Неделя 3 по Пятидесятнице, Сщмч. Мефодия, еп. Патарскаго. Глас 2 ВСЕНОЩНОЕ БДЕНИЕ. УТРЕНЯ.
3 ию́ля 2022 гóда. Недéля 3 по Пятидеся́тнице, Святáго священномýченика Мефóдiя, епúскопа Патáрскаго, úже Оригéнову éресь попалú. Глас 2. Всeнóщное бдéнiе для домáшнего (келéйнаго) совершéнiя. Слýжба мирскúм чúном.
УТРЕНЯ
Начáло зри здесь ( великая вечерня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнé моѝ отвéрзеши, и устá моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менé, нижé гнéвом Твои́м накáжеши менé. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицá гнéва Твоегó, несть ми́ра в костéх мои́х от лицá грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицá безýмiя моегó. Пострадáх и слякóхся до концá, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелá, рыкáх от воздыхáнiя сéрдца моегó. Гóсподи, пред Тобóю все желáнiе моé и воздыхáнiе моé от Тебé не утаи́ся. Сéрдце моé смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и́скреннiи моѝ пря́мо мне прибли́жишася и стáша, и бли́жнiи моѝ отдалéче менé стáша и нуждáхуся и́щущiи дýшу мою́, и и́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдá порáдуют ми ся вразѝ моѝ: и внегдá подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моé аз возвещý и попекýся о гресé моéм. Вразѝ же моѝ живýт и укрепи́шася пáче менé, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занé гоня́х благосты́ню. Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Псалом 62
Бóже, Бóже мой, к Тебé ýтренюю, возжадá Тебé душá моя́, коль мнóжицею Тебé плоть моя́, в земли́ пýсте и непрохóдне, и безвóдне. Тáко во святéм яви́хся Тебé, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнé мои́ похвали́те Тя. Тáко благословлю́ Тя в животé моéм, о и́мени Твоéм воздежý рýце моѝ. Я́ко от тýка и мáсти да испóлнится душá моя́, и устнáма рáдости восхвáлят Тя устá моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прия́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжия, чáсти ли́совом бýдут. Царь же возвесели́тся о Бóзе, похвáлится всяк клены́йся Им, я́ко загради́шася устá глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Псалом 87
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнию моемý, я́ко испóлнися зол душá моя́, и живóт мой аду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннии спя́щии во грóбе, и́хже не помянýл еси́ ктомý, и ти́и от руки́ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл еси́ на мя. Удáлил еси́ знáемых мои́х от менé, положи́ша мя мéрзость себé: прéдан бых и не исхождáх. Очи мои́ изнемогóсте от нищеты́, воззвáх к Тебé, Гóсподи, весь день, воздéх к Тебé рýце мои́. Едá мéртвыми твори́ши чудесá? Или́ врáчеве воскреся́т, и исповéдятся Тебé? Едá повéсть кто во грóбе ми́лость Твою́, и и́стину Твою́ в поги́бели? Едá познáна бýдут во тьме чудесá Твоя́, и прáвда Твоя́ в земли́ забвéнней? И аз к Тебé, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицé Твоé от менé? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твои́, устрашéния Твоя́ возмути́ша мя, обыдóша мя я́ко водá, весь день одержáша мя вкýпе. Удáлил еси́ от менé дрýга и и́скренняго, и знáемых моих от страстéй.
Гóсподи Бóже спасéния моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý.
Псалом 102
Благослови, душé моя, Гóспода, и вся внýтренняя моя имя святóе Егó. Благослови, душé моя, Гóспода, и не забывáй всех воздаянiй Егó, очищáющаго вся беззакóнiя твоя, исцеляющаго вся недýги твоя, избавляющаго от истлéнiя живóт твой, венчáющаго тя милостiю и щедрóтами, исполняющаго во благих желáнiе твоé: обнови́тся яко óрля юность твоя. Творя́й милостыни Госпóдь, и судьбý всем обидимым. Сказá пути Своя Моисéови, сыновóм Изрáилевым хотéния Своя: Щедр и Ми́лостив Госпóдь, Долготерпели́в и Многоми́лостив. Не до концá прогнéвается, нижé во век враждýет, не по беззакóнiем нáшим сотвори́л есть нам, нижé по грехóм нáшым воздáл есть нам. Яко по высотé небéсней от земли́, утверди́л есть Госпóдь ми́лость Свою́ на боя́щихся Егó. Ели́ко отстоя́т востóцы от зáпад, удáлил есть от нас беззакóния нáша. Якоже щéдрит отéц сы́ны, ущéдри Госпóдь боя́щихся Егó. Яко Той познá создáние нáше, помянý, я́ко персть есмы́. Человéк, яко травá дни́е eгó, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегó. Ми́лость же Госпóдня от вéка и до вéка на боя́щихся Егó, и прáвда Его на сынéх сынóв, храня́щих завéт Егó, и пóмнящих зáповеди Егó твори́ти я. Госпóдь на Небеси́ уготóва Престóл Свой, и Цáрство Егó всéми обладáет. Благослови́те Гóспода вси Ангели Егó, си́льнии крéпостию, творя́щии слóво Егó, услы́шати глас словéс Егó. Благослови́те Гóспода вся Си́лы Егó, слýги Егó, творя́щии вóлю Егó. Благослови́те Гóспода вся делá Егó, на вся́ком мéсте влады́чества Егó, благослови́, душé моя́, Гóспода.
