Молитва Папы Пия XII
По случаю посвящения мира Непорочному Сердцу Марии, совершённого Папой Пием XII 31 октября 1942 года, Вячеслав Иванов выполнил переложение на церковнославянский язык акта посвящения, составленного Папой (опубликован 8 декабря 1942 г., в торжество Непорочного Зачатия). Оригинальный текст папской молитвы (в переводе на русский язык) выложен здесь (файл в формате PDF), а переложение В. Иванова я предлагаю читателям.
Молитва
Святейшего Отца нашего
Вселенского Архиерея Пия XII, Папы Римского,
ко Пресвятой Богородице
(в славянском переложении Вячеслава Иванова)
Ангельского привета благодатная таиннице Дево, богоневестная Владычице, споборнице христианом, рода человеческого прибежище, Воеводо непобедимая во бранех Господних, молебне простершеся, припадаем Твоему Престолу, милости Твои во время потребное уповающе улучити, скорую убо велице нужде постигши помощь, в настоящих напастех покров и заступление, не яко дел мзду, аще кая добре сотворихом, прияти мняще, никако бо теми щедрот Твоих непщуем быти достойни, но точию надеющеся на матерняго сердца Твоего неисчетную благость.
Ей, матернему благосердию Твоему, всенепорочная Госпоже Царице Богородице, в сию годину страшную судьб Господних сами себе, и друг друга, и весь живот наш предаем и посвящаем, людие Твои, единодушни и единострадальни убо со святою Церковию, телом Сына Твоего глаголемою священнотайне, страждущею днесь, и многочастне кровоточащею, и многообразне обидимою, общницы же суще скорби и воздыхания такожде и со всею вселенною, свирепыми раздираемою распрями, и ненависти палимою пожаром, от своея неправды разжженным.
Призри милосердовавши на толикую благостояния мирскаго и благонравия разруху: на толику родителей, супруг, братии, чад невинных печаль и тугу: на толик юности цвет пресечен: на толика телеса растерзана в лютых побоищех: на толицех душ муку и борение смертное, толицех же нераскаянных о гресех беспамятство и погибели вечныя бесстрашие в час последний.
Мир, Мати милосердия, Господа умоли вселенней даровати: и первее убо твоим предстательством да излиется свыше в сердца человеков елей милования, умягчаяй при ярость, и укрощаяй вражды гнев: и обратятся абие дышащие злобою к согласию, вожделеюще мира. Моли Бога о нас, Ходатаице всемощная, и посреде земли войною обуреваемыя повели тишине стати, еяже народи земстии взыскуют. Мир мирови дай, Царице мира, в истине и правде и любви Христове утвержденный, яко да преставшу оружия ужасу, и страстей треволнению улегшуся, в благоучиненнем и безмятежнем жития строе царствие Божие распространяется.
Покрый осенением благостыни твоея роды неверныя, и елицы выну коснеют в сени смертней, во еже водворитися миру в пределех их, и возсияти очесем их с высоты востоку: да и тии с нами славят солнце правды, единому мира Спасу зовуще: слава в вышних Богу, и на земли мир, и в человецех благоволение.
Языком, аще ли заблуждением, аще ли распрею отторгнувшимся, наипаче же и в разделении верою и любовию тя чтущым, яко не быти дому в селениих людей тех честною твоею не благословену иконою, от гонителей веры опасно таимою, и под спудом соблюдаемою до лета Господня, мир ниспосли, и приведи овцы рассеянныя во двор овчий, да будет едино стадо и един пастырь.
Мир святей Церкви Божией дай, и свободу неутесненну: запрети потопу возмогшу мудрований и хулений язычествующих: востепли в верных чистоты любовь, благочестия усердие неослабное, о проповедании и прославлении имени Иисусова ревность: по Бозе подвизающихся сонм и венцы умножи.
Тем убо, якоже человеколюбцу Господу нашему Иисусу Христу святая Церковь себе и весь род человеческий предаде и посвяти, на того всяческое невозвратно возложиши упование, и того крест победы знамение и спасения залог имущи, темже купно тебе всемилосердней, пресвятая Мати наша и вселенныя Владычице, рекше Всенепорочному Сердцу Твоему, оружием пронзенному, мы, вернии твои суще и достояние Твое, сами себе и друг друга и весь живот наш неотступно, понележе в сем веке поживем, предаем и посвящаем, предстательнаго любве Твоея поспешения чающе, яко да прекратятся дние сии скорби и сетования и да приближится царствия Божия торжество, внегда всем языком земным тя восславити, зане вся к Богу примирила еси, благословенная, и с Тобою величит воспевшего благодарственное от всех концев земли согласити величание, немолчную любве хвалу возносящим человеколюбцу Христу, единому истины, и жизни, и мира подателю: емуже подобает всякая слава, честь и поклонение со безначальным его Отцем, и пресвятым и благим и животворящим Его Духом, ныне и присно и во веки веков. Аминь.
