Избранные псалмы.
Псалом 149.
Воспойте Господеви песнь нову; хваление Его в церкви преподобных.
Да возвеселится Израиль о Сотворшем eго, и сынове Сиони возрадуются о Царе своем.
Да восхвалят имя Его в лице, в тимпане и псалтири да поют Ему.
Яко благоволит Господь в людех Своих, и вознесет кроткия во спасение.
Восхвалятся преподобнии во славе и возрадуются на ложах своих.
Возношeния Божия в гортани их, и мечи oбоюду oстры в руках их;
Сотворити отмщение во языцех, обличeния в людех;
Связати цари их путы, и славныя их ручными оковы железными;
Сотворити в них суд написан. Слава сия будет всем преподобным Его.
Псалом 95.
Воспойте Господеви песнь нову, воспойте Господеви вся земля;
Воспойте Господеви, благословите имя Его;
Благовестите день от дне спасение Его.
Возвестите во языцех славу Его, во всех людех чудеса Его.
Яко велий Господь и хвален зело, страшен eсть над всеми боги.
Яко вси бози язык бесове; Господь же небеса сотвори.
Исповедание и красота пред Ним, святыня и великолепие во святиле Его.
Принесите Господеви, oтечeствия язык, принесите Господеви славу и честь.
Принесите Господеви славу имени Его; возмите жeртвы и входите во дворы Его.
Поклонитеся Господеви во дворе святем Его; да подвижится от лица Его вся земля.
Рцыте во языцех: яко Господь воцарися; ибо исправи вселенную, яже не подвижится;
Судит людем правостию. Да возвеселятся небеса, и радуется земля;
Да подвижится море и исполнение eго; возрадуются поля, и вся яже на них;
Тогда возрадуются вся древа дубравная от лица Господня,яко грядет судити земли;
Судити вселенней в правду, и людем истиною Своею.
Псалом 33.
Благословлю Господа на всякое время, выну хвала Его во устех моих.
О Господе похвалится душа моя; да услышат кротцыи и возвеселятся.
Возвеличите Господа со мною, и вознесем имя Его вкупе.
Взысках Господа, и услыша мя и от всех скорбей моих избави мя.
Приступите к Нему и просветитеся, и лица ваша не постыдятся.
Сей нищий воззва, и Господь услыша и, и от всех скорбей eго спасе и.
Ополчится ангел Господень окрест боящихся Его и избавит их.
Вкусите и видите, яко благ Господь; блажен муж, иже уповает нань.
Бойтеся Господа, вси святии Его, яко несть лишения боящымся Его.
Богатии обнищаша и взалкаша; взыскающии же Господа не лишатся всякаго блага.
Приидите, чада, послушайте менe, страху Господню научу вас.
Кто eсть человек хотяй живот, любяй дни видети благи?
Удержи язык твой от зла и устне твои, eже не глаголати льсти.
Уклонися от зла и сотвори благо; взыщи мира и пожени и.
Oчи Господни на праведныя, и уши Его в молитву их.
Лице же Господне на творящыя злая, eже потребити от земли память их.
Воззваша праведнии, и Господь услыша их и от всех скорбей их избави их.
Близ Господь сокрушенных сердцем, и смирeнныя духом спасет.
Многи скорби праведным, и от всех их избавит я Господь.
Хранит Господь вся кости их, ни eдина от них сокрушится.
Смерть грешников люта, и ненавидящии праведнаго прегрешат.
Избавит Господь душы раб своих, и не прегрешат вси уповающии на Него.
_