На всяком мéсте влады́чества Егó, благослови́, душé моя, Гóспода.
Псалом 142
Гóсподи, услы́ши моли́тву мою́, внуши́ молéнíе моé во и́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнá враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И уны́ во мне дух мой, во мне смятéся сéрдце моé. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя, Гóсподи, исчезé дух мой, не отврати́ лицá Твоегó от менé, и уподóблюся низходя́щым в ров. Слы́шану сотвори́ мне заýтра ми́лость Твою́, я́ко на Тя уповáх. Скажи́ мне, Гóсподи, путь вóньже пойдý, я́ко к Тебé взях дýшу мою́. Изми́ мя от враг мои́х, Гóсподи, к Тебé прибегóх. Научи́ мя твори́ти вóлю Твою́, я́ко Ты еси́ Бог мой. Дух Твой Благíй настáвит мя на зéмлю прáву. Имене Твоегó рáди, Гóсподи, живи́ши мя, прáвдою Твоéю изведéши от печáли дýшу мою́. И ми́лостiю Твоéю потреби́ши враги́ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благи́й настáвит мя на зéмлю прáву.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 2
Чтец: Бог Госпóдь, и яви́ся нам, благословéн Гряды́й во Имя Госпóдне.
Чтец: Исповéдайтеся Гóсподеви, я́ко благ, я́ко в век ми́лость Егó.
Хор: Бог Госпóдь, и явúся нам, благословéн Гряды́й во Имя Госпóдне.
Чтец: Обышéдше обыдóша мя и и́менем Госпóдним противля́хся им.
Хор: Бог Госпóдь, и явúся нам, благословéн Гряды́й во Имя Госпóдне.
Чтец: Не умрý, но жив бýду и повéм делá Госпóдня.
Хор: Бог Госпóдь, и явúся нам, благословéн Гряды́й во Имя Госпóдне.
Чтец: Кáмень, Егóже небрегóша зи́ждущии, Сей бысть во главý ýгла, от Гóспода бысть Сей, и есть ди́вен во очесéх нáших.
Хор: Бог Госпóдь, и явúся нам, благословéн Гряды́й во Имя Госпóдне.
ТРОПАРИ
Тропáрь воскрéсный, глас 2: Егдá снизшéл еси́ к смéрти, Животé Безсмéртный,/ тогдá ад умертви́л еси́ блистáнiем Божествá./ Егдá же и умéршыя от преиспóдних воскреси́л еси́,/ вся Си́лы Небéсныя взывáху:// Жизнодáвче, Хрiстé Бóже наш, слáва Тебé.
Слáва Отцý и Сы́ну и Святóму Дýху.
Тропáрь Мефóдiя Патáрскаго, глас 1: Кровь твоя́, мýдре, тáйно вопiéт от земли́,/ я́коже Áвелева к Бóгу,/ Богомýдре святи́телю Мефóдiе,/ я́сно проповéдавый Бóжiе вочеловéченiе./ Тéмже и посрами́л еси́ Оригéнову лесть,/ и престáвился еси́ в Небéсный чертóг./ Моли́ Хрiстá Бóга,// да спасéт дýши нáша.
И ны́не и прúсно и во вéки векóв, амúнь.
Богорóдичен воскрéсный, глас 1: Гаврiи́лу, вещáвшу Тебé, Дéво, рáдуйся,/ со глáсом воплощáшеся всех Влады́ка,/ в Тебé, Святéм Кивóте,/ я́коже речé прáведный Дави́д;/ яви́лася еси́ ши́ршая небéс,/ поноси́вши Зижди́теля Твоегó./ Слáва Всéльшемуся в Тя,/ слáва Прошéдшему из Тебé,// слáва Свободи́вшему нас рождествóм Твои́м.
