Служба преподобному Анастасию Синаиту
К приближающейся памяти преподобного Анастасия Синаита († ок. 705) выкладываю в «Уставные заметки» службу ему, написанную «Кассией русского рассеяния» Валерией Константиновной Хеке (1904 - 1986). Служба написана в подарок митрополиту Кишинёвскому и Хотинскому (позже Нью-Йоркскому и Восточно-Американскому) Анастасию (Грибановскому), второму Первоиерарху Русской Православной Церкви Заграницей, носившему имя преподобного в монашеском постриге. Публикуется по машинописи из архива Михаила М. Осоргина (Бруклин, Массачусетс). Служба одобрена к богослужебному употреблению Архиерейским Синодом Зарубежной Церкви.
Месяца апреля в 20-й день
Память преподобнаго отца нашего Анастасия Синаита
Творение Валерии
На вечерни
На Господи воззвах: стихиры преподобнаго, глас 1:Боговидца древляго подражая, на гору Синайскую возшел еси, яко да тамо пожив равноангельски, богозрения истиннаго научишися, и закон Христов в сердцах ученик твоих напишеши; темже любовию память твою почитаем. Моли спастися душам нашим.
Божественною ревностию разжизаем, огнедухновенными писании твоими на еретики возгремел еси, Анастасие прехвальне; темже тебе за истину подвизавшагося, безмолвия же горы священныя не оставльшаго, сугуба венца сподоби Христос Бог, Имеяй велию милость.
Лествицы списателя чуднаго возлюбил еси, Анастасие премудре, духовную высоту того предзрев, тобою же, чудне, истину списаний его являя, восхождения бо в души твоей на всяк день полагая, якоже лествицею некою божественною на небеса добродетелей восходил еси; сего ради непрестанно ублажаем тя, прехвальне. Моли спастися душам нашим.
Слава, глас 8:Воскресению тезоименитаго, Христу Богу подвиги твоими в житии сораспявшагося и спогребшагося, и с Ним живот новый и негиблемый совозставшаго, Анастасия чуднаго приидите вси восхвалим, яко монахов наставника и учителя, православия поборника, богозрителя Моисея подражателя, обилели же Синайския сокровище многоценное, и молитвеника о душах наших.
И ныне: Триоди.
На стиховне, стихиры Триоди.
Слава, глас 6:Всю отложив молву жития суетнаго, безмолвие горы Синайския избрал еси, и тамо подвизався, богозритель истинный явился еси, закона же Христова проповедник неложный, и сего списатель в сердцах верных, путевождь же к небесному царствию; темже монахов множества и православных соборы, сошедшеся днесь, да торжествуют, твою память блажаше, Анастасие отче наш.
И ныне: Триоди.
Тропарь преподобнаго, глас 8:В тебе, отче, известно спасеся еже по образу: приим бо крест последовал еси Христу, и дея учил еси презирати убо плоть преходит бо, прилежати же о души вещи безсмертней. Темже и со ангелы срадуется, преподобне Анастасие, дух твой.
Слава. И ныне: Триоди.
На утрени
Канон преподобнаго, глас 8, егоже краегранесие: Воскресению тезоименитаго почитаем.
Песнь 1Ирмос: Поим Господеви, проведшему люди Своя сквозе Чермное море, яко Един славно прославися.
Воскресению тезоименитаго, Христу Богу спогребшагося, и с Ним совозставшаго, Анастасия богомудраго, приидите, вернии, воспоим.
Отче священнейший, крепость нам молитвами твоими даждь, яко да по долгу подвиги твои воспоим, имиже Христа Бога прославил еси.
Синайскаго безмолвнаго жителя, и небеснаго Иерусалима гражданина, и собора праведных сликовника, приидите, песньми почтим.
Богородичен: Красуйся и радуйся, Дево Пречистая, о возстании Рождества твоего, Имже мирови спасение соделася, Емуже тя непрестанно молися приводяще, спасени быти уповаем.
Песнь 3Ирмос: Ты еси утверждение притекающим к Тебе, Господи: Ты еси Свет омраченных, и поет Тя дух мой.
Руце твои преподобнеи непрестанно воздвизал еси к Дающему молитву молящемуся, Амалика мысленнаго побеждая, и Господеви немолчно поя.
Елика суть истина, елика чиста, елика прелюбезна, о сем помышлял еси, и сему научал еси, отче преподобне.
Скинию святыя души твоея Царю царей преукрасив, богомудре, осенения благодати Того сподобился еси, яже обильно во устех твоих излияся, освящающи тя почитающия.
