БӘ ШАИР ӘЛИ НАСИРИ!

[tolishpresxabon]

Ризван Шыхизодә

Бәты гынјә дардон бәмә гынјәни,

Бәнә ты бе, че һар мерди һынә ни,

Толыш һәлә бәштә оме зынәни,

Шаир, ышты пијәмерд бе һәхы ни!

Ышты вырәј һички әвәз әкәни,

Бәнә ышты шерон шини, шәкә ни,

Һәлә чәмә ноҹон зизә окани,

Шаир, ышты пијәмерд бе һәхы ни!

Нишо быдә, ки һәх вотә, бәд бәни,

Чоки-бәди мијонәдә сәд бәни,

Осмонику сијо авә рәд бәни,

Шаир, ышты пијәмерд бе һәхы ни!

Есәт шедә манде-марде мәсәлә,

Ышты гијәдәје хысуси шәлә,

Сардын бәни Нәвузәли хун һәлә,

Шаир, ышты пијәмерд бе һәхы ни!

Дештә шерон шо кардедәш әмәни,

Ҹанги һандәш, зу вардедәш әмәни,

Есәт бәки асбардедәш әмәни?

Шаир, ышты пијәмерд бе һәхы ни!

Тојки ныбо, Овшум беше әзыни,

Зылмотә шәв дыроз кәше әзыни,

Һәши икәрәти еше әзыни,

Шаир, ышты пијәмерд бе һәхы ни!

Пијәмерд бе кәно бынә, вәс һәни,

Толыш бәпе са быжијы, мәсәни?

Ризван һәлә омә бәты рәсәни,

Шаир, ышты пијәмерд бе һәхы ни!

Москва. 03.01.2014