Служба святому ап. Закхею. Пам. 20 апреля (3 мая) (а тж. Неделя о Закхее)
(Герасима, монаха Микраяннанита).
Источник: http://akolouthiesorthodox.blogspot.com/2019/09/20_15.html
На малей вечерни
Ставим стиха 4 и поем стихиры подобны.
Глас 2. Яко от древа:
Егда́ возжела́л еси́ ви́дети и́же нас ра́ди вопло́щшагося/ Христа́ всех Бо́га,/ тогда любо́вию лу́чшею и душе́ю богоприя́тною/ на дре́во смоко́вницы восте́кл еси́/ и духовнаго желания, му́дре./ Те́мже с дре́ва слез[1],/ того́ прия́л еси́, Закхе́е,// и я́же па́че помышле́ния сподо́бился еси́.
Егда́ в ра́дости прия́л еси́ в дому́ твое́м, Закхе́е, Христа́ Го́спода,/ тогда́ от души́ возопи́л еси́ к Нему́:/ пол име́ния моего́, Го́споди нужда́ющымся дам,/ и оби́женным вче́тверо./ Те́мже спасе́ния сло́во от Спаси́теля услы́шав,// благода́ти бога́тныя сподо́бился еси́.
Егда́ прия́л еси́ в души́ сло́во Христа́ Спа́са,/ истоща́нию боже́ственному единонра́вен/ и апо́столом сопричте́н яви́лся еси́,/ Закхе́е богому́дре,/ и позна́нию всему́ лу́чшему тайнонаучи́лся еси́./ Те́мже я́ко други́й апо́стол,// все Благове́стия сло́во возвести́л еси́, богодухнове́нне.
Апо́столом о́бщник яви́лся еси́,/ вся, я́же в ми́ре, оста́вив душе́ю соверше́нною,/ и Петру́ после́довал еси́, ра́дуяся,/ и того́ трудо́м соприча́стник показа́лся еси́,/ я́ко служи́тель и́стинный Вседержи́теля./ Те́мже и награ́ды досто́йныя на небесе́х сподо́бился еси́,// с тем, Закхе́е, веселя́ся.
Слава, глас 1.
Зре́ния Спа́сова сподо́бивыйся,/ сло́во спасе́ния прия́л еси́,/ и от мытаря́ апо́стол яви́лся еси́,/ Ду́хом измене́н быв, Закхе́е блаже́нне,/ и апо́стольское ше́ствие сконча́в,/ пре́лести те́рния изсе́кл еси́ боже́ственным пропове́данием./ И ны́не, в го́рнее Ца́рствие всели́выйся,// моли́ся, мо́лимся, о душа́х на́ших.
На стиховне глас 2. Доме Ефрафов:
Слы́шал еси́ от Христа́:/ сле́зи с я́годичины, Закхе́е,/ с тобо́ю бо днесь подоба́ет мне бы́ти// в дому́ твое́м.
Стих: Во всю землю:
Све́том Ду́ха ум просвети́в,/ ку́пно со апо́столы пропове́дал еси́, Закхе́е// Ева́нгелие боже́ственное.
Стих: Небеса поведают:
Моли́ся приле́жно, Закхе́е апо́столе,/ Христу́ учи́телю// пода́ти нам всем прегреше́ний проще́ние.
Слава. Троичен:
Безнача́льне Вседе́телю,/ Тро́ице Пресвята́я,/ моле́ньми благоприя́тными Закхе́я свяще́ннаго// уще́дри мир Твой.
И ныне. Богородичен:
Родила́ еси́ пло́тию Царя́ всех,/ и пребыла́ еси́ Де́ва,/ чи́стая по рождестве́,// Де́во па́че помышле́ния.