Богородичен: Егоже родила еси Бога Слова моли, Чистая, Благословенная, грехи наша не помянути и благодать нам даровати, яко да поем Тя спасаеми,
Кондак преподобнаго, глас 2:Воскресению тезоименитаго и безмолвника Синайскаго, приидите ныне, песньми ублажим; той бо боговидца Моисея подражая, на гору священную востекл есть, во еже гласа божественнаго послушати, и закону благодати на скрижалех сердечных богонаписатися: темже похваляюще его яко боготаиника и ангелом подражателя, православия поборника и монахов наставника богомудраго, от любве сердечныя возопиемъ: радуйся, Анастасие, Синайская похвало!
Икос:Рцы нам, преподобне: Како безмолвию толика лета прилежал еси? Како ветхаго человека погреб, со Христом совостал еси? Како Того закону в души твоей богонаписавшуся за истину подвизался еси и на еретики возгремел еси? Како духовныя овцы жезлом правости упасл еси? Како добродетелей лествицу яко на крыле прелетел еси? Како света невечерняго причастник неложный явился еси? Что убо смиренномудрстуеши, отче, и не отвещаваеши? Обаче тебе молчащу мы велегласно возопиим: радуйся, Анастасие, Синайская похвало!
Седален преподобнаго, глас 7:Киими ли похвалы преподобнаго почтим? Киими ли песньми память его украсим, мирския славы убежавшаго, небесную же славу стяжавшаго, ангелы подвиги своими подражавшаго, и человеки учении своими просвещавшаго; темже припадающе тому воззовем: помяни нас, отче священнейший, у престола Божия.
Слава. И ныне: Триоди.
Песнь 4Ирмос: Услышах, Господи, смотрения Твоего таинство; разумех дела Твоя, и прославих Твое Божество.
Не закон сени на скрижалех каменных, но закон Христов на скижалех сердца твоего написуется, преподобне, емуже в житии твоем лепотно следуя, невечерняго Света зритель явился еси.
Иоанна, сына громова, «Не любите мира» вещающа слышав, отче богомудре, мира грехолюбнаго бегая, на горе святей безмолвию прилежал еси.
Юности свет и сердце горящее Христови яко дар принес, на гору Господню усердно востекл еси, во еже богозрения истиннаго сподобитися.
Богородичен: Тобою, Дево, радость всем возсия Воплощшимся из тебе, Всенепорочная. Тебе подобает радоватися единей: тебе убо, «Радуйся!» немолчно зовем.
Песнь 5Ирмос: Утренююще вопием Ти: Господи, спаси ны! Ты бо еси Бог наш; разве Тебе иного не вемы.
Египтяны древле медленноязычный в мори потопи; ты же, отче, Богу крепкому немолчно вопия, демонския полчища на тя воюющия потоки благодати потопил еси.
Закон иже на Синаи данный изнеможе, благодать же Христова по всей вселенней ныне возсия, от запада и севера и моря новыя люди созывающи, ихже ко спасению путевождь, преподобне, был еси.
Овцы пажити твоея, отче, добре упасл еси, подвиги твоими тем присно предходя, заблудшия взыскуя, и вводя я в вечныя кровы.
Богородичен: Имаши матернее дерзновение к Сыну твоему и Богу, Дево всенепорочная; темже не престай молящи о рабех Твоих, ихже всыновление из уст Того прияла еси.
Песнь 6Ирмос: Ризу ми подаждь светлу, Одеяйся светом яко ризою, многомилостиве Христе Боже наш.
Моисея боговидца подражая, на гору Синайскую возшел еси, во еже глас Божий в сердцы твоем услышати, и Того закона на скрижалех сего написатися.
Единый путь спасительный оставивше, в пустыни добродетелей заблудихом; обаче ты, преподобне отче, в сретение нам изыди, путеводя нас в царствие обетованное.
Не из камене воду людем источаеши, Анастасие прехвальне, но учении твоими вся напаяеши, от воды живыя благовестия Христова почерпая.
Богородичен: Иже Тя не проповедуяй язык, Царице Богородице, Юже вся тварь славит непрестанно, да умолкнет яко безстуден всеконечно.
Кондак и икос Триоди.
Песнь 7Ирмос: От Иудеи дошедше отроцы в Вавилоне иногда, верою Тройческою пламень пещный попраша, поюще: отцев Боже, благословен еси!
Тело твое смирив и душу освятив, Анастасие чудне, тишины и мира премирнаго наслаждаяся, ко Творцу всяческих взывал еси: отцев Боже, благословен еси!
