразличных не убоявся, / безумство злых человек упразднил еси, / преподобне отче Ефреме, / моли Христа Бога спастися душам нашим.
Слава, и ныне, глас тойже:Едина истинная христиан Покровительнице, / всяких лютых обстояний, / бед и скорбей нас избави / и молитвами Твоими спаси души наша.
По 2-м стихословии седален, глас 2:Претерпел еси первее подвиги постническия / и ныне мученическим увязлся еси венцем, / Ефреме достоблаженне, / Темже и ныне не отрини нас от твоего заступления, // любовию восхваляющих тя.
Слава, и ныне, глас тойже:Устами и сердцем величаем Тя, / Дево Мати: / Ты же, рождшая Бога, / не отрини нас от Твоего заступления.
Величание:Величаем тя, / преподобне отче Ефреме, / и чтим честная страдания твоя, / яже за Христа претерпел еси.
Псалом избранный:1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь. 2. Суди ми, Господи, яко аз незлобою моею ходих. 1. Искуси мя, Господи, и испытай мя, разжи утробы моя, и сердце мое. 2. Да не погубиши с нечестивыми душу мою. 1. Аз же незлобою моею ходих, избави мя, Господи, и помилуй мя. 2. Нога моя ста на правоте: в церквах благословлю Тя, Господи.
По полиелеи седален, глас 8:По славнем страдании твоем, отче Ефреме блаженне, / и от агарян нечестивых убиении / явил есть Христос нетленныя мощи твоя, / и мы, лобызающе сия, любовию вопием тебе: / от прелести лукаваго, скорбей и болезней // спасай нас молитвами твоими.
Слава, и ныне, Богородичен, глас тойже:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4.Прокимен, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?
Всякое дыхание: Евангелие от Матфея, зачало 11.
По 50-м псалме стихира, глас 6:От чрева материя возлюблен быв Богом, / яко житель града Небеснаго, / призвание велие обрел еси / и, Тому житием твоим славным угодив, / всем требующим помощи твоея / чудотворный податель явился еси. / Спасай нас, яко предстатель наш, // чудотворче отче Ефреме преблаженне.
Канон святому, глас 2.
Песнь 1Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, / яко прославися.
Моего разума мрак твоими молитвами отжени, страстоносче Христов Ефреме, яко да воспою, славне, твою священную и светозарную память песньми.
Слез твоих стенаньми и кровей потоками угасил еси злобы демонския лютое углие, мучениче всеблаженне Ефреме.
Силою Владычнею укрепляемь, князя тьмы победил еси и, стопам Христовым последуя неотступно, вышшаго совершенства достигл еси; но моли Бога о нас, преподобне, любовию чтущих святую память твою.
Богородичен: Спасение родила еси человеком и обновление принесла еси нам, обетшавшим грехми, Дево, Мати Божия.
Песнь 3Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, / и несть праведен паче Тебе, Господи.
Уязвляемь лютыми ранами среди мук всеразличных и тяжких, Христова Имене не отверглся еси, мучениче славне Ефреме.
Преславное житие твое, преподобне отче, достодолжно прославляется днесь, чудеса же твоя в концех земли проповедаются, яве всем возвещающа, яко великую благодать от Бога приял еси.
Мысленно, яко угль, разжегся теплотою Божественнаго Духа, лед страстей растаил еси, потоки же кровными огнь погасил еси злочестия чуждий, Ефреме, исповедниче Богоблаженне.
Богородичен: Дева и Мати паче естества явилася еси, Чистая, Единаго от Единаго родившая, спасающаго души наша.
Седален, глас 4:Муки мужественно претерпев, отче Ефреме блаженне, / к неболезненней жизни себе уготовляя, / научил еси нас терпением стяжати души наша. / Темже днесь Христова Церковь, // празднующи святую память твою, светло радуется.
Слава, и ныне, Богородичен:Пречистеи Твои руце, Дево Мати, простерши, / покрый уповающия на Тя и к Сыну Твоему зовущия: // всем подаждь, Христе, Твоя милости.
Песнь 4Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: / слава силе Твоей, Господи.
Приял еси от Бога, отче треблаженне, за подвиги твоя дар недуги телесныя исцеляти и многоболезненныя страсти врачевати зовущих Христу Богу: слава силе Твоей, Господи.
Постничества слезами омовен, кровию мученическою удобрился еси, Ефреме добропобедне, и весь краснейш показався, востекл еси к Желаемому, вопия: слава силе Твоей, Господи.
Умом очищенным предстоя Троице, преподобне Ефреме, и отонудными зарями осияемь, отче, сущия нас во тьме, бедствующия душевными страстьми, просвещаеши всегда, да зовем с тобою: слава силе Твоей, Господи.
