Служба святой благоверной Царице Тамаре
К приближающейся памяти святой благоверной Тамары, Царицы Грузинской (†1213) выкладываю в «Уставные заметки» службу ей, написанную «Кассией русского рассеяния» Валерией Константиновной Хеке (1904 - 1986). Служба публикуется по машинописи из архива Михаила М. Осоргина (Бруклин, Массачусетс). Служба одобрена к богослужебному употреблению Архиерейским Синодом Зарубежной Церкви.
Месяца мая в 1-й день
Память святыя праведныя Тамары, царицы Грузии
Творение Валерии
На вечерни
На Господи воззвах: стихиры, глас 1:С лики и тимпаны сретаем тя, царице, в Иерусалим горний грядущую, от руки Вседержителевы увенчатися, и входящую во святый и вечный град, вонь же по слову апостолову славу свою приносиши яко дар Христу Богу.
Иверская страно, красуйся! Горы и холмы, взыграйте! Потоцы, восплещите с веселием, и людие, торжествуйте! Се бо царица ваша в вечная кровы с честию приемлется, и у престола страшнаго Царя царей поставляется, во еже моление за род свой присно приносити.
Нино святая, апостолом поревновавшая, и Иверскую страну Христовою верою просветившая, прииди ныне, целуй Тамару славную, твое благое сеяние возрастившую, сторичный плод Христови принесшую, и сугубую славу пожавшую, земную убо и небесную.
Слава, глас 5:Кая сия блистающая яко заря, и яко луна благосветлая, сияющая яко солнце, грозная яко полци со знаменами? Сия есть державная владычица Иверския земли, и Христовая раба смиренномудрейшая, Церкве Его служительница усердная, православия ревнительница мудрая, благонравных и благочестивых отрадо и утешение, злочестивых же страх и посрамление, молитвеница за род наш неусыпная; темже зовем ей: радуйся, Тамаро, царице богокрасная!
И ныне, Триоди.
На стиховне, стихиры Триоди.
Слава, глас 2:Царство твое благоденствием благослови Христос, и слава твоя даже до конец земли достиже, Тамаро великоименитая; миром бо пределы твоя оградивши, на страсти духовныя воевати не престала еси: темже враги земли твоея вкупе же и враги души твоея безсмертныя преславно победивши, тишиною же наслаждающися, благодарение непрестанное Богу приносила еси.
И ныне, Триоди.
Тропарь, глас 1:Царю царей на земли усердно послуживши, Тамаро, царице великоименитая, в Иерусалим горний с честию взошла еси, и славу твою яко дар Христови принесла еси; темже торжествующе днесь и ликующе, радостию немолчно вопием: слава Давшему ти славу! слава Венчавшему тя! слава Подающему всем предстательством твоим прошений исполнение!
Слава, и ныне: тропарь Триоди.
На утрени
Канон святыя, глас 4, егоже краегранесие:
Сердцем горящим Тамару державную пою.
Песнь 1Ирмос: Несть Тебе подобен, препрославленный Господи, рукою бо крепкою избавил еси люди, яже стяжал еси, Человеколюбче.
Слава твоя, о царице, даже до конец земли достиже, благочестие же со смиренномудрием на небеса тя возведе, идеже ныне светло пребываеши.
Елену святую подражающи, страну Иверскую храмы Божиими украсила еси, Тамаро великоименитая.
Рабство Христово честь вменяющи, богатство и владычество земное за сень и соние почитающи, тому не прилагала еси сердца твоего, Тамара премудрая.
Богородичен: Дево таинственная, Исаием пророком пронареченная, Гавриилом о Божием воплощении извещенная, како дерзаем воспевати тя?
Песнь 3Ирмос: Лик сильных изнеможе, и немощствующии препояшасеся силою; сего ради утвердися в Господе сердце мое.
Царство твое Христови предала еси, о Тамаро; темже Той утверди е непоколебимо, и славу Соломона вящшую даде ти.
Елей милости стяжала еси яко мудрая дева, мироухание же добродетелей Христови принесла еси, яко мироносица, венценосица преславная.
Миром пределы твоя оградивши, на страсти воевати николиже престала еси, царице мудрая, Христу победу ти Подающу.