Авраамову веру стяжав, блаженне, живот свой яко сына Господеви принесл еси, отец же множества спасаемых явився, благодарне взывал еси: отцев Боже, благословен еси!
Горняя присно мудрствуя, а не земная, горе подвизался еси, преподобне, божественною лествицею добродетелей в небесный град восходя и воспевая: отцев Боже, благословен еси!
Богородичен: Отцем Небесным от века предизбранная, Сына Мати пренепорочная, Духа Святаго жилище украшенное, Богородице Владычице, благословенна еси!
Песнь 8Ирмос: Царя Небеснаго, Егоже поют вои ангельстии, хвалите и превозносите во вся веки.
По имени твоему, отче преподобне, и житие твое бысть; Христу бо сораспявся и совозстав духом, воскресение миру проповедуеши.
Освященная память твоя, Анастасие великоимените, лучи воскресения Христова облиставаема, соборы верных на похвалу тебе созывает.
Человеколюбца Спаса ныне зрением пресладким наслаждаяся, и Тому в невечернем дни истее причащаяся, славне, Троицу воспеваеши во веки.
Богородичен: Истинную Богородицу тя исповедуем, и миру Заступницу теплую. Сохрани нс под кровом твоим во веки.
Песнь 9Ирмос: Воистинну Богородицу тя исповедуем, спасеннии тобою, Дево чистая, с безплотными лики тя величающе.
Таинство будущаго века образуя, в молчании горы Синайския пребывал еси, преподобне, единому гласу Божию в сердцы твоем вниимая: темже тя почитаем, превеликий.
Аще убо плотию от нас преставился еси, Анастасие отче наш, обаче духом твоим нам пребываеши, любовию тя величающим.
Емуже сораспялся еси и совоскресл еси, Христу Богу припади ныне, отче треблаженнейший, Того моля воскесение живота улучити рабом твоим, яко да тя в царствии Его возвеличим.
Богородичен: Мати Божия пренепорочная, Марие всеблагословенная, достойно похвалити тя недоумеюще, любовию сердечною и благоговейнством тя величаем.
Светилен:Се ныне наста день светлаго торжества! Приидите вси, взыдем на гору Господню, не огнем дышащую и громы устрашаемую, но гласом хлада тонка осеняемую, пении же и песньми духовными оглашаемую! Приидите, внидем во святая врата, и единый лик со монахов множеством составим, наставника великаго присно ублажающе, и Синайския горы и обители светлое украшение, Анастасия пречуднаго и богомудраго, и молитвеника крепкаго за мир.
Слава. И ныне: Триоди.
Месяца апреля в 20-й день
Память преподобнаго отца нашего Анастасия Синаита
Творение Валерии
На вечерни
На Господи воззвах: стихиры преподобнаго, глас 1:Боговидца древляго подражая, на гору Синайскую возшел еси, яко да тамо пожив равноангельски, богозрения истиннаго научишися, и закон Христов в сердцах ученик твоих напишеши; темже любовию память твою почитаем. Моли спастися душам нашим.
Божественною ревностию разжизаем, огнедухновенными писании твоими на еретики возгремел еси, Анастасие прехвальне; темже тебе за истину подвизавшагося, безмолвия же горы священныя не оставльшаго, сугуба венца сподоби Христос Бог, Имеяй велию милость.
Лествицы списателя чуднаго возлюбил еси, Анастасие премудре, духовную высоту того предзрев, тобою же, чудне, истину списаний его являя, восхождения бо в души твоей на всяк день полагая, якоже лествицею некою божественною на небеса добродетелей восходил еси; сего ради непрестанно ублажаем тя, прехвальне. Моли спастися душам нашим.
Слава, глас 8:Воскресению тезоименитаго, Христу Богу подвиги твоими в житии сораспявшагося и спогребшагося, и с Ним живот новый и негиблемый совозставшаго, Анастасия чуднаго приидите вси восхвалим, яко монахов наставника и учителя, православия поборника, богозрителя Моисея подражателя, обилели же Синайския сокровище многоценное, и молитвеника о душах наших.
И ныне: Триоди.
На стиховне, стихиры Триоди.
Слава, глас 6:Всю отложив молву жития суетнаго, безмолвие горы Синайския избрал еси, и тамо подвизався, богозритель истинный явился еси, закона же Христова проповедник неложный, и сего списатель в сердцах верных, путевождь же к небесному царствию; темже монахов множества и православных соборы, сошедшеся днесь, да торжествуют, твою память блажаше, Анастасие отче наш.