Гóсподи, помúлуй. (трúжды)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
КАФИЗМА ВТОРАЯ
И чтем кафíсму 2-ю ( или одúн псалóм, или до 1-й Слáвы)
[Псалом 9]Исповéмся Тебé, Гóсподи, всем сéрдцем мои́м, повéм вся чудесá Твоя́. Возвеселю́ся и возрáдуюся о Тебé, пою́ и́мени Твоемý, Вы́шнiй. Внегдá возврати́тися врагý моемý вспять, изнемóгут и поги́бнут от лицá Твоегó. Яко сотвори́л eси суд мой и прю мою́, сел eси́ на Престóле, судя́й прáвду. Запрети́л eсѝ язы́ком, и поги́бе нечести́вый, и́мя eгó потреби́л eсѝ в век и в век вéка. Врагу оскудéша oрýжiя в конéц, и грáды разруши́л eсѝ, поги́бе пáмять eгó с шýмом. И Госпóдь во век пребывáет, уготóва на суд Престóл Свой, и Той суди́ти и́мать вселéнней в прáвду, суди́ти и́мать лю́дем в правотé. И бысть Госпóдь прибе́жище убóгому, помóщник во благоврéменiих, в скóрбех. И да уповáют на Тя знáющiи и́мя Твоé, я́ко не остáвил eсѝ взыскáющих Тя, Гóсподи. Пóйте Гóсподеви, живýщему в Сиóне, возвести́те во язы́цех начинáнiя Егó, я́ко взыскáяй крóви их помянý, не забы́ звáнiя убóгих. Поми́луй мя, Гóсподи, виждь смирéнiе моé от враг мои́х, вознося́й мя от врат смéртных, Яко да возвещý вся хвалы́ Твоя́ во вратéх дщéре Сióни, возрáдуемся о спасéнiи Твоéм. Углебóша язы́цы в па́губе, ю́же сотвори́ша, в сéти сей, ю́же скры́ша, увязé ногá их. Знáемь eсть Госпóдь судьбы́ творя́й, в дéлех рукý своéю увязé грéшник. Да возвратя́тся грéшницы во ад, вси язы́цы забывáющiи Бóга. Яко не до концá забвéн бýдет ни́щiй, терпéнiе убóгих не поги́бнет до концá. Воскресни́, Гóсподи, да не крепи́тся человéк, да сýдятся язы́цы пред Тобóю. Постáви, Гóсподи, законоположи́теля над ни́ми, да разумéют язы́цы, я́ко человéцы суть. Вскýю, Гóсподи, отстоя́ далéче, презирáеши во благоврéменiих, в скóрбех? Внегдá горди́тися нечести́вому, возгарáется ни́щiй, увязáют в совéтех, я́же помышля́ют. Яко хвали́мь eсть грéшный в пóхотех души́ своея́, и оби́дяй благослови́мь eсть. Раздражи́ Гóспода грéшный, по мнóжеству гнéва своегó не взы́щет, несть Бóга пред ним. Оскверня́ются путié eгó на вся́ко врéмя, отъéмлются судьбы́ Твоя́ от лицá eгó, всéми враги́ свои́ми обладáет. Речé бо в сéрдце своéм, не подви́жуся от рóда в род без зла, eгóже кля́твы устá eгó пóлна суть, и гóрести и льсти, под язы́ком eгó труд и болéзнь. Приседи́т в лови́тельстве с богáтыми в тáйных, éже уби́ти непови́ннаго, óчи eгó на ни́щаго призирáете. Лови́т в тáйне я́ко лев во огрáде своéй, лови́т éже восхи́тити ни́щаго, восхи́тити ни́щаго, внегдá привлещи́ и́ в сéти своéй. Смири́т eгó, преклони́тся и падéт, внегдá eмý обладáти убóгими. Речé бо в сéрдце своéм: забы Бог, отвратѝ лицé Своé, да не ви́дит до концá. Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. Чесó рáди прогнéва нечести́вый Бóга? Речé бо в сéрдце своéм: не взы́щет. Ви́диши, я́ко Ты болéзнь и я́рость смотря́еши, да прéдан бýдет в рýце Твои́, Тебé остáвлен eсть ни́щiй, си́ру Ты бýди помóщник. Сокрушѝ мы́шцу грéшному и лукáвому, взы́щется грех eгó и не обря́щется. Госпóдь Царь во век и в век вéка, поги́бнете, язы́цы, от землѝ Егó. Желáнiе убóгих услы́шал eсѝ, Гóсподи, уготóванiю сéрдца их внят ýхо Твоé. Судѝ си́ру и смирéну, да не приложи́т ктомý величáтися человéк на землѝ.
[Псалом 10]На Гóспода уповáх, кáко речéте души́ моéй: превитáй по горáм, я́ко пти́ца? Яко се, грéшницы налякóша лук, уготóваша стрéлы в тýле, состреля́ти во мрáце прáвыя сéрдцем. Занé я́же Ты соверши́л eсѝ, oнѝ разруши́ша, прáведник же что сотвори́? Госпóдь во хрáме святéм Своéм. Госпóдь, на Небеси́ Престóл Егó, óчи Егó на нищаго призирáете, вéжди Егó испытáете сы́ны человéчeскiя. Госпóдь испытáет прáведнаго и нечести́ваго, любя́й же непрáвду ненави́дит свою́ дýшу. Одожди́т на грéшники сéти, oгнь и жýпел, и дух бýрен часть чáши их. Яко прáведен Госпóдь, и прáвды возлюби́, правоты́ ви́де лицé Егó.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 11]Спасѝ мя, Гóсподи, я́ко оскудé преподóбный, я́ко умáлишася и́стины от сынóв человéческих. Сýeтная глагóла кíйждо ко и́скреннему своемý, устнé льсти́выя в сéрдце, и в сéрдце глагóлаша злáя. Потреби́т Госпóдь вся устны́ льсти́выя, язы́к велерéчивый, рéкшыя: язы́к наш возвели́чим, устны́ нáша при нас суть, кто нам Госпóдь eсть? Стрáсти рáди ни́щих и воздыхáнiя убóгих ны́не воскреснý, глагóлет Госпóдь, положýся во спасéнiе, не обиню́ся о нем. Словесá Госпóдня словесá чи́ста, сребрó разжжéно, искушéно землѝ, очищéно седмери́цею. Ты, Гóсподи, сохрани́ши ны и соблюдéши ны от рóда сегó и во век. Óкрест нечести́вiи хóдят, по высотé Твоéй умнóжил eсѝ сы́ны человéчeскiя.