Молитва
Святейшего Отца нашего
Вселенского Архиерея Пия XII, Папы Римского,
ко Пресвятой Богородице
(в славянском переложении Вячеслава Иванова)
Ангельского привета благодатная таиннице Дево, богоневестная Владычице, споборнице христианом, рода человеческого прибежище, Воеводо непобедимая во бранех Господних, молебне простершеся, припадаем Твоему Престолу, милости Твои во время потребное уповающе улучити, скорую убо велице нужде постигши помощь, в настоящих напастех покров и заступление, не яко дел мзду, аще кая добре сотворихом, прияти мняще, никако бо теми щедрот Твоих непщуем быти достойни, но точию надеющеся на матерняго сердца Твоего неисчетную благость.
Ей, матернему благосердию Твоему, всенепорочная Госпоже Царице Богородице, в сию годину страшную судьб Господних сами себе, и друг друга, и весь живот наш предаем и посвящаем, людие Твои, единодушни и единострадальни убо со святою Церковию, телом Сына Твоего глаголемою священнотайне, страждущею днесь, и многочастне кровоточащею, и многообразне обидимою, общницы же суще скорби и воздыхания такожде и со всею вселенною, свирепыми раздираемою распрями, и ненависти палимою пожаром, от своея неправды разжженным.
Призри милосердовавши на толикую благостояния мирскаго и благонравия разруху: на толику родителей, супруг, братии, чад невинных печаль и тугу: на толик юности цвет пресечен: на толика телеса растерзана в лютых побоищех: на толицех душ муку и борение смертное, толицех же нераскаянных о гресех беспамятство и погибели вечныя бесстрашие в час последний.
Мир, Мати милосердия, Господа умоли вселенней даровати: и первее убо твоим предстательством да излиется свыше в сердца человеков елей милования, умягчаяй при ярость, и укрощаяй вражды гнев: и обратятся абие дышащие злобою к согласию, вожделеюще мира. Моли Бога о нас, Ходатаице всемощная, и посреде земли войною обуреваемыя повели тишине стати, еяже народи земстии взыскуют. Мир мирови дай, Царице мира, в истине и правде и любви Христове утвержденный, яко да преставшу оружия ужасу, и страстей треволнению улегшуся, в благоучиненнем и безмятежнем жития строе царствие Божие распространяется.
Покрый осенением благостыни твоея роды неверныя, и елицы выну коснеют в сени смертней, во еже водворитися миру в пределех их, и возсияти очесем их с высоты востоку: да и тии с нами славят солнце правды, единому мира Спасу зовуще: слава в вышних Богу, и на земли мир, и в человецех благоволение.
Языком, аще ли заблуждением, аще ли распрею отторгнувшимся, наипаче же и в разделении верою и любовию тя чтущым, яко не быти дому в селениих людей тех честною твоею не благословену иконою, от гонителей веры опасно таимою, и под спудом соблюдаемою до лета Господня, мир ниспосли, и приведи овцы рассеянныя во двор овчий, да будет едино стадо и един пастырь.
Мир святей Церкви Божией дай, и свободу неутесненну: запрети потопу возмогшу мудрований и хулений язычествующих: востепли в верных чистоты любовь, благочестия усердие неослабное, о проповедании и прославлении имени Иисусова ревность: по Бозе подвизающихся сонм и венцы умножи.
Тем убо, якоже человеколюбцу Господу нашему Иисусу Христу святая Церковь себе и весь род человеческий предаде и посвяти, на того всяческое невозвратно возложиши упование, и того крест победы знамение и спасения залог имущи, темже купно тебе всемилосердней, пресвятая Мати наша и вселенныя Владычице, рекше Всенепорочному Сердцу Твоему, оружием пронзенному, мы, вернии твои суще и достояние Твое, сами себе и друг друга и весь живот наш неотступно, понележе в сем веке поживем, предаем и посвящаем, предстательнаго любве Твоея поспешения чающе, яко да прекратятся дние сии скорби и сетования и да приближится царствия Божия торжество, внегда всем языком земным тя восславити, зане вся к Богу примирила еси, благословенная, и с Тобою величит воспевшего благодарственное от всех концев земли согласити величание, немолчную любве хвалу возносящим человеколюбцу Христу, единому истины, и жизни, и мира подателю: емуже подобает всякая слава, честь и поклонение со безначальным его Отцем, и пресвятым и благим и животворящим Его Духом, ныне и присно и во веки веков. Аминь.