ТОЛЫШ КИJЕ?
Әли Насирtolishpress.org
ТОЛЫШ КИЈЕ?
(Есәтән Толыши дастони окәм)
СИПИЈӘ ТУМ!
“Кали иглә ро һесте - әвән ростә роје!”
Сипијәтум Зәрдуст
Лејнә быжән, быжән Ләлә,
Вәш быгәты лејнә чулә!
Зәрвони рушнә вардеро,
Милләти оғо кардеро -
Быжән, сәдош гур быбу, гур,
Исрафили сур быбу, сур!
Толыш шин-шин һытә һәлә,
Сывык кардејро ым шәлә -
Һытәкәсон һано пекә!
Чы Аријон чәшон окә,
Чы Кәдуси кәјбә окә.
Пукә ыштә кијә, пукә,
Чы Азәри рушнәтыкә -
Толышон Дастони окә!
“Әвһесте” чы Толыши сәдој,
Чы Һуј бәмә һәхи нидој!
Әв чәмә нышоне, номе,
Чәмә ришә - Сипијә туме!
Әв чы Зәрдусти вошнәје,
Әв “Китобон” һәммәј сәје,
Һәхи иминә чәшмәје,
Әв Толыши чорушнәје!
Әв чы хәлғ бәјон хомәј,
Әв Ҹәмшиде, әв Иомәј!
Һырконе, Каспије, Геле,
Атропати Гавгамеле!
Чәј и гылән мәнош һесте,
Ије Ғырон - Әвһесте!
Гуран - јәни Гурыжон,
Гурыжон кин? - Толышон!
Ғырон че Әвһесте әсле,
Әһумәрд чы туми нәсле!
Чығыно рост бә ә Һәши,
Әли вотәше: Кусәжим!