Неделя 1 по Пятидесятнице, всех святых. ОБЕДНИЦА (Изобразительные) Служба мирским чином. Глас 8
19 ию́ня 2022 гóда. Недéля 1 по Пятидеся́тнице, всех святы́х. Вся слýжба тóлько по Трióди. Послéдование изобразúтельных для домáшнего (келéйного) совершéнiя. Слýжба мирскúм чúном.
Прежде глаголи часы. Аще имаши произволение то чти утреню с евангелием, каноном и первым часом, аще же ни, токмо часы.
ЧИН ОБЕДНИЦЫ
Глагóли сúце: Благословѝ, душé моя, Гóспода,/ благословéн есѝ Гóсподи.
Псалом 102
Благословѝ, душé моя, Гóспода,/ и вся внýтренняя моя имя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Яко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Якоже щéдрит отéц сы́ны,/ ущéдри Госпóдь боя́щихся Егó./ Яко Той познá создáнїе нáше,/ помянý, яко персть есмы́./ Человéк, яко травá дні́е eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Отцý и Сы́ну и Святóму Дýху, и ны́не и при́сно и во вéки векóв. Аминь.
Благослови́, душé моя, Гóспода,/ и вся внýтренняя моя и́мя святóе Егó./ Благословéн еси, Гóсподи.
Слáва Отцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ храня́щаго и́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрiстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцiи,/ я́ко тíи наслéдят зéмлю.
Хор: Блажéни áлчущiи и жáждущiи прáвды,/ я́ко тíи насы́тятся.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры воскрéсные, глас 8): Помяни́ нас, Хрiстé Спáсе мíра,/ я́коже разбóйника помянýл еси́ на дрéве:/ и сподóби всех, Еди́не Щéдре,// Небéсному Цáрствiю Твоемý.
Хор: Блажéни чúстiи сéрдцем,/ я́ко тíи Бóга ýзрят.
Чтец: Слы́ши, Адáме, и рáдуйся со Éвою:/ я́ко обнажи́вый прéжде обоя́,/ и прéлестiю взем вас плéнники,// Крестóм Хрiстóвым упраздни́ся.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: На дрéве пригвождéн быв, Спáсе наш, вóлею,/ я́же от дрéва кля́твы Адáма избáвил еси́,// воздая́, я́ко Щедр, éже по óбразу, и рáйское селéнiе.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Днесь Хрiстóс воскрéс от грóба,/ всем вéрным подая́ нетлéнiе,// и рáдость обновля́ет мvронóсицам по стрáсти и Воскресéнiи.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (стiхúры всех святы́х, глас 8): Я́ко честны́й, избрáнный, положéнный кáмень краеугóльный,/ святíи в Сióне обрéтше Тя, Влады́ко, основáнiе непоколеби́мое,// избрáнное кáменiе себé наздáша.
Хор: Рáдуйтеся и веселúтеся,/ я́ко мзда вáша мнóга на Небесéх.
Чтец: Пронзéнным Твои́м рéбром,/ кáпли крóве искáпаша, с водóю богодéтельно,/ мiр обнови́ша,// и божéственный собóр святы́х всех Благодéтелю приздáша.
Хор: Слáва Ѻтцý и Сы́ну и Святóму Дýху.
Чтец: Поéм всеблагочéстно/ мýченик óблак божéственный, благодáтiю просвещéнный,/ и возсiя́вшiй светлéе багряни́цею крóве,// и червлени́цею их твéрдаго страдáнiя.
Хор: И ны́не и прúсно и во вéки векóв. Амúнь.
Чтец (Богорóдичен): Мáтерь всеи́стинную Бóжiю Тя вси знáем,/ Éюже естествó жéнское избáвльшееся, Всенепорóчная, о Хрiстé предпострадá,// добродéтели же вся́кiя благочéстно бысть испóлнено.
Тропари и кондаки
Тропáрь воскрéсный, глас 8: С высоты́ снизшéл еси́, Благоутрóбне,/ погребéнiе прiя́л еси триднéвное,/ да нас свободи́ши страстéй,// Животé и Воскресéнiе нáше, Гóсподи, слáва Тебé!
