Служба святой мученице Аполлонии диаконисе, Александрийской
К завтрашней памяти святой мученицы Аполлонии диаконисы, Александрийской (†249), выкладываю в «Уставные заметки» шестиричную службу ей, составленную клириком города Одессы (Украинская Православная Церковь) протоиереем Илией Тетерько. Текст воспроизводится по авторской машинописи; цензурными инстанциями пока не рассматривался. При подготовке к выкладке в тексте исправлены замеченные опечатки.
СЛУЖБА
святой мученице Аполлонии,
диакониссе Александрийской
НА ВЕЧЕРНИ
На Господи, воззвах: стихиры, глас 4:Яко благоразумная и избранная дева, / возжгла еси в сердце твоем лампаду огня Божественнаго, / орошая преизобильно елеем доброт твоих путь жизни своея, / душею всегда отзываяся на вышнее призвание. / Сего ради возшла еси в Небесный чертог страданьми за Христа, / Спасова служительница, Аполлония всечудная, / молися грехов оставление даровати, // любовию празднующим святую память твою.
Явилася еси посреде мучителей, / аки в волцех суровых, агница нескверная, / сих зверовидное нечестие побеждающи, / и Христу, яко благоприятный фимиам принеслася еси, / чрез огнь воспаривши в Небесное Царство, // Аполлония всеславная, молитвенице о душах наших.
Изрядную угодницу Христову, / церкве Александрийския диакониссу всечестную, / песньми благохвальными почтим Аполлонию старицу блаженную, / яко исполнена яве благодати / и Божественными сияньми преукрашена, // яже молится о душах наших.
Слава, глас тойже:Кровными каплями / безбожия огнь погасивши, великомученице, / Христову Церковь напоила еси богатно / и верных сердца уяснила еси, / благочестно почитающих, Аполлоние славная, // твою священную и честную память любовию.
И ныне, Богородичен, глас тойже:Огнь рождши нестерпимый, / попаляющ грехи и орошающ верныя, / вещная безмерных моих согрешений, / попали молитвами Твоими, Пренепорочная Чистая, / и росою истаявшую страстьми душу мою прохлади, / яко да велегласно // Твою милость и силу величаю, раб Твой, Марие Всепетая.
Или Крестобогородичен, глас тойже:Не рыдай Мене, Мати, / зрящи на Древе повешена Твоего Сына и Бога, / на водах Повесившаго всю землю неодержимо / и всякое творение Создавшаго; / ибо воскресну и прославлюся, / и адова царствия сокрушу крепостию, / и погублю того силу, / и связанныя избавлю от злодейства его, яко Благоутробен, // и Отцу Моему приведу, яко Человеколюбец.
На стиховне, Слава святой, глас 1:Плоть свою воздержанием увядивши, / терпением мучений врага низложила еси коварствия / и победу взяла еси на него, / о Аполлоние Богоблаженная. / Тем тя венча во огненнем страдании // Иисус Человеколюбец и Спас душ наших.
Тропарь, глас 4:Александрийския Церкве похвалу, / старицу Богоблаженную Аполлонию / прославим ныне в песнех, вернии, / яко та любовию Божественною разжегши душу свою, / во огнь вошла дерзновенно, мучителей посрамивши, / и в Царство Христово возшла еси со славою, // идеже молится о душах наших.
НА УТРЕНИ
Канон святыя, глас 2.
Песнь 1Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, // яко прославися.
Мудрость словесем моим подаждь, Благий Господи, / страстоносицы Твоей Аполлонии мольбами / и сию воспети, Спасе, сподоби ми.
Возжелавши Христовы красоты и Сего любовию снедаема, / страданием сочталася еси Ему, / Аполлоние Богомудрая и всеславная.
Яко огнь тепла ревность веры твоей, мученице Аполлоние, / еюже попрала еси неверных настояние / и победы венец взяла еси страданием.
Богородичен: Святая Дево, Мати Христова, / мучеников слава и Ангелов радосте, / с ними моли Сына Твоего ущедрити и спасти рабы Твоя.
Песнь 3Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, // и несть праведен паче Тебе, Господи.