Ныне отпущаеши: Трисвятое:
Тропарь. Глас 5. Собезначальное Слово:
Гла́са Вседержи́теля послу́шав,/ на я́годичину возше́л еси́ ра́дованною душе́ю,/ и в дому́ свое́м, Закхе́е, Христа́ прия́л еси́./ Те́мже измени́вся до́бре,/ от мытаря́ учени́к Христо́в досто́йне яви́лся еси́./ Его́же моли́ непреста́нно// спасти́ся душа́м на́шым.
Слава и ныне. Праздника.
Отпуст.
На велицей вечерни.
Благословившу иерею, предначинательный псалом и Блажен муж:
На Господи воззвах ставим стихов 6 и поем стихиры подобны, 3 праздника и 3 апостола.
Глас 4. Яко добля в мученицех:
Гла́са я́ко послу́шал еси́,/ и́же за щедро́ту безме́рную/ прия́вшаго смеше́ние челове́ческое,/ потща́вся, с дре́ва сшел еси́, ра́дуяся,/ и прия́л еси́ в дому́ твое́м Христа́,/ спасе́ние ве́чное пло́дствуя,/ и благода́ть боже́ственную прия́в,// измени́лся еси́ а́бие, боже́ственне Закхе́е, Ду́хом.
Я́ко прия́л еси́ в дому́ твое́м/ Спа́са и Го́спода,/ к Нему́ возопи́л еси́ с ве́рою:/ Се ни́щым пол име́ния моего́/ ны́не дам, Го́споди,/ четвери́цею же пода́м, я́же оби́дех./ Сего́ ра́ди, Закхе́е, Христо́с, я́ко же́ртву, прия́т// е́же от се́рдца приноше́ние твое́.
От мытаря́ апо́стол,/ и служи́тель боже́ственный быв,/ Ду́ха Свята́го де́йствие/ в души́ свое́й прия́в, Закхе́е,/ всех Соде́теля с Петро́м пропове́дал еси́ во язы́цех/ благода́ти Ева́нгелие[2] боже́ственное,// и досто́йно прия́л еси́ вене́ц нетле́ния.
Слава. Глас 6.
Све́том Спа́совым се́рдце озари́в,/ благода́ти апо́стольския сподо́бился еси́,/ Закхе́е богоприя́тне,/ Христу́ бо прилепи́вся,/ уче́нием Его́ дух воспери́л еси́,/ и смотре́ния Его́ та́инство ве́лие я́ве восприя́л еси́./ Те́мже такова́го сподо́бился еси́ дарова́ния,/ пропове́датель велегла́сный яви́лся еси́,/ пре́лести те́рния искореня́я./ И ны́не, с ли́ки апо́столов спребыва́я,/ с ни́ми моли́// помиловатися душам нашым.
И ныне. Праздника.
Вход. Свете тихий. Прокимен дне. Чтения [3].
Соборнаго послания[3] Иоаннова чтение (гл. 3:21-24; 4:1-3).
Возлюбленнии, аще сердце наше не зазрит нам:
Соборнаго послания Иоаннова чтение (гл. 4:11-16).
Возлюбленнии, аще сице возлюбил нас Бог:
Соборнаго послания Иоаннова чтение (гл. 4:20 - 5:1-5).
Возлюбленнии, аще кто речет, яко люблю Бога:
Лития. Глас 1.
Боже́ственное измене́ние прия́в,/ апо́стольскими по́двиги просия́л еси́, Закхе́е богоприя́тне./ Ду́ха бо Свята́го наи́тие/ вдохнове́нный тя орга́н показа́/ и Спа́сова служи́теля,/ и проро́ка боже́ственнаго./ Его́же престо́лу предстоя́,// непреста́нно моли́ о душа́х на́ших.
Глас 2.
Все жела́ние устреми́л еси́,/ к кра́йнейшему жела́нию, Христу́ Бо́гу на́шему,/ Закхе́е всеблаже́нне,/ и тепле́йшею душе́ю Тому́ прилепи́вся,/ та́инственнаго Того́ светозаре́ния зерца́ло яви́лся еси́ свяще́нное./ И му́дрость боже́ственную прия́в,/ спаси́тельная уче́ния ми́ру возвести́л еси́,/ и ду́шы омраче́нныя/ благоче́стия све́том наста́вил еси́.// Сего́ ра́ди досто́йно прия́л еси́ ве́чнаго живота́ вене́ц.