[Псалом 12]Докóле, Гóсподи, забýдеши мя до концá? Докóле отвращáеши лицé Твоé от менé? Докóле положý совéты в души́ моéй, болéзни в сéрдце моéм день и нощь? Докóле вознесéтся враг мой на мя? При́зри, услы́ши мя, Гóсподи Бóже мой, просветѝ óчи моѝ, да не когдá уснý в смерть, да не когдá речéт враг мой, укрепи́хся на негó. Стужáющiи ми возрáдуются, áще подви́жуся. Аз же на ми́лость Твою́ уповáх, возрáдуется сéрдце моé о спасéнiи Твоéм, воспою́ Гóсподеви благодéявшему мне и пою́ и́мени Гóспода Вы́шняго.
[Псалом 13]Речé безýмен в сéрдце своéм: несть Бог. Растлéша и омерзи́шася в начинáнiих, несть творя́й благосты́ню. Госпóдь с Небесé прини́че на сы́ны человéчeскiя, ви́дети, áще eсть разумевáяй илѝ взыскáяй Бóга. Вси уклони́шася, вкýпе неключи́ми бы́ша: несть творя́й благосты́ню, несть до eди́наго. Ни ли уразумéют вси дéлающiи беззакóнiе, снедáющiи лю́ди моя́ в снедь хлéба? Гóспода не призвáша. Тáмо убоя́шася стрáха, идéже не бе страх, я́ко Госпóдь в рóде прáведных. Совéт ни́щаго посрами́сте, Госпóдь же уповáнiе eгó eсть. Кто даст от Сióна спасéние Iзрáилево? Внегдá возврати́т Госпóдь пленéнiе людéй Свои́х, возрадуется Iáков, и возвесели́тся Iзрáиль.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 14]Гóсподи, кто обитáет в жили́щи Твоéм? Илѝ кто всели́тся во святýю гóру Твою́? Ходя́й непорóчен и дéлаяй прáвду, глагóляй и́стину в сéрдце своéм. Иже не ульстѝ язы́ком свои́м и не сотворѝ и́скреннему своемý зла, и поношéнiя не прiя́т на бли́жнiя своя́. Уничижéн eсть пред ним лукáвнуяй, боя́щыя же ся Гóспода слáвит, клены́йся и́скреннему своéму и не отметáяся. Сребрá своегó не дадé в ли́хву и мзды на непови́нных не прiя́т. Творя́й сiя́ не подви́жится во век.
[Псалом 15]Сохранѝ мя, Гóсподи, яко на Тя уповáх. Рех Гóсподеви: Госпóдь мой eсѝ Ты, яко благи́х мои́х не трéбуеши. Святы́м, и́же суть на землѝ Егó, удивѝ Госпóдь вся хотéнiя Своя́ в них. Умнóжишася нéмощи их, по сих ускори́ша: не соберý собóры их от кровéй, ни помянý же имéн их устнáма мои́ма. Госпóдь часть достоя́нiя моегó и чáши моея́, Ты eсѝ устроя́яй достоя́нiе моé мне. Ужя нападóша ми в держáвных мои́х, и́бо достоя́нiе моé держáвно eсть мне. Благословлю́ Гóспода, вразуми́вшаго мя, eщé же и до нóщи наказáша мя утрóбы моя́. Предзрéх Гóспода предо мнóю вы́ну, я́ко одеснýю менé eсть, да не подви́жуся. Сегó рáди возвесели́ся сéрдце моé, и возрáдовася язы́к мой, eщé же и плоть моя́ всели́тся на уповáнiи. Яко не остáвиши дýшу мою́ во áде, нижé дáси преподóбному Твоемý ви́дети истле́нiя. Сказáл ми eси́ пути́ животá, испóлниши мя весéлiя с лицéм Твои́м, красотá в десни́це Твоéй в конéц.
