Стихи Симеона Полоцкаго.

[sociologia1]

Стихотворенiе, вѣроятно, написано Симеономъ Полоцкимъ.

Оно помѣщено въ концѣ «Букваря языка славенска» (1679 г.).

19 iюля 2020 г. переписалъ его.

Увѣщанiе.

Хощеши чадо благъ разумъ стяжати;
тщися во трудѣхъ выну пребывати.
Временемъ раны нужда есть терпѣти,
ибо тѣхъ кромѣ безчинуютъ дѣти.
Розги малому, бича болшымъ требѣ,
а жезлъ подрастшымъ, при нескудномъ хлѣбѣ.
Та орудiя глупыхъ исправляютъ,
плоти цѣлости ничтоже вреждаютъ.
Розга умъ остритъ, память возбуждаетъ,
и волю sлую въ благу прелагаетъ.
Учитъ Господу Богу ся молити,
и ранw въ церковь на службы ходити.
Бичь возбраняетъ сквернw глаголати,
и дѣлъ лукавыхъ юнымъ содѣвати.
Жезлъ ленивыя къ дѣлу понуждаетъ,
рождшихъ слушати во всемъ, поучаетъ.
А sлобы творцы страхомъ си спасаетъ,
егда болѣзнми душу проницаетъ.
Не вредитъ костей, тѣлу болѣзнь родитъ,
но sлыя нравы отъ юныхъ отводитъ.
Душу отъ огня вѣчна сохраняетъ,
въ небесную же радость водворяетъ.
Ты убw отче, такожде и мати,
научитеся чяда поучати:
Аще хощете утѣху имѣти,
а не срамъ за ня, въ старости терпѣти.
Не на плотскую красоту чадъ зрите,
но душы красны да будутъ, смотрите.
Красота плоти многихъ погубляетъ,
а язва тоя душу удобряетъ.
Лѣпота души велми есть спасенна,
создавшему ю Богу возлюбленна:
Ту же wбычно ученiе вводитъ,
а умный дѣтищъ въ чести мнозѣй ходитъ.
Вы же, w чяда, трудъ честный любите,
еже полезно тогw ся держите,
Знающе, якw аще ся трудити
тяжкw, но легкw труды плодwвъ жати.
И раны яже добро содѣваютъ,
вамъ не мерзостны въ дѣтствѣ да бываютъ.
Цѣлуйте розгу, бичь и жезлъ лобзайте,
та суть безвинна, тѣхъ не проклинайте:
И рукъ, яже вамъ язвы налагаютъ,
ибо не sла вамъ, но добра желаютъ.
Дѣлеса sлая весма отрѣвайте,
ко добрымъ сердца ваша прилагайте.
Сiеже слово за даръ благъ возмите,
не sлослов'те ми, но благословите:
Иже вамъ благихъ всяческихъ желаю.
Кончя, къ благости всяцѣй увѣщаю.