Служба священномученику Александру, пресвитеру Георгие-Афипскому
К приближающейся памяти святого священномученика Александра Флегинского (†1918), настоятеля храма в станице Георгие-Афипской Кубанской области (ныне пос. Афипский Северского р-на Краснодарского края), с разрешения автора выкладываю в «Уставные заметки» написанную в 2019 году службу святому. Служба написана чтецом Никитой Кияшко, секретарём комиссии по канонизации святых Екатеринодарской епархии Русской Православной Церкви. Служба публикуется по авторской машинописи с исправлением замеченных опечаток; цензурными инстанциями пока не рассматривалась.
6 апреля (24 марта по старому стилю)
Служба священномученику Александру, пресвитеру Георгие-Афипскому
Зри: Предпразднство Благовещения Пресвятыя Богородицы.
И празднуется память священномученика Александра.
На велицей вечерни
Блажен муж: 1-й антифон.
На Господи, воззвах: стихиры святаго, глас 2.
Подобен: О, дивное чудо!О, преславное чудо! / От земли до неба вземлется дивный воин / священномученик Александр славный, / и приемлет от Отца Небеснаго горняго Царствия венец. / Сликовствует же сему Церковь и воинствующая, и торжествующая, / ужасается адское воинство, / земнороднии радуются, / явися бо нам молитвенник новый // ко Всеблагому Богу.
Похвалитеся ныне, лицы мучеников, / с воеводою Твоим, святым Георгием, / прияли бо есте благаго воина / страдальца освященна Александра / той бо мук и козней диавольских не убоявся / но любовию сквозе страсти вопия Христу: / слава Тебе, Боже, Всещедрый.
Созидаяй церкви святыя на земли / обителище краснейшее чертог царей земных улучивый / в чертозех небеснаго Царя, / радуешися ныне и почиваеши на небесех, / мы же, на земли, празднующе твою честную память вопием: / претерпевый до конца и Христом спасенный отче, / молися о нас, почитающих тя и глаголющих: // слава в вышних Богу и на земли.
Слава, глас 3:К источнику нескончаемому жизни приселился еси, / одожди на ны благодати Божия воды, / священномучениче славный Александре, / земли Русския похвало, / и моли за ны вкупе с сонмом новомученик и исповедник Церкве нашея, / да искушений избавльшеся диавольских, и заповеди соблюдше, // принесем Господеви цветы благоухающия.
И ныне, Богородичен по гласу.
Вход. Прокимен дне. И чтения три священномученику.
Премудрости Соломоновы чтение (главы 4, 6, 7 и 2):Похваляему праведнику, возвеселятся людие. Безсмертие бо есть память его, яко от Господа познавается и от человек и угодна Господеви душа его. Возлюбите убо, о мужие, мудрость и поживете, восхощите ея и наказани будете. Начало бо ея любы и соблюдение закона. Почтите премудрость, да во веки царствуете. Возвещу вам и не скрыю от вас таин Божиих: яко Той мудрости Наставник есть, и мудрых Исправитель, и всякому смыслу и делу Хитрец, и всем смыслом научит мудрость. Есть бо в ней Дух разумен и Свят, и сияние Света Присносущнаго, и образ благости Божия. Та други Божия и пророки устрояет. Благолепнейши же есть солнца и паче всякаго сотворения звезд, свету сосуждаема, обретается первейши. Та угождающих ей от болезней избави и настави на стези правыя. Даде им разум имети свят, и сохрани я от ловящих, и подвиг крепок подаде им. Да разумеют вси, яко сильнейши всего есть благочестие. И никогдаже преможет злоба мудрости, ниже прейдет злыя, обличающи суд. Рекоша же в себе, помысливше неправедно: насильствуем праведному, и не пощадим преподобства его, ни усрамимся седин старости многолетны. Будет бо нам крепость закон, и уловим праведнаго, яко неугоден нам есть, и противится делом нашим, и поносит нам отпадение закона, и обличает нам согрешения наказания нашего. Возвещает нам разум имети Божий и отрока Господня себе именует. Бысть нам на обличение помышлением нашим, и тяжек нам есть, и видимь, яко неподобно иным житие Его и изменены стези Его: в поругание вменихомся Ему, и удаляется от путей наших, яко от нечистот, и блажит последняя праведных. Увидим убо, аще словеса Его истинна суть: искусим, яже сбываются Ему. Руганием и мукою истяжем Его, да разумеем кротость Его, и искусим беззлобство Его: смертию безобразною осудим Его, будет бо посещение от словес Его. Сия помыслиша и прельстишася: ослепи бо я злоба их, и не разумеша тайн Божиих, и не разсудиша, яко Ты еси Бог Един, живота имеяй и смерти власть, и спасаяй во время скорби, и избавляяй от всякаго зла, Щедр и Милостив, и дая преподобным Своим благодать, и Своею мышцею гордым противляяся.