Глас 3.
Ева́нгельския благода́ти тайноводи́тель быв,/ богому́дрыми уче́ньми возвеща́еши/ Спа́са Христа́ неизъясни́мое воплоще́ние./ Апо́стольскую бо власть прие́м,/ де́лом и сло́вом изъявля́еши/ бы́вшее нам возсозда́ние/ и спасе́ние ве́чное/ неизрече́нным Сло́ва истоща́нием./ Сего́ ра́ди тя ублажа́ем, Закхе́е богоглаго́ливе,// я́ко предста́теля на́шего тепле́йшаго.
Слава. Глас 4.
И́же от мытаря́ ученика́ Христо́ва показа́вшася,/ и от дел непра́вды в пра́ведное житие́ преобруче́нна/ Закхе́я всепе́таго/ пе́ньми и пе́сньми духо́вными восхва́лим./ Ко Го́споду бо прише́д,/ сосу́д благопотре́бен бысть Ду́ха Свята́го,/ я́ко апо́столов учени́к./ С ни́ми го́рняго Ца́рствия блага́ насле́довав,// моли́тся непреста́нно о душа́х на́ших.
И ныне. Праздника.
На стиховне глас 4. Званный свыше:
Мыта́рский яре́м оста́вив,/ по́мыслом соверше́нным/ и́го Христо́во на ра́мена твоя́ подъя́л еси́,/ блаже́нне Закхе́е,/ к небе́сным возводи́м./ Отоню́ду единонра́вен и купножи́тель апо́столом быв,/ благоче́стия боже́ственное сло́во всем возвести́л еси́./ Сего́ ра́ди тя вси ублажа́ем,/ чту́щии тя любо́вию,/ прегреше́ний разреше́ние пло́дствующе,// моли́твами твои́ми ко Го́споду.
Стих: Во всю землю:
На дре́во смоко́вничное я́ко возше́л еси́,/ мудрова́нием боже́ственным, ви́дети Го́спода,/ во плоть сме́ртную оде́явшася за благоутро́бие,/ гла́са блаже́ннаго послу́шал еси́,/ Закхе́е, сле́зи, я́ко в дому́ твое́м/ странноприи́меши мя днесь,/ и испо́лнися се́рдце твое́ боже́ственнаго жела́ния./ Те́мже прия́л еси́, я́ко возлюби́л еси́,/ от Сама́го Спа́са, блаже́нне,// все дая́ние благ и прему́дрости све́тлость.
Стих: Небеса поведают:
От бе́здны благода́тей поче́рп, Закхе́е, Христа́ Вседержи́теля,/ я́ко в дому́ твое́м прия́л еси́ всех Творца́,/ и Тому́ бесе́довав тепле́йше,/ му́дрости исполне́нию и исто́чнику благ,/ ве́лию и па́че сло́ва/ боже́ственному та́инству Того́ смотре́ния/ тайнонаучи́лся еси́./ Та́кожде и ты, житие́ твое́ сконча́в,/ в го́рния черто́ги преста́вился еси́ во сла́ве// и а́нгелом сопричта́лся еси́.
Слава. Глас 8.
Кра́йнейшему Све́ту, прия́вшему челове́ческое вещество́/ неосла́бным жела́нием, Закхе́е, бесе́довал еси́./ И блаже́нства боже́ственнаго улучи́в,/ я́же па́че естества́ испо́лнился еси́,/ и всем пре́дал еси́ от благ, и́хже улучи́л еси́,/ и до́бре тече́ние сконча́в,/ обоже́ния плод прия́л еси́,// моля́ся Христу́ поми́ловати ду́шы на́ша.
