Սուրբ Պատարագի և կիսասարկավագների ձեռնադրման արարողություն Մաաստրիխտում
Կիրակի՝ 2024թ դեկտեմբեր 8-ը Մաաստրիխտի Սուրբ Կարապետ եկեղեցի այցելած մարդկանց հիշողության մեջ երկար կմնա: Հովվական առաքելությամբ կրկին Մաաստրիխտ էր այցելել Արևմտյան Եվրոպայի Հայրապետական Պատվիրակ Գերաշնորհ Տ. Խաժակ Արքեպիսկոպոս Պարսամյանը: Նրա իսկ հանդիսապետությամբ տեղի հոգևոր հովիվ Տ․ Աստվածատուր քահանա Սարգսյանի ձեռամբ մատուցվեց Սուրբ և Անմահ Պատարագ։ Մայր Աթոռ Սուրբ Էջմիածնից բերված նորօրհնեալ սուրբ Մյուռոնով կատարվեց ջրօրհնեքի կարգ։
Օրը յուրահատուկ էր Սուրբ Կարապետ եկեղեցու խորանի սպասավորներ՝ Հովհաննես և Նարեկ Կարապետյանների, Մուրադ Սարգսյանի համար: Պատարագի ավարտին Սրբազան Հայրը` Գերաշնորհ Տ. Խաժակ Արքեպիսկոպոս Պարսամյանը նրանց ձեռնադրեց կիսասարկավագներ։ Պատարագի ու կիսասարկավագների ձեռնադրման այս գեղեցիկ արարողությանը իր ներկայաությամբ պատվեց Նիդերլանդների Թագավորությունում Հայաստանի Հանրապետության արտակարգ և լիազոր դեսպան Ն.Գ. Վիկտոր Բիյագովը: Արարողակարգին ներկա էր Մաաստրիխտի Սուրբ Սերվատիուս Բազիլիկայի Դեկան Ջոն Դայուզենբերգը։
Տոնական օրվա ջերմ մթնոլորտը շարունակվեց Մաաստրիխտի Անի Հայ Համայնքի սրահում, որտեղ Տիկնանց միությունը կազմակերպել էր համեղ հյուրասիրություն։
Լևոն ՍԱՐԳԻՍ
(Նիդ.օրագրի համար)