Пророчества Исаиина чтение (глава 43):Тако глаголет Господь: вси языцы собрашася вкупе, и соберутся князи от них. Кто возвестит сия в них; или яже от начала, кто слышана сотворит вам; да приведут свидетели своя, и оправдятся: и да услышат, и да рекут истину. Будите ми свидетели и Аз свидетель, глаголет Господь Бог, и открок, егоже избрах: да познаете, и веруете ми, и разумеете, яко Аз есмь, прежде Мене не бысть ин бог, и по Мне не будет. Аз есмь Бог, и несть разве Мене спасаясь. Аз возвестих и спасох, уничижих, и не бе в вас чуждий. Вы мне свидетели, и Аз Господь Бог, и еще от начала Аз есмь: и несть от рук моих избавляяй. Сотворю, и кто отворатит то; сице глаголет Господь Бог, избавляяй вас, святый израилев.
Премудрости Соломоновы чтение (глава 3):Праведных душы в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
На литии стихира храма.
Слава, святаго, глас 8:Днесь красуется святыя Екатерины славный град, / божественным сокровищем мощей твоих, / и паства твоя ликовствующи радуется, / и православнии твоими чудесы блаженне Александре хвалятся: / ты же моли земли Кубанстей // тишину даровати и велию милость.
И ныне, Богородичен, глас тойже.
На стиховне стихиры, глас 4:Просветился еси многими добродетельми, / и веры правыя светильник явился еси, / священномучениче Александре, / на премногую дерзая благость победившаго мир, / исповедал еси Его, яко истиннаго Бога, / мечем разсечен быв, / яко жертва Господеви благоуханная принеслся еси, / кровию честною землю Кубанскую освятив. / Темже и ныне, у престола Агнца вечнаго предстоя, // моли спастися душам нашим.
Стих: И убоятся языцы имени Господня, и вси царие земстии славы твоея.
Любовию Христовою от юности распалаемь / и тебе еще неискусну сущу, / паству твою в благоверии укрепляше, / и смерти же не страшитися научаше, / образ страдальчества всем верным явив, / безвременную кончину от рук нечестивых прият, / темже и мы припадающе зовем: // не остави нас и в последния дни жития нашего.
Слава, глас 8:Егда мучители безбожнии смерти тя предаваху, / достославне Александре, / крестным знамением себе ограждая, / молитву Творцу всех возносил еси Христу подражая: / прости им, Боже, не ведят бо, что творят. / Мы же, светоносное твое прославление совершающе, // любовию тя почитаем.
И ныне, Богородичен, глас тойже.
Тропарь, глас 3:Егда же без суда закалаеми бываху священницы, / мучителей, оскверняющих храмы Божии, не убоявшеся, / лестию диавольскою не соблазнишася, священне Александре, / явился еси верный Христа друг и таинник, / за веру даже до смерти богопочтенен быв. / Ныне же, предстоя Престолу Господню, // моли за чтущих святую память твою.
Слава, и ныне, Богородичен.
На утрени
По 1-м стихословии седален, глас 3:Прием вся оружия Божия и облекся в броню правды, не плотию, но духом воинствовал еси, богоблаженне Александре, чадом верным Христовым вопиял еси: добродетельны будите и с радостию смерть приимите.