И ныне: Праздника.
Ныне отпущаеши. Трисвятое.
Тропарь. Глас 5. Собезначальное Слово:
Гла́са Вседержи́теля послу́шав,/ на я́годичину возше́л еси́ ра́дованною душе́ю,/ и в дому́ свое́м, Закхе́е, Христа́ прия́л еси́./ Те́мже измени́вся до́бре,/ от мытаря́ учени́к Христо́в досто́йне яви́лся еси́./ Его́же моли́ непреста́нно// спасти́ся душа́м на́шым.
Слава и ныне. Праздника.
Отпуст.
На утрени:
По 1 стихословии седален. Глас 1. Гроб Твой, Спасе:
Го́спода ви́дев, и Тому́ бесе́довав чи́стым се́рдцем,/ Того́ светозаре́ния прия́л еси́ осия́ние,/ привре́менная оста́вив,/ и собесе́дник апо́столом был еси́./ С ни́миже моли́ о нас Спа́са,/ Закхе́е богоприя́тне.
Слава и ныне Праздника.
По 2 стихословии седален. Глас 4. Скоро предвари:
Прия́телище пречестно́е боже́ственных дарова́ний быв, Закхе́е,/ Христу́ бесе́довав боже́ственным помышле́нием,/ яви́лся еси́ и́стины проро́к свяще́нный,/ сло́во благоче́стия всем провозвести́л еси́./ Сего́ ра́ди тя досто́йно почита́ем, апо́столе.
Слава и ныне. Праздника.
По полиелеи седален. Глас 4. Вознесыйся на крест:
На дре́во смоко́вное возше́д,/ и Христо́во уви́дев зре́ние,/ благода́ть плодоно́сиши Ду́ха./ Боже́ственное бо измене́ние а́бие прия́л еси́,/ и име́ния твоя́ ни́щым раздае́ши,/ и от мытаря́ боже́ственный учени́к Христо́в был еси́,/ Закхе́е блаже́нне.
Слава и ныне. Праздника.
Таже степенны. 1 антифон 4-го гласа.
Прокимен. Во всю землю изыде вещание их:
Стих: Небеса поведают славу Божию:
Евангелие, еже на Литургии Безплотным 8-го ноемврия.
50 псалом.
Слава: Молитвами апостола:
И ныне: Молитвами Богородицы:
Самогласен. Глас 6. Помилуй мя, Боже:
Сло́вом благода́ти возде́лавый сердца́ челове́ков,/ все́ял еси[4] в ня и́стины се́мена./ И мно́гий плод пожа́в,/ ве́ровавших полки́ ко Христу́ приве́л еси́,/ тече́ние твое́ сконча́в./ Но моли́ся ко Го́споду, Закхе́е,// спасти́ся тя ублажа́ющым.
Таже каноны праздника и апостола. Егоже краегранесие: Божественному Закхею песнь сплетаю. Герасима. Глас 1.
Песнь 1. Песнь победную:
Тро́ицы осия́ние прия́в,/ ум мой озари́ моле́ньми твои́ми,/ я́ко да воспою́ све́тло свяще́нный твой пра́здник,/ Закхе́е сла́вне.
Егда́ обре́л еси́ Го́спода умо́м соверше́нным,/ Тому́ после́довал еси́,/ и все оста́вил еси́, Закхе́е, я́же тле́нная,/ и просвеще́ния испо́лнился еси́ боже́ственнаго Ду́ха.
Бо́га я́ко ви́дел еси́ плоть прие́мшаго/ безме́рныя ра́ди ми́лости,/ за е́же спасти́ челове́ков,/ и прилепи́вся к Нему́, тайнонаучи́лся еси́ от Него́/ я́же па́че помышле́ния.
Богородичен:
От Тебе́ возсия́ в подо́бии пло́ти/ пра́ведное живота́ Со́лнце,/ Девома́ти Чи́стая,/ и нас просвети́ позна́нием Свои́м.
