Тропарь праздника Богоявленія
гласъ 1
Во Іорданѣ крещающуся Тебѣ, Господи, Тройческое явися поклоненіе: Родителевъ бо гласъ свидѣтельствоваше Тебе, возлюбленнаго Тя Сына именуя, и Духъ въ видѣ голубине извѣствоваше словесе утвержденіе. Явлейся Христе Боже и міръ просвѣщей, слава Тебѣ.
Кондакъ праздника Богоявленія
гласъ 4
Явился еси днесь вселенней, и свѣтъ Твой, Господи, знаменася на насъ, въ разумѣ поющихъ Тя: пришелъ еси и явился еси, Свѣтъ Неприступный.
Величаніе праздника Богоявленія
Величаемъ Тя, Живодавче Христе, насъ ради нынѣ плотію крестившагося отъ Іоанна въ водахъ Іорданскихъ.