Богородичен: Невесту Тя безневестну и чисто, Чистая, селение Иисусово, святейшую Херувим вемы, Богородице.
Песнь 5Ирмос: Света подателю и веков Творче, Господи, / во свете Твоих повелений настави нас; / разве бо Тебе иного бога не знаем.
Миродохновен добродетелей благовонием быв, во гробе лежа благовонствиши лица призывающих тя несомненным сердцем, отче Ефреме преподобне.
Блаженно житие твое на земли и кончина безсмертна, сего ради нетленная богатства стяжал еси, отче Ефреме всехвальне, и просвещаеши притекающих к тебе чудесы.
Яко победивый князя тьмы века сего, вшел еси в радость Господа твоего, победы венец на главе твоей нося; но, яко имеяй дерзновение ко Спасу, Того моли, святе Ефреме, от страстей и нужд избавитися тя почитающим.
Богородичен: Дреманием уныния мя сон греховный, Отроковице, постиже, / бодренною молитвою Твоею возстави мя к покаянию.
Песнь 6Ирмос: В бездне греховней валяяся, / неизследную милосердия Твоего / призываю бездну: / от тли, Боже, мя возведи.
Имуще честный гроб твой, от негоже исцеления дары приемлем, память твою чтим, святе Ефреме, Христа Спаса славяще яко Всемогуща.
Ко Христу воздев пречистеи руце, презря соблазны наша, Владыце помолися, отче преподобне, избавитися нам от всех напастей, мир свыше испроси всей вселенней.
Пречистый Свет, почивший в тебе, всего тя световидна сотвори, Ефреме отче всечудне, просвещающа верных добродетелей твоих светлыми сиянии.
Богородичен: Исцели изъязвленную страстьми душу мою, Пречистая, матернею Твоею молитвою Божественное врачевание прилагающе.
Кондак, глас 3:На горе Амомстей / добре подвизался еси, богомудре, / и тамо мученическое течение скончал еси. / Темже, преподобномучениче Ефреме, / Жизнодавец сугубыми венцы достойно тя увенча, // прилежно молящася о душах наших.
Икос:Жития монашескаго украшение и мучеников красоту / явил себе житием твоим, Ефреме Богоблаженне, / и, яко солнце пресветлое, / людем православным возсиял еси. / Темже и Христос даром превелиих чудес обогати тя, / и людем Своим яви тя, преподобне, // прилежно молящася о душах наших.
Песнь 7Ирмос: Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющыя Тебе: / отцев, Боже, благословен еси.
Угасив страстей пламень слез росою и кровию своею вещественный огнь, благодать чудес источил еси, всечестне, имиже врачуеши недуги душ и телес наших.
Мучения терпя, опаляемь вещественным огнем, душу твою огнем невещественным оросил еси, Ефреме долготерпеливе, якоже трие отроцы, посреде пламене взывая: отцев Боже, благословен еси.
Изнури плоть твою многими ранами зломудреннии мучители, ты же, треблаженне, из глубины сердечныя взывал еси усердно тя Укрепльшему: отцев Боже, благословен еси.
Богородичен: Радуйся, Владычице Дево, всем людем похвала, непрестанно молися Христу Богу сохранити место сие и люди молитвами всеблаженнаго Ефрема.
Песнь 8Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите, вся дела Господня, Господа.
Ублажиша тя люди, благословиша святителие, слышаще твое мужественное терпение и ко Христу ходатая стяжавше тя, Ефреме всечудне. И ныне приходяще, честным твоим мощем покланяются, взывающе: благословите, вся дела Господня, Господа.
Хваляся язвами Христовыми, к вечным востекл еси обителем, в багряницу одеян, мучениче Ефреме славне, от кровей твоих обагреную, и светло Царю сил предстоиши, с мученики ликуя, поеши: благословите, вся дела Господня, Господа.
Яко многоценное богатство крыемое, отче Ефреме, являешися, предлежа лицем благочестивых, и чудесы вся обогащаеши, почитающия тя и Христу поющим: благословите, вся дела Господня, Господа.
Богородичен: Нетленное Слово, паче слова тления нас всякаго избавляюща, родила еси, сего ради Тя вси, Дево, славим.
Песнь 9Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: / тем всепетую Богородицу величаем.
Струю нам всегда честная твоя рака исцелений источает, отче, страстей излияния всяческих изсушающи и всяку напаяющи душу к благоплодию Божественному, отче Ефреме, Христов угодниче.
Нарочитый святый день славныя твоея памяти творяще духовно, тя молим, Богоблаженне преподобне: моли прилежно, Ефреме, о пользе душ наших.