Богородичен: Грядеши в горняя со тщанием, Богородице пречистая, услышати Елизаветин светлый глас, егоже ти непрестанно припеваем.
Седален святыя, глас 7:Горы тя возрастиша, горняя присно мудрствовати хотящую, Тамаро; темже и моя помыслы долу прникшия впери к высоте, и на всяк день восхождение в сердцы моем полагати научи мя, яко да тобою укрепляем, в селения горняя достигну, идеже ты в незаходимей сияеши славе.
Слава, и ныне: седален Триоди.
Песнь 4Ирмос: Сей Бог наш, от Девы воплощься, и естество обожив, Егоже воспевающе, вопием: слава силе Твоей, Господи!
Орлу горнему подобящися, воспарила еси духом даже до небес, Тамаро всехвальная, на Солнце правды, Христа, небоязненно взирающи и зовущи: слава силе Твоей, Господи!
Рцы нам, царице благоверная: Како жена немощная сущи, толику славу стяжала еси? Како славу стяжавши, умом не вознеслася еси? Обаче за вся благодарящи, Христови пела еси: слава силе Твоей, Господи!
Явил еси нам, Христе, Тамару молитвенницу теплую, царем же державу и ограждение, людем Иверским покров и заступление; темже ти зовем: слава силе Твоей, Господи!
Богородичен: Щедраго Бога и всея твари Владыку, нас ради даже до яслей Обнищавшаго, моли за род христианский, Богородице всепетая.
Песнь 5Ирмос: От света Пресекий первородный Свет, яко во свете дела поют Тя, Христа Содетеля, во свете Твоем пути наша направи.
Иверския земли слава незаходимая, Церкве православныя светлое украшение, посреде цариц яко луна посреде звезд сияет Тамара превеликая.
Матере Божия жребий упасла еси добре, о Тамаро, светом учения Христова люди просвещающи, и православную веру утверждающи.
Телесною добротою вся превозшедши, духовными лепотами паче просияла еси, Тамаро дивная, добродетельми многообразными яко рясны златыми преукрашенна.
Богородичен: Аще убо чудотворения час не у прииде, Сын твой Божественный, Дево, воду в вино претворяет, по слову Твоему единому, егоже и о нас, Владычице, рцы.
Песнь 6Ирмос: Буря мя искушений постигши, во глубину низвлачит безмерных грехов; но Ты, Управителю благий, предварив управи, яко пророка, и спаси мя.
Меч правды в деснице, в шуйце же щит веры держащи, достохвальная, враги твоя внеуду и внутрьуду в души твоей победила еси.
Аще и недостойны есмы твоего заступления, царице велемудрая, обаче из бездны грехопадений многих ны возведи, рова погибельнаго славно избегшая.
Руце нам помощи простри, царице христоименитая, путем жестоким взыти тщащимся на гору Господню, на нейже ты Богу предстоиши во славе.
Богородичен: «Увы ми, Свете мой!» Пречистая взываше, при Кресте стоящи Сына своего, душею Тому сраспинающися; темже и всыновленным людем Мати всякаго утешения является.
Кондак, глас 4:Готовися, горний Иерусалиме! Отверзи врата, Едеме! Праведных лицы, нам сликуйте; и людие Иверстии торжествуйте! И ты, Нино святая, целуй Тамару славную, в небесное царствие днесь грядущую, от руки Божия увенчатися.
Икос:Славу твою превеликую, о Тамаро, вси концы земли поведают, и о той камение вопиют; обаче ты премудра сущи, духом и умом не вознеслася еси, но с Екклесиастом вся суету сует вменила еси, о единей славе Божией усердно пекущися, и той причаститися хотящи: сего ради ныне с веселием ко Царю царей грядеши, от руки Его увенчатися.
Песнь 7Ирмос: Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси!
Дом Божий душу твою сотворила еси, Тамаро державная, всякую добродетель в нем странноприемлющи, Господеви зовущи: отец наших Боже, благословен еси!
Еленю на горах ароматских подобяшися, припадала еси усердно ко источнику воды живыя, еюже жажду духовную утоляющи, страстей пламень угасила еси,
Ризу Господню яко дар священнейший, икону же Богоматере яко сокровище многоценное, Тамару же яко новую молитвеницу теплую страна Иверская царству Московскому принесла еси.
