БЛАГОВЕЩЕНИЕ ПРЕСВЯТОЙ БОГОРОДИЦЫ. ЧАС ТРЕТИЙ
7 апрéля 2022 гóда. Благовéщение Пресвятóй Богорóдицы. Послéдование часóв, изобразúтельных и вечéрни совмещéнной с обéдницей для домáшнего (келéйного) совершéния. Слýжба мирскúм чúном.
ЧАС ТРЕТИЙ
Моли́твами святы́х отéц нáших, Гóсподи Иисýсе Христé, Бóже наш, поми́луй нас, ами́нь.
Слáва Тебе, Бóже наш, слáва Тебé.
Царю́ Небéсный, Утéшителю, Дýше Истины, Иже вездé сый и вся исполня́яй, Сокрóвище благи́х и жи́зни Подáтелю, прииди́ и всели́ся в ны, и очи́сти ны от вся́кия сквéрны, и спаси́, Блáже, Дýши нáша.
Святы́й Бóже, Святый Крéпкий, Святый Безсмéртный, поми́луй нас.(3 раза)
Слáва Отцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехи́ нáша, Влады́ко, прости́ беззакóния нáша, Святы́й, посети́ и исцели́ нéмощи нáша и́мене Твоегó рáди.
Гóсподи, помилуй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, я́ко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сы́не Бóжий, поми́луй нас. Ами́нь.
Гóсподи, поми́луй, (12 раз.)
Слáва Отцý и Сы́ну и Святóму Дýху, и ныне и при́сно и во вéки векóв, аминь.
Прииди́те, поклони́мся Царéви нáшему Бóгу.
Прииди́те, поклони́мся и припадéм Христý, Царéви нáшему Бóгу.
Прииди́те, поклони́мся и припадéм Самомý Христý, Царéви и Бóгу нáшему.
Псалом 16
Услыши, Гóсподи, прáвду мою, вонми́ молéнию моемý, внуши́ моли́тву мою не во устнáх льсти́вых. От лицá Твоегó судьбá моя изы́дет, óчи мои́ да ви́дита правоты. Искусил еси сéрдце моé, посетил еси нóщию, искуси́л мя еси и не обрéтеся во мне непрáвда. Яко да не возглагóлют устá моя дел человéческих, за словесá устéн Твоих аз сохраних пути́ жéстоки. Соверши́ стопы моя во стезях Твои́х, да не подви́жутся стопы моя. Аз воззвáх, яко услы́шал мя еси́, Бóже, приклони́ ýхо Твоé мне, и услы́ши глагóлы моя. Удиви́ ми́лости Твоя, спасáяй уповáющия на Тя от проти́вящихся десни́це Твоéй. Сохрани́ мя, Гóсподи, яко зéницу óка, в крóве крилý Твоéю покры́еши мя. От лицá нечести́вых острáстших мя, врази́ мои́ дýшу мою одержáша. Тук свой затвори́ша, устá их глагóлаше горды́ню. Изгонящии мя ны́не обыдóша мя, óчи свои́ возложи́ша уклони́ти на зéмлю. Объяша мя яко лев готóв на лов, и яко ски́мен обитáяй в тáйных. Воскресни́, Гóсподи, предвари́ я и запни́ им, избáви дýшу мою от нечести́ваго, орýжие Твоé от враг руки́ Твоея. Гóсподи, от мáлых от земли́ раздели́ я в животé их, и сокровéнных Твоих испóлнися чрéво их, насы́тишася сынóв, и остáвиша остáнки младéнцем своим. Аз же прáвдою явлю́ся лицý Твоемý, насы́щуся, внегдá яви́ти ми ся слáве Твоéй.