Лучезарная память твоя, отче Ефреме, якоже солнце, всем возсия, просвещающи светло в ней тя славящия, яко служителя Христова, и наследника Царствия Его, и всем преподобным сопричастника.
Помяни ныне, святче Божий, всех верою к тебе притекающих, и, от душевных страстей и болезней избавляя, защити ны от бед и обстояний, и спасения Божественнаго буди нам ходатай.
Богородичен: Глас Тебе архангелов, Пречистая, вопием: радуйся, спасение всех человеков и славных мученик Божественное венчание.
Светилен:Трисиянному Великому Свету ныне предстоя и в неизреченней светлости со всеми святыми пребывая, мучениче всечестне Ефреме, помяни всех нас, память твою светоносную совершающих.
Слава, и ныне, Богородичен:Света Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.
На хвалитех стихиры, глас 1:Ефреме Богоблаженне, / от земли преставився, востекл еси к Небесным, / и в Горних жити селениих сподобился еси, отче всечестне, / раны и смерть за Христа приял еси, / Егоже ныне моли // даровати душам нашим мир и велию милость.
Ликуй и веселися, страстотерпче Христов Ефреме! / Ты кровию твоею честною землю освятил еси, / и венец нетленный от руки Господни / на версе твоем приял еси, всечестне, / и посещати не престаешь люди чудесы преславными // предстательствуя присно о душах наших.
Яко всесвященное Божественное / и Богоугодное исповедание твое: / яко злато бо очистився, / Богу принеслея еси жертва благоприятна, / веселяся, преподобие Ефреме, // подражанием страстей Спаса нашего.
О верно творящих твою память / и многия подвиги честнаго твоего мучения поющих, / не престай моля, блаженне отче, / присно сохранити от бед и скорбей / и будущия сподобитися жизни, / Ефреме мучениче, Богопроповедниче.
Слава, глас 8:Приидите, мучениколюбцы вси, / лик празднующий составим, / венцы похвальныя плетуще / и честную главу великомученика Христова Ефрема венчающе. / Сей убо, на земли пострадавый / и ныне на Небесех царствуя, / со Ангелы, и с лики мученик, / и со всеми святыми молится Спасу о нас, // умирити мир и спасти души наша.
И ныне, глас тойже:Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИБлаженны от канона песнь 3-я и 6-я.
Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми?
Апостол к Галатом, зачало 213.
Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни, во дворех Бога нашего процветут.
Евангелие от Луки, зачало 24.
Причастен: В память вечную будет праведник:
МОЛИТВАО святый отче Ефреме, преподобных единовсельниче и мучеников сопричастниче, возлюбивый Господа Бога всем сердцем и Тому даже до конца последовавый!
Ты первее постом и молитвою душу твою очистил еси и произволением твердым, якоже мечем, вся страстныя помыслы посекл еси. Таже, егда прииде время твоего страдания, не убоялся еси мучителей, но молитвою к Богу отразил еси нахождения диавола. И, якоже един от древних великих страстотерпцев, претерпел еси вся муки, елика безумнии врази измыслити возмогоша. Конечне же и смерть за веру Православную приял еси и силою Креста Христова агарянское нечестие посрамил еси.
Сего ради прославляем подвиги твоя, отче Ефреме, почитаем страдания и молимся: умилосердися о нас, грешных, и житие наше плодоносно покажи. Да падут обильныя слезы покаяния на изсохшую землю душ наших, и да обратится сия из пустыни неплодныя в сад божественных добродетелей, да утвердится оградою воздержания, да процветет цветом чистоты и целомудрия, и принесет плод сторичный делы милосердия и любве к Богу и ближнему. Да услышим и мы сладкий глас Владыки Христа: приидите, благословеннии Отца Моего, наследуйте уготованное вам Царствие от сложения мира. Аминь.
Ина молитваО преподобномучениче Ефреме, новый чудотворче и великий миру светильниче! Ты от юности Христа возлюбив, Тому Единому вседушно последовал еси. Жития же монашескаго взыскуя, на горе Амомон вселился еси и тамо, плоть распиная и непрестанную молитву в сердце твоем совершая, многими слезами душу твою от страстей очистил еси.
Сего ради уготовася тебе путь превосходнейший, не токмо в Сына Божия веровати, но и по Нем страдати. Темже муки горчайшия за Христа радостно приял еси и, никакоже агарян нечестивых устрашився, на долзе времени мучения телесная терпел еси, таже, дивное мужество показуя, кровь твою, яко многоценное миро, на землю пролиял еси. Егда же безумнии агаряне, желавшии тя от Христа отринути, узреша, яко ничтоже успевают, на древе стремглав простроша тя и палицею горящею святое тело твое прободоша. Ты же, претрудный путь свой совершив, кротко душу твою в руце Божии предал еси.