Тропáрь всех святы́х, глас 4: И҆́же во всем мíре мýченик Твои́х,/ я́ко багряни́цею и ви́ссом,/ кровьми́ Цéрковь Твоя́ украси́вшися,/ тéми вопiéт Ти, Хрiстé Бóже:/ лю́дем Твои́м щедрóты Твоя́ низпосли́,/ мiр жи́тельству Твоемý дáруй,// и душáм нáшим вéлiю ми́лость.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Кондáк всех святы́х, глас 8: Я́ко начáтки естествá, Насади́телю твáри,/ вселéнная принóсит Ти, Гóсподи, богонóсныя мýченики,/ тех моли́твами в ми́ре глубóце/ Цéрковь Твою́, жи́тельство Твоé,// Богорóдицею соблюди́, Многоми́лостиве.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен Триоди, глас 8
Чтец: Прокíмен, глас осьмы́й, псалóм Давíдов: Помоли́теся и воздади́те Гóсподеви Бóгу нáшему. (Пс.75:12А)
Хор: Помолúтеся и воздадúте Гóсподеви Бóгу нáшему.
Чтец: Вéдом во Iудéи Бог, во Iзрáили вéлiе И҆́мя Егó. (Пс.75:2)
Хор: Помолúтеся и воздадúте Гóсподеви Бóгу нáшему.
Прокимен всех святых, глас 4
Чтец: Прокíмен, глас четвéртый, псалóм Давíдов: Ди́вен Бог во святы́х Свои́х, Бог Iзрáилев. (Пс.67:36А)
Хор: Дúвен Бог во святы́х Своúх, Бог Iзрáилев.
АПОСТОЛ
Чтец: Ко Еврéем послáнiя святáго апóстола Пáвла чтéнiе.
(Евр.зач.330): Брáтiе, святíи вси вéрою победи́ша цáрствiя, содéяша прáвду, получи́ша обетовáнiя, загради́ша устá львов, угаси́ша си́лу óгненную, избегóша óстрея мечá, возмогóша от нéмощи, бы́ша крéпцы во бранéх, обрати́ша в бéгство полки́ чужи́х. Прiя́ша жены́ от воскресéнiя мéртвыя своя́, инíи же избiéни бы́ша, не прiéмше избавлéнiя, да лýчшее воскресéнiе улучáт, друзíи же ругáнiем и рáнами искушéнiе прiя́ша, ещé же и уз и темни́ц. Кáменiем побiéни бы́ша, претрéни бы́ша, искушéни бы́ша, убíйством мечá умрóша, проидóша в ми́лотех, и в кóзiях кóжах, лишéни, скорбя́ще, озлóблени. И҆́хже не бе достóин [весь] мiр, в пусты́нях скитáющеся, и в горáх, и в вертéпах, и в прóпастех земны́х. И сíи вси послýшествовани бы́вше вéрою, не прiя́ша обетовáнiя, Бóгу лýчшее что о нас предзрéвшу, да не без нас совершéнство прiи́мут. Тéмже ýбо и мы, толи́к имýще облежáщь нас óблак свидéтелей, гóрдость вся́ку отлóжше, и удóбь обстоя́тельный грех, терпéнiем да течéм на предлежáщiй нам пóдвиг, взирáюще на начáльника вéры и соверши́теля Iисýса.
[русский синодальный перевод]Братья, святые, которые верою побеждали царства, творили правду, получали обетования, заграждали уста львов, угашали силу огня, избегали острия меча, укреплялись от немощи, были крепки на войне, прогоняли полки чужих; жены получали умерших своих воскресшими; иные же замучены были, не приняв освобождения, дабы получить лучшее воскресение; другие испытали поругания и побои, а также узы и темницу, были побиваемы камнями, перепиливаемы, подвергаемы пытке, умирали от меча, скитались в ми́лотях и козьих кожах, терпя недостатки, скорби, озлобления; те, которых весь мир не был достоин, скитались по пустыням и горам, по пещерам и ущельям земли. И все сии, свидетельствованные в вере, не получили обещанного, потому что Бог предусмотрел о нас нечто лучшее, дабы они не без нас достигли совершенства. (11:33 - 12:2)
Аллилуиарий, глас 4
Чтец: Аллилýіа, аллилýіа, аллилýіа, глас четвéртый.
Хор: Аллилýіа, аллилýіа, аллилýіа.