Псалом 24
К Тебé, Гóсподи, воздвигóх дýшу мою, Бóже мой, на Тя уповáх, да не постыжýся во век, ниже да посмеют ми ся врази́ мои; Ибо вси терпящии Тя не постыдятся. Да постыдятся беззакóннующии вотщé. Пути́ Твоя, Гóсподи, скажи́ ми, и стезям Твоим научи́ мя. Настáви мя на истину Твою и научи мя, яко Ты еси Бог Спас мой, и Тебé терпéх весь день. Помяни́ щедрóты Твоя, Гóсподи, и милости Твоя, яко от вéка суть. Грех юности моея и невéдения моегó не помяни́, по ми́лости Твоéй помяни́ мя Ты рáди блáгости Твоея, Гóсподи. Благ и прав Госпóдь, сегó рáди законоположи́т согрешáющим на пути́. Настáвит крóткия на суд, научи́т крóткия путéм Свои́м. Вси путиé Госпóдни ми́лость и и́стина, взыскáющым завéта Егó и свидéния Егó. Рáди и́мене Твоегó, Гóсподи, и очи́сти грех мой, мног бо есть. Кто есть человéк бояйся Гóспода; законоположи́т емý на пути́, егóже извóли. Душá егó во благи́х водвори́тся, и сéмя егó наслéдит зéмлю. Держáва Госпóдь боящихся Егó и завéт Егó яви́т им. Óчи мои выну ко Гóсподу, яко Той истóргнет от сéти нóзе мои. Призри на мя и помилуй мя, яко единорóд и нищ есмь аз. Скóрби сéрдца моегó умнóжишася, от нужд моих изведи́ мя. Виждь смирéние моé и труд мой, и остáви вся грехи моя. Виждь враги́ моя, яко умнóжишася, и ненавидéнием непрáведным возненави́деша мя. Сохрани́ душу мою и избáви мя, да не постыжýся, яко уповáх на Тя. Незлóбивии и прáвии прилепляхуся мне, яко потерпéх Тя, Гóсподи. Избáви, Бóже, Изрáиля от всех скорбéй егó.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твои́х очи́сти беззакóние моé. Наипáче омы́й мя от беззакóния моегó, и от грехá моегó очи́сти мя. Яко беззакóние моé аз знáю и грех мой прéдо мнóю есть выну. Тебе Еди́ному согреши́х, и лукáвая пред Тобóю сотвори́х; яко да оправди́шися во словесéх Твои́х и победи́ши, внегдá суди́ти Ти. Се бо в беззакóниих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлие, возрáдуются кóсти смирéнныя. Отврати́ лицé Твоé от грех мои́х, и вся беззакóния моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéния Твоегó, и Дýхом Влады́чним утверди́ мя. Научý беззакóнныя путéм Твои́м, и нечести́вии к Тебé обратятся. Избáви мя от кровéй, Бóже, Бóже спасéния моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою. Яко áще бы восхотéл еси жéртвы, дал бых ýбо, всесожжéния не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнием Твои́м Сиóна, и да сози́ждутся стéны Иерусали́мския. Тогдá благоволи́ши жéртву прáвды, возношéние и всесожегáемая; тогдá возложáт на олтáрь Твой тельцы́.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
КАФИСМА ДЕСЯТАЯ
И чтем кафúсму 10-ю ( или одúн псалóм, или до 1-й Слáвы)
[Псалом 70]На Тя, Гóсподи, уповáх, да не постыжýся в век. Прáвдою Твоéю избáви мя и изми́ мя, приклони́ ко мне ýхо Твоé и спаси́ мя. Бýди ми в Бóга Защи́тителя и в мéсто крéпко спасти́ мя, я́ко утвержéние моé и прибéжище моé еси́ Ты. Бóже мой, избáви мя из руки́ грéшнаго, из руки́ законопрестýпнаго и оби́дящаго, я́ко Ты еси́ терпéние моé, Гóсподи, Гóсподи, уповáние моé от ю́ности моея́. В Тебé утверди́хся от утрóбы, от чрéва мáтере моея́ Ты еси́ мой покрови́тель: о Тебé пéние моé вы́ну. Я́ко чýдо бых мнóгим, и Ты помóщник мой крéпок. Да испóлнятся устá