Воскресное чтиво на Толышпрессе: ЧОКНЭ БЭБЕ ?!
Забил Мәдож on 14 Май, 2011 г.
http://tolishpress.org/news/1473.html
Чокнә бәбе?!
Һәрзә-һәрзә гәп жедәмон,
Чич седәмон, бәј шедәмон?
Де чанд дусти бәд бедәмон,
Кәјнә роһат, локнә бәбе?
Вај, чәмә ко чокнә бәбе?!
Овыжгыне дарды деки?
Бышиј думо охо чики?
Зындәниш һич ҹики-бики,
Ым чымы дыл токнә бәбе,
Вај, чәмә ко чокнә бәбе?!
Мәседәнин һич сәроси,
Мерди ни тыни сәроси,
Нәв гыләш ду, иглә роси,
Зил нывәшо, ноғнә бәбе?
Вај, чәмә ко чокнә бәбе?!
Гәпәдә Бабәк, Һәзимон,
Быми-бәј ангә рәзимон,
Чак бе-бе, чокнә гәзимон?
Ружбәруж дард кофна бәбе,
Вај, чәмә ко чокнә бәбе?!
Чәмә кәј курси рыжедә,
Дыл пучә бедә ғыжедә,
Хәлх жидә, толыш мыжедә,
Бәчәмә сә дохлә бәбе,
Вај, чәмә ко чокнә бәбе?!
Ғасбу вотдәм гырд быбәмон?!
Бојәнды пард, сырд быбәмон,
Јоли тоно һырд быбәмон,
Дешмени чәш зохлә бәбе,
Вај, чәмә ко чокнә бәбе?!
Бәјәнды һол быларзәмон,
Јәнды һоли быпарсәмон,
Бој Хыдоку бытарсәмон!
Верән бәвдә соклә бәбе,
Вај, чәмә ко чокнә бәбе?!