Толыши нозэдоштэ Шаир!
Талышфонд, Толышпресс on 12 Июль, 2011
http://tolishpress.org/news/1514.html
Ымруж чәмә Билә, Толыши шинә-шәкә һәмән нозәдоштә Шаир Забил Мәдожи мовардә руже. Забил бә поезијә омә де "Һа Хыдо, аз чич быкәм?" Бы чандә сорон Шаир һежо ҹәвоб нәвејдә бын парси: Чич быкәм ки, овҹ быкә, озавзијы, перәхы, озод быбу чәмә хәлғ? Шәв-руж бә ҹанге де зәмини-осмони: танә жәјдә, сә-сыхан кардејдә, жыго бејдә, һәтто ләнәт кардејдә бә толышон ки, ыштә хәлғи ғырјәти кәшејдәнин, "ыштә кәдә толыши гәп жәјдәнин", конҹо быбо, әвони бә ғырјәт сәдо кардејдә! Жыгоән бејдә ки, бә зывон гәтејдә әвони, сә-зывон кардејдә дејәвон, тариф кардејдә, мәдһ кардејдә Толыши, чәмә зывони, чәмә бандон ијән вишон, чәмә Каспи, чәмә рујон ијән һонијон, меһиббәт пеловнејдә һар гылә толыши дыләдә бәчәмә Вәтәни! Есә дәшош бә кон гылә толышә Форум, Забили әјо бәвиндеш, шојд бәбеш бәчәј бардә ҹанги -Озоди ҹанги! Һар вырәдә толыши зывони умутејдә бәчәмә ҹывонон, сәрост кардејдә чәвон сәһвон, омутејдә бәвон "Фатмә нәнә фолклори бохчә"...
...Бә веј одәмон чочин омејдән чәј һәрәкәтон. Чандә кәсон фикир кардејдән ки, чы одәми нише ҹо дард-сәр, ишкил, әғыли дард, хыјзони дард, жимони дард, жије дард... Лыберә жәкәсән кам бејдәни, рышханд кардәкәсән, песырәкәсән. Чич карде бәбе? Жәләвонә толышонән һестин һәлә. Әвон бехәбән дынјокујән, хәлғикујән. Ашығин бә дынјо моли. Әвон һәлбәттә, дәнибәрәсен чиче хәлғ, чиче моә зывон, чиче ОЗОДИ! Әвон сәрәсејдәнин ки, Забил Хыдо роәдәј, Чәј һәхи роәдәј! Забил Хыдо һәхи, јәни Чәј офәјә хәлғи, чәј зывони роәдә ҹангәдәј. Чымисә јолә бахтәвәрәти бәбе јәне? Вај бә одәмон һоли ки, ыми сәрәсејдәнин! Вај бә ружи ки, әвон димбәдим бомен дештә Офәјевони! Бәвәдә сијодим бәбен Чәј вәдә!...
Чәмә хосә Билә Забил! Мыборәк быбу ышты мовардә руж! Чокнә бино кардә де Хыдо номи, жәгоән быши дештә гәтә рој - де һәхи рој, бынывышт шинә-шәкә шерон, мәдһ быкә чәмә Вәтәни, Хәлғи, чәмә шинә Зывони! Хыдо хәј быдә бәты бы роәдә! Әмә һәммәј веј пијејдәмоне ты, фәхр кардејдәмон деты, чәмә хәлғ фәхр кардејдә деты! Ыштыку тожә-тожә шерон бә чәшимон!...
Сороны соронсә речин, ружоны ружонсә!
Мовардә ружы мыборәк, Толыши нозәдоштә Шаир Забил Мәдож!