[Псалом 16]Услы́ши, Гóсподи, прáвду мою́, вонми́ молéнiю моемý, внуши́ моли́тву мою́ не во устнáх льсти́вых. От лицá Твоегó судьбá моя́ изы́дет, óчи мои́ да ви́дита правоты́. Искуси́л eси́ сéрдце моé, посети́л eси́ нóщiю, искуси́л мя eси́, и не обрéтеся во мне непрáвда. Яко да не возглагóлют устá моя́ дел человéческих, за словесá устéн Твои́х аз сохрани́х пути́ жéстоки. Соверши́ стопы́ моя́ во стезя́х Твои́х, да не подви́жутся стопы́ моя́. Аз воззвáх, яко услы́шал мя eси́, Бóже, приклони́ ýхо Твоé мне и услы́ши глагóлы моя́. Удиви́ ми́лости Твоя́, спасáяй уповáющыя на Тя от проти́вящихся десни́це Твоéй. Сохрани́ мя, Гóсподи, я́ко зéницу óка, в крóве крилý Твоéю покры́еши мя. От лицá нечести́вых острáстших мя, врази́ мои́ дýшу мою́ одержáша. Тук свой затвори́ша, устá их глагóлаша горды́ню. Изгоня́щiи мя ны́не обыдóша мя, óчи свои́ возложи́ша уклони́ти на зéмлю. Объя́ша мя я́ко лев готóв на лов и яко ски́мен обитáяй в тáйных. Воскресни́, Гóсподи, предвари́ я́ и запни́ им, избáви дýшу мою́ от нечести́ваго, орýжiе Твоé от враг руки́ Твоея́, Гóсподи, от мáлых от земли́, раздели́ я́ в животé их, и сокровéнных Твои́х испóлнися чрéво их, насы́тишася сынóв, и остáвиша остáнки младéнцeм свои́м. Аз же прáвдою явлю́ся лицý Твоемý, насы́щуся, внегдá яви́ти ми ся слáве Твоéй.
Чтец: Слáва Отцý и Сыну и Святóму Дýху, и ныне и присно и во вéки векóв, аминь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
СЕДАЛЬНЫ
Хор (по кафíсме седáльны воскрéсные, глас 2): Благообрáзный Ióсиф,/ с Дрéва снем Пречи́стое Тéло Твоé,/ плащани́цею чи́стою обви́в, и благоухáньми,/ во грóбе нóве, закры́в, положѝ,/ но триднéвен воскрéсл есѝ, Гóсподи,// подая́й мíрови вéлiю ми́лость.
Стих: Воскреснú Гóсподи Бóже мой, да вознесéтся рукá Твоя,/ не забýди убóгих Твоúх до концá.
Мvронóсицам женáм при грóбе предстáв Áнгел вопiя́ше:/ ми́ра мéртвым суть прили́чна,/ Хрiстóс же истлéнiя яви́ся чуждь./ Но возопíйте: воскрéсе Госпóдь,// подая́ мíрови вéлiю ми́лость.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Вся пáче смы́сла,/ вся преслáвная Твоя́, Богорóдице, тáинства,/ чистотé запечáтанной и дéвству храни́му,/ Мáти познáлася еси́ нелóжна,/ Бóга рóждши И҆́стиннаго;// Тогó моли́ спасти́ся душáм нáшим.
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ныне и присно и во вéки векóв. Аминь.
КАФИЗМА ТРЕТЬЯ
И чтем кафíсму 3-ю (или одúн псалóм, или до 1-й Слáвы)
[Псалом 17]Возлюблю́ Тя, Гóсподи, крéпосте моя́. Госпóдь утверждéнiе моé, и прибéжище моé, и Избáвитель Moй, Бог мой, Помóщник мой, и уповáю на Негó, Защи́титель мой, и рог спасéнiя моегó, и Застýпник мой. Хваля́ призовý Гóспода и от враг мои́х спасýся. Одержáша мя болéзни смéртныя, и потóцы беззакóнiя смятóша мя, болéзни áдовы обыдóша мя, предвари́ша мя сéти смéртныя. И внегдá скорбéти ми, призвáх Гóспода, и к Бóгу моемý воззвáх, услы́ша от хрáма Святáго Своегó глас мой, и вопль мой пред Ним вни́дет во ýши Егó. И подви́жеся, и трéпетна бысть земля́, и основáнiя гор смятóшася и подвигóшася, я́ко прогнéвася на ня Бог. Взы́де дым гнéвом Егó, и огнь от лицá Егó восплáменится, ýглiе возгорéся от Негó. И приклонѝ небесá, и сни́де, и мрак под ногáма Егó. И взы́де на Херувíмы, и летé, летé на крилý вéтреню. И положѝ тму закрóв Свой, óкрест Егó селéнiе Егó, темнá водá во óблацех воздýшных. От облистáнiя пред Ним óблацы проидóша, град и ýглiе óгненное. И возгремé с Небесé Госпóдь и Вы́шнiй дадé глас Свой. Низпослá стрéлы и разгнá я́, и мóлнiи умнóжи и смятé я́. И яви́шася истóчницы воднíи, и откры́шася основáнiя вселéнныя, от запрещéнiя Твоегó, Гóсподи, от дохновéнiя дýха гнéва Твоегó. Низпослá с высоты́, и прiя́т мя, воспрiя́т мя от вод