Зубов сокрушение и огненная стремления / юношески подъяла еси, старице Аполлоние всечестная, / силою Креста укрепляема.
Подвигов ранами удобряяся, / душу светлейшу солнечнаго сияния соделала еси, / яко служительница Христова, страстотерпице всеславная.
Богородичен: Ангелов удивление, человеков дерзновение, Богородице Чистая, Приснодево, / моли Христа Бога, спасти непрестанно Тя блажащия.
Седален, глас 4:Уяснив житие твое добродетелей красотами, / служительница нареклся еси Церкве Александрийския, Аполлоние блаженная, / кровию же мучения себе украсив, / горе к Невещественным ликом преставилася еси. / С нимиже о нас Христа, мати, моли // помиловати души наша.
Слава, и ныне, Богородичен, глас тойже:Едина Чистая и Пречистая Дево, / Яже Бога безсеменно рождшая, // моли спастися душам нашим.
Песнь 4Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: // слава силе Твоей, Господи.
Лучами Креста сияющи, присноблаженная, / терпяше огненную муку, / прелести углие росою любве Христовы погашающи.
Была еси кротка и незлобива, смиреномудра же и тиха / и любве Божественный исполнена, / мученическими при кончине украсилася еси венцы.
Богородичен: Невесту Тя безневестну исповедаем / и чисто селение Иисусово, Богородице Дево Марие, / и Херувим святейшую.
Песнь 5Ирмос: Света подателю и веков Творче, Господи, / во свете Твоих повелений настави нас; // разве бо Тебе иного бога не знаем.
Единаго Тя, Господа Иисуса, исповедавши, славная, / рукою человека создавшаго, / во огнь дерзновенно входит старица всечестная, / муки мужески терпящи.
Претерпела еси муки доблественно, любовию Божественною исполнена, / и Богу себе от юности возложивши, умрети за Него не отверглася еси, / повеления Того послушая и стопам спасительным последуя.
Богородичен: Архангельский глас вопием Ти: / Радуйся, Благодатная, Господь с Тобою; / радуйся, Благословенная, Заступница наша и скорая в бедах Помощница.
Песнь 6Ирмос: В бездне греховней валяяся, / неизследную милосердия Твоего / призываю бездну: // от тли, Боже, мя возведи.
К будущей славе взирая, всечестная, / маловременную ни во чтоже вменил еси; / темже тя ничтоже возможе разлучити от любве Христовы: / ни жестокая биения, ни зубов сокрушение, ни огня разгорение, / ниже тленныя славы обещание.
Девство твое соблюде непоругано Христос Господь, мученице Аполлоние достославная, / и престави тя от земных скорбей к Небесней радости.
Любовию ко Спасителю рода человеческого воспылавши, всечестная, / востекла еси во след заповедей Его / и на огнь взошла еси дерзновенно.
Богородичен: Милости Твоея, Богородице, сподоби мя, премилостиваго Спаса рождшая, / Своею кровию от смерти вечныя человеки избавльшаго.
Кондак, глас 2:Мученическими красотами / Владычнему Престолу предстоящи / и Божественными блистании сияющи, / нас, поющих твою память, // страстотерпице Аполлоние, просвети.
Песнь 7Ирмос: Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющыя Тебе: // отцев, Боже, благословен еси.
Яко агница на жертву ведома, славная, / никакоже провещала еси, Владыце твоему подобяся, / Егоже ради и смерть пренебрегла еси.
Разгарашеся на тя яростию мучители, / зря тя непреклонну и повеления Господня хранящу, / огнь разложиша, устрашити тя хотя, / но посрамила еси дерзость их, приимши муки волею.
Богородичен: Преестественно Создателя от утробы Твоей, Дево, родити сподобилася еси, / земныя назидающа, поющия верою: / отцев Боже, благословен еси.
Песнь 8Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: // благословите, вся дела Господня, Господа.
Мученица явльшася, Небесная божественне наследовала еси / и престолу предстоиши Создателя, вопия: / благословите, вся дела Господня, Господа.
Одождении Божественными угасила еси многобожия пещь, / разжегшеся Божественною любовию прерадостно, / и ныне песнопоеши, Аполлоние всеславная: / благословите, вся дела Господня, Господа.