Слава, и ныне, Богородичен:Премудрость ипостасную, и Слово пресущное, и Врача душ и телес рождшая, гноение и язвы лютыя души моея исцели и сердца моего устави болезни, Дево.
По 2-м стихословии седален, глас 6Источаеши любовь всем приходящим к тебе, богоблаженне Александре, еюже познаются Христови ученицы, темже образ благочестия ближним и дальним показал еси и блаженством земным пренебреже жития ради будущаго, тако и нас настави молитвами твоими.
Слава, и ныне, Богородичен:Под кров Твой, Пречистая Дево, прибегающих к Тебе приими, мольбы наша приимши, и молися непрестанно о нас Человеколюбцу Богу.
Величание:Величаем тя, / священномучениче Александре, / и чтим честная страдания твоя, / яже за Христа / претерпел еси.
Псалом избранный:Бог нам Прибежище и Сила.
Господи, воздвигни силу Твою и прииди, во еже спасти нас.
Глаголах о свидениих Твоих пред цари и не стыдяхся.
Вси языцы обыдоша мя и именем Господним противляхся им.
Тебе ради умерщвляемся весь день, вменихомся, яко овцы заколения.
Крепость моя и пение мое Господь и бысть мне во спасение.
По полиелеи седален, глас 4:Подвигом древних мученик ревнителю, / святителю Константина града именем нареклся еси, Александре, / того стопам последуя, / к предстательству сего прибегая, / кончину славну восприял еси, / мы же к твоему заступлению прибегаем ныне: / не презри убогая чада твоя, / но общники и нас недостойных сотвори / молитвами твоими, блаженне.
Слава, и ныне, Богородичен, глас тойже:Предстательнице теплая и Заступнице усердная, в годину безбожия от конечныя погибели землю Русскую всемощным ходатайством к Сыну Твоему избавльшая, и ныне не остави нас молитвами Твоими, Владычице Богородице.
Степенна, 1-й антифон 4-го гласаПрокимен, глас 4: Проидохом сквозе огнь и воду / и извел еси ны в покой.
Стих: Разжегл ны еси, якоже разжизается сребро. Всякое дыхание:
Евангелие от Матфеа, зачало 36.
По 50-м псалме стихира, глас 6:Егда попусти Господь по грехом нашим братоубийство, гонения и веры Христовы поругание, ты, священномучениче Александре, Церкве Российския столп непоколебимый явился еси, и кровь свою за Христа пролияв, паству во единстве соблюл еси. Ныне же на небеси предстоя с лики новомучеников, моли спастися душам нашим.
Канон, глас 2, егоже краегранесие:
Воспеваю мученика Александра, жертву благоуханную, Христу принесшуюся.
Песнь 1Ирмос: Высоковыйный в колесницах и в крепких тристатах фараон / в Чермнем потопися со всевоинством. / Моисей же Израиля, яко по суху, провед / Божественным велением, пояше: // поим Господеви, славно бо прославися.
Владыку твари и всякаго блага Содетеля, Бога нашего умолим, о празднолюбцы, да восставит нас от сна леностного, во еже славити непрестанно угодника Своего, священномученика Александра.
Сиянием крил ваших восхищаемии, просим вы, о, чини бесплотнии, оградите нас от злых поднебесных, да безпрепятственно восхвалим Господа и Его святаго воина, кровьми своими Церковь укрепившаго и нас в твердости веры наставльшаго.
Потоками кровей ваших Церковь древле утвердили есте, святии мученицы, молите и ныне Всеблагаго Бога, да прегрешения презревше, вознесет ны на словесное небо, верою и любовию, святаго Александра, брата вашего, чествующия.
Богородичен: Всесвятая Мати, Госпоже наша и Помоще, Еяже душу оружие некогда пройде, радуйся ныне, се бо благовестник новый Сына Твоего явися на земли, смертию за овцы Его пострадавый и кровьми истину Христову соблюдый.
Песнь 3Ирмос: Хранитель твердый / и незыблемое утверждение Ты еси, Христе, / надеющиися на Тя, неуклонны утверждая нас, / извести в твердом Твоем основании надежды и веры.
