Ля сiнагогi вырылi вялiзную траншэю
Днямi на вул. Вялiкай Траецкай пачалi пракладваць камунiкацыi да новага офiснага будынку, якi павiнен паўстаць неўзабаве на месцы разбуранага за пажарным дэпо.
Нягледзячы на абяцаны археалагiчны нагляд, прэтэнзii
ў адрас будаўнiкоў i археолагаў ёсць. Па-першае, каўшом экскаватара пашкоджаны, а калi больш дакладна, знiшчаны, падмуркi дамоў ХIX ст. Па-другое, не вядзецца фiксацыi залягання i стану гэтых падмуркаў для магчымага ў будучым археалагiчнага вывучэння гэтага месца, якое некалi насiла назву "школьны двор". Варта адзначыць, што гэта вельмi важнае ў археалагiчным плане месца, бо ў XII ст. тут быў пасад. Дагэтуль сур'ёзных археалагiчных раскопак у гэтым месцы не праводзiлася i яно застаецца не вывучаным. Складваецца такое ўражанне, што кафедра археалогii ўвайшла ў спячку: за апошнiя дзесяць гадоў не вяла сур'ёзных раскопак, у асноўным капаючы шурфы 2 на 2 метры.
