გალი , "კანალი"/ Гали , канал
1998 წ.
26 ივლისი .
ჟირ თუთა რე ჯარს ვორექინ , სერი რე სუმ საათი , ვა ბლურს . ჭუმან ჩქინ როტა კანალიშ ოთხილუშა მეურს , ჩქიმო პირველ მორიგეობა იუაფ , ხანო ჩხურ მაფ ამსერ , ხანო წყარო ვორექ გინორთელ . თისხე ღურაშა ვა მოშქურ , მუსხე ონჯღორეშა . გალ'შა მიტენა მა მარგალს აფხაზეთიშ მათხილარო .... მუ ბღოლ'უა სო ოკო იდე , ჩქიმ ოჯახობა თაქ პუნც , "მელე" ხოლო ჩქიმ საყოროფო ხალხი რე დოსქილადირ - ბრელ' ნათესებ დო ნაჩინებ ხალხ ნტებულ რენა დო მინ ოჩხოვლეს მინ სკოლაშ შენობას მითორენა .
ჭვენც მაზაკვალიშ , ქიანა ინწყუ , მარა მის უჩქ, ჩქინ კაზარმას, მუნერ ქარიატა იბუძოლ ჩქიმ დუდც დო მუ ალ'დაჩხირს ონტუ ჩქიმ გურს ?
27 ივლისი.
ჩქიმ მორიგეობაშ პირველ სერი რე . თეცალ' ამინდი რე - ტიბ ბორია , თუთარჩელ'ა ბარჩხალანც , მურიცხეფით გოჭკადილ' რე ცა . კანალიშ მოლენ მხარეს გევორექ , ავტომატ მიკინებ , თეშ ხვარება ჟირ თუთაშე ჯგირო მაფ დოგურაფილ . ღუმა თელ' სერს ვა ბლურდ დო ამსერ ვა მარულუაფ , მარა ღუმა ირფელს მაცანცალუდ დო ამდღა , თაქ , სქასქერს ხვალე ვორექ დო შურო , ითამ დო მუჭომს ბაღანობას "პახოდშა" ვორექ ულირინ თეშ გევორექ იარაღამო დო უჯინექ ღალიშ მელენ ფეშერებს , ბუჩქებც .
მის ბთხილანქ მა თაქ , მიშ ქიანას დო ხალხის , მუ მოკო თაქ ?
მუდგარენქ ქიდიხვარხვალ' მელენ მხარეს , ეგებას ბორია რე მანგარ ? ვარ , კინ იხვარხვალ.... ასე მიოტუ.... ვა მორთათ აშო ,რთხიინთ ჯიმალურო ,ჩქიმ მორიგეობას ვა მორთათ ! მიჩქ , მუჭომს გურს რჭუნა თქვან დინაფილ უდე დო ბინა , შურ გოლ'უნა ძირაფაშა , მარა.... ვა მორთათ , ღორონც გიფუჩუანთ , ვა მორთათ - გო'ოთანთ ტყვიას ! მიჩქ , მუჭო თი ტყვია ჩქიმ შურს დო გურს ქუმოხვადუ , მარა საშველ' ვა მიღუ ...
ვარ ჩიტ ოფე, თურმე , მიდაფურინ გვალაშა . გოთანა ი'უაფ დო ჩქიმ სმენა ითებუ .
29 ივლისი.
გალიშ მინალს გევორეთ , ვასინჯენთ მანქანებს . გალ'შა მეურსუნ პროპუსკ ოკო , გალარეფ ქორენა და , უბრალ'ოთ ვასინჯენთ მუთუნ ტყვია ვარდა იარაღ ვა მნუძუდან ჯიბეს დო ტომარებს . არძა მარგალეფ რენა ... მუდა წანა რე თესხე მარგალებ ართო ვა მიძირუნ დო თეზმა მარგალურ ვა მირჩქილუნ ... მარა პიჯ გოჭკადილ' მაფუ , ნინა კიბირს მიკოჭაბილ' . ქო რუსულ' სკოლას ბგურაფულენდ , მარა რუსულო ქობთქვენ , ხათე ეტყვებუ ჩქიმ მარგალურ აქცენტ , თენა მოკონო მა , ხასლას ჩქიმ როტაშ აფხაზეფ გერენა , უჩქუნა მუჭო მარგალ' ვორექინ ,მუ მიჩქ ირფილს ელ'და თენეფშე , ქეჩოულენა კამანდირს , მუჭოთ მა მარგალურო ურაგადუდ დო მუ გიჩქ მუ მაღოლე უკულ'
ონჯუა.
კაზარმას ვორეთ , ჩასტის, თურმე პატიოსან ბოშეფ ქიუეს ჩქიმ თანამსახურეფ აფხაზეფ , სმენაშ უკულ გუმოძიცანდეს , მუშენ ვა უპასუხია სი თი ბების მარგალუროვა , ჟირ წუთის მუნჯ ცალო გერდინ , სოიშახ მა ვა უწია ფასუხ ,- აფხაზაქ თქუ))) მუ მიჩქ , აფხაზეფიშ ჯარს ბსახურენქ , მარა დიო მითინს ვა უთქუალ' ჩქიმდა გლახა ნინათ "მარგალ' რექიავა".
31 ივლისი.
თენეფ , მუჟამს მიტენა სერით კანალშა , მუს ფიქრენა , მა ოჯახობა თაქ პუნც დო ვა უღალატენქ ეგებას თინაო ? მაჟია სერი რე სმენას ვორექინ . მუს მა ლანდგვა რე თე წყარ , დღაშით უჩა დო სერით ყვინთელ' , ჩქიმ ასეიან ცხოვრებას ვა გუნო ? - დინახალე მარგალ' ვორექ დო გალე აფხაზაშ ფორმა მიკმოქუნც.