Темже, яко молния на небо возшел еси, достигнув возлюбленнаго тобою Господа. Иже прием тя, яко вернаго воина, увязе главу твою честную венцем нетленныя славы и отре всякую слезу твою, на веки с Собою сочетавая. Кто ныне возможет разлучити тя от любве Божия? Кто исхитит у тебе светлую диадиму, дарованную Небесным Царем? Кто лишит тя вечнаго жительства во граде Господнем? Воистину неотъемлемое наследие и причастие со святыми восприял еси на Небесех.
Обаче и на земли просия слава твоя, святый отче Ефреме. Аще бо и безвестно в мире сем пострадал еси и память о подвизех твоих за давностию лет пресечеся, обаче Творец всяческих, ведый тайная, в последок дний сих яви сокровенныя в земли твоя мощи, подвиги твоя явлены сотвори и дарова ти велию благодать исцелений в помощь и утешение роду христианскому. Сего ради потоцы чудес источил еси, отче Ефреме, притекающим к святей твоей раце, расслабленныя укрепляя, слепым зрение подавая, хромыя возставляя и иными многими и неисцельными недугами содержимыя люди уврачуя. И даже до днесь вся концы вселенныя просвещаеши многоразличными дивными чудесы и видении.
О святче Божий, не остави и нас, убогих, оскудевших в вере, любви и добрых делех, возстави нас падших в страсти, даруй нам слезы покаяния, утверди твоею крепкою к Богу молитвою, исцели наша недугующия души и телеса. Просвети наш ум последовати евангельским заповедем, возжги в сердцах наших неугасимую любовь ко Спасу и ближним нашим, даруй нам благими делы прославляти Отца нашего Небеснаго, Емуже подобает всякая слава, честь и поклонение со Единородным Его Сыном и с Пресвятым и Благим и Животворящим Его Духом, ныне и присно и во веки веков. Аминь.
СЛУЖБА
преподобномученику Ефрему Новому, чудотворцу
НА ВЕЛИЦЕЙ ВЕЧЕРНИ
Блажен муж: 1-й антифон.
На Господи, воззвах: стихиры, глас 1:Отче богомудре Ефреме, / постником причелся еси, безстрастием украшен, / и мученическому сочтался еси сословию, / и вселился еси во обители присноцветущия, / идеже Свет незаходимый и идеже есть Древо жизни. / И ныне Христу, блаженне, молися // даровати душам нашим мир и велию милость.
Житие непорочно, терпение и благодушие, / любовь ко всем и милосердие, / незлобие же со смирением / и самоотвержение крайнее стяжав, / яко Ангел, на земли пожил еси / и страдати за Христа сподобился еси, / сего ради и друг Божий нареклся еси, Ефреме блаженне, // молитвенниче о душах наших.
Нося крест на рамех твоих, / последовал еси Христу невозвратным помыслом, / житейския сладости презрев / и плотския страсти отнюд отринув, / многоразличныя муки дерзновенно претерпел еси, / темже и благодать от Бога приял еси / недуги различныя исцеляти / и духи лукавыя от человек прогоняти, / Ефреме отче треблаженне, // молитвенниче о душах наших.
Первее иноческими подвигами твоим / в житии земнем Богови угождая, / страданием второе мученически житие твое скончал еси. / Тем тя венча за сугубыя подвиги, отче Ефреме преподобне, / и даром чудес обогати тя / Христос Человеколюбец / и Спас душ наших.
Слава, глас 2:Земная отринув, Небесная себе уготовляя, / яко страдалец за истину, / Небесныя сладости вкусил еси, страстотерпче Ефреме. / Сея сладости испроси и нам у Христа, Спаса нашего, // яко теплый молитвенник о душах наших.
И ныне, догматик, глас тойже:Прейде сень законная, благодати пришедши: / якоже бо купина не сгараше опаляема, / тако Дева родила еси / и Дева пребыла еси. / Вместо столпа огненнаго / праведное возсия Солнце, / вместо Моисея - Христос, // спасение душ наших.
Вход. Прокимен дне, и чтения 3.
Премудрости Соломоновы чтение (глава 3):Праведных души в руце Божией, и не прикoснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку примут, упование их безсмертия исполнено. И вмале наказании бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение (глава 4):Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.
Премудрости Соломоновы чтение (глава 5 и 6):Праведницы во веки живут, и в Господе мзда их, и попечение их у Вышняго. Сего ради примут Царствие благолепия и венец доброты от руки Господни, зане десницею покрыет я и мышцею защитит их. Примет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Примет щит непобедимый преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли, внушите, держащие множества и гордящиися о народех язык, яко дана есть от Господа держава вам и сила от Вышняго.
