Dünya köhnə dünyadır
Click to viewDünya köhnə dünyadır,
Sevgiləri təzədir.
Görüşə gedəni var,
Görüşdən gələni var.
Kövrəlib ağlayanı,
Ürəkdən güləni var.
Son bahar yarpaqları
Saralmış xatirədir.
Dünyaya sevgi gəlir,
Dünyadan sevgi gedir.
Dağlarda qar əridi,
Qışdan üzü yazadır.
Hər eşqin özü qalır,
Hər sevginin öz dadı.
Dünya köhnə dünyadır,
Gülüşləri təzədir.
Çəmənlərə şeh düşür,
Sırğa taxır çiçəklər.
Çiçəkləri gülənlər
Çəməndən dərəcəklər.
Hər ürək çiçək kimi
Məhəbbətlə açılır.
Ömrümüzə bir eşqin
Son ünvanı yazılır.
Hər çiçəyin ünvanı
Bir gülüzlü qızadır.
Fikirli-qəmli gördü,
Qızı o güllər qınadı.
Dünya köhnə dünyadır,
Çiçəkləri təzədir.
Göylər baxıb göllərə
Hər səhər güzgülənir.
Hər axşam ulduzlardan
Yeni sevgi ələnir.
Ulduzların bizimlə
Sirli bir söhbəti var.
Sevənlərin köksündə
Dəniz məhəbbəti var.
Yenə də ömrümüzü
Gül-çiçəklər bəzədi
Xatirələr dil açdı
Sevgi nəğməsi dedi.
Dünya köhnə dünyadır,
Sevgiləri təzədir.