моя́ хвалéния, я́ко да воспою́ слáву Твою́, весь день великолéпие Твоé. Не отвéржи менé во врéмя стáрости, внегдá оскудевáти крéпости моéй, не остáви менé. Я́ко рéша врази́ мои́ мне, и стрегýщии дýшу мою́ совещáша вкýпе, глагóлюще: Бог остáвил есть eгó, пожени́те и ими́те eгó, я́ко несть избавля́яй. Бóже мой, не удали́ся от менé, Бóже мой, в пóмощь мою́ вонми́. Да постыдя́тся и исчéзнут оклеветáющии дýшу мою́, да облекýтся в студ и срам и́щущии злáя мне. Аз же всегдá возуповáю на Тя и приложý на вся́ку похвалý Твою́. Устá моя́ возвестя́т прáвду Твою́, весь день спасéние Твоé, я́ко не познáх кни́жная. Вни́ду в си́ле Госпóдни, Гóсподи, помянý прáвду Тебé Еди́наго. Бóже мой, и́мже научи́л мя еси́ от ю́ности моея́, и до ны́не возвещý чудесá Твоя́, и дáже до стáрости и престарéния, Бóже мой, не остáви менé, дóндеже возвещý мы́шцу Твою́ рóду всемý грядýщему, си́лу Твою́ и прáвду Твою́, Бóже, дáже до вы́шних, я́же сотвори́л ми еси́ вели́чия. Бóже, кто подóбен Тебé? Ели́ки яви́л ми еси́ скóрби мнóги и злы, и обрáщься оживотвори́л мя еси́, и от бездн земли́ возвéл мя еси́. Умнóжил еси́ на мне вели́чествие Твоé, и обрáщься утéшил мя еси́, и от бездн земли́ пáки возвéл мя еси́. И́бо аз исповéмся Тебé в лю́дех, Гóсподи, в сосýдех псалóмских и́стину Твою́, Бóже, воспою́ Тебé в гýслех, Святы́й Изрáилев. Возрáдуетеся устнé мои́, егдá воспою́ Тебé, и душá моя́, ю́же еси́ избáвил. Ещé же и язы́к мой весь день поучи́тся прáвде Твоéй, егдá постыдя́тся и посрáмятся и́щущии злáя мне.
[Псалом 71]Бóже, суд Твой царéви даждь, и прáвду Твою́ сы́ну царéву: суди́ти лю́дем Твои́м в прáвде, и ни́щим Твои́м в судé. Да восприи́мут гóры мир лю́дем, и хóлми прáвду. Сýдит ни́щим людски́м, и спасéт сы́ны убóгих и смири́т клеветникá. И пребýдет с сóлнцем, и прéжде луны́ рóда родóв. Сни́дет я́ко дождь на рунó, и я́ко кáпля, кáплющая на зéмлю. Возсия́ет во днех eгó прáвда и мнóжество ми́ра, дóндеже отъи́мется лунá. И обладáет от мóря до мóря, и от рек до конéц вселéнныя. Пред ним припадýт Ефиóпляне, и врази́ eгó персть поли́жут. Цáрие Фарси́йстии и óстрови дáры принесýт, цáрие Арáвстии и Савá дáры приведýт: и поклóнятся eмý вси цáрие зéмстии, вси язы́цы порабóтают eмý. Я́ко избáви ни́ща от си́льна, и убóга, eмýже не бе помóщника. Пощади́т ни́ща и убóга, и дýши убóгих спасéт: от ли́хвы и от непрáвды избáвит дýши их, и чéстно и́мя eгó пред ни́ми. И жив бýдет, и дáстся eмý от злáта Арави́йска, и помóлятся о нем вы́ну, весь день благословя́т eгó. Бýдет утверждéние на земли́ на версéх гор, превознесéтся пáче Ливáна плод eгó: и процветýт от грáда я́ко травá земнáя. Бýдет и́мя eгó благословéно во вéки, прéжде сóлнца пребывáет и́мя eгó, и благословя́тся в нем вся колéна земнáя, вси язы́цы ублажáт eгó. Благословéн Госпóдь Бог Изрáилев, творя́й чудесá Еди́н. И благословéно и́мя слáвы Егó во век и в век вéка, и испóлнится слáвы Егó вся зéмля: бýди, бýди.