На стиховне стихиры, глас 4:Светлая память страданий твоих, / преподобне отче Ефреме, / сердца наша веселит духовно: / зрим бо честную раку мощей твоих, / исцеляющу недужныя, с верою к ней притекающия, / и славим Господа, тя прославльшаго, / труды и подвиги твоя увенчавшаго // толикою чудес благодатию.
Стих: Честна пред Господем / смерть преподобных Его.
В жертву Богу себе самаго принося, / в сердце твоем хранил еси образ Христа, Агнца непорочнаго, / вдавшаго Себе на заклание за грехи мира, / и, Тому подражая, Ефреме отче блаженне, / сладце предал еси душу твою в руце Божии. / Христовых страданий общниче, // Того моли спастися душам нашим.
Стих: Блажен муж, бояйся Господа, / в заповедех Его восхощет зело.
Кто не воспоет, кто не прославит / преславная чудеса твоя, отче Ефреме? / По честных страданиих твоих / врач недугов и заступник милосерд явился еси нам, / подавая обильно исцеления / и помощи различныя даже не ведущим тя, // поспешая к людем благодатию твоею.
Слава, глас 6:Светлый мученик славным страданием своим / Горния силы возвесели, / нам же на земли праздник воздвиже добропобеднаго своего преставления, / в немже подвиги его прославляюще, / яже за Христа даже до смерти претерпе, / любовию к нему возопиим: / моли о нас, святе Ефреме, // получити нам райское вселение и велию милость.
И ныне, Богородичен, глас тойже:Творец и Избавитель мой, Пречистая, / Христос Господь, из Твоих ложесн прошед, / в мя оболкийся, первыя клятвы Адама свободи. / Темже Ти, Всечистая, / яко Божии Матери же и Деве, / воистинну вопием немолчно: / радуйся, Ангельски, радуйся, Владычице, / предстательство и покрове, // и спасение душ наших.
Тропарь, глас 1:Якоже светильник, на горе Амомстей возсиял еси, / преподобномучениче Христов Ефреме, / и, варварская претерпев нахождения, / мученически к Богу отшел еси. / Сего ради благодать всегда источаеши / благочестно зовущим ти: / слава Давшему ти крепость, / слава Прославльшему тя, // слава Действующему тобою всем исцеления.
НА УТРЕНИ
По 1-м стихословии седален, глас 1:Яко инок всечестен / и благочестия священнострадалец, / мук многоразличных не убоявся, / безумство злых человек упразднил еси, / преподобне отче Ефреме, / моли Христа Бога спастися душам нашим.
Слава, и ныне, глас тойже:Едина истинная христиан Покровительнице, / всяких лютых обстояний, / бед и скорбей нас избави / и молитвами Твоими спаси души наша.
По 2-м стихословии седален, глас 2:Претерпел еси первее подвиги постническия / и ныне мученическим увязлся еси венцем, / Ефреме достоблаженне, / Темже и ныне не отрини нас от твоего заступления, // любовию восхваляющих тя.
Слава, и ныне, глас тойже:Устами и сердцем величаем Тя, / Дево Мати: / Ты же, рождшая Бога, / не отрини нас от Твоего заступления.
Величание:Величаем тя, / преподобне отче Ефреме, / и чтим честная страдания твоя, / яже за Христа претерпел еси.
Псалом избранный:1. Терпя потерпех Господа, и внят ми, и услыша молитву мою. 2. Бог нам Прибежище и Сила, Помощник в скорбех, обретших ны зело. 1. Многи скорби праведным и от всех их избавит я Господь. 2. Суди ми, Господи, яко аз незлобою моею ходих. 1. Искуси мя, Господи, и испытай мя, разжи утробы моя, и сердце мое. 2. Да не погубиши с нечестивыми душу мою. 1. Аз же незлобою моею ходих, избави мя, Господи, и помилуй мя. 2. Нога моя ста на правоте: в церквах благословлю Тя, Господи.
По полиелеи седален, глас 8:По славнем страдании твоем, отче Ефреме блаженне, / и от агарян нечестивых убиении / явил есть Христос нетленныя мощи твоя, / и мы, лобызающе сия, любовию вопием тебе: / от прелести лукаваго, скорбей и болезней // спасай нас молитвами твоими.
Слава, и ныне, Богородичен, глас тойже:Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4.Прокимен, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?
Всякое дыхание: Евангелие от Матфея, зачало 11.
По 50-м псалме стихира, глас 6:От чрева материя возлюблен быв Богом, / яко житель града Небеснаго, / призвание велие обрел еси / и, Тому житием твоим славным угодив, / всем требующим помощи твоея / чудотворный податель явился еси. / Спасай нас, яко предстатель наш, // чудотворче отче Ефреме преблаженне.
