ДикагIбола кхача - хьаьнал бар
Кхы цIенах хила йиш йоацаш дин да, Ислам. Цунца дIаводаш вола саг кегалургвац.
Сий долча АллахIа Къурана чухьи, вай Мухьамад Пайхьмара (саллаллахIу IалайхIи ва ссаллам) хьадисашкахьи дин дакъа чулоацаш да, сага ший дегIаца беш бола тIом а, ший во оамалаш IотеIаеш, дингахьа ца эшаш долча хIаманна гаьна воалаш; ший дегIага, оамалашка, гIулакхашка хьожаш хилар а.
Бусулба саг ший дег чура чIоагIа хила веза, цунна декхар а из. Саг тешаш хила веза АллахIа хьарам мел даь хIама сага пайда бахьаш доацалга. Бакъда, АллахIа лелабе аьнна амар а даь, тIабилла никъ лелабеш волча сага, вай дийца даргдоацаш бола маьл кхоачаргба, - ялсмаленца совгIат хургда цунна. Ишта, вай мел леладеш дола гIулакхаш, вай вахарца дувзаденна а долаш, вахаргахьа а Iаьхартенгахьа а лир дуташ да.
Вай буаш бола кхача цIийца дIаув, дега тIа соц, из бахьан долаш эцаш болча кхачан оамал беш хила веза саг. Масала: воашош хIама эцаш хилча вай декхар да, сурсата (продукты питания) ха чакхъяьннайий хьажа а, цул совгIа, из кхача мишта хьакийчбаьб, фу дIайитта кийч баь ба, хьажа веза бусулба саг. Из оамал Iомае еза вай. Цун теркам чIоагIбе беза. Мел дукха тайп-тапара вай буаш болча кхачах хIамаш дIаетта, хой вайна из? Пищевой добавкаш оал царех, царна юкъе яа хьарам йолаш дукха хIамаш я. Уж бахьан долаш хьахул во мел дола лазараш, тахан уж мелла дукха даьржа да, вайна дувца ца дезаш ховш ма дий.
Хьаляль я яхаш каьхаташ тIатеIадеш нах Iехабеш оапаш бувцаш моттигаш а нийслу шортта. Шоашта ца хар дале а, е ха безам ца хилар бахьан долаш дале а хила тарлу из. Цу гIулакха жоп шоаша лургда цар. Бакъда, вай дIаала декхар да. Вай дIааларца адам хьалха доаккха цу балийха.
Халяль Сертификат доацаш из болх хьабе а, е нахага майрра кхача халяль ба яха йиш йолаш вац бусулба саг, тешам тIехьа из ца хуле.
Дала йоах сийддолча къурана чухь, «Дааргахь хьарам да АллахIа цIи а ца йоккхаш урс хьекхача хьайбай дулх. Къеденнача хьайбай дулхи, цIии даа хьарам да». Хьайба урс хьакхача цIийцара лазар хьатIадоакхаш дола хIамаш хьалхьов. Из дулх даар кхераме да. Хоададе дезаш дола пхьанаш лерттIа хьахоададича хьайбай дегIацара деррига цIий дIакъаст. ТIаккха урс хьакха хьайба даа мегаш да.
Хьайба урс хьакхалехьа цун буабаь кхача, йол цIен хилал еза, молхаш йитта хила йиш йолаш бац из кхача. Нагахьа санна хьайба буабеш бола кхача цIенабар хуле из дулх диа саг лазар хиларах гаьн воалаш ва, ший сина а, дегIа а пайда бахьаш да из.
Дала иман, лолда вайна доаггIача тайпара из гIулакх леладе.
Iарчакхнаькъан Лидия
http://radio-angusht.ru/