Богородичен: Живоносному Гробу испразднившуся, воскресшему же Сыну Твоему Ти явившуся, «Отец наших Боже, благословен еси!» воспела еси, Приснодево.
Песнь 8Ирмос: Всяческая Носяй неприступною Твоею силою, Христе, преподобныя Твоя отроки в пламени оросил еси, зовушия: благословите, вся дела Твоя, Господи!
Арагва река со Курою, Мцхетский град, хитон Господень соблюдший, обтекающи, сказание славы Тамары царицы до Понта и даже до предел земли преносят, вся горы и холмы призываюше вопити: благословите, вся дела Твоя, Господи!
Виноград, егоже насадила просветительница Иверии равноапостольная, возделала еси усердно, царице мудрая, плоды его Господеви приносящи, вино умиления пиющи и вопиющи: благословите, вся дела Твоя, Господи!
Нино святая, Христовы веры семя в Иверстей стране насадившая, и ты, Тамаро славная, тое возрастившая, преподобных сонм от земли вашея грядущий сретающе, радуйтеся и воспойте: благословите, вся дела Твоя, Господи!
Богородичен: Узревши славное вознесение Христово, Мати Божия, радости неизреченныя исполнившися, воззвала еси ликующи: благословите, вся дела Твоя, Господи!
Песнь 9Ирмос: Тя преславную Невесту и всесвятую Богородицу, Зиждителя рождшую невидимых и видимых, песньми величаем.
Южныя царицы премудрейшая, и Соломона славнейшая, Тамара царица яко звезда на тверди небесней сияет, юже песньми величаем.
Помощь твою даждь царем православным, молитвами твоими теплыми от бед изимающи, Тамаро всеблагочестивейшая.
О сокровища добродетелей! О смирения христомудреннаго! О пресветлыя славы! имиже память твоя честная, о Тамаро преукрашена! Темже тя любовию величаем.
Богородичен: Юнии и старцы, богатии и нищии, монаси и мирстии, царие и владомыя, здравии и недужнии! Приидите, припадем к Марии Приснодеве, единей человеков надежди, яко Матерь Божию ту величающе.
Светилен:Лоза благоплодная Тамара, от корене царскаго на горах Иверских прозябшая, росою благодати орошаема, Солнцем же правды согреваема, плод сторичный Христови принесла есть.
Слава, и ныне: светилен Триоди.
Месяца мая в 1-й день
Память святыя праведныя Тамары, царицы Грузии
Творение Валерии
На вечерни
На Господи воззвах: стихиры, глас 1:С лики и тимпаны сретаем тя, царице, в Иерусалим горний грядущую, от руки Вседержителевы увенчатися, и входящую во святый и вечный град, вонь же по слову апостолову славу свою приносиши яко дар Христу Богу.
Иверская страно, красуйся! Горы и холмы, взыграйте! Потоцы, восплещите с веселием, и людие, торжествуйте! Се бо царица ваша в вечная кровы с честию приемлется, и у престола страшнаго Царя царей поставляется, во еже моление за род свой присно приносити.
Нино святая, апостолом поревновавшая, и Иверскую страну Христовою верою просветившая, прииди ныне, целуй Тамару славную, твое благое сеяние возрастившую, сторичный плод Христови принесшую, и сугубую славу пожавшую, земную убо и небесную.
Слава, глас 5:Кая сия блистающая яко заря, и яко луна благосветлая, сияющая яко солнце, грозная яко полци со знаменами? Сия есть державная владычица Иверския земли, и Христовая раба смиренномудрейшая, Церкве Его служительница усердная, православия ревнительница мудрая, благонравных и благочестивых отрадо и утешение, злочестивых же страх и посрамление, молитвеница за род наш неусыпная; темже зовем ей: радуйся, Тамаро, царице богокрасная!
И ныне, Триоди.
На стиховне, стихиры Триоди.
Слава, глас 2:Царство твое благоденствием благослови Христос, и слава твоя даже до конец земли достиже, Тамаро великоименитая; миром бо пределы твоя оградивши, на страсти духовныя воевати не престала еси: темже враги земли твоея вкупе же и враги души твоея безсмертныя преславно победивши, тишиною же наслаждающися, благодарение непрестанное Богу приносила еси.
