11 Ноября. Служба иконѣ Божіей Матери Иверской-Мѵроточивой (2009)
«Дне́сь Хра́мъ Сло́ва Бо́жія въ хра́мъ на́шъ пріи́де, и мы́, трепе́щуще благоговѣ́ніемъ, святу́ю ико́ну Твою́, Богоро́дице, лобыза́емъ. О́чи же на́ша съ наде́ждою въ нея́ вперя́емъ и сле́зъ Твои́хъ благоуха́ніемъ умиле́нніи благодари́мъ Тя́, Ма́ти на́ша Всеблага́я. - Отъ святы́я ико́ны Твоея́, о Влады́чице Богоро́дице, мѵ́ро благода́тное источи́ла еси́ оби́льно, вѣ́рныя Твоя́ во изгна́ніи су́щія утѣ́шила еси́, и невѣ́рныя свѣ́томъ Сы́на Твоего́ просвѣти́ла еси́. Тѣ́мже и припа́даемъ къ Тебѣ́, Богоро́дице, со слеза́ми: ми́лостива на́мъ бу́ди въ ча́съ су́дный, да не ка́ко толи́кую ми́лость Твою́ воспрія́вше, я́ко презо́рливи нака́зани бу́демъ, но пода́ждь на́мъ Твои́ми моли́твами пло́дъ духо́вный принести́ и спаси́ ду́ши на́ша. - О, Влады́чице Богоро́дице, Свѣ́тъ мі́ру, Христа́, несказа́нно ро́ждшая, въ ли́къ пра́зднственный ны́нѣ соше́дшеся, ико́нѣ Твое́й покланя́емся, е́юже зе́млю на́шу многострада́льную благоволи́ла еси́ по вели́цѣй Твое́й ми́лости посѣти́ти. И со слеза́ми Тебѣ́ мо́лимся, Пречи́стая: ересе́й воста́нія разори́ и искорени́, Це́рковь Правосла́вную моли́твами Твои́ми утверди́, цѣлому́дріе всѣ́мъ пода́ждь и спаси́ ду́ши на́ша. - Време́нъ послѣ́днихъ покая́нія проповѣ́дницу зри́мъ ико́ну Твою́ мѵроточи́вую, о на́съ бо Ма́терски сле́зы источа́еши и Христа́ Бо́га те́плѣ умоля́еши: прости́, Бо́же Мо́й и Сы́не Мо́й возлю́бленный, по вели́цѣй ми́лости Твое́й прегрѣше́нія всѣ́хъ, съ вѣ́рою и любо́вію почита́ющихъ Мя́, и спаси́ и́хъ въ де́нь су́дный...» (СПб., 2009.) далѣе...