Тәмом бе ымруж Ружәмо!
Забил Мәдож on 31 Авуст, 2011
tolishpress.org
Шәв егыније, Шәввал дамәј,
Дышәвә бе Овшум, чамәј,
Ид бәчәмә со-бә омәј,
Һа шинә пы, һа шинә мо,
Тәмом бе ымруж Ружәмо!
Бекардән фытрә, сәдәхә,
Бојәнды ғандән ғәдәғә,
Зерән, биши тосә јәхә,
Дыво кардән јәнды думо: -
Тәмом бе ымруж Ружәмо!
Бә идә шәвнышт гардедән,
Бо јәнды хавло бардедән,
Бә иҹо овнә һардедән,
Сурфәдә сефчәк де хымо,
Тәмом бе ымруж Ружәмо!
Кәдә емандә ҹызғә бу,
Фәти патедән де локу,
Фол-фол кардән гылвонә ку,
Годушдә мос кардә бә мо,
Тәмом бе ымруж Ружәмо!
Бә иврә вотдән ныможи,
Ко кардәнин идә ружи,
Дыво кардән руж дырози,
Сыхан кардән Хыдо номо,
Тәмом бе ымруж Ружәмо!
Жыго иди һәзо сорон
Шымә, бывиндон, бысырон,
Бәшмә комәг Хыдо Ғырон,
Кинә, вәју, зоә де зомо,
Тәмом бе ымруж Ружәмо!