И ныне: Триоди.
Тропарь преподобнаго, глас 8:В тебе, отче, известно спасеся еже по образу: приим бо крест последовал еси Христу, и дея учил еси презирати убо плоть преходит бо, прилежати же о души вещи безсмертней. Темже и со ангелы срадуется, преподобне Анастасие, дух твой.
Слава. И ныне: Триоди.
На утрени
Канон преподобнаго, глас 8, егоже краегранесие: Воскресению тезоименитаго почитаем.
Песнь 1Ирмос: Поим Господеви, проведшему люди Своя сквозе Чермное море, яко Един славно прославися.
Воскресению тезоименитаго, Христу Богу спогребшагося, и с Ним совозставшаго, Анастасия богомудраго, приидите, вернии, воспоим.
Отче священнейший, крепость нам молитвами твоими даждь, яко да по долгу подвиги твои воспоим, имиже Христа Бога прославил еси.
Синайскаго безмолвнаго жителя, и небеснаго Иерусалима гражданина, и собора праведных сликовника, приидите, песньми почтим.
Богородичен: Красуйся и радуйся, Дево Пречистая, о возстании Рождества твоего, Имже мирови спасение соделася, Емуже тя непрестанно молися приводяще, спасени быти уповаем.
Песнь 3Ирмос: Ты еси утверждение притекающим к Тебе, Господи: Ты еси Свет омраченных, и поет Тя дух мой.
Руце твои преподобнеи непрестанно воздвизал еси к Дающему молитву молящемуся, Амалика мысленнаго побеждая, и Господеви немолчно поя.
Елика суть истина, елика чиста, елика прелюбезна, о сем помышлял еси, и сему научал еси, отче преподобне.
Скинию святыя души твоея Царю царей преукрасив, богомудре, осенения благодати Того сподобился еси, яже обильно во устех твоих излияся, освящающи тя почитающия.
Богородичен: Егоже родила еси Бога Слова моли, Чистая, Благословенная, грехи наша не помянути и благодать нам даровати, яко да поем Тя спасаеми,
Кондак преподобнаго, глас 2:Воскресению тезоименитаго и безмолвника Синайскаго, приидите ныне, песньми ублажим; той бо боговидца Моисея подражая, на гору священную востекл есть, во еже гласа божественнаго послушати, и закону благодати на скрижалех сердечных богонаписатися: темже похваляюще его яко боготаиника и ангелом подражателя, православия поборника и монахов наставника богомудраго, от любве сердечныя возопиемъ: радуйся, Анастасие, Синайская похвало!
Икос:Рцы нам, преподобне: Како безмолвию толика лета прилежал еси? Како ветхаго человека погреб, со Христом совостал еси? Како Того закону в души твоей богонаписавшуся за истину подвизался еси и на еретики возгремел еси? Како духовныя овцы жезлом правости упасл еси? Како добродетелей лествицу яко на крыле прелетел еси? Како света невечерняго причастник неложный явился еси? Что убо смиренномудрстуеши, отче, и не отвещаваеши? Обаче тебе молчащу мы велегласно возопиим: радуйся, Анастасие, Синайская похвало!
Седален преподобнаго, глас 7:Киими ли похвалы преподобнаго почтим? Киими ли песньми память его украсим, мирския славы убежавшаго, небесную же славу стяжавшаго, ангелы подвиги своими подражавшаго, и человеки учении своими просвещавшаго; темже припадающе тому воззовем: помяни нас, отче священнейший, у престола Божия.
Слава. И ныне: Триоди.
Песнь 4Ирмос: Услышах, Господи, смотрения Твоего таинство; разумех дела Твоя, и прославих Твое Божество.
Не закон сени на скрижалех каменных, но закон Христов на скижалех сердца твоего написуется, преподобне, емуже в житии твоем лепотно следуя, невечерняго Света зритель явился еси.
Иоанна, сына громова, «Не любите мира» вещающа слышав, отче богомудре, мира грехолюбнаго бегая, на горе святей безмолвию прилежал еси.
Юности свет и сердце горящее Христови яко дар принес, на гору Господню усердно востекл еси, во еже богозрения истиннаго сподобитися.
Богородичен: Тобою, Дево, радость всем возсия Воплощшимся из тебе, Всенепорочная. Тебе подобает радоватися единей: тебе убо, «Радуйся!» немолчно зовем.
Песнь 5Ирмос: Утренююще вопием Ти: Господи, спаси ны! Ты бо еси Бог наш; разве Тебе иного не вемы.