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 72]Коль благ Бог Изрáилев, прáвым сéрдцем. Мои́ же вмáле не подвижáстеся нóзе: вмáле не пролия́шася стопы́ моя́. Я́ко возревновáх на беззакóнныя, мир грéшников зря. Я́ко несть восклонéния в смéрти их, и утверждéния в рáне их, в трудéх человéческих не суть, и с человéки не прии́мут ран. Сегó рáди удержá я́ горды́ня их до концá: одéяшася непрáвдою и нечéстием свои́м. Изы́дет я́ко из тýка непрáвда их, преидóша в любóвь сéрдца. Помы́слиша и глагóлаша в лукáвстве, непрáвду в высотý глагóлаша. Положи́ша на небеси́ устá своя́, и язы́к их прéйде по земли́. Сегó рáди обратя́тся лю́дие мои́ сéмо, и дни́е испóлнени обря́щутся в них. И рéша: кáко увéде Бог? И áше есть рáзум в Вы́шнем? Се си́и грéшницы и гобзýющии в век, удержáша богáтство. И рех: едá всýе оправди́х сéрдце моé и умы́х в непови́нных рýце мои́, и бых я́звен весь день, и обличéние моé на ýтренних. А́ще глагóлах, повéм тáко: се рóду сынóв Твои́х, eмýже обещáхся, и непщевáх разумéти: сиé труд есть предо мнóю, дóндеже вни́ду во святи́ло Бóжие и разумéю в послéдняя их. Обáче за льщéния их положи́л еси́ им злáя, низложи́л еси́ я́, внегдá разгордéшася. Кáко бы́ша в запустéние? Внезáпу исчезóша, погибóша за беззакóние своé. Я́ко сóние востаю́щаго, Гóсподи, во грáде Твоéм óбраз их уничижи́ши. Я́ко разжжéся сéрдце моé, и утрóбы моя́ измени́шася. И аз уничижéн и не разумéх, скóтен бых у Тебé. И аз вы́ну с Тобóю, удержáл еси́ рýку деснýю мою́, и совéтом Твои́м настáвил мя еси́, и со слáвою прия́л мя еси́. Что бо ми есть на небеси́? И от Тебé что восхотéх на земли́? Исчезé сéрдце моé и плоть моя́, Бóже сéрдца моегó, и часть моя́, Бóже, во век. Я́ко се удаля́ющии себé от Тебé поги́бнут; потреби́л еси́ вся́каго любодéющаго от Тебé. Мне же прилепля́тися Бóгови блáго есть, полагáти на Гóспода уповáние моé, возвести́ти ми вся хвалы́ Твоя́ во вратéх дщéре Сиóни.
[Псалом 73]Вскýю, Бóже, отри́нул еси́ до концá? Разгнéвася я́рость Твоя́ на óвцы пáжити Твоея́? Помяни́ сонм Твой, eгóже стяжáл еси́ испéрва, избáвил еси́ жезлóм достоя́ния Твоегó, горá Сиóн сия́, в нéйже всели́лся еси́. Воздви́гни рýце Твои́ на горды́ни их в конéц, ели́ка лукáвнова враг во святéм Твоéм. И восхвали́шася ненави́дящии Тя посредé прáздника Твоегó, положи́ша знáмения своя́, знáмения, и не познáша, я́ко во исхóде превы́ше, я́ко в дубрáве дрéвяне секи́рами разсекóша. Двéри eгó вкýпе: сéчивом и оскóрдом разруши́ша и́. Возжгóша огнéм святи́ло Твоé, на земли́ оскверни́ша жили́ще и́мене Твоегó. Рéша в сéрдце своéм ю́жики их вкýпе: прииди́те и отстáвим вся прáздники Бóжия от земли́. Знáмения их не ви́дехом: несть ктомý прорóка, и нас не познáет ктомý. Докóле, Бóже, понóсит враг? Раздражи́т проти́вный и́мя Твоé до концá? Вскýю отвращáеши рýку Твою́ и десни́цу Твою́ от среды́ нéдра Твоегó в конéц? Бог же Царь наш прéжде вéка содéла спасéние посредé земли́. Ты утверди́л еси́ си́лою Твоéю мóре, Ты стéрл еси́ главы́ змиéв в водé, Ты сокруши́л еси́ главý зми́еву, дал еси́ тогó брáшно лю́дем Ефиóпским. Ты растóргл еси́ истóчники и потóки, Ты изсуши́л еси́ рéки Ифáмския. Твой есть день, и Твоя́ есть нощь: Ты соверши́л еси́ зарю́ и сóлнце. Ты сотвори́л еси́ вся предéлы земли́, жáтву и вéсну Ты создáл еси́ я́. Помяни́ сия́, враг поноси́ Гóсподеви, и лю́дие безýмнии раздражи́ша и́мя Твоé. Не предáждь зверéм дýшу, исповéдающуся Тебé, душ убóгих Твои́х не забýди до концá. При́зри на завéт Твой, я́ко испóлнишася помрачéннии земли́ домóв беззакóний. Да не возврати́тся смирéнный посрáмлен, нищ и убóг восхвали́та и́мя Твоé. Востáни, Бóже, суди́ прю Твою́, помяни́ поношéние Твоé, éже от безýмнаго весь день. Не забýди глáса моли́твенник Твои́х, горды́ня ненави́дящих Тя взы́де вы́ну.