Песнь 3. Да утвердится сердце мое:
Ви́дя Созда́тель возше́дша тя на я́годичину, возопи́:/ «Потща́вся, сни́ди. Се в дому́ твое́м днесь подоба́ет мне бы́ти,/ и испо́лню твое́, Закхе́е, стремле́ние».
Я́ко измене́н Боже́ственным Ду́хом был еси́,/ вся отве́ргл еси́ привре́менная,/ и в обновле́нии жи́зни Христу́ благоугоди́л еси́,/ учени́к Того́ быв, Закхе́е блаже́нне.
Взыска́в, обре́л еси́, Его́же возлюби́л еси́/ всем помышле́нием, богоприя́тне, Христа́ всех Творца́,/ и Тому́ после́довал еси́,/ мы́тницы весь соу́з оста́вив соверше́ннейше.
Богородичен:
Неискусобра́чно зачала́ еси́ Соде́теля всея́ тва́ри,/ и по рождестве́ стра́шнем Присноде́ва пребыла́ еси́./ Сего́ ра́ди велича́ем, Богоро́дице, сла́ву Твою́.
Седален. Глас 8. Премудрость и Слово:
Мытаре́во служе́ние оста́вив,/ Христу́ всеце́ло прилепи́лся еси́,/ и Тому́ вопия́л еси́:/ пол име́ния моего́ а́бие отдаю́, Го́споди,/ и я́же оби́дех, благоде́йствую мно́жицею/ от име́ний мои́х./ Те́мже и дела́ ме́ртвая оста́вив,/ стезя́ми живота́ ходи́л еси́ любо́вию боже́ственною,/ Закхе́е богоприя́тне./ моли́ Христа́ Бо́га/ прегреше́ний оставле́ние дарова́ти// пра́зднующым любо́вию святу́ю па́мять твою́.
Слава и ныне. Праздника.
Песнь 4. Услышах, Господи:
Соше́д со дре́ва, прия́л еси́/ в дому́ твое́м Спа́са,/ Его́же возлюби́л еси́, о Закхе́е сла́вне,/ и я́же па́че естества́ причасти́лся еси́.
Облагодати́в Госпо́дь се́рдце твое́,/ блаже́нне Закхе́е,/ служи́теля тя показа́ истоща́ния Своего́,/ прови́дя твою́ чистоту́.
Апо́столом единоревни́тель/ и спу́тник, Закхе́е, яви́лся еси́,/ и боже́ственное Ева́нгелие свяще́нно пропове́дал еси́/ и́же во тьме пре́лести седя́щым.
Богородичен:
Иису́са Пребоже́ственнаго/ и Живода́вца, Чи́стая, ро́ждши,/ сме́ртную всю низложи́ла еси́ си́лу,/ и живо́т ве́чный источи́ла еси́.
Песнь 5. Твой мир даждь нам:
Я́ко Свята́го Ду́ха благода́ть прие́м,/ духо́в лука́вых полко́м запрети́л еси́,/ и мно́гия неду́ги уврачева́л еси́,/ Закхе́е богоглаго́ливе, апо́столе Госпо́день.
Христу́ прише́д несре́дственно бесе́довал еси́,/ и от Него́ свет ве́ры прия́л еси́/ и ра́зум вои́стинну спаси́тельный,/ и подае́ши всем богоразу́мия сия́ние.
Претыка́ния зако́нная оста́вив я́ве,/ мы́тницы вся́каго сою́за избе́гнув,/ и́стины изве́ство смы́сленно прия́л еси́,/ послу́шав Го́спода.
Богородичен:
Ма́рия Присноде́во, Ма́ти Бо́жия,/ Того́ моли́ обрести́ нам ми́лость в день испыта́ния,/ таково́е дерзнове́ние Ма́терне стяжа́вши.