мнóгих. Избáвит мя от врагóв мои́х си́льных и от ненави́дящих мя, я́ко утверди́шася пáче менé. Предвари́ша мя в день озлоблéнiя моегó, и бысть Госпóдь утвержéнiе моé. И изведé мя на широтý, избáвит мя, я́ко восхотé мя. И воздáст ми Госпóдь по прáвде моéй и по чистотé рукý моéю воздáст ми. Яко сохрани́х путѝ Госпóдни и не нечéствовах от Бóга моегó. Яко вся судьбы́ Егó предо мнóю и оправдáнiя Егó не отступи́ша от менé. И бýду непорóчен с Ним, и сохраню́ся от беззакóнiя моегó. И воздáст ми Госпóдь по прáвде моéй и по чистотé рукý моéю пред очи́ма Егó. С преподóбным преподóбен бýдеши, и с мýжем непови́нным непови́нен бýдеши, и со избрáнным избрáн бýдеши, и со стропти́вым разврати́шися. Яко Ты лю́ди смирéнныя спасéши и óчи гóрдых смири́ши. Яко Ты просвети́ши свети́льник мой, Гóсподи, Бóже мой, просвети́ши тму мою́. Яко Тобóю избáвлюся от искушéнiя и Бóгом мои́м прейдý стéну. Бог мой, непорóчен путь Егó, словесá Госпóдня разжжéна, Защи́титель есть всех уповáющих на Негó. Яко кто бог, рáзве Гóспода? или́ кто бог, рáзве Бóга нáшего? Бог препоясýяй мя си́лою, и положи́ непорóчен путь мой. Совершáяй нóзе моѝ, я́ко елéни, и на высóких поставля́яй мя. Научáяй рýце моѝ на брань, и положи́л есѝ лук мéдян мы́шца моя́. И дал ми есѝ защищéнiе спасéнiя, и десни́ца Твоя́ воспрiя́т мя, и наказáнiе Твоé испрáвит мя в конéц, и наказáнiе Твоé то мя научи́т. Ушири́л есѝ стопы́ моя́ подо мнóю, и не изнемогóсте плеснé моѝ. Поженý врагѝ моя́, и пости́гну я́, и не возвращýся, дóндеже скончáются. Оскорблю́ их, и не возмóгут стáти, падýт под ногáма мои́ма. И препоя́сал мя есѝ си́лою на брань, спял еси́ вся востаю́щыя на мя под мя. И врагóв мои́х дал ми есѝ хребéт, и ненави́дящыя мя потреби́л есѝ. Воззвáша, и не бе спасáяй: ко Гóсподу, и не услы́ша их. И истню́ я́ я́ко прах пред лицéм вéтра, я́ко брéнiе путéй поглáжду я́. Избáвиши мя от пререкáнiя людéй, постáвиши мя во главý язы́ков. Лю́дiе, и́хже не вéдех, рабóташа ми. В слух ýха послýшаша мя. Сы́нове чуждíи солгáша ми. Сы́нове чуждíи обетшáша и охромóша от стезь свои́х. Жив Госпóдь, и благословéн Бог, и да вознесéтся Бог спасéнiя моегó. Бог дая́й отмщéнiе мне и покори́вый лю́ди под мя. Избáвитель мой от враг мои́х гневли́вых, от востаю́щих на мя вознесéши мя, от мýжа непрáведна избáвиши мя. Сегó рáди исповéмся Тебé во язы́цех, Гóсподи, и и́мени Твоемý пою́: величáяй спасéнiя царéва, и творя́й ми́лость хрiстý Своемý Дави́ду, и сéмени eгó до вéка.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 18]Небесá повéдают слáву Бóжiю, творéние же рукý Егó возвещáет твердь. День дни отрыгáет глагóл, и нощь нóщи возвещáет рáзум. Не суть рéчи, нижé словесá, и́хже не слы́шатся глáси их. Во всю зéмлю изы́де вещáние их и в концы́ вселéнныя глагóлы их. В сóлнце положи́ селéнiе Своé, и Той, я́ко Жени́х исходя́й от чертóга Своегó, возрáдуется, я́ко Исполи́н тещѝ путь. От крáя небесé исхóд Егó, и срéтенiе Егó до крáя небесé, и несть и́же укры́ется теплоты́ Егó. Закóн Госпóдень непорóчен, обращáяй дýшы, свидéтельство Госпóдне вéрно, умудря́ющее младéнцы. Оправдáнiя Госпóдня прáва, веселя́щая сéрдце, зáповедь Госпóдня светлá, просвещáющая óчи. Страх Госпóдень чист, пребывáяй в век вéка: судьбы́ Госпóдни и́стинны, оправдáны вкýпе, вожделéнны пáче злáта и кáмене чéстна мнóга, и слáждша пáче мéда и сóта. Ибо раб Твой храни́т я́, внегдá сохрани́ти я́, воздая́нiя мнóго. Грехопадéнiя кто разумéет? От тáйных мои́х очи́сти мя, и от чужди́х пощади́ рабá Твоегó, áще не обладáют мнóю, тогдá непорóчен бýду и очи́щуся от грехá вели́ка. И бýдут во благоволéнiе словесá уст мои́х, и поучéнiе сéрдца моегó пред Тобóю вы́ну, Гóсподи, Помóщниче мой и Избáвителю мой.