Мирския бури и треволнения, святе Александре, корабль твой потопити хотяху, но не возмогоша, ты бо окормлен был еси, отче, в недре Господнем, за сиянием правды Того непрестанно следуя, в надежде и уповании.
Чтил еси Святую Троицу, святе Александре, внегда растерзаемь был еси аки львами людьми, но заградил еси уста их в жизни вечней. Вера бо твоя и надежда на милость Господню спасоша тя.
Наше смятение, от маловерия сущее, утиши, священномучениче Александре, да зовем ти непрестанно: даруй надежду нам ненадеждным, и восстави на славословие Владыки и Бога нашего.
Богородичен: К Пречистей Деве притецыте, неразумнии, Та бо есть Спасение ваше и чуден Покров всех, в печалех и скорбех к Ней прибегающих и Господеви зовущих: Боже, благословен еси!
Седален, глас 2:Новии страстотерпцы российстии, мученически поприще земное скончавшии и страданьми дерзновение ко Господу приобретшии, молитеся Ему, вас укрепившему, да и мы, егда найдет на ны испытания час, мужества дар Божий восприимем.
Слава, и ныне, Богородичен, глас тойже:Богородице Дево, / упование христианом, / покрый, соблюди и спаси на Тя уповающих.
Песнь 4Ирмос: Неизреченное таинство вочеловечения Твоего, Христе Боже, / тайно провидев, Аввакум вопияше: / услышах слух Твой и убояхся, / разумех дела Твоя / и прославлю силу Твою.
Литургию священную совершая, со всяким достоинством Бога восхвалял еси, святе, возрадуйся и ныне: обоня бо Господь благоухание жертвы твоея, дарова ти венец нетленный во Царствии Своем.
Киими песньми воспоим святость твою, святче Божий? Коим дерзновением изречем молитвы твоея силу? Токмо просим тя, отче: поминай чада твоя, за яже принеслся еси в жертву, и моли за ны Бога нашего.
Сликует нам ныне и родитель твой Косма, о страдальче! Зрит бо чадо, достойно иго священства подъемшее, и заповеди Христовы преисполнившее: не токмо бо за други душу свою отдаде, но и врагом не противился еси, внегда страданием велиим тя подвергоша, хвалит ныне Господа, вкупе со пресвитеры земли своея.
Богородичен: Неискусобрачная Отроковице, Марие святая, цвете Церкви нашея всеблагоуханный, каменю драгоценный венца Архиерея Велика, моли о нас грешных.
Песнь 5Ирмос: Просвещение во тьме лежащих, / спасение отчаянных, Христе, Спасе мой, / к Тебе утреннюю, Царю мира, / просвети мя сиянием Твоим, / иного бо, разве Тебе, Бога не знаю.
Душу твою, отче, Богови предал еси, просвещения быв ревнитель, хотяше и костем древним служити во благо Церкве. Просвети нас, отче, Светом Христовым, да поем Ему разумно: инаго, разве Тебе, Бога не знаем.
Желал еси, святе, познанием и горних, и дольних, Бога Твоего уведити, се, по хотению твоему дано бысть тебе: возлежиши бо с Ним в вечнем чертозе, и вся мудрость мира ти покоряется.
Взывал еси, отче, верным: добродетельни будите и смерти ожидайте радостно. Тако и сам ликуя сретил еси похитительницу лютую, достигл же еси чертогов святых Спаса нашего Бога.
Богородичен: Родила еси неизреченно Бога и Творца нашего, о, Богородице, веселишися ныне и радуешися с Ним купно, прославленна еси паче всех безплотных сил.
Песнь 6Ирмос: Возопих в скорби моей / ко Господу Богу моему, / и посла Спаса мира, / и избави от тли живот мой.
Твердость веры и надежду на Господа имея во вся дни жизни твоея, священномучениче Александре, сия неколеблемы содержал еси, внегда оскуде родство твое. Слава твоему терпению.
Вдовцем древним последуя, отче, втораго брака Христа ради отверглся еси, яко монах в миру пожил еси: вопия бо в скорбех твоих к Богу, и услышана бысть молитва твоя.