Просвещшеся зарею Святыя Троицы, Богоблаженная, / тьму прелести отгнала еси и славу улучила еси, песнопоюще: / благословите, вся дела Господня, Господа.
Троичен: Яко Единицу естеством, Тя пою, Божество Всесвятое, / в триех ипостасях Единаго Создателя, радуяся зову: / благословите, вся дела Господня, Господа.
Богородичен: Слово Отца Небеснаго Единосущное, / Адамово избавление от кровей Твоих девственных воплотися, Дево Марие Чистая, / Емуже благодарственне зовем: / благословите, вся дела Господня, Господа.
Песнь 9Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: // тем всепетую Богородицу величаем.
Целомудрием украшаема и мирностию духа, / раны твердым умом твоим терпела еси, / дух твой предая в руце Небеснаго Отца.
Звезда светла возсияла еси в мире, / сиянием священным озаряя мысли верных, Аполлоние преблаженная, / темже тя верно ублажаем.
Разжигаема любовию Вседержителя, / вошла еси мужественно во огнь / и, терпеливно пострадав, расторгла еси змия великаго, / Аполлоние старице Богоблаженная.
Богородичен: Глас Тебе ангелов, Пречистая, вопием: / радуйся, спасение всех человеков / и славных мучеников Божественное венчание.
Светилен:Трисиянному Великому Свету ныне предстоя / и в неизреченней светлости со всеми святыми пребывая, / Аполлоние всечудная, помяни всех нас, / память твою светоносную совершающих.
Слава, и ныне, Богородичен:Зарю пресветлую, являющую нам Солнце незаходимое, вемы, Тя, Пресвятая Дево Богородице. / Сего ради молим Тя: яко Мати Света сущи, / просвети нас светом Сына Твоего, Христа Бога нашего.
На стиховне, Слава, глас 1:Мучений огнь, Духа Святаго росою погасила еси, / старице Аполлоние всечестная, / и к Свету преставилася еси божественному и невещественному, / и по кончине блаженней источаеши исцелений капли, // уставляющи разжжение страстей силою духовною.
И ныне, Богородичен, глас тойже:Молитвы Твоих рабов приими, Богородице, / и избави нас от всякия беды, // яко рождшая Христа Спаса, Избавителя душ наших.
СЛУЖБА
святой мученице Аполлонии,
диакониссе Александрийской
НА ВЕЧЕРНИ
На Господи, воззвах: стихиры, глас 4:Яко благоразумная и избранная дева, / возжгла еси в сердце твоем лампаду огня Божественнаго, / орошая преизобильно елеем доброт твоих путь жизни своея, / душею всегда отзываяся на вышнее призвание. / Сего ради возшла еси в Небесный чертог страданьми за Христа, / Спасова служительница, Аполлония всечудная, / молися грехов оставление даровати, // любовию празднующим святую память твою.
Явилася еси посреде мучителей, / аки в волцех суровых, агница нескверная, / сих зверовидное нечестие побеждающи, / и Христу, яко благоприятный фимиам принеслася еси, / чрез огнь воспаривши в Небесное Царство, // Аполлония всеславная, молитвенице о душах наших.
Изрядную угодницу Христову, / церкве Александрийския диакониссу всечестную, / песньми благохвальными почтим Аполлонию старицу блаженную, / яко исполнена яве благодати / и Божественными сияньми преукрашена, // яже молится о душах наших.
Слава, глас тойже:Кровными каплями / безбожия огнь погасивши, великомученице, / Христову Церковь напоила еси богатно / и верных сердца уяснила еси, / благочестно почитающих, Аполлоние славная, // твою священную и честную память любовию.
И ныне, Богородичен, глас тойже:Огнь рождши нестерпимый, / попаляющ грехи и орошающ верныя, / вещная безмерных моих согрешений, / попали молитвами Твоими, Пренепорочная Чистая, / и росою истаявшую страстьми душу мою прохлади, / яко да велегласно // Твою милость и силу величаю, раб Твой, Марие Всепетая.