Канон святому, глас 2.
Песнь 1Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, / яко прославися.
Моего разума мрак твоими молитвами отжени, страстоносче Христов Ефреме, яко да воспою, славне, твою священную и светозарную память песньми.
Слез твоих стенаньми и кровей потоками угасил еси злобы демонския лютое углие, мучениче всеблаженне Ефреме.
Силою Владычнею укрепляемь, князя тьмы победил еси и, стопам Христовым последуя неотступно, вышшаго совершенства достигл еси; но моли Бога о нас, преподобне, любовию чтущих святую память твою.
Богородичен: Спасение родила еси человеком и обновление принесла еси нам, обетшавшим грехми, Дево, Мати Божия.
Песнь 3Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, / и несть праведен паче Тебе, Господи.
Уязвляемь лютыми ранами среди мук всеразличных и тяжких, Христова Имене не отверглся еси, мучениче славне Ефреме.
Преславное житие твое, преподобне отче, достодолжно прославляется днесь, чудеса же твоя в концех земли проповедаются, яве всем возвещающа, яко великую благодать от Бога приял еси.
Мысленно, яко угль, разжегся теплотою Божественнаго Духа, лед страстей растаил еси, потоки же кровными огнь погасил еси злочестия чуждий, Ефреме, исповедниче Богоблаженне.
Богородичен: Дева и Мати паче естества явилася еси, Чистая, Единаго от Единаго родившая, спасающаго души наша.
Седален, глас 4:Муки мужественно претерпев, отче Ефреме блаженне, / к неболезненней жизни себе уготовляя, / научил еси нас терпением стяжати души наша. / Темже днесь Христова Церковь, // празднующи святую память твою, светло радуется.
Слава, и ныне, Богородичен:Пречистеи Твои руце, Дево Мати, простерши, / покрый уповающия на Тя и к Сыну Твоему зовущия: // всем подаждь, Христе, Твоя милости.
Песнь 4Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: / слава силе Твоей, Господи.
Приял еси от Бога, отче треблаженне, за подвиги твоя дар недуги телесныя исцеляти и многоболезненныя страсти врачевати зовущих Христу Богу: слава силе Твоей, Господи.
Постничества слезами омовен, кровию мученическою удобрился еси, Ефреме добропобедне, и весь краснейш показався, востекл еси к Желаемому, вопия: слава силе Твоей, Господи.
Умом очищенным предстоя Троице, преподобне Ефреме, и отонудными зарями осияемь, отче, сущия нас во тьме, бедствующия душевными страстьми, просвещаеши всегда, да зовем с тобою: слава силе Твоей, Господи.
Богородичен: Невесту Тя безневестну и чисто, Чистая, селение Иисусово, святейшую Херувим вемы, Богородице.
Песнь 5Ирмос: Света подателю и веков Творче, Господи, / во свете Твоих повелений настави нас; / разве бо Тебе иного бога не знаем.
Миродохновен добродетелей благовонием быв, во гробе лежа благовонствиши лица призывающих тя несомненным сердцем, отче Ефреме преподобне.
Блаженно житие твое на земли и кончина безсмертна, сего ради нетленная богатства стяжал еси, отче Ефреме всехвальне, и просвещаеши притекающих к тебе чудесы.
Яко победивый князя тьмы века сего, вшел еси в радость Господа твоего, победы венец на главе твоей нося; но, яко имеяй дерзновение ко Спасу, Того моли, святе Ефреме, от страстей и нужд избавитися тя почитающим.
Богородичен: Дреманием уныния мя сон греховный, Отроковице, постиже, / бодренною молитвою Твоею возстави мя к покаянию.
Песнь 6Ирмос: В бездне греховней валяяся, / неизследную милосердия Твоего / призываю бездну: / от тли, Боже, мя возведи.
Имуще честный гроб твой, от негоже исцеления дары приемлем, память твою чтим, святе Ефреме, Христа Спаса славяще яко Всемогуща.
Ко Христу воздев пречистеи руце, презря соблазны наша, Владыце помолися, отче преподобне, избавитися нам от всех напастей, мир свыше испроси всей вселенней.
Пречистый Свет, почивший в тебе, всего тя световидна сотвори, Ефреме отче всечудне, просвещающа верных добродетелей твоих светлыми сиянии.
Богородичен: Исцели изъязвленную страстьми душу мою, Пречистая, матернею Твоею молитвою Божественное врачевание прилагающе.
