Новокузнетскәдә ғәтл
Мамулгани
tolishpress.org
“Криминал ијән һодисон”
Новокузнетскәдә ғәтл
Апрелә манги 12-дә бәруж тәғрибән саат ијәдә вилојәт Кемерово шәһр Новокузнетскәдә ғәтл быә. Мардәкәс шәһри әһл, Толышыстони рәјон Ланкони ди Мамустәдә моәку быә Имран Бејгијеве. Әв бо мәшғ карде бә фитнес-клуб “Спорт-лајф” шеәдә, де гулләшон жә әв.
Бә фитнес-клуб Имран Бејгијев дештә машини омә. Әв машино бешеәдә, номәлумә шәхсон бә гулләшон гәтә әв. Се-чоглә гуллә бәј гыније нәтиҹәдә, И.Бејгијев әлбәһол мардә. Ҹинојәткорон око доә силоһ һодисә вырәдә пәјдо кардә быәни.
Мардәкәс Новокузнетскәдә фәолијәт нишо доә мытәшәккилә ҹинојәткорә дастә јол быә. Ҹинојәткорә дастә дечәј номи “Имрани дастә” быә. Ым дастә Новокузнетски рәјон Орҹоникидзејәдә фәолијәтыш нишо доә.
Де ын ҹинојәтә кој әлоғодор бә Русијә Федерасијә Ҹинојәт мәҹәллә 1-нә маддә әсосәдә (“Ғәтл”) тәһғиғот бардә бејдә. Тәһғиғот дәвом кардејдә.