У нашага клуба новы сайт - fk-orsha.com
Цяпер клубны сайт працуе па новым адрасе - www.fk-orsha.com У ім працуюць разьдзелы "Галоўная", "Клуб", "Расклад і вынікі", "Медыя", "Гісторыя клуба". Напаўненьне пераважна расейскамоўнае, але ёсьць ужо і беларуская мова. Таксама ў параўнаньні з папярэднім сайтам значна палепшыўся выгляд старонкі. Футбалісты ва ўкладцы "Асноўны склад" сфатаграфаваныя на фоне сьцяга Воршы - лагічнае і прыгожае рашэньне! Зь мінусаў - нельга прачытаць пра кожнага гульца падрабязьней, гэтага б хацелася. Вельмі цікава аформлена ўкладка "Медыя" - арыгінальнае разьмяшчэньне фатаграфій, гэта прываблівае да сайту. Ёсьць спасылкі на афіцыйную суполку "Ўкантакце" і на канал на Ютубе. Ну, а "бомба" новай старонкі - фон!!! Цудоўная дэманстрацыя пераемнасьці пакаленьняў і наогул традыцый "Старта"! Наша каманда амаль увесь час свайго існаваньня ад 1951 года прадстаўляла завод "Легмаш", у 90-я гады нават насіла імя завода. За гэтую ідэю велізарны плюс таму, хто яе высунуў! У цэлым сайт нашмат лепшы ад папярэдняга. Мы як гістарычна-культурніцкі дзеньнік шанавальнікаў "Старта" спадзяёмся, што сайт будзе якасна напаўняцца і больш ня будзе зьнікаць. Гэта трэцяя спроба наладзіць працу клубнага сайту і няхай жа яна будзе канчатковай і самай пасьпяховай! У сваю чаргу будзем толькі радыя, калі на афіцыйным сайце будуць публікавацца нашыя матэрыялы па гісторыі клуба, фотаздымкі, нагадваньні пра важныя даты. Мы актыўна праводзім такую працу тут, у Livejournal, а таксама ў Твітэры і Тэлеграме. Падпісвайцеся, рэкамендуйце нам, дзе мы можам стаць лепш, узгадвайце мінулае клуба і распавядайце пра сёньняшні дзень ФКО. "Старт" - наша жыцьцё!