Был еси, светильниче наш, непреклонен к кознем диавольским, не остави Христовы надежды, егда уязви супружницу твою смерть. Даруй терпение твое и нам, непрестанно мужество твое воспевающим.
Богородичен: Лукаваго прогонительнице и всякаго блага дарованию от Бога ходатаице, Богородице, радосте наша всесветлая, молися о нас, унылых и недостойных.
Кондак, глас 4:Яко жертва Господеви показался еси, / мечем бо разсечен с земным поношением, / на небеси же стяжал еси святости венцы, / Бога прославив своею кровию / и, диавольския власти избежав, / всего ся дав Христу в покорение. / Ныне же, с лики новомученик и исповедник Церкви Русския, / молися Богу прилежно // даровати нам мир и велию милость.
Икос:Пресвитеров похвала священномученик Александр, / во храме древняго достохвального Георгия служа, / тому уподобился есть: / слово бо Божие проповеда житием и смертию своею, / ныне ублажаемь бывает паствою: / поем, отче, честная страдания твоя, / почитаем и святыя мощи твоя, / нас бо ради ныне молиши тепле Христа Бога, // о еже спастися душам нашим.
Песнь 7Ирмос: Херувимы подражающе, отроцы / в пещи ликовствоваху, вопиюще: / благословен еси, Боже, / яко истиною и судом навел еси сия вся грех ради наших, / препетый и препрославленный во вся веки.
Гонимь был еси, яко древний мученик, святе Александре, огнем мучений опаляемь был еси, но исхити тя Христос от мира сего и росу духовную яви: молися о нас, отче, ко Спасу, препетому и превозносимому во вся веки.
Хвалися ныне, личе святый мучеников Христовых! Се бо нов явися багряноносец и сподвижник твой: ярость врагов посрамляя, Богу же Вышнему поя, препетому и превозносимому во вся веки.
Ныне дым благоухания священнаго жертвы твоея, святе, прииде к чертогу Вышняго и услади великаго совета ангела, Христа Бога нашего, Егоже поем и превозносим во вся веки.
Богородичен: Христос пройде Тобою, Богородице, всего мя человека осияв благодатию Своею, молися, молю Тя, о, Дево, да во вся дни жизни моея зову со благодарением Богу, препетому и превозносимому во вся веки.
Песнь 8Ирмос: Свещеносцы душею, / светлии, паче снега пресияюще, / преподобнии отроцы посреде пламене не опалишася: / вся бо вкупе, елика под тварию, / к Божии песни себе созывающе, / с радостию пояху: / пойте, дела Господня, Господа.
Реки словес имея в мыслех твоих, отче, от неисчерпаемаго источника, Бога нашего, исходящих, сущих во тьме язычестей увериша, темже и вси зовем ти: просвети ны в вере, святе Александре, и настави Богу песнь приносити: пойте, дела Господня, Господа!
Страстем священнаго Александра, вернии, подивитеся, и зряще Страстем Спасовым подобие, ужаснитеся: се бо глумления нескончаемыя потерпе и оплевания, на конец же изведен, убит был еси вне града своего, внегда же стражда, вопия непрестанно: пойте, дела Господня, Господа!
Ты, священномучениче, яко апостол нов явился еси, словесами веры люди темныя просвещая, положил еси живот твой за паству твою, юже возлюбил еси, сии кончину твою видевше непрестанно взывают Богови: пойте, дела Господня, Господа!
Богородичен: Преблагословенная Мати Христа Бога нашего, оттряси тину прегрешений наших, да без лености, радостию вопием Богу нашему благодарственная пения, верных же увещаим звати: пойте, дела Господня, Господа!
Песнь 9Ирмос: Преестественно плотию Заченшую во чреве / от Отца безлетно предвозсиявшее Слово / в песнех немолчных / величаем, вернии.
Радуйся, Церкве Господня, чертоже избранный Царя Великаго! Се бо явися молитвенник нов, священномученик Александр, егоже ныне величаем, вернии.