Кондак, глас 3:На горе Амомстей / добре подвизался еси, богомудре, / и тамо мученическое течение скончал еси. / Темже, преподобномучениче Ефреме, / Жизнодавец сугубыми венцы достойно тя увенча, // прилежно молящася о душах наших.
Икос:Жития монашескаго украшение и мучеников красоту / явил себе житием твоим, Ефреме Богоблаженне, / и, яко солнце пресветлое, / людем православным возсиял еси. / Темже и Христос даром превелиих чудес обогати тя, / и людем Своим яви тя, преподобне, // прилежно молящася о душах наших.
Песнь 7Ирмос: Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющыя Тебе: / отцев, Боже, благословен еси.
Угасив страстей пламень слез росою и кровию своею вещественный огнь, благодать чудес источил еси, всечестне, имиже врачуеши недуги душ и телес наших.
Мучения терпя, опаляемь вещественным огнем, душу твою огнем невещественным оросил еси, Ефреме долготерпеливе, якоже трие отроцы, посреде пламене взывая: отцев Боже, благословен еси.
Изнури плоть твою многими ранами зломудреннии мучители, ты же, треблаженне, из глубины сердечныя взывал еси усердно тя Укрепльшему: отцев Боже, благословен еси.
Богородичен: Радуйся, Владычице Дево, всем людем похвала, непрестанно молися Христу Богу сохранити место сие и люди молитвами всеблаженнаго Ефрема.
Песнь 8Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: / благословите, вся дела Господня, Господа.
Ублажиша тя люди, благословиша святителие, слышаще твое мужественное терпение и ко Христу ходатая стяжавше тя, Ефреме всечудне. И ныне приходяще, честным твоим мощем покланяются, взывающе: благословите, вся дела Господня, Господа.
Хваляся язвами Христовыми, к вечным востекл еси обителем, в багряницу одеян, мучениче Ефреме славне, от кровей твоих обагреную, и светло Царю сил предстоиши, с мученики ликуя, поеши: благословите, вся дела Господня, Господа.
Яко многоценное богатство крыемое, отче Ефреме, являешися, предлежа лицем благочестивых, и чудесы вся обогащаеши, почитающия тя и Христу поющим: благословите, вся дела Господня, Господа.
Богородичен: Нетленное Слово, паче слова тления нас всякаго избавляюща, родила еси, сего ради Тя вси, Дево, славим.
Песнь 9Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: / тем всепетую Богородицу величаем.
Струю нам всегда честная твоя рака исцелений источает, отче, страстей излияния всяческих изсушающи и всяку напаяющи душу к благоплодию Божественному, отче Ефреме, Христов угодниче.
Нарочитый святый день славныя твоея памяти творяще духовно, тя молим, Богоблаженне преподобне: моли прилежно, Ефреме, о пользе душ наших.
Лучезарная память твоя, отче Ефреме, якоже солнце, всем возсия, просвещающи светло в ней тя славящия, яко служителя Христова, и наследника Царствия Его, и всем преподобным сопричастника.
Помяни ныне, святче Божий, всех верою к тебе притекающих, и, от душевных страстей и болезней избавляя, защити ны от бед и обстояний, и спасения Божественнаго буди нам ходатай.
Богородичен: Глас Тебе архангелов, Пречистая, вопием: радуйся, спасение всех человеков и славных мученик Божественное венчание.
Светилен:Трисиянному Великому Свету ныне предстоя и в неизреченней светлости со всеми святыми пребывая, мучениче всечестне Ефреме, помяни всех нас, память твою светоносную совершающих.
Слава, и ныне, Богородичен:Света Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.
На хвалитех стихиры, глас 1:Ефреме Богоблаженне, / от земли преставився, востекл еси к Небесным, / и в Горних жити селениих сподобился еси, отче всечестне, / раны и смерть за Христа приял еси, / Егоже ныне моли // даровати душам нашим мир и велию милость.
Ликуй и веселися, страстотерпче Христов Ефреме! / Ты кровию твоею честною землю освятил еси, / и венец нетленный от руки Господни / на версе твоем приял еси, всечестне, / и посещати не престаешь люди чудесы преславными // предстательствуя присно о душах наших.
Яко всесвященное Божественное / и Богоугодное исповедание твое: / яко злато бо очистився, / Богу принеслея еси жертва благоприятна, / веселяся, преподобие Ефреме, // подражанием страстей Спаса нашего.
О верно творящих твою память / и многия подвиги честнаго твоего мучения поющих, / не престай моля, блаженне отче, / присно сохранити от бед и скорбей / и будущия сподобитися жизни, / Ефреме мучениче, Богопроповедниче.