Песнь 6. Пророка Иону:
Учени́к богови́дный Спа́сов быв,/ с Петро́м сла́вным/ на ка́мени живо́тнем назда́л еси́ ве́рно,/ блаже́нне Закхе́е, помышле́ние.
Апо́столом ревни́тель и собесе́дник явле́йся,/ с ни́ми на земли́ пропове́дал еси́/ Всецаря́ Христа́, блаже́нне Закхе́е,/ Благове́стие[5].
Со тща́нием прише́д ко Спа́су Иису́су,/ сокро́вище от Него́ стяжа́л еси́ и́стинное,/ и яви́л еси́, блаже́нне Закхе́е,/ всем лу́чшая.
Богородичен:
Освяти́ мою ду́шу, я́ко све́щник све́та,/ заря́ми та́инственными благода́ти Твоея́, Чи́стая,/ и изба́ви мя от пре́лести бори́теля.
Кондак. Глас 2. Кровей Твоих:
Мытаре́ву слу́жбу[6] отве́ргл еси́,/ и ко Спа́су хоте́нием прите́кл еси́,/ и лу́чшым от Него́ тайнонаучи́лся еси́,/ Закхе́е блаже́нне,/ и свет был еси́.// Сего́ ра́ди па́мять твою́ почита́ем.
Икос:
Вопло́щшееся Сло́во ви́дети возжела́в,/ на дре́во смоко́вное со тща́нием возше́л еси́,/ и я́ко Христа́ узре́в, гла́са Его́ послу́шал еси́,/ и ра́дости испо́лнился еси́, Закхе́е богому́дре,/ и Спа́са в дому́ прия́в,/ а́бие измене́ние боже́ственное прия́л еси́,/ и от мытаря́ пря́мо таи́нник Ева́нгелия был еси́,/ и па́че сло́ва смотре́ния,/ Влады́ки служи́тель и апо́стол,/ богоприя́тною душе́ю и се́рдцем./ Сего́ ра́ди па́мять твою́ велича́ем.
Песнь 7. Пещь, Спасе, орошашеся:
Прия́л еси́ от руку́ Госпо́дню, Закхе́е,/ благослове́ние лу́чшее,/ благослове́н, вопия́, отце́в Бог.
Ви́дел еси́ Спа́са и послу́шал еси,/ Того́ глаго́лы спаси́тельныя,/ и к обновле́нию жи́зни преложи́лся еси́.
Я́ко Петру́ му́дрому после́довал еси́,/ благода́ти того́ яви́лся еси́ испо́лнь,/ и Спа́са Христа́ я́сно пропове́даеши.
Богородичен:
Ро́ждши Христа́ па́че помышле́ния,/ и пребы́вши Де́ва нескве́рная,/ Богороди́тельнице Чи́стая,/ ми́ру живо́т источа́еши.
Песнь 8. Песнь Тебе приносим:
Текл еси́ усе́рдно, блаже́нне,/ стопа́ми апо́столов богоглаго́ливых,/ и с ни́ми пел еси́/ Благослови́те вся дела́, Закхе́е, Го́спода.
Глаго́лы Спа́са живоно́сными/ обнови́лся еси́ а́бие, Закхе́е,/ и ве́тхая отве́ргл еси́ образо́в дре́вних,/ Го́споду после́дуя.
От мытаря́ таи́нник Госпо́день,/ учи́тельством Бо́жиим яви́лся еси́, Закхе́е блаже́нне,/ Благослови́те, вся дела́, взыва́я, Го́спода.
Богородичен:
В плоть оде́явся от пло́ти Твоея́,/ Бог Сло́во пресу́щественный/ яви́ся я́ко благоволи́, Богоро́дице,/ и челове́ки от тли изба́вил есть.
Песнь 9. Светоносный облак:
Ви́девый Христа́ и послу́шавый/ Того́ боже́ственных глаго́лов,/ апо́столом подража́тель и Ду́ха сосу́д,/ яви́лся еси́ предста́тель[7],/ слу́жбы мыта́рския вся́кий соу́з оста́вив,/ и у́зами небе́сными свя́зан ко учи́телю Иису́су.