Ныне ликовствует земля Кубанская, процвете бо новым плодом, иже в небеснем Царствии Христа молит о спасении нас неразумных, егоже ныне величают вернии.
Слава мужеству твоему, о мучениче, слава вере твоей и надежде, ко Спасу нашему, Богу, вземшему тя ныне на небеса, да прославит чадо Свое, Егоже ныне величаем, вернии.
Богородичен: Ширши небес бысть утроба Твоя, непорочная Мати Искупителя нашего, восславися же ныне и взыграй вкупе с чадами твоими, величающими Бога и угодника Его, священномученика Александра.
Светилен, глас 6:Достойно прославил еси, отче, искупившаго тя честною кровию Своею, Христа Спаса нашего. Мы же, недостойнии, благодарственно тебе вопием: радуйся, похвало священная земли нашея, буди нам помощник и защитник в скорбех и обстояниих.
На хвалитех поставим стихир 4, во глас 3:В житии твоем древним святым поревновав, / обличал еси нечестия нечестивых, / врачевал еси недуги духовныя верных, / темже ти вси вопием: / молися о нас, священномучениче Александре, / да бесовских искушений избавльшеся, // Господеви песнь хвалебную всегда приносим.
Радуйся, отче Александре, / страдания бо твоя злая Бог сильный веселием премени, / мучителей же вельми посрами, / мы же Всеблагому Спасу вопием: / Господи, спаси ны от враг видимых и невидимых, // да Тебе песнь хвалебную всегда приносим.
Уподобишася древним пророкоубийцам мучители твои, святе Александре, / злом возблагодать слугам Божиим воздающе. / Мы же молим ти ся, святе, присно: / избави ны участи таковыя, // яко да Господеви песнь хвалебную принесем.
Слава Тебе, Боже Всещедрый, / дивно жизнь нашу устрояяй: / вопиют Ти благодарственная пения апостоли, мученицы и вси святии, / тако и мы недостойнии / избавления прегрешений от Тебе просим, // и от души песнь хвалебную приносим присно.
Слава, глас 2:По имени твоем, отче Александре / тако бысть житие твое: / защищал еси стадо Христово от волков, губящих е, / поучая и смерти не противитися, но благодушно сретати ю, / по слову твоему бысть вскоре: / се нечестивцы люди зле погубиша тя. / Мы же таковую кончину видевше вопием, хвалу ти воздающе: / радуйся, Богом избранный пастырю, / моли Того о спасении нас грешных, // да Господеви песнь хвалебную приносим присно.
И ныне, Богородичен.
На Литургии служба священномученику.В тойже день на вечерни, по обычной кафизме, на Господи, воззвах: ставим стихов 10. И поем Триоди, и святаго Александра 4.
Стихиры святаго, глас 7:Видите, людие, / како может сила Божия: / како в страдания велия вверженный человек / благодарением и любовию ко Господу молится, / паству же наставляя в вере, глаголя: // добродетельны будите и с радостию смерть приимите.
Времена и лета скоротечна на земли ни во что же вменяя, / положил еси душу твою за веры утверждение, / священномучениче Александре, земли Кубанския похвало, / наставлял еси нас маловерных: / ежечасно, Евангелие, заповедая, имейте в души, // и верою испытуйте деяния своя.
Удовольствием и сластем жизнь твою не покорив, / в посте и молитве прешел еси дни твои, / житием и словом уча люди православныя: / еже не любити нам дольнее счастие и благоденствие / ибо во гробе вся сия в прах обратятся / верою же и благодеяниями тамо пользу приимем.
В храме досточудныя Екатерины, / идеже лежат ныне мощи твоя, преславне отче Александре, / исцеления подаются всем притекающим к ним с верою. / темже и мы усердно вопием ти: // моли триипостаснаго Бога избавити нас от напрасныя и лютыя смерти.
Слава, глас тойже:Не посрамил еси рода твоего, святе Александре / достойны бо пресвитеры в нем имееши, / но украсися тобою аки венцем светлым, / сорадуется ныне нам во всепразднственный сей день памяти твоея, / ко святым бо преставлен еси, отче, // моли о нас святотворца Бога.
И ныне, Богородичен.