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 74]Исповéмыся Тебé, Бóже, исповéмыся Тебé, и призовéм и́мя Твоé; повéм вся чудесá Твоя́. Егдá приимý врéмя, Аз правоты́ возсуждý. Растáяся земля́ и вси живýщии на ней, Аз утверди́х столпы́ ея́. Рех беззакóннующим, не беззакóннуйте: и согрешáющим, не возноси́те рóга, не воздвизáйте на высотý рóга вáшего, и не глагóлите на Бóга непрáвду: я́ко нижé от исхóд, нижé от зáпад, нижé от пусты́х гор. Я́ко Бог судия́ есть: сегó смиря́ет, и сегó вознóсит. Я́ко чáша в руцé Госпóдни, винá нерастворéна, испóлнь растворéния, и уклони́ от сея́ в сию́: обáче дрóждие Егó не истощи́ся, испию́т вси грéшнии земли́. Аз же возрáдуюся в век, воспою́ Бóгу Иáковлю: и вся рóги грéшных сломлю́, и вознесéтся рог прáведнаго.
[Псалом 75]Вéдом во Иудéи Бог: во Изрáили вéлие и́мя Егó. И бысть в ми́ре мéсто Егó и жили́ще Егó в Сиóне. Тáмо сокруши́ крéпости лукóв, орýжие и мечь и брань. Просвещáеши Ты ди́вно от гор вéчных. Смятóшася вси неразýмнии сéрдцем: уснýша сном свои́м, и ничтóже обретóша вси мýжие богáтства в рукáх свои́х. От запрещéния Твоегó, Бóже Иáковль, воздремáша всéдшии на кóни. Ты стрáшен еси́, и кто противостáнет Тебé? Оттóле гнев Твой. С Небесé слы́шан сотвори́л еси́ суд: земля́ убоя́ся, и умолчá, внегдá востáти на суд Бóгу, спасти́ вся крóткия земли́. Я́ко помышлéние человéческое исповéстся Тебé: и остáнок помышлéния прáзднует Ти. Помоли́теся и воздади́те Гóсподеви Бóгу нáшему. Вси и́же óкрест Егó принесýт дáры, стрáшному и отъéмлющему дýхи князéй, стрáшному пáче царéй земны́х.
[Псалом 76]Глáсом мои́м ко Гóсподу воззвáх, глáсом мои́м к Бóгу, и внят ми. В день скóрби моея́ Бóга взыскáх рукáма мои́ма, нóщию пред Ним, и не прельщéн бых. Отвéржеся утéшитися душá моя́. Помянýх Бóга и возвесели́хся, поглумля́хся и малодýшествоваше дух мой. Предвари́сте стражбы́ óчи мои́: смятóхся и неглагóлах. Помы́слих дни пéрвыя, и лéта вéчная помянýх, и поучáхся: нóщию сéрдцем мои́м глумля́хся, и тужáше дух мой: едá во вéки отри́нет Госпóдь, и не приложи́т благоволи́ти пáки? Или́ до концá ми́лость Свою́ отсечéт, скончá глагóл от рóда в род? Едá забýдет ущéдрити Бог? Или́ удержи́т во гнéве Своéм щедрóты Своя́? И рех: ны́не начáх, сия́ измéна десни́цы Вы́шняго. Помянýх делá Госпóдня, я́ко помянý от начáла чудесa ́ Твоя́, и поучýся во всех дéлех Твои́х, и в начинáниих Твои́х поглумлю́ся. Бóже, во святéм путь Твой: кто бог вéлий я́ко Бог наш? Ты еси́ Бог творя́й чудесá: сказáл еси́ в лю́дех си́лу Твою́, избáвил еси́ мы́шцею Твоéю лю́ди Твоя́, сы́ны Иáковли и Иóсифовы. Ви́деша Тя вóды, Бóже, ви́деша Тя вóды, и убоя́шася: смятóшася бéздны, мнóжество шýма вод, глас дáша óблацы, и́бо стрéлы Твоя́ прехóдят. Глас грóма Твоегó в колеси́, освети́ша мóлния Твоя́ вселéнную: подви́жеся и трéпетна бысть земля́. В мóри путиé Твои́, и стези́ Твои́ в водáх мнóгих, и следы́ Твоя́ не познáются. Настáвил еси́ я́ко óвцы лю́ди Твоя́ рукóю Моисéовою и Аарóнею.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху.
