Мухьаммада Пайхамарага (Даьлера салот салам хилда хьона)
Даьла беркат хьоца хилда, Мухьаммад Пайхамар (Даьлера салот салам хилда хьона)! Геттара хала да хьона доаг1аш дола дешаш хьалаха.
Хьоцара безама, хьона доаг1а баркал, хьа дикал кхайкхаде вахар то1аргдац...
Даьла наькъа т1ехьа сабар гучадаккхара, хьай умматаца боарам боаца безам гучабаккхара, массадолча адамашта дикаг1дола масал гойтара Аллах1агара эггара доккхаг1дола хайра хьайна доаг1аш ва хьо, Мухьаммад, (Даьлера салот салам хилда хьона).
Ма ч1оаг1а сахьовз, ма ч1оаг1а г1айг1ане делх дог, хьо тхоца ца хиларах...
Хьахетараг1, тха сагото Билала сахьувзарца йистача в1ала йоацаш санна хете а, х1аьта Аллах1а ло1амца бусалба наьха дегашка хьо везар а, хьоцара къастара а сагото еш хилар чудессад.
Хьога г1олла доссадаьча Китабагахь, ийманагахь, тха синош т1адерзадеш, иразах чам бовзийташ да хьа вахар!
Ца1 волча Аллах1а ба хоастам!
Баьсса, шийла, сатем боацаш ба-кх е лаьттан букъ, хьа г1а баккхар цу т1а доацаш.
Хьай уммат ахк ца дахара никъ хьехаш, тха синош к1алхарадара Къур1ан а Суннат дитад 1а тхона!
Даьи-наьнеи й1овхал йоацаш диса бой санна да тхо, тха лерх1аме Мухьаммад-Пайхмар (Даьлера салот салам хилда хьона).
Тха хьамсара, сийдола Даьла Элча! Мухьаммад-Мустафа! (Даьлера салот салам хилда хьона).
Хьа Везача Аллах1аца, Цун Къахьетамца дог тешаш, хьоца в1ашаг1кхетара сатувсаш да тхо.
Укх дунен т1а тхона эггара гаргаг1дола ираз да, хьо д1авелла воалача зерате на1арашка юххе даха-дахка йиш хилар.
Мухьаммад, Мухьаммад (Даьлера салот салам хилда хьона). Ма ч1оаг1а хоза, йоаккхача хана, метта мерза я из хьа ц1и. Из кердайоахаш
хилча цхьан оаг1орахь дог г1оз доалаш, вокха оаг1орахь дог ч1ехкаш хьал хул тхога.
Хьоцара тхоай юкъ хьадагъехача дега хала хет, бакъда г1оздоал из хьоца в1ашаг1кхетар хургхилара сатувсаш.
Г1анахьа, б1арга ног1ар тохача юкъа мукъаг1а хьа сийрда лир, хьа к1аьда б1арахьажар, хьа хоза велакъежар зе йиш хилча, цхьаккха боарамца дист йиш йоаца рузкъа а ни1маташ а сай кара кхаьчача санна хетаргдар сона.
Геттара ч1оаг1а сатувс аз, айса хьона доаха салоташ хьога д1акхачара.
Къинт1ера вала тхона, хьона хетача тайпара, хьай къахьегамга хьежжа тхоай дег1а духьал овтта тха в1ашт1ехьа ца далараг1.
Тхо дерригаш в1аший гулделча а, 1а тхога хьакхачийтача нурах хьона доаг1а баркал ала, аьттув баргбацар тха.
Кхоллархочун ло1амца 1айха мел даьр т1ехдика даьд 1а! Хьо ва ХьабибуЛлах1- Далла везашвар, тха умматан са да хьо (Даьлера салот салам хилда хьона)!
Оаха фу де йиш яр хьона?
Хьахетараг1, хьа эггара ч1оаг1аг1а дог г1оздаргдар, хьа уммат цхьоаг1о йолаш, ц1ена дош долаш, массаза ший куцагахь а дукхленгахьа а лакхлуш хилча.
Г1айгане хет, бакъда таханарча дийнахьа хьа уммата юкъе дукха питамаш, къовсамаш декъадалар даьржад. Х1аьта х1аравар сатувсаш ва, ше Аллах1а нийсача наькъа т1ехьа ваккхара, иштта х1арачун дукхабез 1а лелабаь никъ.
Хьа асхьабаш сона дагабехача, Аллах1 раьза хилва царна, уйла ю аз, хьо хьахаза, хьогара 1илма 1омаде, хьона ламаза хий кийчде цар таро хинналга
Йа Аллах1, цу тайпа х1ама аз дича…!
Хоастам ба-кх шедолча х1аман т1ехь Низкхоачашволчоа! Дунен а 1аьхартен а къахьетам бола Мухьаммад Пайхамар (саллаллоах1у 1алейх1и вас-саллам) вайтачоа!
Ма ч1оаг1а хам бу аз Хьона са Даьла, Хьайх тешар сона далара! Ялсмален хозаг1дола ни1маташ далахь Мухьаммад-Пайхамара (1алайх1ис-салату вас-саллам).
Йа Роахьман-Къахетаме вар, Хьайна везачоа юхе хилар совг1ат делахь тхона!
Тха лерх1аме, хьамсара Даьла Элча (саллаллоах1у 1алайхьи вас-саллам)! Хье вахача хана укх лаьттан нур долаш ваьхав хьо, х1аьта х1анз тха дегашкар сердал да хьо!
Хьоцарча г1айг1ано, деноши бийсаши къоаста долийтац, геттара й1аьха хет хьо тхона юкъе воацаш яккха езаш йола ха!
Хьа дега тарра тха дог деттадалийта безам болаш, хьа уйлашта, хьа вахара ларашта г1олла д1адаха чам ба тха, Йа Мухьаммад Мустафа (саллаллоах1у 1алайхьи вас-саллам)!
Дуне хьалдиз йишъя укх тайпара яздеча дуккхача дешашца, цхьабакъда, хьона доаг1ар язде в1ашт1ехьдаргдац цхьан сага. Ер дуне а сага синош а сел къе миска да!
Тхона ч1оаг1а веза хьо, тха эггара дикаг1вола, эггара лерх1амег1вола, эггара камаьршаг1вола, эггара къахьетамех вола Даьла Элча - Мухьаммад (1алайх1ис-салату вас-саллам)!