26 января (8 февраля) - память…
…муч. Иоанна (Попова), профессора Московской Духовной Академии (†1938)
На заседании Священного Синода Русской Православной Церкви 11 марта 2020 года (журнал №21, §5) были утверждены к общецерковному богослужебному употреблению тексты тропаря и кондака мученику Иоанну; они выложены на официальном сайте нашей Церкви. Эти тропарь и кондак были составлены в богослужебной комиссии Московской областной епархии. Однако существуют иные богослужебные тексты в честь мученика Иоанна - тропарь, кондак и молитва, составленные в Хабаровской духовной семинарии. Их я сегодня представляю читателям «Уставных заметок».
Свято́му му́ченику Иоа́нну
Тропа́рь, гла́с 2:Оте́ческому преда́нию поревнова́в, * и пло́ть покори́в ду́ху воздержа́нием, * в де́встве, чистоте́ и пра́вде пожи́л еси́, му́чениче Иоа́нне: * тала́нт же от Влады́ки тебе́ да́нный умно́жив, * те́м Це́ркви Христо́вой послужи́л еси́; * я́ко име́яй дерзнове́ние ко Го́споду, * помози́ на́м моли́твами твои́ми * всегда́ рабо́тати во сла́ву Трисвята́го И́мене Его́.
Конда́к, гла́с 3:Ре́вность боже́ственную в души́ твое́й име́я, сла́вне, * су́етнаго оклевета́ния беззако́нующих отре́клся еси́, * и убие́нию прибли́жився, * доблемы́сленне проше́л еси́ тво́й по́двиг, страстоте́рпче Иоа́нне. * Те́мже от Царя́ Небе́снаго вене́ц улучи́в, * го́рнему Престо́лу ны́не предстои́ши; * Христа́ Бо́га моли́ * дарова́ти на́м ве́лию ми́лость.
Моли́тваО святы́й и преблаже́нный му́чениче Христо́в Иоа́нне, красото́ Це́ркве Ру́сския, новому́чеников похвало́, прему́дрых удивле́ние, Ева́нгелиа Боже́ственнаго побо́рниче, за́поведей Госпо́дних ревни́телю, ве́ры христиа́нския храни́телю, вра́жия лука́вства обличи́телю, воздержа́ния и смире́ния о́бразе, сугу́бым венце́м де́вства и му́ченичества украше́нный! Предстоя́ со дерзнове́нием Небе́сному Царю́, Ему́же на земли́ ве́рен бы́л еси́ да́же до сме́рти, испроси́ у Него́ проще́ние все́х согреше́ний, от ю́ности до настоя́щаго дне́ и часа́ де́лом, сло́вом и помышле́нием соде́янных на́ми; умоли́ Го́спода Вседержи́теля, да да́рует на́м си́лу душе́вную, во е́же подража́ти доброде́телем твои́м высо́ким, да пода́ст на́м ве́ры пра́выя тве́рдое и неизме́нное сохране́ние, Це́ркви Святе́й послуша́ние, жития́ на́шего исправле́ние, и во все́х ну́ждах, ско́рбех и искуше́ниих ско́рое поможе́ние. Укрепи́ на́с малоду́шных в терпе́нии и упова́нии на Го́спода, помози́ возгре́ти в се́рдце и́стинную любо́вь Христо́ву, да небе́сных бла́г па́че земны́х жела́ем и и́ми услажда́емся; испроси́ на́м у Го́спода и́скреннее о гресе́х сокруше́ние, да поживе́м в ми́ре, покая́нии и исполне́нии за́поведей Христо́вых. Защити́ на́с, о страстоте́рпче Иоа́нне, с Преблагослове́нною Богоро́дицею от зло́бных наве́тов вра́жиих, и сподо́би ны́ насле́дницы бы́ти ра́йских селе́ний, да ку́пно с тобо́ю и со все́ми святы́ми непристу́пнаго Бо́жия вели́чества Престо́лу предста́нем, и Живонача́льную Тро́ицу просла́вим и воспое́м во ве́ки веко́в. Ами́нь.