Из Повести временных лет, о убиении Бориса и Глеба
Из Повести временных лет, о убиении Бориса и Глеба
(По смерти князя Владимира) Святополк же седе Кыеве по отци своем, и созва кыяны, и нача даяти им именье. Они же приимаху, и не бе сердце их с ним, яко братья их беша с Борисом. Борису же возвратившюся с вои, не обретшю печенег, весть приде к нему: "Отец ти умерл". И плакася по отци велми, любим бо бе отцем своим паче всех, и ста на Лете пришед. Реша же ему дружина отня: "Се дружина у тобе отьня и вои. Поиди, сяди Кыеве на столе отни". Он же рече: "Не буди мне возняти рукы на брата своего старейшаго: аще и отець ми умре, то сь (сей) ми буди въ отца место". И се слышавше, вои разидошася от него. Борис же стояше со отрокы своими. Святополк же, исполнився беззаконья, Каинов смысл приим, посылая к Борису, глаголаше, яко "С тобою хочу любовь имети, и к отню придам ти"; а льстя под ним, како бы и` погубити. Святополк же прииде ночью Вышегороду, отай призва Путшю и вышегородские болярьце, и рече им: "Прияете ли ми всем сердцем?" Рече же Путьша с вышегородьци: "Можем главы своя сложити за тя". Он же рече им: "Не поведуче никомуже, шедше, убийте брата моего Бориса". Они же вскоре обещашася ему се створити. О сяковых бо Соломон рече: "Скори суть пролити кровь┘ без правды. Ти бо обещаются крови, сбирают собе злая. Сих путие суть скончавающих беззаконие, нечестием бо свою душу емлют". Послании же придоша на Лето ночью, и подступиша ближе, и слышаша блаженнаго Бориса поюща заутреню: бе бо ему весть уже, яко хотят погубити и`. И, встав, нача пети, глаголя: "Господи! Что ся умножиша стужающии мне. Мнози востают на мя"; и паки: "Яко стрелы твоя унзоша во мне, яко аз на раны готов, и болезнь моя предо мною есть"; и паки: "Господи! Услыши молитву мою, и не вниди в суд с рабом твоим, яко не оправдится пред тобою всяк живый, яко погна враг душу мою". И кончав ексапсалма (гексапсалма - шестопсалмие), увидев, яко послани суть губить его, нача пети псалтырю, глаголя, яко "Обыдоша мя унци тучни┘ И собор злобивых оседе мя. Господи, Боже мой, на тя уповах, и спаси мя, и от всех гонящих мя избави мя". Посем же нача канун пети. Таче, кончав заутреню, помолися, глаголя, зря на икону, на образ Владычен, глаголя сице: "Господи Иисусе Христе! Иже сим образом явися на земли спасенья ради нашего, изволив своею волею пригвоздити на кресте руце свои, и приим страсть грех ради наших, тако и мене сподоби прияти страсть. Се же не от противных приимаю, но от брата своего, и не сотвори ему, Господи, в сем греха". И помолившуся ему, возлеже на одре своем. И се нападоша аки зверие дивии около шатра, и насунуша и` копьи, и прободоша Бориса, и слугу его, падша на нем, прободоша с ним. Бе бо сей любим Борисом. Бяше отрок сь родом сын угорск, именем Георги, его же любляше повелику Борис; бе бо возложил на нь гривну злату велику, в ней же предстояше пред ним. Избиша же и ины отроки Борисовы многи. Георгиеви же сему не могуще вборзе сняти гривны с шие, усекнуша главу его, и тако сняша гривну, а главу отвергоша прочь; темже послеже не обретоша тела сего в трупии. Бориса же убивше, оканьнии, увертевше в шатер, возложивше на кола (колеса), повезоша и`, и еще дышущу ему. Уведев же се, оканьний Святополк яко еще дышет, посла два варяга прикончат его. Онема же
пришедшема и видевшема, яко и еще жив есть, един ею` извлек мечь, проньзе и` к сердцу. И тако скончася блаженный Борис, венец приим от Христа Бога с праведными, причется с пророки и апостолы, с лики мученическими водваряяся, Аврааму на лоне почивая, видя неизреченную радость, воспевая с ангелы и веселяся с лики святых. И положиша тело его, принесше отай Вышегороду, у церкве святаго Василия. Оканьнии же си убийце придоша к Святополку, аки хвалу имуще, безаконьници. Суть же имена сим законопреступником: Путьша, и Талец, Еловит, Ляшько, отец же их сотона. Сици бо слуги беси бывают, беси бо на злое посылаеми бывают, ангели на благое посылаеми. Ангели бо человеку зла не творят, но благое мыслят ему всегда, паче же христианом помагают и заступают от супротивнаго дьявола; а беси на злое всегда ловят, завидяще ему, понеже видят человека Богом почтена, и завидяще ему, на зло слеми (посылаемы) скори суть. Зло бо человек, тщася на злое не хущи есть беса; беси бо Бога боятся, а зол человек ни Бога боится, ни человек ся стыдит; беси бо Креста ся боять Господня, а человек зол ни Креста ся боит.
