КУЛӘ ШӘВОН, НӘВУЗӘ ИДОН, НУЈӘ СОРОН МЫБОРӘКЕ!
tolishpress.org
КУЛӘ ШӘВОН, НӘВУЗӘ ИДОН, НУЈӘ СОРОН МЫБОРӘКЕ!
Чәмә азизә толышон! Чәшонон рушин быбун! Ымшанго КУЛӘ ШӘВЕ! Иншалла, ид омејдә иди сәпе: маштә Кулә руж бәкамон, машкинә шангоән идә шәве - НӘВУЗӘ ИДЕ! Ғәдәмоныш мыборәк быбу чы Нәвузи!
...Руж дабаме, тојки дәбаршије. Дијонәдә әғылон, һырдәнон һәммәј вә бәгәтен бә дашт, ғонғә/вәшәпос бәғанден! Ҹывонон ружи дырози рестә бәманден, моғнә бәжен! Есә чәмә Толышәдә иглән одәм нибәвиндеш ки, ыштә дијәнон екә, бә и кәси телә сыхан быкә, гонә ҹәвоб быдә! Һәмәкәси дим сырејдә, һар одәми димо нур војдә! Һәмә толышон бә ијәнды ҹон вотејдән, ҹонән мәсејдән! Рукику бә јол ҹәми толышон һәммәј танкардәшоне ыштә “бохчә оләтон”, дәросәтшоне-перостәшоне ыштән, бешән бә ҹәмати дылә! Вотәкәс ки, сырәкәс ки, бәјәнды ҹон вотәкәс, ҹон мәсәкәс ки! Чумчыко Кулә шәв омә, Нәвуз омә бә Толыш!
Шангонә вахт боме, нәнон бәван бә кә пылоә ғәзәни, ләвәнгинә мој, мыви, чынгыри, дынјо һар ноз-немәти дәбәвоштен бә сурфә! Хыјзон һәммәј гырдә бәбе бә Идә сурфә! Корпә әғылон һовсәлә әрәсни, тади бәкан ыштә инә ки, рәјрә екә чәј пыло! Инән бәвоте, “Сәбр быкән, чымы азизон!”, сыфтә һовон, бибијон пылоә бахшә бывғандәмон, чәјо бино бәкамон бо һарде! Һовы-бо умуж бәбен бәјәнды, вите-вите бәшен, бахшә бәроснен бәчәј сојби, бәстен ыштә идә бахшә, тадибәсә бомен бәштә кә! Һәммәј ки гырдә бин, бәвәдә пыло боме бә мәјдон. Ај һарды-һәш бәбеһа! Чокнә бәвотен, “луз си бәбе, чәш си әбыни!” Пыло бәпештә дәбәманден бо ләл-гыл һарде, быштә баһан, мивә баһан, ғәндәкукә, ғырәкукә, визәкукә, чандә гылә шини һарде бәпештә “идәбәг” бәкәсон бәбен! Әмма һички һичики, һичкику шикат әкәни! Нәнон сәрһисоб бәманден ки, һички гәво јавә сыхан бенышу! Әғылбәболоә вәјуон, шушәнинә кинон, рәсә зоон бә “гуши фол” бәшен ки, һамсијәку гыләј хошә сыхан бымәсын, бәштә орзу бырәсын! Сурфә гырдә карде бәпештә, әғылон певыло бәбен бә һамсијон бо “кышти ғанде”. Тосә маштә “Кулә шәвон мыборәке!” бәвотен, бәмәсен!
Руж ки обәј, нәнон әлбәһол бәшен бә һони, рушнәкәшә ов бәван, пебәшанден бәштә әғылон, “Јол быбән!”, “Јол быбән!” бәвотен! Сардынә овику пеларзијә әғылон пебәпуштен ыштәни бә лефи, шин-шини норозијәти бәкан, “Инә, вәсејәни!” бәвотен, әмма ижән димон бәсырен! Вырәоку пемәјн, әғылику бә јол, певыло бәбен бә ди, ҹәми ов-авлоди Кулә шәви тәбрик бәкан! Бәд быәкәсон бәјәнды кә бәшен, јодо бебәкан ыштә бәдәти, һәммәј дуст бәбен! Сулһ боме бә Толыш, әмнијәт боме, әмин-әмонәти боме, бәрәкәт боме бә Толыш!
Шангоән ки, толышон һәммәј Ид бәкан иншалла! Идәгардыш бәбе, мәхлоғ һәммәј бәнәве бә кәон, бекимсәнә одәмон бы ружәдә ыштә кәонәдә меһмон бәвинден, Идә бахшә бәвинден!
Чы хосә иде Нәвуз! Ым чы јолә меҹузәје, Хыдо нозил кардәше бәчәмә хәлғи! Идон ән речини, чошамбә ружон ән ғәшәнги чәмәне! Шукур быбу бәшты јолјәти Хыдо! Ыштә ән азизә иды бахшә кардә бәчәмә толышон!
...Әмәнән һәммәј - Вәтәнику дијәроә мәмләкәтонәдә, ғурбәтәдә, дынјо чандә мәһолонәдә жијә толышон дыләдә Вәтәни һәсрәт, чәшонәдәшон һиҹрони ғәм, бәныштемон бә сурфә, Кулә шәв бәкамон, Нәвузә ид бәкамон! Сурфонәдә чанә ноз-немәтон быбунән, ләвәмон чанә си быбујән, орзумон иглә бәбе: Вәомә Нәвузи дештә хәлғи, ов-авлоди бә иҹо ыштә Вәтәнәдә - Толышәдә ғејд быкәмон! Конҹо быбумонән, дылымон де Толыши бәбе, де толышон бәбе!
Мыборәк быбу шымә Кулә шәв, Нәвузә ид, хосә толышон! Орзумоне, һәммәј бырәсән бәштә орзујон: пәвәндијә кинон ијән зоон вәјә быбу, субајон кә быбун, кә быәкәсон пыә-моә быбун, бе кә мандәкәсон кәсојб быбун, ғурбәтәдә быәкәсон һәммәј огардын бәштә Вәтән, бахтәвәр быбу чәмә хәлғ! Һәзо-һәзо жыго Кулә шәвон, Нәвузә идон, Нујә сорон ғысмәт быбун бәшмә, ај чәмә азизә хәлғ!
Толыши озавзије һәрәкот
ИА “Толышпресс”
ВИДЕО: Фәхрәддин Әбосзодә Нәвузә идә тәбрик