И ныне, Триоди.
Тропарь, глас 1:Царю царей на земли усердно послуживши, Тамаро, царице великоименитая, в Иерусалим горний с честию взошла еси, и славу твою яко дар Христови принесла еси; темже торжествующе днесь и ликующе, радостию немолчно вопием: слава Давшему ти славу! слава Венчавшему тя! слава Подающему всем предстательством твоим прошений исполнение!
Слава, и ныне: тропарь Триоди.
На утрени
Канон святыя, глас 4, егоже краегранесие:
Сердцем горящим Тамару державную пою.
Песнь 1Ирмос: Несть Тебе подобен, препрославленный Господи, рукою бо крепкою избавил еси люди, яже стяжал еси, Человеколюбче.
Слава твоя, о царице, даже до конец земли достиже, благочестие же со смиренномудрием на небеса тя возведе, идеже ныне светло пребываеши.
Елену святую подражающи, страну Иверскую храмы Божиими украсила еси, Тамаро великоименитая.
Рабство Христово честь вменяющи, богатство и владычество земное за сень и соние почитающи, тому не прилагала еси сердца твоего, Тамара премудрая.
Богородичен: Дево таинственная, Исаием пророком пронареченная, Гавриилом о Божием воплощении извещенная, како дерзаем воспевати тя?
Песнь 3Ирмос: Лик сильных изнеможе, и немощствующии препояшасеся силою; сего ради утвердися в Господе сердце мое.
Царство твое Христови предала еси, о Тамаро; темже Той утверди е непоколебимо, и славу Соломона вящшую даде ти.
Елей милости стяжала еси яко мудрая дева, мироухание же добродетелей Христови принесла еси, яко мироносица, венценосица преславная.
Миром пределы твоя оградивши, на страсти воевати николиже престала еси, царице мудрая, Христу победу ти Подающу.
Богородичен: Грядеши в горняя со тщанием, Богородице пречистая, услышати Елизаветин светлый глас, егоже ти непрестанно припеваем.
Седален святыя, глас 7:Горы тя возрастиша, горняя присно мудрствовати хотящую, Тамаро; темже и моя помыслы долу прникшия впери к высоте, и на всяк день восхождение в сердцы моем полагати научи мя, яко да тобою укрепляем, в селения горняя достигну, идеже ты в незаходимей сияеши славе.
Слава, и ныне: седален Триоди.
Песнь 4Ирмос: Сей Бог наш, от Девы воплощься, и естество обожив, Егоже воспевающе, вопием: слава силе Твоей, Господи!
Орлу горнему подобящися, воспарила еси духом даже до небес, Тамаро всехвальная, на Солнце правды, Христа, небоязненно взирающи и зовущи: слава силе Твоей, Господи!
Рцы нам, царице благоверная: Како жена немощная сущи, толику славу стяжала еси? Како славу стяжавши, умом не вознеслася еси? Обаче за вся благодарящи, Христови пела еси: слава силе Твоей, Господи!
Явил еси нам, Христе, Тамару молитвенницу теплую, царем же державу и ограждение, людем Иверским покров и заступление; темже ти зовем: слава силе Твоей, Господи!
Богородичен: Щедраго Бога и всея твари Владыку, нас ради даже до яслей Обнищавшаго, моли за род христианский, Богородице всепетая.
Песнь 5Ирмос: От света Пресекий первородный Свет, яко во свете дела поют Тя, Христа Содетеля, во свете Твоем пути наша направи.
Иверския земли слава незаходимая, Церкве православныя светлое украшение, посреде цариц яко луна посреде звезд сияет Тамара превеликая.
Матере Божия жребий упасла еси добре, о Тамаро, светом учения Христова люди просвещающи, и православную веру утверждающи.
Телесною добротою вся превозшедши, духовными лепотами паче просияла еси, Тамаро дивная, добродетельми многообразными яко рясны златыми преукрашенна.
Богородичен: Аще убо чудотворения час не у прииде, Сын твой Божественный, Дево, воду в вино претворяет, по слову Твоему единому, егоже и о нас, Владычице, рцы.
Песнь 6Ирмос: Буря мя искушений постигши, во глубину низвлачит безмерных грехов; но Ты, Управителю благий, предварив управи, яко пророка, и спаси мя.
