МЫБОРӘКЕ ТОЛЫШИ ПОЕЗИЈӘ СИПИРИШИ МОВАРДӘ РУЖ!
Ф. Абосзода, Толышпресс
tolishpress.org
Жыго вотејдән ки, вахтисә бәнав тәбрик карде әбыни одәми мовардә ружи. Жыбызын, ын сыханон вотә быән бочәмә портал “Толышпреси” ијән чәј мыәллифон гыләјни Забил Мәдожи. Портали админ де Забил Мәдожи бә иҹо сәбәсә доәшоне, бә ғәрор омән ки, Әбдулрза миәллим бә дынјо омә ијулә манги 20-дә! Ај ко кардәшонеја! Һар кардә кошон һежо жыго бәбәј, веј вахти бешәбимон бә сипијә руж! Азән пегәтәме нывыштәме гыләј чәшрушни бәчәмә Сипиришә Шаири ки, баһанды, бызны ки, јодо бекардәмонни әв чәј бы пи-пышгә вахтәдә! Чич быбо, чоке? Мәвотбән, Әбдулрза миәллим манги бәнав, јәни ијунә манги 20-дә омә бә дынјо! Ымијән вотејдән ки, һар гылә сәһви ыштән гыләј нахше! Быдә ымән быбу чәмә бә Әбдулрза миәллими мовардә ружи жә нахш! Быбахш әмәни, хосә Әбдулрза миәллим! Гыләј зәрфәти ғәзинә ғәбул быкә чымы ын сыханон. Фырсәте вотәјнә, и кәрән тәбрик кардејдәм шымә мовардә ружи!
Бердәм Әбдулрза миәллими һичи нывыштәшнәбәј ғәрәјз “Ыврә чәмә дәдә јурде, Толыше!”, иглә ым поемә вәс әкәј ки, әв гыләј јолә шаири ғәзинә егыны бә Толыши поезијә тарых! Шык быбу бә Хыдо јолјәти ки, сывој ын поемә, Әбдулрза миәллими нывыштәше чандә гылә шерон, ғәзәлон, мәснәвијон, муҹәссәмон ијән ҹо әсәрон ки, чәвон һар гыләјни гыләј рангрисинә нахше, һәшјәје, гыле чәмә поезијәдә! Һәлбәттә, чәмә һынә ни бы тәбрикномәдә тәһлил быкәмон әвони һәммәј. Ын әсәрон веј вахти мәлумин бәчәмә толышон, һәғиғәтән зывонон әзбәрин. Интаси Әбдулрза миәллими һәмонә поемә гыләј мырворијә донәје ки, бәвәдә Толыши ыштәни тәбиәт, чәј хәлғи адәт-әнәнон, мәишәт, етнографијә, һаружнә жимони рангрисинә портрет. Ә поемә һандә һар гылә толыш - “сыбыжинә” деғыж быбу, ја “пыхә” толыш, һич нише фәрғ, әјо бәвинде Толыши битовә мәнзәрә!
Һич әзынимон воте, чоке ја бевәҹ, интаси ғајдә жыгоје ки, шаир кам бәгәм бәкарде ҹо шаири. Шаиронку жыго хосјәт тарыхән һежо быә, есән жәго. Ымијән бывотәмон ки, иминә кәрә чәмә толышә шаирон, - Вәлиша, Әли Насир, Хилгәт, Аллаһверди ијән ҹо кәсон һузурәдә Әбдулрза миәллим һандеәдә ыштә ын поемә, һәммәј бә и гәв вотышоне ки, “Быми һәни нимоне һич сыхан!” Бо шаири әсәри әбыни,һич әбыни чымисә јолә, чокә ғыјмәт!
Ружи аз чы рој тоно пемандәбим,
Ыштән-бәштә гәдә-гәдә һандәбим.
Дуст пәјдо бе, дәј бә иврә мандәбим...
Чәмә тоно гыләј барзы-боло ше...
Воте, “киј әв?” Вотем, “чәмә толыше,
Ыврә чәмә дәдә јурде, Толыше”!
Ымруж чы сәтрон мыәллифи, чәмә һәммәј сипириш, Толыши шаирон сипириш ғурбинә Әбдулрза миәллими мовардә руже. ...Дынјо дардон, Толыши дардон ғат кардәшоне чәј барзыбылындә пешт. Интаси бә вәзјәтәдән, номхыдо, ғәләми нојдәни бә зәмин, шәв-руж нывыштејдә, Толышику нывыштејдә,толыши, ыштә Нәнә зывонәдә нывыштејдә, шин-шини нывыштејдә, әмәни һәммәј бә ғырјәт сәдо кардејдә, бә толышәти - толыш бе сәдо кардејдә. Чәј шерон, поемон бәнә чәмә Нәнон шыти ру бејдән бә һар гылә толыши дыли, бәвонәдә меһиббәт пеловнејдән бә Толыши. Һар гылә толыш әвони һанде-һанде һәнијән веј толыш бејдә, веј бејдә чәј меһиббәт бәштә Вәтәни - бә Толыши, бәштә зывони, - бә толыши зывони, бәчәмә хәлғи, - бә толышон, бәчәмә адәт-әнәнон, тәбиәти, бә Каспи дыјо, бә Вазәру. Чәј сәдо омејдә тарыхи лап ғәдимә вахтонку - лап ғәдимә Мәдо ыштәно, елон кардејдә бә дынјо һар вырә ки, Толыш һесте, толыши хәлғ һесте, толыши зывон һесте, толышон һестин!
Мыборәке ышты мовардә руж, чәмә хосә Әбдулрза миәллим! Хыдо умр быдә бәты, бынвышт, ҹанг быкә Толыши роәдә! Ты чәмә һәммәј сипиришиш, Толыши шаирон һәммәј сипиришиш! Толышон һәммәј сәлом быбу бәты!
Бы азизә ружәдә әмә Әбдулрза миәллими шогирд, чәј пероснијә шаир Забил Мәдожи ыштә устоди барәдә нывыштә кали әһволотон едаштејдәмон бә һандәкәсон нәзә..