Слава, глас 8:Приидите, мучениколюбцы вси, / лик празднующий составим, / венцы похвальныя плетуще / и честную главу великомученика Христова Ефрема венчающе. / Сей убо, на земли пострадавый / и ныне на Небесех царствуя, / со Ангелы, и с лики мученик, / и со всеми святыми молится Спасу о нас, // умирити мир и спасти души наша.
И ныне, глас тойже:Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИБлаженны от канона песнь 3-я и 6-я.
Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми?
Апостол к Галатом, зачало 213.
Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни, во дворех Бога нашего процветут.
Евангелие от Луки, зачало 24.
Причастен: В память вечную будет праведник:
МОЛИТВАО святый отче Ефреме, преподобных единовсельниче и мучеников сопричастниче, возлюбивый Господа Бога всем сердцем и Тому даже до конца последовавый!
Ты первее постом и молитвою душу твою очистил еси и произволением твердым, якоже мечем, вся страстныя помыслы посекл еси. Таже, егда прииде время твоего страдания, не убоялся еси мучителей, но молитвою к Богу отразил еси нахождения диавола. И, якоже един от древних великих страстотерпцев, претерпел еси вся муки, елика безумнии врази измыслити возмогоша. Конечне же и смерть за веру Православную приял еси и силою Креста Христова агарянское нечестие посрамил еси.
Сего ради прославляем подвиги твоя, отче Ефреме, почитаем страдания и молимся: умилосердися о нас, грешных, и житие наше плодоносно покажи. Да падут обильныя слезы покаяния на изсохшую землю душ наших, и да обратится сия из пустыни неплодныя в сад божественных добродетелей, да утвердится оградою воздержания, да процветет цветом чистоты и целомудрия, и принесет плод сторичный делы милосердия и любве к Богу и ближнему. Да услышим и мы сладкий глас Владыки Христа: приидите, благословеннии Отца Моего, наследуйте уготованное вам Царствие от сложения мира. Аминь.
Ина молитваО преподобномучениче Ефреме, новый чудотворче и великий миру светильниче! Ты от юности Христа возлюбив, Тому Единому вседушно последовал еси. Жития же монашескаго взыскуя, на горе Амомон вселился еси и тамо, плоть распиная и непрестанную молитву в сердце твоем совершая, многими слезами душу твою от страстей очистил еси.
Сего ради уготовася тебе путь превосходнейший, не токмо в Сына Божия веровати, но и по Нем страдати. Темже муки горчайшия за Христа радостно приял еси и, никакоже агарян нечестивых устрашився, на долзе времени мучения телесная терпел еси, таже, дивное мужество показуя, кровь твою, яко многоценное миро, на землю пролиял еси. Егда же безумнии агаряне, желавшии тя от Христа отринути, узреша, яко ничтоже успевают, на древе стремглав простроша тя и палицею горящею святое тело твое прободоша. Ты же, претрудный путь свой совершив, кротко душу твою в руце Божии предал еси.
Темже, яко молния на небо возшел еси, достигнув возлюбленнаго тобою Господа. Иже прием тя, яко вернаго воина, увязе главу твою честную венцем нетленныя славы и отре всякую слезу твою, на веки с Собою сочетавая. Кто ныне возможет разлучити тя от любве Божия? Кто исхитит у тебе светлую диадиму, дарованную Небесным Царем? Кто лишит тя вечнаго жительства во граде Господнем? Воистину неотъемлемое наследие и причастие со святыми восприял еси на Небесех.
Обаче и на земли просия слава твоя, святый отче Ефреме. Аще бо и безвестно в мире сем пострадал еси и память о подвизех твоих за давностию лет пресечеся, обаче Творец всяческих, ведый тайная, в последок дний сих яви сокровенныя в земли твоя мощи, подвиги твоя явлены сотвори и дарова ти велию благодать исцелений в помощь и утешение роду христианскому. Сего ради потоцы чудес источил еси, отче Ефреме, притекающим к святей твоей раце, расслабленныя укрепляя, слепым зрение подавая, хромыя возставляя и иными многими и неисцельными недугами содержимыя люди уврачуя. И даже до днесь вся концы вселенныя просвещаеши многоразличными дивными чудесы и видении.
О святче Божий, не остави и нас, убогих, оскудевших в вере, любви и добрых делех, возстави нас падших в страсти, даруй нам слезы покаяния, утверди твоею крепкою к Богу молитвою, исцели наша недугующия души и телеса. Просвети наш ум последовати евангельским заповедем, возжги в сердцах наших неугасимую любовь ко Спасу и ближним нашим, даруй нам благими делы прославляти Отца нашего Небеснаго, Емуже подобает всякая слава, честь и поклонение со Единородным Его Сыном и с Пресвятым и Благим и Животворящим Его Духом, ныне и присно и во веки веков. Аминь.