28 Августа (10 Сентября). Служба преп. Саввѣ Крыпецкому (1822)
«Все́ свое́ душе́вное жела́ніе те́плѣ отъ ю́ности своея́ возне́съ ко Го́споду, ду́шу съ тѣ́ломъ посто́мъ очи́стилъ еси́, Бо́жія же ра́зума вода́ми напая́емь, пло́дъ благоуха́ненъ яви́лся еси́ житіе́мъ свои́мъ, о́тче Са́вво преподо́бне. А́ще и человѣ́къ естество́мъ бы́лъ еси́, но а́нгельски на земли́ пожи́лъ еси́, стра́хъ Бо́жій возлюби́въ и за́повѣдемъ Его́ при́сно поуча́яся, всѣ́мъ же ти́хъ и утѣ́шителенъ словесы́ показа́лся еси́, ми́лостивъ же и кро́токъ бы́лъ еси́ и ны́нѣ са́мъ бла́гости вѣ́чныя отъ Го́спода своего́ сподо́бился еси́, Ему́же прилѣ́жно моли́ся дарова́ти душа́мъ на́шимъ ми́ръ и ве́лію ми́лость. - Богому́дре Са́вво, о́тче преподо́бне, пра́выми свои́ми стопа́ми тече́ніе до́блественно къ воздержа́нію просте́рлъ еси́ и, мі́ра оша́явся, въ пусты́ню дости́глъ еси́ ра́достно, идѣ́же пе́рвѣе са́мъ въ себѣ́ Ду́ха Бо́жія водвори́лъ еси́, та́же храмъ изъ пусты́ни Бо́гу воздви́глъ еси́, къ нему́же и и́нокъ мно́жество собра́лъ еси́, съ ни́миже а́нгельски на земли́ пожи́въ и добродѣ́тельми си́хъ просвѣти́въ, возве́лъ еси́, идѣ́же свѣ́тъ невече́рній, идѣ́же а́нгельское предстоя́ніе, съ ни́миже прилѣ́жно моли́ Христа́ Бо́га дарова́ти душа́мъ на́шимъ ми́ръ и ве́лію ми́лость. - Отъ земны́хъ къ небе́снымъ оби́телемъ, пресла́вне Са́вво о́тче, преше́лъ еси́ и та́мо святы́хъ че́сти сподо́бился еси́, съ ни́миже моли́ся спасти́ся душа́мъ на́шимъ. - Ны́нѣ собо́ръ и́ночествующихъ тебѣ́, Са́вво о́тче, предста́, заря́ми луче́й святы́ни твоея́, я́ко со́лнцемъ, свѣ́тло облиста́емь, прославля́етъ свѣ́тлость твоея́...» (М., 1822.) далѣе...