Житие́ твое́ бесе́дою Христо́вою преложи́в,/ Ева́нгелия повеле́нием после́довал еси́, ра́дуяся,/ и во́ле Его́ ве́рно и непоро́чно послужи́л еси́,/ тем, я́же в ми́ре, умертви́вся/ жела́нием живота́ и́стиннаго.
Всеце́ло вся су́етных у́зы оста́вив,/ вседу́шно после́довал еси́ Христу́, о Закхе́е,/ и к Нему́ возше́л еси́,/ сверши́в тече́ние твое́, апо́столе,/ и прия́л еси́ от Него́ по́честь трудо́в твои́х на небесе́х.
Богородичен:
Превы́шшее Сло́во ро́ждшая теле́сно па́че естества́,/ бла́гости ра́ди мно́гия возсозда́вшее мир,/ яви́лася еси́ а́нгелом Цари́ца/ и всех тва́рей превы́шши несравне́нно, Де́во,/ и челове́ком кре́пкое прибе́жище.
Эксапостилларий. Небо звездами:
Свяще́нный Закхе́й да восхва́лится от нас,/ я́ко Христа́ служи́тель и тайново́дец и́стинный,/ я́ко мо́лится непреста́нно о нас ко Спа́су.
Хвалите. Глас 1. Небесных чинов:
Вопло́щшагося Влады́ку ви́дети возжела́л еси́,/ на я́годичину возше́л еси́ ра́дуяся, Закхе́е,/ и зре́ния сподо́бився Спа́сова, веселя́ся,/ апо́столом о́бщник а́бие// и собесе́дник показа́лся еси́.
В дому́ прия́л еси́ Закхе́е, Спа́са/ душе́ю ра́дованною,/ и к Нему́ возопи́л еси́,/ се, ни́щым дам полови́ну от я́же и́мам, Го́споди,/ и четвери́цею, и́хже оби́дех, возда́м// от име́ний мои́х.
Мы́тницы благоразу́мно соу́з оста́вил еси́,/ я́ко послу́шал еси́ боже́ственных глаго́лов Спа́совых,/ Закхе́е богому́дре,/ и учени́к и апо́стол боже́ственный Христо́в яви́лся еси́,// и служи́тель и́стинный Того́ снизхожде́ния.
Со апо́столы ликовству́я, Закхе́е сла́вне,/ в неизрече́нней сла́ве Бо́га и Спа́са,/ моли́ непреста́нно о нас,/ соверша́ющих па́мять твою́,/ я́ко да наве́та вся́каго изба́вимся// лука́ваго бори́теля.
Слава. Глас 5.
Его́же проро́цы пропове́даша,/ и ви́дети вожделе́ша,/ того́ ви́дел еси́ и прия́л еси́,/ плоть прие́мшаго за ны, Закхе́е всепе́те./ Блаже́н вои́стинну яви́лся еси́,/ я́ко Христа́ узре́в, Тому́ прибли́жился еси́,/ и чи́стым се́рдцем Ему́ бесе́довал еси́./ Но я́ко благоче́стия тече́ние сконча́в,/ и живота́ ве́чнаго вене́ц прие́м,// моли́ся о душа́х на́ших.
[1] На всякий случай: «слез» - причастие (слезши), не глагол.
[2] Деян 20:24.
[3] 1-го (тж. и следующие чтения). В нашей традиции нумерация не указывается.
[4] Видимо, опечатка в греч. тексте: ἔπειρε вместо ἔσπειρε.
[5] Вар.: Евангелие.
[6] В ориг.: σχέσιν - зд. образ. Но «мытарев образ» уже может восприниматься только в положительном смысле, не как то, что нужно оставить.
[7] Здесь в греч. тексте стоит странное несуществующее слово «πρευθύς», которое я прочитала как «πρεσβύς».