[Псалом 19]Услы́шит тя Госпóдь в день печáли, защи́тит тя и́мя Бóга Iáковля. Пóслет ти пóмощь от Святáго и от Сióна застýпит тя. Помянéт вся́ку жéртву твою́, и всесожжéнiе твоé тýчно бýди. Даст ти Госпóдь по сéрдцу твоемý и весь совéт твой испóлнит. Возрáдуемся о спасéнiи твоéм и во и́мя Гóспода Бóга нáшего возвели́чимся. Испóлнит Госпóдь вся прошéнiя твоя́. Ны́не познáх, я́ко спасé Госпóдь хрiстá Своегó, услышит eгó с Небесé Святáго Своегó, в си́лах спасéнiе десни́цы Егó. Сíи на колесни́цах, и сíи на кóнех, мы же во и́мя Гóспода Бóга нáшего призовéм. Тíи спя́ти бы́ша и падóша, мы же востáхом и испрáвихомся. Гóсподи, спасѝ царя́ и услы́ши ны, вóньже áще день призовéм Тя.
[Псалом 20]Гóсподи, си́лою Твоéю возвесели́тся царь и о спасéнiи Твоéм возрáдуется зелó. Желáнiе сéрдца eгó дал есѝ eмý, и хотéнiя устнý eгó нéси лиши́л eгó. Я́ко предвари́л есѝ eгó благословéнiем благосты́нным, положи́л еси́ на главé eгó венéц от кáмене чéстна. Животá проси́л есть у Тебé, и дал еси́ eмý долготý днíй во век вéка. Вéлiя слáва eгó спасéнiем Твои́м, слáву и велелéпiе возложи́ши на негó. Я́ко дáси eмý благословéнiе во век вéка, возвесели́ши eгó рáдостiю с лицéм Твои́м. Я́ко царь уповáет на Гóспода, и ми́лостiю Вы́шняго не подви́жится. Да обря́щется рукá Твоя́ всем врагóм Твои́м, десни́ца Твоя́ да обря́щет вся ненави́дящiя Тебé. Я́ко положи́ши их я́ко пещь óгненную во врéмя лицá Твоегó, Госпóдь гнéвом Свои́м смятéт я́, и снéсть их огнь. Плод их от земли́ погуби́ши, и сéмя их от сынóв человéческих. Я́ко уклони́ша на Тя злáя, помы́слиша совéты, и́хже не возмóгут состáвити. Я́ко положи́ши я́ хребéт, во избы́тцех Твои́х уготóвиши лицé их. Вознеси́ся, Гóсподи, си́лою Твоéю, воспоéм и поéм си́лы Твоя́.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 21]Бóже, Бóже мой, вонмѝ ми, вскýю остáвил мя есѝ? Далéче от спасéнiя моегó словесá грехопадéнiй мои́х. Бóже мой, воззовý во дни, и не услы́шиши, и в нощѝ, и не в безýмiе мне. Ты же во Святéм живéши, хвалó Iзрáилева. На Тя уповáша отцы́ нáши, уповáша и избáвил есѝ я́. К Тебé воззвáша, и спасóшася, на Тя уповáша, и не постыдéшася. Аз же есмь червь, а не человéк, поношéнiе человéков и уничижéнiе людéй. Вси ви́дящiи мя поругáша ми ся, глагóлаша устнáми, покивáша главóю: уповá на Гóспода, да избáвит eгó, да спасéт eгó, я́ко хóщет eгó. Яко Ты есѝ истóргiй мя из чрéва, уповáнiе моé от сосцý мáтере моея́. К Тебé привéржен есмь от ложéсн, от чрéва мáтере моея́ Бог мой есѝ Ты. Да не отстýпиши от менé, я́ко скорбь близ, я́ко несть помогáяй ми. Обыдóша мя тельцы́ мнóзи, юнцы́ тýчнiи одержáша мя. Отверзóша на мя устá своя́, я́ко лев восхищáяй и рыкáяй. Яко водá излiя́хся, и разсы́пашася вся кóсти моя́, бысть сéрдце моé я́ко воск, тáяй посредé чрéва моегó. И҆́зсше я́ко скудéль крéпость моя́, и язы́к мой прильпé гортáни моемý, и в персть смéрти свел мя еси́. Яко обыдóша мя пси мнóзи, сонм лукáвых одержáша мя, ископáша рýце мои́ и нóзе моѝ. Исчетóша вся кóсти моя́, тíи же смотри́ша и презрéша мя. Раздели́ша ри́зы моя́ себé, и о одéжди моéй метáша жрéбiй. Ты же, Гóсподи, не удалѝ пóмощь Твою́ от менé, на заступлéнiе моé вонми́. Избáви от орýжiя дýшу мою́, и из руки́ пéсiи единорóдную мою́. Спаси́ мя от уст львóвых и от рог единорóжь смирéнiе моé. Повéм и́мя Твоé брáтiи