Тропáрь Благовéщения, глас 4: Днесь спасéния нáшего глави́зна и éже от вéка тáинства явлéние: Сын Бóжий Сын Дéвы бывáет, и Гаврии́л благодáть благовествýет. Тéмже и мы с ним Богорóдице возопии́м: рáдуйся, Благодáтная, Госпóдь с Тобóю.
И ныне и прúсно и во вéки векóв. Амúнь.
Богорóдичен: Богорóдице, Ты еси Лозá и́стинная, возрасти́вшая нам Плод Животá, Тебе мóлимся, моли́ся Влады́чице, со святы́ми Апóстолы, поми́ловати дýши нáша.
Госпóдь Бог благословéн, благословéн Госпóдь день дне, поспеши́т нам Бог спасéний нáших, Бог наш, Бог спасáти.(Пс.67:20-21)
Посем Трисвятое по Отче наш
Святы́й Бóже, Святый Крéпкий, Святый Безсмéртный, помилуй нас. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святы́й, посети и исцели нéмощи нáша и́мене Твоегó рáди.
Гóсподи, помилуй. (3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Óтче наш, Иже еси на небесéх. Да святи́тся Имя Твоé, да приии́дет Цáрствие Твоé, да бýдет вóля Твоя, я́ко на небеси́ и на земли́. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введи́ нас во искушéние, но избáви нас от лукáваго.
Гóсподи, Иисýсе Христé, Сыне Бóжий, поми́луй нас. Ами́нь.
КОНДAК
Кондáк Благовéщения, глас 8: Взбрáнной Воевóде победи́тельная, я́ко избáвльшеся от злы́х, благодáрственная восписýем Ти́ раби́ Твои́, Богорóдице; но я́ко имýщая держáву непобеди́мую, от вся́ких нас бед свободи́, да зовéм Ти́: рáдуйся, Невéсто Неневéстная.
Гóсподи, помúлуй. (40 раз)
Иже на вся́кое врéмя и на вся́кий час, на небеси́ и на земли́ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, Иже вся зовы́й ко спасéнию обещáния рáди бýдущих благ; Сам, Гóсподи, приими́ и нáша в час сей моли́твы, и испрáви живóт наш к зáповедем Твои́м; дýши нáша освяти́, телесá очи́сти, помышлéния испрáви, мы́сли очи́сти, и избáви нас от вся́кия скóрби, зол и болéзней; огради́ нас святы́ми Твои́ми Áнгелы, да ополчéнием их соблюдáеми и наставля́еми, дости́гнем в соединéние вéры, и в рáзум непристýпныя Твоея́ слáвы, я́ко благословéн еси́ во вéки векóв, аминь.
Гóсподи, поми́луй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херуви́м и слáвнейшую без сравнéния Серафи́м, без истлéния Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благослови́.
Моли́твами святы́х отéц нáших, Гóсподи Иисýсе Христé, Бóже наш, поми́луй нас, ами́нь.
Молитва святаго Ефрема Сирина
Гóсподи и Влады́ко животá моегó, дух прáздности, уны́ния, любоначáлия, и празднослóвия не даждь ми. (Земнóй поклóн.)
Дух же целомýдрия, смиренномýдрия, терпéния, и любвé, дáруй ми рабý Твоемý. (Земнóй поклóн.)
Ей, Гóсподи Царю́, дáруй ми зрéти моя́ прегрешéния, и не осуждáти брáта моегó, яко благословéн еси во вéки векóв, ами́нь. (Земнóй поклóн.)
Молитва святаго Мардария
Владыко Бóже Óтче Вседержи́телю, Гóсподи Сыне Единорóдный Иисýсе Христé, и Святы́й Дýше, Еди́но Божествó, Еди́на Си́ла, поми́луй мя грéшнаго, и и́миже вéси судьбáми спаси́ мя недостóйнаго рабá Твоегó, яко благословéн еси́ во вéки векóв, ами́нь.
И глаголем зде шестый час.