ЛИКӘДӘ ҺӘНИ МАНДӘНИ СА СОР УМР КАРДӘКӘС...
Мамулгани on 03 Июль, 2011
http://tolishpress.org/news/1507.html
Гыләј гонә хәбән омәј беше чәмә Лико: Информасијә агентәтијон хәбә дошоне ки, рәјон Лики ди Пештәтукәдә жијә Фәтуллајевә Мәһбубә Һәсәни кинә бә Хыдо рәһмәт шә 113 синәдә.
Вахти һестбе, јәни жәгоән навконә вахтон нәзәрәдә гәтејдәним, лап 20-30 сор чыми бәнав, Лики һар дијәдә 15-20, һаканә 30-40 кәс сајку бә пе сининә одәм әжи. Чәвон һар гыләјни бәнә бози мандәбин чәмә хәлғи адәт-әнәнон, дини, әхлоғи, мәнәвијоти, дијонәдә ғајдә-ғануни мыдофиәдә. Һар гылә ликыж бәзне воте ки, хәј-шәрәдә пи-пышкон әныштин де рестә, имкон нәдәјн ки, комсә ҹоһил хәләл бијә бә мәҹлиси шемони. Чәш әнәјн ки, һар гылә ҹывонә әғыл чокнә лозиме хыдмәт быкә бә омәкәсон, норози шәкәс ныбу мәҹлисо. Мәхсусән чәмә вәјонәдә пијәмердон тарсику и кәс шулуғи карде нәзни! Дештә чәлиги гыләј дәрс әдәјн бә жәләвони ки, пандәномә әби бо мандәкәсонән. Әве хәј-бәрәкәт, абру-һәјо, номус-ғырјәт, дин-имон һестбе бәвәдә Толышәдә! Жәләвонә сининә женон һымһымбәдә толышон огәтәшонбе ыштә кијәсә, ыштә номбәномә хорәкон. Әвон кам бе-бе, чә хорәкон патпеши чәми зынә вәјујон-кинонән кам бејдән.
Әве, һар жыго гыләј пијәжени бә Хыдо рәһмәт ше веј гонә һодисәје бо толышон. Һәлбәттә, бәшәри мығјосәдә вејән јолә һодисә ни икәси бә рәһмәт ше. Әмма, ижән сәнибәтон вотејдәм, ым бо толышон гонә дарде - чәмә Вәтәни дарде, Толыши дарде, хәлғи дарде!
Хыдо рәһмәт быкә чәмә Мәһбубә нәнә! Ғәбыш пур быбу де нури!
Хыдо рәһм быкә бәчәмә хәлғи!