Или Крестобогородичен, глас тойже:Не рыдай Мене, Мати, / зрящи на Древе повешена Твоего Сына и Бога, / на водах Повесившаго всю землю неодержимо / и всякое творение Создавшаго; / ибо воскресну и прославлюся, / и адова царствия сокрушу крепостию, / и погублю того силу, / и связанныя избавлю от злодейства его, яко Благоутробен, // и Отцу Моему приведу, яко Человеколюбец.
На стиховне, Слава святой, глас 1:Плоть свою воздержанием увядивши, / терпением мучений врага низложила еси коварствия / и победу взяла еси на него, / о Аполлоние Богоблаженная. / Тем тя венча во огненнем страдании // Иисус Человеколюбец и Спас душ наших.
Тропарь, глас 4:Александрийския Церкве похвалу, / старицу Богоблаженную Аполлонию / прославим ныне в песнех, вернии, / яко та любовию Божественною разжегши душу свою, / во огнь вошла дерзновенно, мучителей посрамивши, / и в Царство Христово возшла еси со славою, // идеже молится о душах наших.
НА УТРЕНИ
Канон святыя, глас 2.
Песнь 1Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, // яко прославися.
Мудрость словесем моим подаждь, Благий Господи, / страстоносицы Твоей Аполлонии мольбами / и сию воспети, Спасе, сподоби ми.
Возжелавши Христовы красоты и Сего любовию снедаема, / страданием сочталася еси Ему, / Аполлоние Богомудрая и всеславная.
Яко огнь тепла ревность веры твоей, мученице Аполлоние, / еюже попрала еси неверных настояние / и победы венец взяла еси страданием.
Богородичен: Святая Дево, Мати Христова, / мучеников слава и Ангелов радосте, / с ними моли Сына Твоего ущедрити и спасти рабы Твоя.
Песнь 3Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, // и несть праведен паче Тебе, Господи.
Зубов сокрушение и огненная стремления / юношески подъяла еси, старице Аполлоние всечестная, / силою Креста укрепляема.
Подвигов ранами удобряяся, / душу светлейшу солнечнаго сияния соделала еси, / яко служительница Христова, страстотерпице всеславная.
Богородичен: Ангелов удивление, человеков дерзновение, Богородице Чистая, Приснодево, / моли Христа Бога, спасти непрестанно Тя блажащия.
Седален, глас 4:Уяснив житие твое добродетелей красотами, / служительница нареклся еси Церкве Александрийския, Аполлоние блаженная, / кровию же мучения себе украсив, / горе к Невещественным ликом преставилася еси. / С нимиже о нас Христа, мати, моли // помиловати души наша.
Слава, и ныне, Богородичен, глас тойже:Едина Чистая и Пречистая Дево, / Яже Бога безсеменно рождшая, // моли спастися душам нашим.
Песнь 4Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: // слава силе Твоей, Господи.
Лучами Креста сияющи, присноблаженная, / терпяше огненную муку, / прелести углие росою любве Христовы погашающи.
Была еси кротка и незлобива, смиреномудра же и тиха / и любве Божественный исполнена, / мученическими при кончине украсилася еси венцы.
Богородичен: Невесту Тя безневестну исповедаем / и чисто селение Иисусово, Богородице Дево Марие, / и Херувим святейшую.
Песнь 5Ирмос: Света подателю и веков Творче, Господи, / во свете Твоих повелений настави нас; // разве бо Тебе иного бога не знаем.
Единаго Тя, Господа Иисуса, исповедавши, славная, / рукою человека создавшаго, / во огнь дерзновенно входит старица всечестная, / муки мужески терпящи.
Претерпела еси муки доблественно, любовию Божественною исполнена, / и Богу себе от юности возложивши, умрети за Него не отверглася еси, / повеления Того послушая и стопам спасительным последуя.
Богородичен: Архангельский глас вопием Ти: / Радуйся, Благодатная, Господь с Тобою; / радуйся, Благословенная, Заступница наша и скорая в бедах Помощница.
Песнь 6Ирмос: В бездне греховней валяяся, / неизследную милосердия Твоего / призываю бездну: // от тли, Боже, мя возведи.