моéй, посредé цéркве воспою́ Тя. Боя́щiися Гóспода, восхвали́те Егó, все сéмя Iáковле, прослáвите Егó, да убои́тся же от Негó все сéмя Iзрáилево. Яко не уничижѝ, нижé негодовá моли́твы ни́щаго, нижé отвратѝ лицé Своé от менé, и егдá воззвáх к Немý, услы́ша мя. От Тебé похвалá моя́, в цéркви вели́цей исповéмся Тебé, моли́твы моя́ воздáм пред боя́щимися Егó. Ядя́т убóзiи и насы́тятся, и восхвáлят Гóспода взыскáющiи Егó, живá бýдут сердцá их в век вéка. Помянýтся и обратя́тся ко Гóсподу вси концы́ земли́, и поклóнятся пред Ним вся отéчествiя язы́к. Яко Госпóдне есть цáрствiе, и Той обладáет язы́ки. Ядóша и поклони́шася вси тýчнiи землѝ, пред Ним припадýт вси низходя́щiи в зéмлю, и душá моя́ Томý живéт. И сéмя моé порабóтает Емý, возвести́т Гóсподеви род грядýщiй. И возвестя́т прáвду Егó лю́дем рóждшымся, я́же сотворѝ Госпóдь.
[Псалом 22]Госпóдь пасéт мя, и ничтóже мя лиши́т. На мéсте злáчне, тáмо вселѝ мя, на водé покóйне воспитá мя. Дýшу мою́ обратѝ, настáви мя на стезѝ прáвды, и́мене рáди Своегó. Áще бо и пойдý посредé сéни смéртныя, не убою́ся зла, я́ко Ты со мнóю есѝ, жезл Твой и пáлица Твоя́, та мя утéшиста. Уготóвал есѝ предо мнóю трапéзу сопроти́в стужáющым мне, умáстил есѝ елéом главý мою́, и чáша Твоя́ упоявáющи мя, я́ко держáвна. И ми́лость Твоя́ поженéт мя вся дни животá моегó, и éже всели́ти ми ся в дом Госпóдень, в долготý днiй.
[Псалом 23]Госпóдня земля́, и исполнéнiе ея́, вселéнная и вси живýщiи на ней. Той на моря́х основáл ю есть, и на рекáх уготóвал ю есть. Кто взы́дет на гóру Госпóдню? илѝ кто стáнет на мéсте святéм Егó? Непови́нен рукáма и чист сéрдцем, и́же не прiя́т всýе дýшу свою́, и не кля́тся лéстiю и́скреннему своемý. Сей прiи́мет благословéнiе от Гóспода, и ми́лостыню от Бóга, Спáса своегó. Сей род и́щущих Гóспода, и́щущих лицé Бóга Iáковля. Возми́те вратá кня́зи вáша, и возми́теся вратá вéчная, и вни́дет Царь слáвы. Кто есть сей Царь слáвы? Госпóдь крéпок и си́лен, Госпóдь си́лен в брáни. Возми́те вратá кня́зи вáша, и возми́теся вратá вéчная, и вни́дет Царь слáвы. Кто есть сей Царь слáвы? Госпóдь сил, Той есть Царь слáвы.
Чтец: Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, помилуй. (12 раз)
Хор (по кафисме седáльны воскрéсные, глас 2): Кáмень грóбный запечáтати не возбрани́в,/ кáмень вéры воскрéс пóдал еси́ всем,// Гóсподи, слáва Тебé.
Стiх: Исповéмся Тебé Гóсподи всем сéрдцем моúм,/ повéм вся чудесá Твоя́.
Ученикóв Твои́х лик с мvронóсицами женáми рáдуется соглáсно:/ óбщiй бо прáздник с ни́ми прáзднуют,/ в слáву и честь Твоегó Воскресéнiя./ И тéми вопiéм Ти, Человеколю́бче Гóсподи:// лю́дем Твои́м подáждь вéлiю ми́лость.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Богорóдичен: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вши тáко, слáва Тебé.
Пение Непорочных на воскресной утрене назначается Уставом до отдания Воздвижения (21 сентября), кроме совпадения с воскресным днем полиелейного или бденного праздника. 118-й псалом (17-я кафизма) поется на 5-й глас, независимо от недельного гласа, и сразу после него тропари «Ангельский собор…». В приходской практике вместо Непорочных на воскресных всенощных бдениях обычно поется полиелей.
ПОЛИЕЛЕЙ
Хор: Хвали́те Имя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
(продолжение зри здесь)