Ф.Ф. Әбосзоде - 57 : Толыши јолә зоә, моәку бә руж буд быбу!
Ризван Шыхизодә
Толыши јолә зоә, моәку бә руж буд быбу!
Һәхи роәдә һежо ҹангиш, озодәти тәшиш ты,
Бә зәмини жимон быдә һафт рангинә Һәшиш ты.
Бәнә Лики бандон барзиш, шимшора дој бәшиш ты
Бәпе чәмә осмонику сијо авә рәд быбу!
Толыши јолә зоә, моәку бә руж буд быбу!
Золым фәләк гордынедә, дынјо жәјдә бәјәнды,
Рыхнә ғандә, әмә сулук кардәнимон дејәнды,
Чан соронин тамарзумон, виндәнимон ијәнды.
Ғәрибәти јолә дарде, әмон быбу, дод быбу!
Толыши јолә зоә, моәку бә руж буд быбу!
Озодәти! Тафутыш ни, веј бедә ја каме әв,
Бәнә инә лајлај шине, һәлиме әв, наме әв,
Гиләвоје, бә сардынон синә омә гаме әв.
Хәзри дасто чәмә Вәтән-сәрзәмин озод быбу,
Толыши јолә зоә, моәку бә руж буд быбу!
Бәмә һәхи ро нишо дој, зылмотәдә рушнә биш,
Кардедәмон дыво-сәно ноҹон бедән дыло пеш,
Хыдо бәты бәдә ружон нишо ныдә чымбәпешт.
Навәдә һа омә ружы шој-вој быбу, ид быбу!
Толыши јолә зоә, моәку бә руж буд быбу!
Устод, бәты быһтон вотдән, ријо вотдән, чич быкәм?
Бә гәдә руј ҹони дардо дыјо вотдән, чич быкәм?
Ку бә чәшон сипи виндән, сијо вотдән, чич быкәм?
Һәх-ноһәхи и әбыни, әвон бәпе зид быду!
Толыши јолә зоә, моәку бә руж буд быбу!
24.12.2013 - Москва