Чтец: Воззвáша прáведнiи и Госпóдь услы́ша их.(Пс.33:18А)
Хор: Аллилýіа, аллилýіа, аллилýіа.
Чтец: Мнóги скóрби прáведным и от всех их избáвит я́ Госпóдь. (Пс.33:20)
Хор: Аллилýіа, аллилýіа, аллилýіа.
ЕВАНГЕЛИЕ
От Матфéя Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мф.зач.38А): Речé Госпóдь Свои́м ученикóм: всяк ýбо и́же исповéсть Мя пред человéки, исповéм егó и Аз пред Отцéм Мои́м, и́же на Небесéх, а и́же отвéржется менé пред человéки, отвéргуся егó и Аз пред Отцéм Мои́м, и́же на Небесéх. И́же лю́бит отцá или́ мáтерь пáче Менé, несть Менé достóин, и и́же лю́бит сы́на или́ дщерь пáче Менé, несть Менé достóин. И и́же не прiи́мет крестá своегó, и вслед Менé грядéт, несть Менé достóин. Тогдá отвещáв Петр, речé Емý: се, мы остáвихом вся и вслед Тебé идóхом, что ýбо бýдет нам? Iисýс же речé им: ами́нь глагóлю вам, я́ко вы шéдшiи по Мне, в пакибытié, егдá ся́дет Сын Человéческiй на престóле слáвы Своея́, ся́дете и вы на двоюнáдесяте престóлу, судя́ще обеманáдесяте колéнома Iзрáилевома. И всяк, и́же остáвит дом, или́ брáтiю, или́ сестры́, или́ отцá, или́ мáтерь, или́ женý, или́ чáда, или́ сéла, и́мене Моегó рáди, стори́цею прiи́мет и живóт вéчный наслéдит. Мнóзи же бýдут пéрви послéднiи, и послéдни пéрвiи.
[русский синодальный перевод]Итак, всякого, кто исповедает Меня пред людьми, того исповедаю и Я пред Отцом Моим Небесным; а кто отречется от Меня пред людьми, отрекусь от того и Я пред Отцом Моим Небесным. Кто любит отца или мать более, нежели Меня, не достоин Меня; и кто любит сына или дочь более, нежели Меня, не достоин Меня; и кто не берет креста своего и следует за Мною, тот не достоин Меня. Тогда Петр, отвечая, сказал Ему: вот, мы оставили всё и последовали за Тобою; что же будет нам? Иисус же сказал им: истинно говорю вам, что вы, последовавшие за Мною, - в пакибытии, когда сядет Сын Человеческий на престоле славы Своей, сядете и вы на двенадцати престолах судить двенадцать колен Израилевых. И всякий, кто оставит до́мы, или братьев, или сестер, или отца, или мать, или жену, или детей, или зе́мли, ради имени Моего, получит во сто крат и наследует жизнь вечную. Многие же будут первые последними, и последние первыми. (10:32-33,37-38,19:27-30)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стих: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Отцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Отцá, Вседержи́теля, Творцá нéбу и земли́, ви́димым же всем и неви́димым. И во Еди́наго Гóспода Iисýса Хрiста, Сы́на Бóжiя, Единорóднаго, И҆́же от Отцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Отцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пилáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Отцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Отцá исходя́щаго, И҆́же со Отцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сы́не Бóжiй, поми́луй нас. Ами́нь.
КОНДАК
Кондáк всех святы́х, глас 8: Я́ко начáтки естествá, Насади́телю твáри,/ вселéнная принóсит Ти, Гóсподи, богонóсныя мýченики,/ тех моли́твами в ми́ре глубóце/ Цéрковь Твою́, жи́тельство Твоé,// Богорóдицею соблюди́, Многоми́лостиве.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрiстóс, во слáву Бóга Отцá, ами́нь.
Бýди и́мя Госпóдне благословéно от ны́не и до вéка. (3 раза)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша ѝ,/ и от всех скорбéй егó спасé ѝ./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ ѝ./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Достойно есть
Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
ОТПУСТ
Воскресы́й из мéртвых, Хрiстé, и́стинный Бог наш, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоаки́ма и Áнны, и всех святы́х, поми́луй и спасѝ нас, яко Благ и Человеколю́бец. Ами́нь.