калі грэшнікі спяць

[pk_magister]

калі грэшнікі спяць,
нехта ж павінен заняць
іхняе месца

можа памёрлыя
труцца адзін аб аднаго
трухлявымі сцёгнамі,
енчаць ды вохаюць
узбуджаюцца, разумеючы,
што мала хто
рабіў гэта ў труне

можа ненароджаныя
ва ўлонне маці
захлынаюцца мацюкамі
ды лупяць кулачкамі
знутры па жываце
ў чаканні
свайго нараджэння

а можа
і самі праведнікі
ідуць у бар,
каб нажрацца ўдрызг,
пабіцца з ахоўнікамі,
памацаць дзеўку ў прыбіральні

толькі, як вядома,
трохмесны столік
з таблічкай
"reserved for righteous"
яшчэ ніхто
не займаў

таму, калі грэшнікі засынаюць,
лёгкая ўсмешка кранаецца
іх вуснаў,
і ўсё засынае
разам з імі