Спадарожнік (Рэчыца) - Старт (Ворша). Анонс
Дата: 2.11.2019
Час: 15:00
Месца: Рэчыца, Цэнтральны стадыён
Зусім нядаўна Рэчыца была адной з тых чырвоных кропак на мапе краіны, якая згубіла свой клуб у чэмпіянатах краіны. "Ведрыч-97" спачатку пераназвалі ў "Рэчыцу-2014", што быццам намякала на вялікія праблемы каманды. Так яно і сталася, клуб, які ў свой час нядоўга зьяўляўся нават у Найвышэйшай лізе, у выніку зьнік. У Рэчыцы ў 2017 годзе стварылі новы клуб, узяўшы назву, пад якой рэчычане выступалі яшчэ некалькі дзясяткаў гадоў таму - "Спадарожнік". Чырвона-сінія колеры перасталі быць актуальнымі для рэчыцкага футболу, былі ўзятыя зялёна-белыя. Прычым новы клуб настолькі хутка ўварваўся ў беларускі футбол, што стаў прэтэндаваць на выхад у эліту. Летась "Спадарожнік" стаў 3-м у ІІ лізе, але дзякуючы аб'яднаньню магілёўскага "Дняпра" і менскага "Промня" ў адзін клуб магілёўцы ня трапілі ў І лігу. Вось так зьбегліся зоркі для каманды ў Поўдня краіны. Але й І ліга ня стала праблемай для "Спадарожніка", каманда яшчэ прэтэндуе на павышэньне ў класе, а вось аршанцы ўжо змагаюцца выключна за ўласны прэстыж.
Папярэднія матчы
І хоць "Спадарожнік" ня мае ніякага дачыненьня да "Ведрыча", створанага ў 1946 (усяго на год пазьней за наш "Старт") на базе мэблевага камбіната пад назвай "Чырвоная Зорка", мы ўсё ж прывядзем статыстыку супрацьстаяньняў зь "Ведрычам", а толькі потым адзіны матч згуляны дагэтуль са "Спадарожнікам". Верагодна, статыстыка з улікам старых часоў ня будзе поўнай, аднак уключым у яе тыя матчы, якія нам вядомыя. Упершыню ў афіцыйных матчах аршанцы і рэчычане сустрэліся яшчэ ў 1952-м. У групе Б чэмпіянату БССР наша каманда, якая называлася "Працай" двойчы перагуляла ў матчах 7 і 9 верасьня рэчыцкую "Чырвоную Зорку" 4:2 і 4:3. У 1970 годзе "Старт" і тады ўжо "Спадарожнік" сустрэліся зноў у групе Б. Вынік другога матчу пакуль не адноўлены, а вось у першым была нічыя 0:0. Такім чынам, у вядомых матчах чэмпіянатаў БССР 3 гульні, +2=1-0, 8-5 на карысьць аршанцаў.
Матчы зь "Ведрычам-97" у чэмпіянатах Беларусі
14.07.1997 Старт - Ведрыч-97 - 0:3
04.10.1997 Ведрыч-97 - Старт - 3:1
14.07.2004 Старт - Ведрыч-97 - 1:3 (Кубак Беларусі)
15.05.2005 Старт - Ведрыч-97 - 0:2
28.08.2005 Ведрыч-97 - Старт - 1:1
10.05.2015 Старт - Ведрыч-97 - 3:0
30.08.2015 Ведрыч-97 - Старт - 0:0
Баланс "Старт" (Ворша) - "Ведрыч-97" (Рэчыца): 7 матчаў, +1=2-4, 6-12
Матчы са "Спадарожнікам" у чэмпіянатах Беларусі
30.06.2019 Старт - Спадарожнік - 0:2
Баланс "Старт" (Ворша) - "Спадарожнік" (Рэчыца): 1 матч, +0=0-1, 0-2