Меч правды в деснице, в шуйце же щит веры держащи, достохвальная, враги твоя внеуду и внутрьуду в души твоей победила еси.
Аще и недостойны есмы твоего заступления, царице велемудрая, обаче из бездны грехопадений многих ны возведи, рова погибельнаго славно избегшая.
Руце нам помощи простри, царице христоименитая, путем жестоким взыти тщащимся на гору Господню, на нейже ты Богу предстоиши во славе.
Богородичен: «Увы ми, Свете мой!» Пречистая взываше, при Кресте стоящи Сына своего, душею Тому сраспинающися; темже и всыновленным людем Мати всякаго утешения является.
Кондак, глас 4:Готовися, горний Иерусалиме! Отверзи врата, Едеме! Праведных лицы, нам сликуйте; и людие Иверстии торжествуйте! И ты, Нино святая, целуй Тамару славную, в небесное царствие днесь грядущую, от руки Божия увенчатися.
Икос:Славу твою превеликую, о Тамаро, вси концы земли поведают, и о той камение вопиют; обаче ты премудра сущи, духом и умом не вознеслася еси, но с Екклесиастом вся суету сует вменила еси, о единей славе Божией усердно пекущися, и той причаститися хотящи: сего ради ныне с веселием ко Царю царей грядеши, от руки Его увенчатися.
Песнь 7Ирмос: Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси!
Дом Божий душу твою сотворила еси, Тамаро державная, всякую добродетель в нем странноприемлющи, Господеви зовущи: отец наших Боже, благословен еси!
Еленю на горах ароматских подобяшися, припадала еси усердно ко источнику воды живыя, еюже жажду духовную утоляющи, страстей пламень угасила еси,
Ризу Господню яко дар священнейший, икону же Богоматере яко сокровище многоценное, Тамару же яко новую молитвеницу теплую страна Иверская царству Московскому принесла еси.
Богородичен: Живоносному Гробу испразднившуся, воскресшему же Сыну Твоему Ти явившуся, «Отец наших Боже, благословен еси!» воспела еси, Приснодево.
Песнь 8Ирмос: Всяческая Носяй неприступною Твоею силою, Христе, преподобныя Твоя отроки в пламени оросил еси, зовушия: благословите, вся дела Твоя, Господи!
Арагва река со Курою, Мцхетский град, хитон Господень соблюдший, обтекающи, сказание славы Тамары царицы до Понта и даже до предел земли преносят, вся горы и холмы призываюше вопити: благословите, вся дела Твоя, Господи!
Виноград, егоже насадила просветительница Иверии равноапостольная, возделала еси усердно, царице мудрая, плоды его Господеви приносящи, вино умиления пиющи и вопиющи: благословите, вся дела Твоя, Господи!
Нино святая, Христовы веры семя в Иверстей стране насадившая, и ты, Тамаро славная, тое возрастившая, преподобных сонм от земли вашея грядущий сретающе, радуйтеся и воспойте: благословите, вся дела Твоя, Господи!
Богородичен: Узревши славное вознесение Христово, Мати Божия, радости неизреченныя исполнившися, воззвала еси ликующи: благословите, вся дела Твоя, Господи!
Песнь 9Ирмос: Тя преславную Невесту и всесвятую Богородицу, Зиждителя рождшую невидимых и видимых, песньми величаем.
Южныя царицы премудрейшая, и Соломона славнейшая, Тамара царица яко звезда на тверди небесней сияет, юже песньми величаем.
Помощь твою даждь царем православным, молитвами твоими теплыми от бед изимающи, Тамаро всеблагочестивейшая.
О сокровища добродетелей! О смирения христомудреннаго! О пресветлыя славы! имиже память твоя честная, о Тамаро преукрашена! Темже тя любовию величаем.
Богородичен: Юнии и старцы, богатии и нищии, монаси и мирстии, царие и владомыя, здравии и недужнии! Приидите, припадем к Марии Приснодеве, единей человеков надежди, яко Матерь Божию ту величающе.
Светилен:Лоза благоплодная Тамара, от корене царскаго на горах Иверских прозябшая, росою благодати орошаема, Солнцем же правды согреваема, плод сторичный Христови принесла есть.
Слава, и ныне: светилен Триоди.