Египтяны древле медленноязычный в мори потопи; ты же, отче, Богу крепкому немолчно вопия, демонския полчища на тя воюющия потоки благодати потопил еси.
Закон иже на Синаи данный изнеможе, благодать же Христова по всей вселенней ныне возсия, от запада и севера и моря новыя люди созывающи, ихже ко спасению путевождь, преподобне, был еси.
Овцы пажити твоея, отче, добре упасл еси, подвиги твоими тем присно предходя, заблудшия взыскуя, и вводя я в вечныя кровы.
Богородичен: Имаши матернее дерзновение к Сыну твоему и Богу, Дево всенепорочная; темже не престай молящи о рабех Твоих, ихже всыновление из уст Того прияла еси.
Песнь 6Ирмос: Ризу ми подаждь светлу, Одеяйся светом яко ризою, многомилостиве Христе Боже наш.
Моисея боговидца подражая, на гору Синайскую возшел еси, во еже глас Божий в сердцы твоем услышати, и Того закона на скрижалех сего написатися.
Единый путь спасительный оставивше, в пустыни добродетелей заблудихом; обаче ты, преподобне отче, в сретение нам изыди, путеводя нас в царствие обетованное.
Не из камене воду людем источаеши, Анастасие прехвальне, но учении твоими вся напаяеши, от воды живыя благовестия Христова почерпая.
Богородичен: Иже Тя не проповедуяй язык, Царице Богородице, Юже вся тварь славит непрестанно, да умолкнет яко безстуден всеконечно.
Кондак и икос Триоди.
Песнь 7Ирмос: От Иудеи дошедше отроцы в Вавилоне иногда, верою Тройческою пламень пещный попраша, поюще: отцев Боже, благословен еси!
Тело твое смирив и душу освятив, Анастасие чудне, тишины и мира премирнаго наслаждаяся, ко Творцу всяческих взывал еси: отцев Боже, благословен еси!
Авраамову веру стяжав, блаженне, живот свой яко сына Господеви принесл еси, отец же множества спасаемых явився, благодарне взывал еси: отцев Боже, благословен еси!
Горняя присно мудрствуя, а не земная, горе подвизался еси, преподобне, божественною лествицею добродетелей в небесный град восходя и воспевая: отцев Боже, благословен еси!
Богородичен: Отцем Небесным от века предизбранная, Сына Мати пренепорочная, Духа Святаго жилище украшенное, Богородице Владычице, благословенна еси!
Песнь 8Ирмос: Царя Небеснаго, Егоже поют вои ангельстии, хвалите и превозносите во вся веки.
По имени твоему, отче преподобне, и житие твое бысть; Христу бо сораспявся и совозстав духом, воскресение миру проповедуеши.
Освященная память твоя, Анастасие великоимените, лучи воскресения Христова облиставаема, соборы верных на похвалу тебе созывает.
Человеколюбца Спаса ныне зрением пресладким наслаждаяся, и Тому в невечернем дни истее причащаяся, славне, Троицу воспеваеши во веки.
Богородичен: Истинную Богородицу тя исповедуем, и миру Заступницу теплую. Сохрани нс под кровом твоим во веки.
Песнь 9Ирмос: Воистинну Богородицу тя исповедуем, спасеннии тобою, Дево чистая, с безплотными лики тя величающе.
Таинство будущаго века образуя, в молчании горы Синайския пребывал еси, преподобне, единому гласу Божию в сердцы твоем вниимая: темже тя почитаем, превеликий.
Аще убо плотию от нас преставился еси, Анастасие отче наш, обаче духом твоим нам пребываеши, любовию тя величающим.
Емуже сораспялся еси и совоскресл еси, Христу Богу припади ныне, отче треблаженнейший, Того моля воскесение живота улучити рабом твоим, яко да тя в царствии Его возвеличим.
Богородичен: Мати Божия пренепорочная, Марие всеблагословенная, достойно похвалити тя недоумеюще, любовию сердечною и благоговейнством тя величаем.
Светилен:Се ныне наста день светлаго торжества! Приидите вси, взыдем на гору Господню, не огнем дышащую и громы устрашаемую, но гласом хлада тонка осеняемую, пении же и песньми духовными оглашаемую! Приидите, внидем во святая врата, и единый лик со монахов множеством составим, наставника великаго присно ублажающе, и Синайския горы и обители светлое украшение, Анастасия пречуднаго и богомудраго, и молитвеника крепкаго за мир.
Слава. И ныне: Триоди.