К будущей славе взирая, всечестная, / маловременную ни во чтоже вменил еси; / темже тя ничтоже возможе разлучити от любве Христовы: / ни жестокая биения, ни зубов сокрушение, ни огня разгорение, / ниже тленныя славы обещание.
Девство твое соблюде непоругано Христос Господь, мученице Аполлоние достославная, / и престави тя от земных скорбей к Небесней радости.
Любовию ко Спасителю рода человеческого воспылавши, всечестная, / востекла еси во след заповедей Его / и на огнь взошла еси дерзновенно.
Богородичен: Милости Твоея, Богородице, сподоби мя, премилостиваго Спаса рождшая, / Своею кровию от смерти вечныя человеки избавльшаго.
Кондак, глас 2:Мученическими красотами / Владычнему Престолу предстоящи / и Божественными блистании сияющи, / нас, поющих твою память, // страстотерпице Аполлоние, просвети.
Песнь 7Ирмос: Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющыя Тебе: // отцев, Боже, благословен еси.
Яко агница на жертву ведома, славная, / никакоже провещала еси, Владыце твоему подобяся, / Егоже ради и смерть пренебрегла еси.
Разгарашеся на тя яростию мучители, / зря тя непреклонну и повеления Господня хранящу, / огнь разложиша, устрашити тя хотя, / но посрамила еси дерзость их, приимши муки волею.
Богородичен: Преестественно Создателя от утробы Твоей, Дево, родити сподобилася еси, / земныя назидающа, поющия верою: / отцев Боже, благословен еси.
Песнь 8Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: // благословите, вся дела Господня, Господа.
Мученица явльшася, Небесная божественне наследовала еси / и престолу предстоиши Создателя, вопия: / благословите, вся дела Господня, Господа.
Одождении Божественными угасила еси многобожия пещь, / разжегшеся Божественною любовию прерадостно, / и ныне песнопоеши, Аполлоние всеславная: / благословите, вся дела Господня, Господа.
Просвещшеся зарею Святыя Троицы, Богоблаженная, / тьму прелести отгнала еси и славу улучила еси, песнопоюще: / благословите, вся дела Господня, Господа.
Троичен: Яко Единицу естеством, Тя пою, Божество Всесвятое, / в триех ипостасях Единаго Создателя, радуяся зову: / благословите, вся дела Господня, Господа.
Богородичен: Слово Отца Небеснаго Единосущное, / Адамово избавление от кровей Твоих девственных воплотися, Дево Марие Чистая, / Емуже благодарственне зовем: / благословите, вся дела Господня, Господа.
Песнь 9Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: // тем всепетую Богородицу величаем.
Целомудрием украшаема и мирностию духа, / раны твердым умом твоим терпела еси, / дух твой предая в руце Небеснаго Отца.
Звезда светла возсияла еси в мире, / сиянием священным озаряя мысли верных, Аполлоние преблаженная, / темже тя верно ублажаем.
Разжигаема любовию Вседержителя, / вошла еси мужественно во огнь / и, терпеливно пострадав, расторгла еси змия великаго, / Аполлоние старице Богоблаженная.
Богородичен: Глас Тебе ангелов, Пречистая, вопием: / радуйся, спасение всех человеков / и славных мучеников Божественное венчание.
Светилен:Трисиянному Великому Свету ныне предстоя / и в неизреченней светлости со всеми святыми пребывая, / Аполлоние всечудная, помяни всех нас, / память твою светоносную совершающих.
Слава, и ныне, Богородичен:Зарю пресветлую, являющую нам Солнце незаходимое, вемы, Тя, Пресвятая Дево Богородице. / Сего ради молим Тя: яко Мати Света сущи, / просвети нас светом Сына Твоего, Христа Бога нашего.
На стиховне, Слава, глас 1:Мучений огнь, Духа Святаго росою погасила еси, / старице Аполлоние всечестная, / и к Свету преставилася еси божественному и невещественному, / и по кончине блаженней источаеши исцелений капли, // уставляющи разжжение страстей силою духовною.
И ныне, Богородичен, глас тойже:Молитвы Твоих рабов приими, Богородице, / и избави нас от всякия беды, // яко рождшая Христа Спаса, Избавителя душ наших.