Святополк же оканьний помысли в собе, рек: "Се убих Бориса; како бы убити Глеба?" И приим помысл Каинов, с лестью посла к Глебу, глаголя сице: "Поиди вборзе, отец тя зовет, не здравит бо вельми". Глеб же, вборзе всед на коне, с малою дружиною поиде, бе бо послушлив отцу. И придедшу ему на Волгу, на поли потчеся конь во рве, и наломи ему ногу мало. И прииде Смоленьску, и поиде от Смоленьска, яко зреемо, и ста на Смядине в насаде. В се же время пришла бе весть к Ярославу от Передславы о отни смерти, и посла Ярослав к Глебу, глаголя: "Не ходи, отец ти умерл, а брат ти убьен от Святополка". Се слышав, Глеб возопи велми со слезами, плачася по отци, паче же по брате, и нача молитися со слезами, глаголя: "Увы мне, Господи! Луче бы ми умрети с братом, нежели жити на свете сем. Аще бо бых, брате мой, видел лице твое ангельское, умерл бых с тобою: ныне что ради остах аз един? Кде суть словеса твоя, яже глагола ко мне, брате мой любимый? Ныне уже не услышу тихаго твоего наказанья. Да аще еси получил дерзновенье у Бога, молися о мне, да и аз бых ту же страсть приял. Луче бы ми было с тобою умрети, неже в свете сем прелестнем жити". И сице ему молящуся со слезами, се внезапу придоша послании от Святополка на погубленье Глебу. И ту абие послании яша корабль Глебов и обнажиша оружие. Отроцы Глебови уныша. Оканьний же посланый Горясер повеле вборзе зарезати Глеба. Повар же Глебов, именем Торчин, вынез нож, зареза Глеба, яки агня непорочно. Принесеся на жертву Богови, в воню благоухания, жертва словесная, и прия венец, вшед в небесныя обители, и узре желаемого брата своего, и радовашеся с ним неизреченною радостью, юже улучиста братолюбием своим. "Се коль добро, и коль красно еже жити братома вкупе!" Оканьнии же возвратишася вспять, якоже рече Давид: "Да возвратятся грешницы во ад". Онем же пришедшим, и поведаша Святополку, яко "Сотворихом повеленная тобою". Он же, се слышав, вознесеся сердце его болма, не ведый Давида глаголюща: "Что ся хвалиши о злобе, сильный, Беззаконие весь день; умысли язык твой". Глебу же убиену бывшу и повержену на брезе межи двема колодама, посем же вземше везоша и`, и положиша и` у брата своего Бориса у церкве святаго Василия.
И совкуплена телома, паче же душама, у Владыки Всецаря пребывающа в радости бесконечней, во свете неизреченнем, подающа целебныя дары Русьстей земли, и инем приходящим страным в верою дается исцеление: хромым ходити, слепым прозрение, болящим цельбы, окованным разрешение, темницам отверзение, печальным утеху, напастным избавление. И еста заступника Русьстей земли, и светилника сияюща и молящася воину ко Владыце о своих людех. Темже и мы должни есмы хвалити достойно страстотерпца Христова (двойственный падеж здесь и далее), молящася прилежно к нима, рекуще: "Радуйтася, страстотерпца Христова, заступника Русьстей земля, яже исцеление подаета приходящим к вама верою и любовию. Радуйтася, небесная жителя, во плоти ангела быста, единомысленая служителя, верста единообразна, святым единодушна; тем страждущим всем исцеление подаета. Радуйтася, Борисе и Глебе богомудрая, яко потока точита от кладязя воды живоносныя исцеления, истекают верным людем на исцеление. Радуйтася, лукаваго змия поправша, луча светозарна явистася, яко светиле озаряюща всю Русьскую, всегда тму отгоняща, являющася верою неуклонною. Радуйтася, недреманное око стяжавша, душа на свершение Божиих святых заповедей приимша в сердци своем, блаженная. Радуйтася, брата, вкупе в местех златозарных, в селех небесных, в славе неувядающей, ея же по достоянию сподобистася. Радуйтася, Божиими светлостьми яве облистаема, всего мира обиходита, бесы отгоняюща, недуги исцеляюща, светилника предобрая, заступника теплая, суща с Богом, божественными лучами разжизаема воину, добляя страстьника, душа просвещающа верным людем. Возвысила бо есть ваю светоносная любы небесная; тем красных всех наследоваста в небеснем житии, славу, и райскую пищу, и свет разумный, красныя радости. Радуйтася, яко вся напаяюща сердца, горести и болезни отгоняюща, страсти злыя исцеляюща, каплями кровными, святыми очервивша багряницу, славная, ту же красно носяща со Христом царствуетя всегда, молящася за новыя люди христианския и сродники своя. Земля бо Руска благословися ваю кровию, и мощьми лежаща в церкви Духом Божественне просвещаета, в ней же с мученики яко мученика за люди своя молитася. Радуйтася, светлеи звезде, заутра восходящии. Но христолюбивая страстотерпца и заступника наша! Покорита поганыя под нози князем нашим, молящася ко Владыце Богу нашему мирно пребывати в совокуплении и в здравии, избавляюща от усобныя рати и от пронырьства диаволя, сподобита же и нас, поющих и почитающих ваю честное торжество,
во вся веки до скончания".