«Сув» керда журнал
Боккха кхаъ хилар сона укх деношка. Октябрь бетта 25-ча дийнахьа Наьсаре дукха нах в1ашаг1 а теха «ХХ1 век» яхача ц1аг1а чакхдаьлар «Сув» яхаш ц1и йола керда журнал довзийтар. Журнал Г1алг1айчен кхалнаха лаьрх1а да. Из журнал в1ашт1ехьдаьккхараша лерх1 таханарча дийнахьа вай республике бахача кхалнаьха балаш-г1айг1аш, цар дагадоахкараш, цар дагалаттараш, цар догдоахараш, царна бакъахьа хетар е харцахьа хетар цу журнала оаг1онаш т1а довзийта.
Х1аьта цу т1а вайна корадоаг1аргда бусалба динах дола бакъдар, г1алг1ай эхь-эзделах ха дезар, могашал лораяра де дезар, дезал кхебеча эшар. Цул совг1а, таханарча кхалсага вахар довзийташ дола а кхыдола а дувцараш. Масала аьлча, журнал дешачарна укх хьалхарча номера т1а корадоаг1аргда т1адувха барзкъа таханарча денца товш хургдолаш мишта хила деза, ноанал мишта де деза (яа х1ама мишта кийчъе еза), дика нускал хилара фу ха деза, фу де деза, гурахьа сомий бешамашта доал мишта де деза, яхача а иштта кхы дуккхача а хаттарашта дола жоп. Иштта цу журнала т1а да тайп-тайпара керда хоамаш. Дуккхачарна хьашт хургда аьнна хет «Могашали хозали» яхача рубрикаца а.
Къаьстта ала безам бар са «Национальная идентичность» яхача рубрика к1ала оттаяьча «1омабе вай г1алг1ай мотт» яхаш ц1и йолча г1алг1ай метта урокех. Цу т1а дешархошта довзийт г1алг1ай метта алфавит (алапат), эрсий меттаца доаца алапаш. Иштта цу хьалхарча уроке 1омаду г1алг1аша шоаш в1ашаг1кхийтача ду хаттараш - «моаршал хаттар», е д1а-юха къастача хана ду хаттараш, е доахаш дола ловцаш, е оалаш дола дешаш. Уж урокаш овттаяьраш ба къона 1илманхой Къоастой Хамарз, Хайранаькъан Хадчат, Баркинхой Зарема. Белгалде доаг1а, г1алг1ай мотт дег1акхувлача а г1алг1ай культура йоаржаеча а цу кхаь 1илманхочун кхы а дукха проекташ йольга. Масала аьлча, цар таржам а деш г1алг1ай меттала даьхад цхьаццадола мультфильмаш. Х1аьта укх номера т1а цар д1айолаяь уж г1алг1ай метта урокаш вай къаманна ч1оаг1а пайда баргболаш дола а тахан эттача хьале вайна ч1оаг1а эшаш дола а х1ама да.
Оформлени 1алаьмате хоза йолаш да журнал. Лоацца аьлча, тахан «глянцевый» оалача журналех ца1 да из, цхьабакъда, Россе арадувлача глянцеви журналаш т1а санна даьсса хабараши артистий (политикий, олигархий) вахарах дола йоахараши дац цу т1а. Лакхе ма аллара, бахача наха ч1оаг1а пайдане хургдола х1амаш да.
Из журнал арадаьккхараш ба Евлоева Изабеллаи Арчакова Фатимаи. Сога хаьттача, 1алаьмате доккха г1улакх да цар в1ашт1ехьдаьннар.
Дала ше аьттув боаккхалба цар шоаш д1адоладаь из пайдане г1улакх д1ачакхдаккха.
НОАКАСТХОЙ Хаваж
Общенациональная газета Республики Ингушетия "Сердало", № 151-152 (11085-086), вторник, 29 октября 2013 год
http://gazeta-serdalo.ru/